Ариана Грандегийн концерт дээр террорист халдлага гарчээ

Их Британийн Манчестер хотын “Манчестер Арена”-д террорист халдлага болсны улмаас 19 хүн амиа алдаж, 50 орчим хүн шархдаж бэртлээ. Америкийн дуучин Ариана Гранде “Манчестер Арена”-д тоглолт хийгээд дууссаны дараа буюу орон нутгийн цагаар 22:30-д дэлбэрэлт болжээ. Тэрээр сүүлчийн дуугаа дуулаад хөшигний араар орсны дараа стадионд хүчтэй дэлбэрэлт болсон байна. Үүний дараа 18 мянган хүний багтаамжтай “Манчестер Арена” цэнгэлдэх айдас, эмх замбараагүй байдалд автаж, сандарсан хүмүүс гүйлдэн гарчээ.

Амиа алдсан хүмүүсийн дунд өсвөр насныхан их байгаа аж. Дуучин Ариана Гранде өсвөр насныхан, залуусын дунд ихээхэн алдартай. Түүний концертыг маш олон хүүхэд, өсвөр насныхан үзэж байжээ. Цагдаа нар “Манчестер Арена” ордныг бүсэлж, шаардлагатай шалгалт, хяналтыг явуулж байна.

Зарим гэрч нэг хүчтэй дэлбэрэлт болсон гэж байгаа бол, бусад нь хоёр, бүр гурван ч дэлбэрэлт болсон гэв. Хамгийн анх ирсэн мэдээллээр, цэнгэлдэхийн тасалбар түгээгүүрийн дэргэд дэлбэрэлт болсон аж. Гэвч цагдаагийн газраас мэдээлснээр дэлбэрэлт концертийн танхимд биш, гадаа болсон бололтой. Амиа золиослогч этгээд бөмбөг дэлбэлсэн байж тун болзошгүй байна. Их Британийн Ерөнхий сайд Тереза Мэй мэдэгдэл хийж Манчестерт болсон халдлагад амь үрэгдсэн хүмүүсийн гэр бүлд эмгэнэл илэрхийлэв. Тэрээр “Энэ бол аймшигтай террорист халдлага. Цагдаагийн газар хэргийн учир шалтгааныг мөрдөн шалгаж байна” хэмээн мэдэгджээ. Гурав хоногийн дараа Их Британид парламентын сонгууль болно. Манчестерт халдлага болсонтой холбогдуулж эрх баригч Консерватив нам сонгуулийн сурталчилгаагаа зогсоожээ. Хэдэн цагийн дараа дуучин Ариане Гранде “Сэтгэл минь урагдлаа. Уучлаарай, уучлаарай гэж зүрхнийхээ угаас хэлье” хэмээн Твитертээ бичжээ.

Дөрөв хоногийн дотор дэлхийн дээвэрт хоёр удаа гарчээ

Энэтхэгийн 37 настай уулчин эмэгтэй Аншу Жамсенпа дөрөв хоногийн зайтай (тавдугаар сарын 16, тавдугаар сарын 21) Эверестийн оргилд хоёр удаа гарч дэлхийн шинэ дээд амжилт тогтоогоод байна. Өмнө нь өөр нэг эмэгтэй долоо хоногийн дотор хоёр удаа дэлхийн зулайд гарч байсан аж. Жамсенпа 2011 онд арав хоногийн дотор хоёр удаа Эверстийн оргилд гарч байсан юм.

Үүний зэрэгцээ өнгөрсөн амралтын өдрөөр Эверестэд авирч явсан гурван уулчин амиа алдсан гэсэн харамсалтай мэдээ иржээ. Түвдийн талаас авирч байсан Австралийн уулчин, мөн Балбын талаас авирч байсан Словак, Америкийн уулчин амь эрсэдсэн байна. Мөн Энэтхэгийн эрэгтэй уулчин Эверестийн оройд гарсныхаа дараа сураггүй алга болжээ.

