Лондонд дахин халдлага гарав уу?

Лондоны хойд хэсгийн Финсбюри-парк дүүрэгт дунд оврын автомашин лалын сүмээс гарч яваа хүмүүсийг мөргөж дайрчээ. Нэг хүн амиа алдаж, хэд хэдэн хүн гэмтэж бэртсэн, нэг хүнийг энэ хэрэгт холбогдуулан баривчилсан хэмээн цагдаагийн газраас мэдээлэв. 77 хүн гэмтэж бэртсэнээс гурвынх нь байдал хүнд байгаа аж. Энэ нь санаатай алан хядах үйлдэл байсан уу, эсвэл тохиолдлын зүйл байв уу гэдгийг цагдаа нар мөрдөн шалгаж байна. Урьдчилан сэргийлэх үүднээс зэвсэгтэй цагдаа нар хэргийн газар иржээ. Их Британийн лал шашны зөвлөлийн тэргүүн Харун Рашид “Твиттер” хуудсандаа “Автомашин оройны мөргөлөөс гарч яваа хүмүүсийг дайрсан. Автомашины жолооч санаатайгаар хүмүүсийг дайрсан” хэмээн бичсэн байна. Лал шашинтай иргэд Рамадан сард зориулсан мөргөл хийчихээд гарч явсан аж. Ямар ч байсан цагдаагийн газар энэ хэрэг явдлыг тун нухацтай шалгаж байна. Цагдаа нар хэргийн газрыг бүсэлж, түргэн тусламжийн машин иржээ. Финсбюри-парк дүүрэг дээгүүр нисдэг тэрэг эргүүл хийж байгаа аж.

Сүүүлийн үед Лондон хотод хэд хэдэн халдлага гараад байна. Зургадугаар сарын 3-нд Лондоны төвийн гүүрэн дээр нэг гурван этгээд автомашинаар явган хүмүүсийг санаатайгаар дайрч, дараа нь Боро-маркет захын тэнд буугаад хүмүүс рүү хутга барин дайрсан юм. Энэ халдлагын улмаас долоон хүн амиа алдаж, арваад хүн шархадсан. Цагдаа нар халдагч этгээдүүдийг буудаж устгажээ. Мөн гуравдугаар сарын 22-нд Халид Масуд гэгч этгээд Вестминстерийн гүүрэн дээр автомашинаар хүмүүсийг дайрч, дараа нь нэг цагдааг хутгалан нийт таван хүний аминд хүрсэн юм.

Францын парламентад 223 эмэгтэй сонгогджээ

Францын парламентын доод танхимд 223 эмэгтэй сонгогдсон нь улс орны түүхэнд байгаагүй амжилт боллоо хэмээн Le Parisien мэдээлэв. Ийнхүү 577 суудалтай үндэсний чуулганы депутатуудын 38.6 хувийг эмэгтэйчүүд эзлэх боллоо. Парламентын өмнөх чуулган 155 эмэгтэй депутаттай байсан юм. Францын парламентын сонгуулийн хоёрдугаар шатанд шинэ Ерөнхийлөгч Эммануэль Макроны нам ялалт байгуулсан билээ. Мөн Марин Ле-Пен, экс Ерөнхий сайд Мануэль Вальс нар парламентад суудалтай болоод байна. Сонгуулийн дүнгээр Макроны нам парламентад үнэмлэхүй олонх болж чаджээ.

Хойд Солонгосын цэрэг Өмнөд Солонгос руу зугтжээ

Хойд Солонгосын цэргийн албан хаагч Ханган мөрнийг сэлж гатлан Өмнөд Солонгос руу зугтжээ. Сүүлийн долоо хоногт хоёр дахь орголт болж байгаа нь энэ . Хойд Солонгосын цэрэг живэхгүйн тулд мөрөндөө хөөсөнцөр бэхэлж Ханган мөрний нарийн хэсгээр нь сэлж гарч ирсэн хэмээн Өмнөд Солонгосын штабын дарга нарын нэгдсэн хорооноос мэдэгдлээ. Өнгөрсөн долоо хоногт Хойд Солонгосын бас нэг цэрэг хоёр улсыг хуваадаг хатуу хяналт, хамгаалалтай хэсгээр хил нэвтрэн өмнөд нутагт орж ирсэн юм. Ер нь жилд нэг хойдсолонгос цэрэг өмнөд рүү зугтан гардаг аж.

Хамгийн сүүлд оргосон цэрэг нь 20 орчим настай, одоогоор Сөүлээс баруун хэсэгт орших Кимпхо хотод ирээд байна хэмээн Ренхап агентлаг мэдээллээ. Өмнөд Солонгосын тал руу сэлж гарч ирсэн цэрэг эргийн харуултай таарахдаа “Намайг битгий алаарай, би танай улс руу зугтаж орж ирлээ” хэмээн хашгирсан аж.

Өмнөд болон Хойд Солонгос улс 1953 оны дайны дараа эвлэрэлд хүрсэн ч албан ёсоор энхийн гэрээ байгуулаагүй байгаа тул дайны байдалд байгаа гэсэн үг. Солонгосын дайн дууссанаас хойш Хойд Солонгосын 30 мянга орчим иргэн өмнөд рүү зугтаж гарсан хэмээн Сөүлийн тал үздэг. Тэд ихэвчлэн Хойд Солонгостой хамгийн их газраар хил залгадаг Хятадын газар нутгаар дамжин зугтдаг ажээ.

Пол Маккартни 75 хүрлээ

ХХ зууны хамгийн агуу дуучдын нэг, алдарт “Битлз” хамтлагийн амьд үлдсэн хоёр гишүүний нэг Сэр Пол Маккартни 75 нас хүрлээ. “Битлз” хамтлаг нэг хэсэг Есүс Христээс илүү алдар сууг олж явсан нь Жон Леннон ч, Ринго Старр ч, Жорж Харрисоноос ч бус, зөвхөн Пол Маккартнийн зохиосон дуутай холбоотой байсан юм. 60-аад оны эхээр түүний зохиосон Yesterday дууг өнөөдрийг хүртэл 2200 гаруй мэргэжлийн дуучин дуулжээ. Пол Маккартнийн өөрөө болон хамтран бичсэн 32 дуу янз бүрийн цаг үед Billboard сэтгүүлийн шилдэг дууны жагсаалтыг тэргүүлж байв. Түүний хөрөнгө чинээ 1.2 тэрбум доллараар үнэлэгдэж байна.

