Киевт жагсаал, цуглаан хийхийг хориглолоо

Киевийн засаг захиргааны тойргийн шүүх Киев хотын Тусгаар тогтнолын талбай, Европын талбай, Банкны, Грушевийн, Богомольцын гудамж зэрэг томоохон талбай, гудамжинд жагсаал, цуглаан хийхийг 2014 оны нэгдүгээр сарын 7 хүртэл хориглосон шийдвэр гаргалаа. Киев хотын захиргаанаас ийм хүсэлт гаргасныг ёсоор болгожээ. Өргөдөлд заасан талбай, гудамжнаас өөр газар тайван жагсаал, цуглаан хийж болно хэмээн Украины нийслэлийн захиргаанаас мэдэгдлээ. Гол талбай дээр жагсаал цуглааныг хориглосон нь шинэ жилийн гацуур, гоёл чимэглэл бэлтгэх ажилтай холбоотой хэмээн тайлбарлав. Хоёр хоногийн өмнө Киевт болсон эсэргүүцлийн жагсаалын үеэр олон хүн гэмтэж бэртсэн юм.

Японууд төсвийн алдагдлыг багасгана хэмээн амлав

Японы Засгийн газар ирэх санхүүгийн жилд төсвийн алдагдлыг дор хаяж 40 тэрбум доллараар багасгана гэсэн зорилт тавилаа хэмээн NHK телевиз мэдээлэв. Эдүгээ төсвийн алдагдал 225 тэрбум долларт хүрээд байгаа юм. Сүүлийн хэдэн жилд Японы хүн ам хөгширч, нийгмийн хангамжийн систем доголдох болсон тул төсвийн алдагдал ихээхэн нэмэгдэх болжээ. Мөн эдийн засгийг сэргээх арга хэмжээний хүрээнд хэд хэдэн удаа томоохон мөнгөний нийлүүлэлт хийсэн нь төсөвт сөргөөр нөлөөлсөн байна.

Газар нутгийн маргааныг дэвэргэхгүй байхыг хүсчээ

Хятадын Гадаад хэргийн яамны төлөөлөгч Цинь Ган “Хятад-Энэтхэгийн зүүн хилийн маргаантай газар нутгийн асуудлаар Бээжингийн байр суурь өөрчлөгдөхгүй” хэмээн мэдэгдэв. Хятадын тал хил, хязгаарын заагийн асуудлаар хоёр талын хэлэлцээ хийх таатай нөхцөлийг бий болгоход бэлэн байгаагаа уламжилжээ. Газар нутгийн маргааныг дэвэргэх үйлдэл хийхгүй байхыг Хятад улс хүссэн байна.

Энэтхэгийн Ерөнхийлөгч Пранаб Кумар арваннэгдүгээр сарын 29, 30-нд Аручанал-Прадеш мужид зочилсон аж. Энэ бүс нутгийг Дели өөрийн газар нутаг хэмээн үздэг ч багагүй хэсгийг нь хятадууд манай харъяаны нутаг хэмээн зүтгэдэг ажээ. Хоёр улс хамтын ашиг сонирхлоо хамгаалахын тулд асуудлыг хурцатгахаас зайлсхийж, уулзалт, хэлэлцээ хийх ёстой хэмээн Хятадын Гадаад хэргийн яам онцолжээ.  

Б.Обама: АНУ-ын шинэ Ерөнхийлөгчөөр эмэгтэй хүн тодорч магадгүй

АНУ-ын лидер Барак Обама улс орны дараагийн Ерөнхийлөгчөөр эмэгтэй хүн тодорч магадгүй хэмээн мэдэгдлээ. АНУ-ын Төрийн нарийн бичгийн дарга асан, экс тэргүүн хатагтай Хиллари Клинтон Цагаан ордны тэргүүн Барак Обамаг залгамжилж гарч ирнэ хэмээн тойм, шинжээчид үзэж байна. Б.Обама Ерөнхийлөгчийн бүрэх эрхийн хугацаагаа дуусгасны дараа гэр бүлийн хамт Вашингтонд үлдэнэ хэмээн ярьжээ. Хоёр удаа АНУ-ын Ерөнхийлөгчөөр сонгогдоод байгаа Б.Обама 2016 онд албан тушаалаасаа буух юм. Ардчилсан намаас Х.Клинтоноос өөр Ерөнхийлөгчид нэр дэвших хүчтэй, нөлөөтэй улстөрч байхгүй хэмээн ажиглагчид үзэж байгаа юм.