“Коза Ностра”-гийн толгойлогч алуулжээ

Сицилийн “Коза Ностра” мафийн толгойлогч Жузеппе Дайнотти өнгөрсөн даваа гаригт Палермод алуулжээ. Түүнийг хотын төвийн Зиса дүүрэгт дугуйгаар зугаалж явахад нь мотоциклтэй хоёр этгээд гүйцэж ирээд толгойд нь хоёр сум зоожээ. Яг энэ газар хоёр жилийн өмнө “Коза Ностра” хамгийн сүүлчийн аллагаа хийж байсан юм. Мафийн толгойлогчийг хөнөөсөн этгээдүүд ор сураггүй алга болжээ. 67 настай Дайнотти дээрэм, цагдаагийн газрын ахмад Эмануэле Базиле, цагдаа Боммарито, Моричи нарыг хөнөөснийхөө төлөө 20 жил шоронд суугаад 2014 онд суллагдсан юм. “Коза Ностра” түүнийг үхсэн хэмээн зарласан тул Дайнотти “Амьд үхдэл” хочтой болоод байв. Яг 25 жилийн өмнө тус мафийнхан Сицилийн шүүгч Фалконегийн аминд хүрч байжээ. Сүүлийн үед “Коза Ностра”-гийн хүч ихээхэн суларсан ч тэднийг хөтлөх жинхэнэ толгойлогч гарч ирвэл тун хурдан “хөл дээрээ босно” хэмээн цагдаа нар үзэж байна.

Венесуэльд Уго Чавесийн төрөлх гэрийг шатаажээ

Улс төр, эдийн засгийн гүнзгий хямралд ороод байгаа Латин Америкийн Венесуэль улсад эсэргүүцлийн жагсаал, эмх замбараагүй байдал үргэлжилсээр байна. Өчигдөр жагсагчид улс орын экс Ерөнхийлөгч Уго Чавесийн төрөлх гэрийг шатаажээ. У.Чавесийн төрөлх гэр байшин Баринас мужид байдаг аж. Цагдаа нар 19 настай оюутныг хөнөөсний дараа ард иргэд хилэгнэн гудамжинд гарсны дараа ийм явдал болжээ. Өнгөрсөн гуравдугаар сард Венесуэлийн парламент улс оронд хүмүүнлэгийн хямрал нүүрлэснийг зарлаж, гадаадын тусламжийн сувгийг нээхийг уриалсан юм. Улс төрийн хямрал гүнзгийрсээр эдийн засгийн хямралд хүргэж, инфляц хэдэн зуун хувиар нэмэгдэж, гол хэрэглээний бараа ховордож үнэ нь тэнгэрт хаджээ. Сөрөг хүчнийхэн энэ хямралд Ерөнхийлөгч Мадурогийн харалган бодлого буруутай хэмээн үзэж түүнийг огцрохыг шаардсаар байна.

Канны кино наадмын хатан хаан

Канны кино наадмын “Алтан дал мод” шагналын эзэн долоо хоногийн дараа тодорно. 50 насыг шүргэж байгаа Австралийн кино од Николь Кидман энэ наадамд “Үдэшлэг дээр охидтой хэрхэн ярилцах вэ”, “Нуурын гүнд”, “Ариун хандгайн аллага”, “Үйлтэй дуршил” гэсэн дөрвөн киногоор оролцож байгаа юм. “Үдэшлэг дээр охидтой хэрхэн ярилцах вэ” киноны нээлтийн өмнө Н.Кидман анх удаа улаан хивсэн дээр олны өмнө гарчээ. Найруулагч Жон Митчеллийн кинонд 49 настай Кидман 19 настай америк жүжигчин Эль Фаннингтай хамт тоглосон юм.

Тэд улаан хивсэн дээр хамтдаа гарч иржээ. Канны кино наадмын хамгийн сайхан бүсгүй алдрыг хүртээд байгаа Николь Кидман залуу хамтрагчаасаа дутахгүй залуу, сайхан харагдаж байсан юм. “Алтан дал мод” шагналын эзнээр тодрох магадлалтай Н.Кидман “Оскар”, BAFTA шагнал болон “Алтан бөмбөрцөг”-ийг гурван удаа авч байв. “Бангкок-Хилтон”, “Мулен Руж”, “Догвилль”, “Хүйтэн уул” нь түүний хамгийн алдартай кино юм. 