Их Британид түүнийг үндэсний үнэт өв хэмээн хүлээн зөвшөөрдөг. Тэрээр маш олон шагнал, хүндэтгэл хүлээсний хамгийн нэр хүндтэй нь мэдээж 1997 онд хатан хаан Элизабетаас авсан Сэр цол юм. Пол Маккартни хангалттай өндөр нас сүүдрийг зооглоод байгаа ч зүгээр суусангүй. Өнгөрсөн онд Pure McCartney хэмээх шилдэг дууныхаа цомгийг гаргасан бол, саяхан “Карибын тэнгисийн дээрэмчид” кинонд нэгэн жижигхэн, хөгжилтэй дүрийг бүтээсэн юм.

Португалын гал түймэрт 62 хүн амь насаа алдлаа

Португалын төв хэсэгт гарсан ойн түймрийн улмаас 62 хүн нас бараад байна хэмээн эрх баригчид мэдээлэв. Тэдний ихэнх нь автомашинтайгаа явж байгаад галд бүслэгдэж угаартаж, шатаж нас барсан байна. Автомашин дотроо шатсан 30 хүний цоцгсыг олжээ. Мөн автомашинаасаа холгүй амиа алдсан 17 хүний цогцсыг олсон байна. Тэд явганаар түймэртэй ой модыг гатлах гэж яваад амь үрэгдсэн бололтой. “Амь үрэгдсэн хүний тоо нэмэгдэж болзошгүй” хэмээн Португалын Засгийн газрын тэргүүн Антониу Кошта хэллээ. Түймэрт амь насаа алдсан хүмүүсийн дунд дөрвөн хүүхэд байгаа аж. 60 орчим хүн хүнд, хөнгөн түлэгдэж эмнэлэгт хүргэгджээ. Гал командын хэдэн зуун машин, нисэх онгоц, мянга орчим гал сөнөөгч ажиллаж байгаа ч ойн түймрийг хяналтдаа авч чадахгүй байна.

Гал түймэр нэгэн зэрэг дөрвөн зүг рүү маш хурдан тархаж байгаа аж. Португалын хэд хэдэн мужид сүүлийн үед 40 градусаас дээш халж байгаа ажээ. 

Амазон мөрний ай сав аюулд оров

Бразил, Герман, Сингапур, Их Британи, АНУ-ын эрдэмтэн, судлаачид Амазон мөрний ай сав, эко систем эрсдэлд орж, устах аюултай болоод байна хэмээн мэдэгдлээ. Судалгааны дүнг Nature сэтгүүлд нийтэлсэн байна. Мэргэжилтнүүд DEVI (Dam Environmental Vulnerability Index) буюу Хүрээлэн буй орчны эмзэг байдлын индексийг тооцож гаргахад түгшмээр дүн гарчээ. Энэ индекс нь 0-100 хүртэл хэмжүүртэй, дээд үзүүлэлтэд хүрвэл эко систем бүрэн устдаг аж. Амазон мөрний хамгийн  том цутгалан болох Мадейрад DEVI индекс хамгийн өндөр (80-аас дээш) гарчээ. Тэнд Санту-Антониу, Жирау гэсэн хоёр усан цахилгаан станц байдаг. Мөн Мараньон, Укаяли бэлчирт DEVI индекс 71, 61-д хүрч бүртгэгдсэн байна.

Ой модыг ихээр огтлох, голын урсгалыг өөрчлөх, биологийн олон төрөл зүйлийг устгах, хөрс зэвэрч муудах зэрэг нь Амазон мөрний ай сав, эко систем муудахад голлон нөлөөлж байгаа аж. Амазон мөрний ай савд 428 усан цахилгаан станц барихаар төлөвлөж байснаас 140-ыг бариад байна. Амазон мөрөн дэлхийн цэнгэг усны 20 хувийг эзэлж, олон зуун төрлийн ургамал, амьтны амьдрах орчныг бүрдүүлж байдаг ажээ.

200 мянган литр дарсыг газар асгажээ

Францын Эро мужид үл мэдэгдэх этгээдүүд Монпелье хотоос 10 км-т орших нэгэн дарсны агуулах руу дайрч 200 мянган литр дарсыг газар руу асгажээ. Тэд агуулахад байсан дарсны 17 тусгай савны цоргыг онгойлгож гоожуулжээ. Цагдаа нар энэ хэргийг шалгаж байна. Le Figaro-д бичиж буйгаар, Испаниас импортлодог дарсны үнэ нэмэгдсэнийг эсэргүүцсэн идэвхтнүүд энэ хэрэгт оролцсон бололтой. Өнгөрсөн оны наймдугаар сарын 3-нд Францын Сет хотын нэгэн гудамжтинд дарсны үер болсон юм. Авто зам, явган зам дээр хэдэн мянган тн дарс асгаж, газар доорх авто зогсоол, орон сууцнууд дарсны үерт автаж байсан билээ. Тэр хавьд байдаг дарсны агуулахыг мөн л санаатайгаар эвдэн сүйтгэж, дарсыг нь асгаж байсан аж.