 Таван мянга 632 хүн шуурганд амиа алджээ

Филиппиныг дайрсан “Хайян” хэмээх хүчтэй далайн шуурганд амиа алдсан хүний тоо таван мянга 632-т хүрээд байна хэмээн тусулсын Онцгой байдлын яамнаас мэдэгдлээ. Хохирлын тоо дөрөв хоногийн өмнөхөөс зуу гаруй хүнээр нэмэгджээ. “Хайян” нь Филиппины түүхэн дэх хамгийн хүчтэй шуурга  болсон юм. Байгалийн гамшигт өртсөн бүсэд нөхцөл байдал тун хүнд байна хэмээн НҮБ-аас мэдэгдэв. Шуурганы улмаас хагас сая хүн орон гэргүй хоцорч, гадаа амьдарч байна.

Хойд Солонгост баривчлагдсан АНУ-ын иргэнийг суллахыг шаардлаа

Вашингтоны засаг захиргаа Хойд Солонгост баривчлагдсан АНУ-ын иргэн Мерилл Ньюманыг даруй суллахыг шаардлаа. 83 настай Ньюман сар гаруйн өмнө Хойд Солонгост жуулчилж явахад хорлон сүйтгэх ажиллагаа явуулсан, Пхеньяны социалист системийг гутаан доромжилсон хэмээн үзэж баривчилсан юм. Тэрээр Хойд Солонгост байхдаа орон нутгийн эрх баригчидтай уулзаж, Солонгосын армийн өнгөрсөн түүхийн талаар асуусан нь ийнхүү саатуулагдахад хүргэсэн бололтой.

Солонгосын дайны ахмад дайчин Мерилл Ньюман Хойд Солонгост амралтаа өнгөрүүлээд буцах гэж байжээ. Түүнийг мөн 1950-53 оны Солонгосын дайны үеэр энгийн номхон иргэдийн аминд хүрсэн хэмээн буруутгаж байгаа аж.

Сири хүүхдүүд эцэг эхгүйгээр дүрвэн амьдарч байна

Ливан, Иордан дахь дүрвэгсдийн хуаранд гурван мянга 700 орчим сири хүүхэд эцэг, эхгүйгээр амьдарч, тэдний олонх нь ямар нэг насанд хүрсэн хүний харгалзаагүйгээр, өөрсдөө хил давж дүрвэсэн байна хэмээн НҮБ-ын Дүрвэгсдийн хорооны (ACNUR) илтгэлд онцолжээ. “Сирийн ирээдүй: дүрвэгч хүүхдүүдийн байдал” хэмээх илтгэл нь Ливан, Иордан дахь бага насны дүрвэгсдийн нөхцөл байдалд гүнзгий судалгаа, дүгнэлт хийсэн анхны ажил болж байгаа юм. Энэ хоёр улсад Сириэс дүрвэсэн 1.1 сая хүүхдийн 60 хувь нь амьдарч байгаа аж. Эцэг эхчүүд нь иргэний дайнд нас барсан, эсвэл дайн, мөргөлдөөний бүсэд Засгийн газрын цэрэг болон босогчдод барьцаалагдаж дайчлагдсан нь дээрх нөхцөл байдлын гол шалтгаан болж байна. Эцэг эхчүүд хүүхдүүдээ зэвсэгт бүлгүүдэд дайчлуулахгүйн тулд тэднийгээ хөрш улс руу явуулахаас өөр аргагүй байдалд ордог аж. “Дүрвэсэн хүүхдүүд ганцаардал, аюултай байдал, тусгаарлалт хэмээх сэтгэл зүйн бэрхшээлтэй тулгарч байна. Гэр бүл, эцэг эхээсээ салсан сири хүүхдүүдийн байдал маш хүнд байна” хэмээн ACNUR-ийн Олон улсын хамгааллын төвийн захирал Волкер Турк Женевт тавьсан илтгэлдээ онцолсон юм.