Италийн мафи цагаачдын төвийг хянаж байжээ

2014 оны арванхоёрдугаар сард “Mafia capitale” буюу Италийн нийслэл Ром хотын мафийн гол тархи, хэт барууны үзэлтэй экс террорист Массимо Карминатийг баривчлахад улс төрийн хуйвалдааны ачаар олон жилийн турш оршин тогтнож байсан төрийн байгууллаар халхлагдсан авлигын систем илэрч байсан билээ. “Mafia capitale”-гийн хэргийг шалгахад тэд Итали дахь цагаачлалыг гартаа авч хар тамхины наймаанаас илүүтэй ашиг олж байсан нь тогтоогдсон юм. Өнгөрсөн даваа гаригт Италийн цагдаа тусгай ажиллагаа явуулж өмнөд хэсгийн Калабриа мужаас “Ндрангета” мафийн 68 гишүүнийг саатуулан баривчилжээ. Тэднийг цагаачдыг хүлээж авдаг Европын хамгийн том төвийг ашиг олох зорилгоор хяналтдаа байлгаж байсан хэмээн үзэж байна. “Ндрангета”-д харъяалагддаг “Арена” бүлгийн гишүүд Калабриа мужийн газар нутаг дээр айлган сүрдүүлэлт, спортын хууль бус бооцооноос гадна цагаачдыг хүлээж авах төв болон Лампедуза дахь цагаачдын хуарангийн хоол хүнсний хангалт, угааж цэвэрлэх үйлчилгээ, ажилчид хөлслөх зэргийг хяналтдаа авсан байв. Тэд эдгээр гэрээнээс жилд 30 сая еврогийн ашиг олдог байжээ.”Арена” мафийнхан Калабриа мужийн Энэрлийн ахан дүүс байгууллагын тэргүүн Леонардо Сакко, мужийн сүмийн тэргүүн Эдуардо Скордио нараар дамжуулан цагаачдыг хүлээж авах төвийг удирдан хянаж байсан юм.

2006-2013 онд тус төв Европын холбооны сангаас 103 сая еврогийн тусламж авчээ. Үүний 36 сая нь шууд “Ндрангета”-гийн халаасанд орсон байна. Мафитай хуйвалдаж байсан ламтан гэхэд л 3.6 сая еврогийн “орлоготой” ажилласан аж. Тэрээр зөвхөн 2007 онд дүрвэгчдэд ном айлдсаныхаа төлөө 132 мянган евро авч байжээ.

Европын холбооны сан болон Италийн Засгийн газраас цагаачдын төвд зориулан олгож байсан хөрөнгө мөнгө мафийн хамсаатан Саккогийн ачаар сүмийн мэдэлд шилжиж байсан юм. Сакко нь Калабриа дахь католик шашны хамгийн том байгууллагыг үндэслэгч төдийгүй өмнөд нутгийн алдартай бизнесмэн, улс төрд нөлөөтэй нэгэн. Тэрээр одоогийн Дотоод хэргийн сайд Анжелино Алфаногийн ойрын хүн бөгөөд Кротонегийн нисэх онгоцны буудлын Удирдах зөвлөлийн гишүүн ажээ. Цагаач, дүрвэгчдэд зориулсан мөнгийг зувчуулсан мафийнхан тэр мөнгөө хөлөг онгоц, байшин, дарвуулт хөлөг худалдаж авахад зарцуулдаг байв. “Мөнгө, эрх мэдэл байгаа газарт “Ндрангета” ирж, хамгийн цөхөрсөн, ядарсан хүмүүсийн халаасыг ч ухаж байна” хэмээн прокурорын газрын мэдэгдэлд онцолжээ. Италийн өмнөд нутагт цагаачдыг “сааж” ашиг олж байсан мафийн 68 гишүүнийг баривчилсан бол, хойд нутагт бас нэг тусгай ажиллагаа явуулж Германы “Лидл” супермаркетийн сүлжээнд нэвтэрсэн мафийг илрүүлээд байна. Цагдаа нар Сицилийн “Коза Ностра”-гийн нэг салбарын 15 гишүүнийг саатуулжээ. Тус мафи Италийн хойд нутаг болон Сицили арал дээр Германы супермаркетийн сүлжээг ашиглаж дөрвөн супермаркет ажиллуулж байжээ.