Д.Трамп 71 хүрлээ

АНУ-ын Ерөнхийлөгч Дональд Трамп 71 нас хүрчээ. Washington Post сонинд бичсэнээр, АНУ-ын 45 дахь Ерөнхийлөгч насан баяраа гэр бүлийн хүрээнд даруухан тэмдэглэжээ. Гэргий Меланиа, хүү Баррон нар нь Нью-Йорк хотоос Вашингтонд, Цагаан ордонд шилжиж ирсэн нь хамгийн том бэлэг болсон аж. Трамп төрсөн өдрөө хэрхэн тэмдэглэж байсан талаар хэвлэлүүд бичиж байна. Тэрээр 42 насны төрсөн өдрөө өөрийн нэг казинод нижгэр тэмдэглэж, томоохон лазерийн шоу хийж бүгдийг алмайруулж байжээ. Д.Трамп 1996 онд өөрийн мэдэлд нь байдаг бүх барилгыг дүрсэлсэн, супермений хувцастай Трампын дүрстэй аварга торт хийлгэж зочдоо дайлсан аж. 2005 онд 59 насны баяраараа “Малибугийн аврагчид”-ын од Памела Андерсоныг урьж, 15 метр өндөр бялууны лааг үзээж байв. Харин өчигдөр тохиосон 71 насны баяраа тун даруухан, цомхон хүрээнд тэмдэглэснийг гэргий Меланиа нь ярьжээ. 

Японы эзэн хаан сэнтийгээ шилжүүлэхээр болов

Японд урьд өмнө хэзээ ч ийм юм болж байсангүй. Амьд сэрүүн ч эрүүл мэнд нь сайнгүй эзэн хаан Акихито Японы парламент болон Засгийн газарт хандаж хааны суудлаас татгалзах зөвшөөрөл өгөхийг хүсчээ. Ард түмэн үүнийг эсрэг биш байгаа ч гунигтай байна.

Эзэн хааны хүсэлтийг ёсоор болгох билэгдлийн санал хураалтыг 235 депутат дэмжиж, эсэргүүцсэн нэг ч санал гарсангүй. “Хууль батлагдлаа” хэмээн сайд нарын танхимийн ерөнхий нарийн бичгийн дарга Ёшихида Суги мэдэгдэж, гүн бөхийж хүндэтгэл үзүүлжээ. Ийнхүү эзэн хаан Акихитод хаан ширээнээс татгалзах зөвшөөрлийг олгож, шинэ эрин үеийн эхлэлийг тавилаа. Эзэн хаан Акихито 2018 оны арванхоёрдугаар сард хааны титмээ буулгаж өгсний дараа тэрхүү шинэ эрин 2019 оны нэгдүгээр сард эхэлнэ хэмээн таамаглаж байна. Энгийн япон иргэдийн 85 хувь нь парламентын шийдвэрийг дэмжиж, эзэн хаан чөлөөнд гарч амрах нь зөв гэж үзжээ. 83 нас сүүдрийг зооглоод байгаа Акихито түрүү булчирхайн хорт хавдраар шаналахын зэрэгцээ зүрхэндээ хүнд мэс засал хийлгэсэн юм. Тэрээр ард түмэндээ хандаж үг хэлэхдээ, эрүүл мэндийн улмаас ажил үүргээ гүйцэтгэж чадахгүй болж байна гэжээ. Олонх дэлхийн иргэдийн хувьд нэг настай хүн чөлөөнд гарч байгаа ч япон иргэдийн хувьд тийм биш. Учир нь Японы хаан сэнтийний сүүлийн 200 жилийн түүхэнд ийм явдал болж байгаагүй аж. Япон иргэдийн хувьд Акихито нь дэлхийн II дайны дараах Японы билэгдэл болсон хүн юм.

Акихито хаан ширээнээс татгалзах шийдвэр гаргасны дараа ВВС-ийн сурвалжлагчид Токиогийн гудамжинд иргэдээс санаа бодлыг нь сонсжээ. Япон иргэд эзэн хаандаа тун ам сайтай, түүнгүйгээр амьдралаа төсөөлөхөд хэцүү хэмээн ярьж байв.

Өнөөгийн Үндсэн хуулийн дагуу, хаан ширээг залгамжлагч нь эрэгтэй талаа дагасан эрэгтэй байх ёстой. Охид, гүнж нар нь хаан ширээг залгамжлах эрхгүй, тэд энгийн хүнтэй гэрлэвэл эзэн хааны удам, овгоос гардаг аж. Акихитогийн охин Саяко, ач охин Мако нар ийм замыг сонгосон билээ. Эзэн хаан Акихито хоёр хүүтэй. Том хүү Нарухито, бага хүү Фумихито, мөн 10 настай ач хүү Хисахито байгаа. 57 настай Нарухито Японы шинэ эзэн хаан болох нь тодорхой. Гурав дахь үеийнхнээс ганцаараа эр хүйсийг төлөөлж байгаа Хисахито том болоод хүүтэй болохгүй бол хаант засаглал төгсгөл болох аж. Тэр тохиолдолд Японы парламент Үндсэн хуулиа эргэн харах нь тодорхой. Жүничиро Коизүмийн Засгийн газар 2000 онд хаан сэнтийг эмэгтэй хүйсийн төлөөлөлд шилжүүлэхийг зөвшөөрөх талаар өөрчлөлт хийх хэрэгтэй хэмээн ярьж, хэлэлцүүлж байв. Гэвч Шинзо Абэ намынхаа консерватив чанарыг хадгалж үлдэхийн тулд энэ талаар ярихыг хүсэхгүй байна. 

168 сая хүүхэд хөдөлмөр эрхэлж байна

Хүүхдийн хөдөлмөрийн эсрэг дэлхийн өдрийг тохиолдуулан НҮБ-аас гаргасан тоо баримтаар, дэлхий даяар 168 сая хүүхэд ажил хийж, тэдний тал хувь нь буюу 85 сая нь амь насанд аюултай хөдөлмөр эрхэлж байна. Хүүхэд, багачуудыг ажил хөдөлмөрт дайчилдаг явдлыг нэн даруй халах ёстой хэмээн тус байгууллагын илтгэлд онцолжээ. Учир нь, хүүхдийн ажил хөдөлмөр эрхлэлт нь ихэвчлэн боолчлолтой холбогдож байдаг, мөн хүүхдийн сургуульд сурах, тоглож наадах эрх хаягддаг аж. Хүүхдүүдийг хамгийн ихээр ажиллуулдаг салбар нь хөдөө аж ахуй. Арван хүүхдийн зургаа нь буюу 98 сая хүүхэд хөдөө аж ахуйн салбарт нуруугаа авахуулсан морь мэт зүтгэж байгаа бол, үйлчилгээний салбарт 54 сая, үйлдвэрлэлийн талбарт 12 сая хүүхэд ажил хөдөлмөр эрхэлж байна. Энэ онд хүүхдийн хөдөлмөр нь дайн мөргөлдөөн, байгалийн гамшгийн улмаас улам хүнд бэрх, өрөвдмөөр байдалтай болжээ.