Ливан, Иорданд дүрвэн гарсан 70 мянган сири гэр бүлийн өрхийн тэргүүн байхгүй байгаагийн улмаас хүүхдүүд ажил хөдөлмөр хийхээс өөр аргагүй байдалд орж байна. Бүр долоон настай хүүхэд ч тун бага мөнгөний төлөө олон цагаар ажиллаж байгаа аж. Өрхийн тэргүүнгүй болсон гэр бүлийн бараг тавин хувь нь хүүхдүүдийнхээ ажиллаж олсон бага мөнгөөр амь зууж байгаа нь судалгаагаар харагджээ. 270 хүүхэдтэй ярилцаж судалгаа явуулахад, тэд орон гэрээ орхин явахаас өөр аргагүй болж, дүрвэж явах замдаа гэр бүл, найз нөхдөө алдаж, насанд хүрсэн хүмүүст ашиглагдаж, дайчлагдан бие, сэтгэлийн асар их дарамтыг туулж байгаа нь тодорхой болсон юм.

Дүрвэсэн хүүхдүүдийн 29 хувь нь дайнаас зугтааж орон гэрээ орхисон, эсвэл гэр нь бөмбөгдөлтөд өртөж сүйрсэн, дүрвэх замдаа ихэд зовж зүдэрсэн тухайгаа ярьжээ. Хүүхдүүд сэтгэл зүйн дарамтаас гадна дайн, тулааны хөлд өртөж шархадсан байх нь элбэг байна. Дүрвэгсдийн хуаранд ирж буй олон хүүхэд шархтай иржээ. Ливанд гэхэд л 2013 оны эхний зургаан сард 741 хүүхэд дайны шархтайгаар эмнэлэгт хүргэгджээ. Иордан дахь Затри хуаранд мянга орчим хүүхэд эмнэлэгт хүргэгдэж шархаа эмчлүүлсэн байна. НҮБ-ын ажилтнууд судалгаа явуулж байхад олон хүүхэд Сирид буцан очиж тулалдаанд орох хүсэлтэй байгаагаа илэрхийлжээ.

Боловсролын хувьд нөхцөл байдал тун муу. Ливаны дүрвэгсдийн хуаранд байгаа сургуулийн насны 270 мянган хүүхдийн дөнгөж 20 хувь нь ямар нэг хичээлд хамрагдаж байна. Иордан дахь сири хүүхдүүдийн тал хувь нь буюу 83 мянган хүүхэд бүрэн бус байдлаар хичээлд хамрагдаж байгаа аж.

Сирийн хямрал, дүрвэлтийн бас нэг санаа зовоосон тал нь дүрвэгсдийн хуаранд мэндэлж буй хүүхдүүд юм. Тэнд мэндэлж буй сири хүүхдүүд ямар ч иргэншилгүй хоцорч байна. Ливан дахь дүрвэгсдийн хуаранд мэндэлсэн 781 хүүхдийн 77 хувь нь төрсний албан ёсны гэрчилгээгүй. Иорданд энэ онд мэндэлсэн 1400 сири хүүхэд төрсний гэрчилгээгээ аваагүй байна. Тиймээс тэдэнд ямар нэг орны иргэншил олгох боломжгүй болж байгаа аж. Сирийн иргэний дайны улмаас тус улсын 2.2 сая иргэн эх орноо орхин дүрвэжээ. Тэдгээрийн талаас илүү хувь нь насанд хүрээгүй хүүхдүүд. Хүүхдүүдийн 75 хувь нь 12-аас доош настай байна.

“Кубад өөрчлөлт авчрах цорын ганц сонголт нь ард түмний бослого”

Кубын зохиолч Армандо де Армас хүний эрхийн төлөө тэмцсэнийхээ төлөө шоронд хоригджээ. 1989 онд тэрээр нэгэн хуягийн тусламжтайгаар шоронгоос оргож, 1994 онд Коммунист намын нэгэн түшмэлийн дарвуулт хөлгийг хулгайлан Кубын эргийн харуул, нисдэг тэрэгнээс бултан Мексикийн Кинтана Род хүрчээ. Дараа нь Армандо АНУ-ын Майами хотод очиж суурьшин, Кубын дэглэмийг хүчтэй шүүмжлэгчдийн нэг болсон юм. Тэрс үзэлтэн Армандо де Армас өнөөдрийн Куба орны талаар ийнхүү ярьж байна.