Хар тамхины мафийн тухай бичиж байсан сэтгүүлч амиа алджээ

Мексикийн Кульякан хотод хар тамхины мафийн гэмт хэргийн сэдвээр дагнаж бичдэг нэрт сэтгүүлч Хавиер Валдес алуулжээ. Түүнийг гудамжинд явж байхад амь насанд нь халдсан байна. 10 гаруй сум зоолгосон сэтгүүлч газар дээрээ амьсгал хураажээ. Х.Валдес амь насаа алдсан Синалоа муж нь энэ оны эхээр АНУ-д хүргэгдсэн Эль-Чапо хочит Хоакин Гусманы толгойлдог хар тамхины мафийн өлгийн нутаг юм. Хэдийгээр хамгийн том мафийн толгойлогчийг баривчилж АНУ-д шилжүүлж өгсөн ч тус мужид хар тамхины наймаа цэцэглэсээр, янз бүрийн гэмт бүлэглэлүүдийн хоорондох өрсөлдөөн улам ширүүсчээ.

Эдуар Филиппийг Францын Ерөнхий сайдаар томилов

Францын Ерөнхийлөгч Эммануэль Макрон Гавр хотын дарга, 46 настай Эдуар Филиппийг Ерөнхий сайдаар томилжээ. “Ерөнхийлөгч Эдуар Филиппийг Засгийн газрын тэргүүнээр томилж Засгийн газрын танхимаа бүрдүүлэхийг даалгалаа” хэмээн Елисейн ордны төлөөлөгч Алекси Колер сэтгүүлчдэд мэдэгдэв. Шинэ Ерөнхий сайд өнөөдрөөс ажлаа хүлээн авч байгаа аж.

Эдуар Филипп Парисын улс төрийн судалгааны хүрээлэнд сурч байхдаа Социалист намд элсч тэр үеийн Ерөнхий сайд  Мишель Рокарын сонгуулийн кампанит ажилд оролцож явжээ. Гэвч дараа нь тэрээр барууны үзэлтэй болсон аж. Сургуулиа төгссөний дараа Францын төрийн зөвлөлд орж төрийн худалдан авах ажиллагааг хариуцаж байв. 2008 онд Э.Филипп Сенийн Ерөнхий зөвлөлийн гишүүнээр сонгогдож, 2010 онд Гавр хотын дарга болжээ. 2017 оны эхэн хүртэл Филипп Бүгд найрамдах намын лидер  Ален Жюппегийн хэвлэлийн албыг хариуцаж байсан ч Жюппе Францын Ерөнхийлөгчийн сонгуульд нэр дэвшиж чадаагүй тул Макроныг сонгуульд дэмжиж ажилласан юм. 

Гэмшиж ухаарсан авлигачдыг өршөөж байна

Хятадын Коммунист намын Сахилга батын төв хороо гадаад руу зугтсаныхаа дараа эх орондоо сайн дураар буцан ирж буруугаа хүлээн зөвшөөрсөн зарим авлигачдыг өршөөж буйгаа мэдэгдэв. Хорооны дүгнэлтэд багтсан статистик мэдээнээс үзвэл, авлигын хэрэгт холбогдож гадаадад, тэр тусмаа Америк, Канад, Австрали руу зугтан гарч эрэн сурвалжлагдаж буй 100 гаруй авлигачдын 40 нь Хятадад буцаж иржээ. Тэдний ихэнх нь сайн дураараа буцаж ирсэн бол, нэг хэсэг нь тухайн улсын хууль хяналтынханд баригдаж хүчээр хүргэгдэж ирсэн байна. Хүргэгдэж ирсэн авлигачдыг шүүхээр оруулж заримд нь бүх насаар нь хорих ял оноожээ. Сайн дураараа буцан ирж гэмшиж буйгаа илэрхийлсэн гурван иргэнд ял шийтгэл оноолгүй сулласан аж. Тэдний нэг нь Жан Давэй. Тэрээр сайн дураараа эх орондоо ирж, үйлдсэн гэмт хэрэгтээ харамсч буйгаа мэдэгдээд хууль бусаар олж авсан бүх хөрөнгө, мөнгөө төрд буцааж өгчээ. Чжу Жэнью, Чан Липин нар мөн ийнхүү өршөөгдөн суллагджээ.