Цаг агаарын өөрчлөлт, байгалийн гэнэтийн гамшиг зэрэг нь хүүхдийн хөдөлмөрийг ашиглах явдлыг улам гааруулж байна хэмээн Хүмүүсийн газар сангийн илтгэлд дурдсан юм. Никарагуа дахь нөхцөл байдлыг судалж үзэхэд, байгаль, хүрээлэн буй орчны нөхцөл байдал муудахын хэрээр хүүхдийн хөдөлмөрийн шинэ хэлбэр үүсч байгаа аж. Үүний нэг жишээ нь ил задгай хогийн цэг ихээр үүсч буй явдал. Хогийн цэг нэмэгдэхийн хэрээр тэнд ажиллах, тэндээс орлого олох гэсэн хүүхдүүдийн тоо нэмэгдсээр байгаа аж. Ливанд ирсэн сири дүрвэгчдийн хүү Али гэр бүлдээ туслахын тулд хог дээрээс олсон эд зүйлсийг зарж суудаг тухай Дэлхийн зөн байгууллага жишээ татан мэдээлж байна. Иордан, Ливи дахь дүрвэгсэд ажил, хөдөлмөр эрхлэх эрхгүй байдаг. Хууль бусаар аахар шаахар ажил хийдэг ч маш бага цалинтай. Тиймээс хүүхдүүд нь сургуульд суухын оронд ажил хөдөлмөр эрхлэхээс өөр аргагүй болдог байна.

Хүүхдийн эрхийг хамгаалагч Plan International байгууллагаас гаргасан тооцоогоор, 10 сая хүүхэд, тэдний 67 хувь нь охид, боолчлолын нөхцөлд гэрийн үйлчилгээний ажил хийж байна. Энэ орон сууц, гэрт байдаг “нууц” ажил тул хянах боломжгүй үйл ажиллагаа юм. Латин Америк, Африкийн олон оронд хүүхдүүд гэрийн үйлчилгээнд ажиллахыг нийгэм нь хүлээн зөвшөөрсөн байдаг. Эдгээр улс оронд хүүхдийн хөдөлмөрийг хязгаарлаж, сурах бололцоогоор хангахыг шаарддаг ч олигтой ахиц гардаггүй аж. НҮБ-ын гишүүн орнууд Тогтвортой хөгжлийн зорилгын хүрээнд 2025 он гэхэд хүүхдийн хөдөлмөрийг устгах үүрэг, амлалт авсан ч биелэх төлөв харагдахгүй байгаа юм.

Манчестерийн алуурчин хагас жилийн өмнөөс халдлагад бэлтгэж байжээ

Дуучин Ариана Грандегийн концерт дээр бөмбөг дэлбэлсэн Манчестерийн алуурчин Салман Абеди 2016 оны арванхоёрдугаар сараас эхлэн халдлага үйлдэхээр бэлтгэж байсан тухай Ливийн тусгай албаны төлөөлөгч Ахмед Салем мэдэгдэв. Ливийн эрх баригчдад Абедийн Ливи болон Британи дахь холбоо сүлбээний талаар чухал мэдээлэл байсан, гэвч Ливийн тусгай албад ТТГ-тай илүү мэдээлэл солилцож байсан гэжээ.

Салман Абеди Манчестерт халдлага үйлдэхээсээ өмнө Триполид гэр бүлийн хамт нэг сар болжээ. Түүнийг Триполид ирсэн даруйд тусгай албад хараандаа авч, 20 настай дүү Хашем, эцэг Рамадан нарыг ч анхааралдаа авсан аж.

Халдлагын дараа Хашем, Рамадан нарыг Ливид баривчилсан ба өдөр бүр байцааж байна. Салман 2015 онд “Исламын улс” бүлэгт элссэн хэмээн дүү Хашем нь ярьжээ. Салман Абеди тэсрэх бөмбөг хийх материал худалдаж авахад дүү нь тусласан байна. Тавдугаар сарын 22-нд Манчестер хотод дуучин Ариана Грандегийн концерт дээр халдлага болж 22 хүн амь насаа алдсан юм.

Панам Тайваньтай дипломат харилцаагаа таслав

Панамын эрх баригчид Хятадын төлөө Тайваньтай дипломат харилцаагаа таслажээ. “Зөвхөн нэг Хятад бий. Тайвань түүний нэг хэсэг” хэмээн тус улсын Засгийн газрын мэдэгдэлд онцолжээ. Ийнхүү Панам улс Тайванийн тусгаар тогтнолыг хүлээн зөвшөөрөхөөс татгалзаж Бээжингийн талд ороод байна. Тайванийг Хятадын нэг хэсэг гэж хүлээн зөвшөөрөх нь Хятадтай дипломат харилцаа тогтоох нэг нөхцөл болдог. Харин Тайвань үүнийг эсэргүүцэж, Тайваньд Хятадын жинхэнэ удирдлага бий, Бүгд найрамдах Хятад ард улс бол 1950 оны иргэний дайны явцад коммунистуудад эзлэгдсэн газар нутаг хэмээн үздэг аж. Үнэхээр Хятадын бүгд найрамдах улс (БНХАУ биш) НҮБ-ыг үүсгэн байгуулагчдын нэг байсан билээ. Тус улс 1971 он хүртэл НҮБ-ын Аюулгүйн зөвлөлийн байнгын гишүүн байж байгаад Бээжинд энэ суудлаа алдсан юм. Панамын шийдвэрийн дараа Тайваньтай дипломат харилцаагаа хадгалан үлдэж буй улсын тоо 20 боллоо. Хятадууд сүүлийн үед Панамд ихээхэн хөрөнгө оруулалт хийх болжээ.

Байгаль нуурыг хамгаалахад 314 сая рубль гаргажээ

ОХУ-ын Ерөнхий сайд Дмитрий Медведев Байгаль нуурыг хамгаалах төсөлд Холбооны төсвөөс хөрөнгө гаргаж Буриадын бүгд найрамдах улсад шилжүүлэх зарлигт гарын үсэг зуржээ. Улаан-Үүдийн цэвэрлэх байгууламжийг сэргээн засварлахад 314 сая рубль олгож байгаа аж. Байгаль нуурын хамгаалалт, Байгаль орчмын нутгийг 2020 он хүртэл хөгжүүлэх төсөлд холбооны төсвөөс ийнхүү томоохон тусламж үзүүлж байна. Байгаль нуур руу асгадаг Улаан-Үүдийн хэрэглэсэн, бохир усны хэмжээг үлэмж багасгаж, хотын экологийн түвшнийг сайжруулахад энэ мөнгийг зарцуулах ажээ.

Брэд Питт, Женнифер Анистон нар эргэн нийлэх үү?

Брэд Питт (53 настай), Женнифер Анистон (48) нар нэг үе  Холливудын хамгийн атаархам хосыг бүрдүүлж байсан ч тэдний хамтын амьдрал ердөө л таван жил үргэлжилсэн юм. Брэдийн амьдралд өөр бүсгүй буюу Анжелина Жоли гарч ирснээр тэдний холбоо тасарч байсан билээ. Жоли, Питт хоёр “Ноён болон Хатагтай Смит” кинонд тоглосныхоо дараа бие биедээ дурлаж, 2006 оны наймдугаар сард Францын Chateau Miraval тансаг эдлэн дээр хуримаа хийж байв. Гэвч нэрт жүжигчин архинд донтсон болон бас бус асуудлын улмаас Холливудын хамгийн алдарт хос хоёр тийш болсон юм. Үүний дараа нэг хэсэг хямарсан Брэд Питт одоо эргэн сэргэж, амьдралынхаа жолоог эргүүлэн атгасан бололтой. Америкийн Life & Style сэтгүүл мэдээлж буйгаар, Брэд Питт экс эхнэр Женнифер Анистон руу утасдаж Анжелинагаас болж хаяж явсандаа уучлал гуйжээ. Анистон ч энэ дуудлагад сэтгэл хангалуун байгаа аж. Тэрээр уучлалыг хүлээн авч, одоо урагшаа харах цаг болсон гэж экс нөхөртөө хэлжээ. Ямар ч байсан тэдний харилцаанд зүгээргүй нэг “оч үсэрлээ” хэмээн хэвлэлүүд бичиж байна. 

CR7-ийн ихрүүд Мадридад ирнэ

Дэлхийн шилдэг хөлбөмбөгч Кристиано Роналдо дөнгөж сая мэндэлсэн ихэр Эва, Матео хоёроо харахаас хоног тоолон хүлээж байна. Түүний шинэ хүүхдүүд АНУ-ын Зүүн эрэгт түрээсийн эхийн хэвлийгээс гурав хоногийн өмнө мэндэлсэн билээ. Роналдогийн ээж Долорес Авейро Атлантын далайг гаталж ач нартайгаа танилцсан ба энэ долоо хоногт тэднийг Мадридад, нэрт хөлбөмбөгчийн тансаг La Finca эдлэн дээр авчрахаас зэхэж байна. Дэлхийн шилдэг хөлбөмбөгчинд олгодог Алтан бөмбөг шагналыг тав дахь удаагаа авах нь бараг тодорхой болоод байгаа Кристиано Роналдо одоогоор Португалд шигшээ багийнхаа бэлтгэлд гараад байна. Түүний ихэр хүүхэд (охин Эва, хүү Матео) зургадугаар сарын 8-нд Калифорни орчмын нэг хотод түрээсийн эхийн хэвлийгээс мэндэлсэн юм. Роналдо хүүхдүүдийг нь тээж төрүүлсэн америк бүсгүйд дор хаяж нэг сая доллар төлсөн хэмээн Португалын хэвлэлүүд бичиж байна. Роналдогийн том хүү Роналдо жуниор зургаан жилийн өмнө мөн л түрээсийн эхийн тусламжтайгаар мэндэлсэн билээ.

Косовогийн сонгуульд Р. Харадинайн эвсэл ялалт байгуулав

Косовогийн парламентын сонгуульд Косовогийн албаниудын цэргийн хээрийн командлагч асан Рамуш Харадинайн тэргүүлдэг эвсэн ялалт байгуулжээ. Тэрээр 2004-2005 онд Косовогийн Ерөнхий сайдаар ажиллаж байв. Дайны дараа Косово тусгаар тогтносны дараа байгуулагдсан эвслийг Харадинай удирдаж байна. Серб улс түүнийг дайны гэмт хэрэгт буруутгадаг аж.

Харадинайн эвсэл нийт саналын 34 хувийг аваад байна хэмээн сонгуулийн хорооноос мэдээлэв. Сөрөг хүчний зүүний үзэлтэй нам 25 хувийн санал авчээ. Өнөөгийн Ерөнхий сайд Иса Мустафа тэргүүтэй эвсэл 26 хувийн санал авсан байна. Косовогийн хязгаар 2008 онд Сербээс салж тусгаар тогтнолоо зарлажээ. АНУ болон Европын ихэнх орон Косовогийн тусгаар тогтнолыг хүлээн зөвшөөрсөн юм. Косовогийн албани үндэстэн Рамуш Харадинай 1998-1999 онд Косовогийн чөлөөлөх армийг удирдаж байжээ. Тэрээр Косовогийн сербүүдийг хоморголон устгасан хэрэгт буруутгагдсан ч Гаагын шүүхээр цагаатгагдсан билээ.

Пуэрто-Рико АНУ-д нэгдэхээр шийджээ

Пуэрто-Рикогийн иргэд бүх нийтийн санал асуулгаараа АНУ-д нэгдэж, түүний 51 дэх муж болох хүсэлтийг АНУ-ын Конгресст илгээхийг дэмжжээ. Өнөөдөр Пуэрто-Рико нь АНУ-д чөлөөт байдлаар нэгдсэн улс гэсэн статустай байдаг ба үндсэндээ АНУ-ын хяналтад байдаг. Санал асуулгад нийт иргэдийн ердөө 23 хувь нь оролцож, 97 хувь нь АНУ-д нэгдэхийг дэмжсэн байна. Пуэрто-Рикогийн эрх баригчид энэ дүнгийн дагуу АНУ-д нэгдэх үйл явцыг эхлүүлэх үүрэггүй, эцсийн шийдвэрийг АНУ-ын Конгресс гаргах ажээ.

Пуэрто-Рико арал өөрийн статусаа тодорхойлох тав дахь удаагийн санал асуулгаа явуулсан нь энэ. Өмнөх санал асуулга 2012 онд болж иргэдийн 60 хувь нь АНУ-д нэгдэхийн төлөө санал өгч байжээ. Гэвч АНУ-ын Конгресс энэ талаар ямар нэг шийдвэр гаргаагүй юм. Бүх нийтийн санал асуулгыг зарлан явуулсан Пуэрто-Рикогийн захирагч Рикардо Роселло “АНУ-ын 51 дэх муж болох нь эдийн засгийн хямралаас гарах цорын ганц зам” хэмээн мэдэгджээ. Тус арлын эдийн засаг 103 тэрбум доллараар үнэлэгддэг, харин гадаад өр нь 72 тэрбум долларт хүрчээ.

“Питтсбург Пингвинс” Стэнлийн цомын аварга боллоо

Үндэсний хоккейн лигийн (NHL) Стэнлийн цомын аварга тодорчээ. “Питтсбург Пингвинс” зургаа дахь тоглолтод “Нэшвилл Предаторс”-ийг 2:0 харьцаагаар хожсоноор цувралыг 4-2-оор дуусгаж аварга боллоо. “Оцон шувуунууд” тоглолтын 59, 60 дахь минутад гоол оруулжээ. Ийнхүү “Питтсбург Пингвинс” Стэнлийн цомыг тав дахь удаагаа, сүүлийн хоёр улирал дараалан хүртэж байна. Алдарт “Детройт Ред Уингз” 1997, 1998 оны улиралд хоёр дараалан энэ цомын эзэн болж байв.  “Оцон шувууд”-ын ахлагч Сидни Кросби хамгийн үнэ цэнэтэй тоглогчоор шалгарсан бол, орос довтлогч Евгений Малкин 28 оноогоор (10+18) Стэнлийн цомын шилдэг довтлогч болжээ.

Ширэнгэ ой, голтой агуй

Вьетнамын Куан Бин муж дахь Пхонг Нха-Ке Банг дархан цаазат газарт газар дор нуугдсан Ханг Сон Донг хэмээх агуй байдаг. 1991 онд анх олж мэдээд, 2009 онд анхны судалгаа шинжилгээг хийсэн энэ агуйг дэлхийн хамгийн том агуй хэмээн үздэг билээ. 2009 онд хэсэг эрдэмтэн, судлаачид уг агуй руу нэвтрэн ороход битүү ногоон давхарга, ой модтой байсан нь бүгдийг гайхан бишрэхэд хүргэсэн юм.

Ханг Сон Донг агуйн нийт урт есөн км. Газар доорх гол, гайхалтай ногоон бүрхүүл, өтгөн ой, мод буттай. Тус агуйд нарны гэрэл тусдаг хоёр том хөндий байгаа нь ийнхүү олон гайхамшиг бүрэлдэхэд хүргэсэн хэмээн эрдэмтэд үзэж байна.

Британийн агуй судлалын холбоо, дараа нь National Geographic-ийн Газар зүйн судлалын багийн мэргэжилтнүүдийн хийсэн судалгаагаар, Ханг Сон Донг агуйн хамгийн том хөндий нь таван км урт, 200 метр өндөр, 150 метр өргөнтэй болох нь харагджээ. Судалгааны үеэр таазнаас унжиж тогтсон 70 метр гаруй урт тогтоцууд нэлээд хэд олджээ. Гэрэл зурагчин Райан Дебод дрон болон мэргэжлийн аппаратны тусламжтайгаар агуйн зураг, бичлэгийг хийсэн нь дэлхийн хэвлэл мэдээллийн гол тренд болж байна. Энэ бичлэгийг Vimeo сайтаас Hang Son Doong Moumtain river cave хэмээн хайлт хийж үзэж болох ажээ.

Сураггүй болсон нисэх онгоцны сэгийг олжээ

Бирм улсад зургадугаар сарын 7-нд радараас алга болсон цэргийн нисэх онгоцны сэгийг олжээ. 122 хүн суулгаж явсан агаарын хөлөг Андаман тэнгис дээгүүр явж байгаад холбоо тасарсан юм. Онгоцны үлдэгдэл болон зорчигчдын цогцсыг улс орны өмнөд хэсгийн Тавой суурингаас холгүй эргээс олсон байна. Ямар нэг хүн амь гарсан талаарх мэдээлэл алга. Хятадад үйлдвэрлэсэн Y-8F-200 загварын нисэх онгоц 7-нд Янгон хот руу нисч яваад сураггүй болсон юм. Эрэл хайгуулын ажиллагаанд Бирмийн флотын есөн хөлөг онгоц, нисэх хүчний гурван тагнуулын нисэх онгоц оролцжээ. 122 хүний 15 нь хүүхэд, 35 нь цэргийн албан хаагч байжээ. Ослын шалтгаан тодорхойгүй байна. Онгоцны нисгэгч нь гурван мянган цаг ниссэн туршлагатай, агаарын хөлөг нь өнгөрсөн гуравдугаар сард Бирмийн армид ирсэн, 800 цаг ниссэн байжээ.

Хойд Солонгос дахин пуужин туршлаа

Хойд Солонгосын тал хөлөг онгоцны эсрэг пуужин хэд хэдийг харвасан нь 200 км орчим нисээд тэнгист уналаа хэмээн Өмнөд Солонгосын цэргийнхэн мэдэгдэв. Сөүлийн үзэж буйгаар, пуужингуудыг Хойд Солонгосын зүүн эргээс харважээ. “Пхеньяны эрх баригчид хөлөг онгоц устгах зориулалттай байж магадгүй хэд хэдэн үл мэдэгдэх пуужинг Канвондо мужаас Япон тэнгис рүү харвалаа” хэмээн Өмнөд Солонгосын зэвсэгт хүчний мэдэгдэлд онцолсон аж. Хойдууд ийнхүү цэргийн томоохон хөлөг онгоцыг өндөр ончтойгоор харвах пуужинтай гэдгээ батлан харууллаа хэмээн Өмнөд Солонгосын цэргийнхэн үзэж байна. Дэлхийн нийт буруутган зэмлэсээр байгаа ч Пхеньян пуужингийн туршилтаа үргэлжлүүлсээр байгаа юм. Тэд дөрөвдүгээр сард хоёр ч пуужин туршсан нь амжилтгүй болсон билээ.

“Боко Харам”-ын дайчид томоохон хот руу дайрчээ

Хэт даврагч “Боко Харам” бүлгийн дайчид Нигерийн зүүн хойд хэсгийн нэг сая гаруй хүн амтай Майдугури хот руу дайрчээ. Сүүлийн жил хагасын дотор тус бүлгийнхний хийж буй хамгийн том довтолгоо нь энэ юм. Гэрчүүдийн хэлж буйгаар, хотын зүүн болон баруун өмнөд хэсэгт цагийн турш буудалцаан, дэлбэрэлт болжээ. Энгийн иргэд шархадсан тухай мэдээлэл ирж байна. Майдугури хотод засаг захиргааны төв нь байрладаг Борно мужийн захирагч лалын дайчид довтолсон гэдгийг батлаад, армийнхан довтолгоог няцааж чадсан гэв. Довтолгооны үеэр хэдэн хүний амь нас үрэгдсэн талаар мэдээлэл алга. Нигерийн арми өнгөрсөн онд “Боко Харам” бүлгийг хамгийн сүүлчийн гол түшиц газар болох Самбиса ойгоос хөөн гаргасан юм. Сүүлийн үед тус бүлгийн хүч ихээхэн суларч байгаа ч тэд Нигерийн хойд хэсэг болон Камерунд халдлага, довтолгоо хийсээр байгаа ажээ.

Токио хамгийн үнэтэй хот байхаа болив

Гадаадын иргэд, мэргэжилтнүүдийн хувьд хамгийн үнэтэй хот гэгддэг Японы нийслэл Токио энэ жагсаалтыг тэргүүнээс буужээ. Судалгаа шинжилгээний ECA International фирмийн үзэж буйгаар, дэлхийн хамгийн үнэтэй хотоор Анголын нийслэл Луандаа тодорчээ. Токио жагсаалтын долоо хүртэл буусан аж. Дэлхийн хамгийн үнэтэй хотын жагсаалтад Луандагийн араас Хонконг орсон бол, гурваас зургадугаар байрыг Швейцарийн Цюрих, Женев, Каракас эзэлжээ. Эхний аравт Сөүл, Каракас, Хартум хот орсон байна. Паундын ханш унасны улмаас Лондон хот энэ жагсаалтад 132-р байрт бичигджээ. Токио хот 2016 оны турш дэлхийн хамгийн үнэтэй хот байсан юм.

Иракийн Курдистан тусгаар тогтнолын талаарх санал асуулга явуулна

Иракийн Курдистаны эрх баригчид тусгаар тогтнолын талаар бүх нийтийн санал асуулга явуулах товыг зарлалаа хэмээн Reuters агентлаг уламжлав. Курдистаны ерөнхийлөгчийн туслах Масуд Барзанийн туслах Хемин Хаврамийн мэдэгдэж буйгаар, бүх нийтийн санал асуулга 2017 оны есдүгээр сарын 25-нд болох ажээ. Бүс нутгийн оршин суугчид Иракийн бүрэлдэхүүнд өргөн автономит эрхээ хадгалан үлдэх үү, эсвэл бүрэн тусгаар тогтнох уу гэдгийг шийдэх хэрэгтэй болж байна. Курдын дарга, түшмэлүүд тайлбарлаж буйгаар, бүх нийтийн санал асуулга явуулах газар нутгийн бүрэлдэхүүнд Киркук хот болон эргэн тойрны газар нутгийг оруулах аж. Одоогоор энэ газар нутгийг курд босогчдын Пешмерга хүчин хянаж байгаа. Гэвч Багдад энэ бүс нутгийг Иракийн Курдистаны газар нутаг гэж үздэггүй ажээ.

Иракийн Курдистан нь Иракийн бүрэлдэхүүнд бий болсон курдуудын төр улс юм. Үндсэн хуулийн дагуу тус бүс нутаг нь өргөн автономит эрх эдэлж байгаа ч үнэн хэрэгтээ хагас тусгаар тогтнолд хүрээд байгаа билээ. Ерөнхийлөгч Масуд Барзани тэргүүтэй Курдистаны Ардчилсан нам бүс нутгийг үндсэнд нь хянаж байна. Курдистаны лидерүүд бүрэн тусгаар тогтнолын талаарх бүх нийтийн санал асуулга явуулах талаар аль эртнээс санаархаж ирсэн юм. Харин Багдадын эрх баригчид үүнийг эрс эсэргүүцсэн хэвээр байна. Хэрвээ Иракийн Курдистан Иракаас салж тусгаар улс болвол Турк, Сири, Иранд амьдардаг курд үндэстнүүдийн салан тусгаарлах үзлийг дэвэргэж, Ойрхи Дорнод дахь тогтвортой байдалд сөргөөр нөлөөлнө хэмээн тоймч, ажиглагчид үзэж байна. 

Лондонд халдлага үйлдсэн этгээдүүдийн нэрийг зарлав

Лондоны цагдаа зургадугаар сарын 3-нд халдлага үйлдсэн гурван этгээдийн хоёрынх нь нэрийг зарлав. Скотланд-Ярдаас мэдэгдэж буйгаар, Британийн нислэлийн баруун хэсгийн Баркинг дүүрэгт амьдардаг 27 настай Хурам Шазад Батт, 30 настай Рашид Редуан нар халдлага үйлдсэнийг тогтоогоод байна. Гурав дахь этгээдийн нэрийг хараахан зарлаагүй байна. Цагдаа нар гурван алан хядагчийг буудаж устгасан юм.

Хурам  Батт Пакистанаас гаралтай, Британийн паспорттой нэгэн аж. Редуан ямар гаралтай нь одоохондоо тодорхойгүй байна. Тэрээр өөрийгөө марокко, ливи гаралтай хэмээн нэрлэж байсан бөгөөд янз бүрийн нэр, төрсөн огноо ашиглаж байжээ. Батт түргэн хоолны ресторануудын сүлжээг удирддаг Auriga компанид ажиллаж байжээ. Тэрээр 2016 оны аравдугаар сар хүртэл Лондоны үлчлүүлэгчдийг дэмжих албанд зургаан сар дадлага хийж байсан аж. Хурам Шазад Батт нь Британийн цагдаа, МИ-5 тусгай албадын хараанд өртсөн нэгэн. Тэрээр лалын хэт даврах үзлээ ил гарган сурталчилж, Лондоны нэгэн цэцэрлэгт “Исламын улс” бүлгийн тугийг барьж бичлэг хийн цацац байсан юм. Батт энэ халдлагыг төлөвлөж байсан тухай мэдээллийг тусгай албад аваагүй байжээ. Харин Рашид Редуан тусгай албадын хараанд өртөж байгаагүй аж.

Халдлага үйлдсэн гурван этгээд амиа золиослогчийн хуурамч бүс зүүсэн байв. Нэг алан хядагчийн биед тэсрэх бөмбөг бэхэлсэн байгаа зураг тархсан ч энэ нь хуурамч тэсрэх бодис байсныг цагдаагийн газраас мэдэгдлээ. Өнгөрсөн хагас сайны орой нэг автомашин Лондоны гүүрэн дээр хүмүүсийг дайрч, дараа нь тэр автомашинаас гарч ирсэн гурван этгээд хутгаар зэвсэглэн хүмүүс рүү дайрсан юм. Тэд Боро-маркет зар руу халдсаныхаа дараа цагдаа нарт алуулжээ. Халдлагын улмаас долоон хүн амиа алдаж, 48 хүн шархдаж гэмтсэн байна. Хүнд шархадсан 18 хүнийг эмнэлэгт хүргэжээ. Энэ халдлагад 11 хүнийг сэжиглэн баривчилсан ч удалгүй суллажээ.

Qatar Airways зарим улс рүү нислэг хийхээ болив

Qatar Airways авиакомпани Саудын Араб, Арабын нэгдсэн эмират, Бахрейн руу хийдэг нислэгээ зогсоожээ. Энэ тухай компанийн сайтад мэдээлсэн байна. Нислэгээ зогсоосон шалтгаанаа албан ёсоор зарласангүй. Цуцлагдсан нислэгүүдийн зарагдсан тийзийг өөр нислэгээ солих, эсвэл мөнгийг нь буцаан авч болох аж. Саудын Араб, Египет, Бахрейн, Арабын нэгдсэн эмират улс Катар улсыг “Исламын улс”, “Аль-Кайда” бүлгийг дэмжиж, арабын орнуудын дотоодын тогтвортой байдалд сөргөөр нөлөөлж байна хэмээн буруутгаж дипломат харилцаагаа тасалж буйгаа зарласан юм. Үүний дараа Йемен, Ливи, Мальдив, Маврики улс мөн Катартай харилцаагаа тасалжээ. Катар улс Иракийн өмнөд хэсэгт барьцаалагдсан хааны гэр бүлийн 26 гишүүнийг суллахын тулд “Жабхат ан-Нусра” террорист байгууллагад 100 сая доллар төлсөн юм.

М.Пенс Оросын дэлхийн гол аюул гэжээ

АНУ-ын дэд ерөнхийлөгч Майк Пенс Атлантын зөвлөлийн хуралдаан дээр үг хэлэхдээ ОХУ, Иран болон терроризмыг дэлхийн гол аюул заналхийлэл болоод байна хэмээн онцлов. “ОХУ олон улсын хил хязгаарыг хаах оролдлого хийж байна. Иран Ойрхи Дорнодыг тогтворгүй болгохоор хичээж байна. Терроризмын аюул нэмэгдсээр байна. Тэд хэзээ ч, хаана ч цохилт өгөх боломжтой болж байгаа нь өнөөдрийн дэлхийг 25 жилийн өмнө коммунизм нуран унаснаас хойш улам аюултай болгож байна” хэмээн Пенс ярьжээ. Вашингтон НАТО-гийн хүрээнд холбоотны амлалтаа биелүүлэхэд бэлэн байгаа, эвслийн нэг гишүүнд халдвал бид бүгдэд халдсан гэж үзнэ хэмээн тэрээр нэмж хэлэв. Үүний өмнө ОХУ-ын Гадаад хэргийн сайд Сергей Лавров НАТО Европт цэргийн хүчин чадлаа нэмэгдүүлж тус тивийг тогтворгүй болгож байна хэмээн шүүмжилсэн юм.

Лууван-аягаар кофе ууж байна

Австралийн Сифорт хотод луувангаар хийсэн аяганд кофе хийн зочдоо дайлах болжээ. Кофенд дурлагсад дуртай ундаагаа шинэ аргаар уух янз бүрийн арга сэддэг. Энэ удаа carrot-cino буюу лууван-капучино хэмээх өвөрмөф кофег хэрэглэгчдэд санал болгож байна. Хэд хоногийн өмнө авокадогаар хийсэн аяганд латте кофе хийн үйлчилж байсан нь avo-latte хэмээх нэр аваад байсан юм. Сифорт дахь кофе-шоп энэ долоо хоногт кофегоо луувангаар хийсан аяганд хийж өгч байна. Дараагийн долоо хоногт алиман аяганаас кофе амталж болох ажээ. Нэг гэм нь луувангаар хийсэн аяга нь багтаамж муутай тул маш бага кофе ордог.