Си Зиньпин 2013 оны гуравдугаар сард Хятад улсын даргаар сонгогдсоны дараа авлигатай хайр найргүй тэмцэнэ гэдгээ зарласан билээ. Тэрээр авлига, хээл хахуультай тэмцэж, “барс”, “ялаа”-ны алинд нь ч ялгалгүй цохилт өгөх ёстой хэмээн уриалсан юм. Тэр цагаас хойш өндөр тушаалын хэдэн арван улстөрч авлигын хэргээр шийтгүүлжээ. Тэдний нэг нь Хятадын Коммунист намын Төв хорооны Улс төрийн товчооны гишүүн Жоу Юнкан. Тэрээр 2016 оны зургадугаар сард авлигын хэргээр насаараа шоронд хоригдох ял сонсчээ. Өмнөх Засгийн газрын үед ийм түвшний дарга, түшмэд халдашгүй дархан эрхтэй, мөрдлөг, шалгалтад өртдөггүй байсан юм. Гадаад руу зугтан гарсан авлигачдын эсрэг өнгөрсөн жилээс эхлэн “Үнэгний ав” хэмээх ажиллагааг эхлүүлжээ. Бээжингийн эрх баригчид хамгийн ихээр эрэн сурвалжилж буй 100 авлигач түшмэлийн жагсаалтыг гаргаж нуугдаж, бүгж буй улсаас нь шилжүүлэн авах оролдого хийж байна. Сайн дураараа эргэн ирж, буруугаа хүлээн зөвшөөрч учруулсан хохирлоо буцаан төлвөл өршөөх бодлого баримталж байгаа аж.  

Сирийн босогчид Табка хотыг “Исламын улс”-аас чөлөөлөв

Сирийн курд, араб дайчдын “Сирийн ардчилсан хүчин” эвсэл “Исламын улс” бүлгээс стратегийн чухал Табка хотыг чөлөөлснөө зарлалаа. Курд, араб дайчид хотыг болон жихадист босогчдын хяналтад байсаар байгаа Ракка хотоос баруун тийш 40 км-т орших үерийн даланг чөлөөлжээ. Табка хотын төлөөх тулаан хэдэн долоо хоногийн турш үргэлжилж, “Исламын улс” бүлгийнхэн амиа золиослогчид, мэргэн буучдын тусламжтайгаар ихээхэн эсэргүүцэл үзүүлсэн байна. Лалын босогчид хотын баруун хэсэг болон үерийн даланг тун их хүчээр хамгаалж байсан юм. Үерийн далан гэмтвэл бүс нутаг усанд автах аюултайг НҮБ сануулж байлаа. Табка хотыг эзлэн авсан курдууд хотыг самнаж, лалын дайчид үлдсэн эсэхийг нягталж байгаа аж. “Сирийн Ардчилсан хүчин” эвслийн цэргүүд АНУ тэргүүтэй олон улсын агаарын хүчний дэмжлэгтэйгээр Сирийн зургаан мянган кв км газар нутггийг “Исламын улс” бүлгээс чөлөөлөөд байна.

Табка хотыг эзлэн авснаар 2014 оны нэгдүгээр сараас хойш “Исламын улс” бүлгийн дайчдын мэдэлд байгаа  Ракка хот руу давших шинэ фронт нээгдэж байгаа юм. Ракка нь Сири, Иракийн газар нутаг дээр нэр нөлөөгөө тогтоогоод байгаа “Исламын улс” террорист бүлгийн гол түшиц хот, нийслэл нь ажээ. Тус хотыг дайран эзлэх ажиллагаа 2016 оны арваннэгдүгээр сард эхэлсэн. Одоогоор Сирийн курд, араб цэргүүд Ракка хотын хойд хэсгийг эзлээд байна.

Хуриман дээр хана нурж 20 хүн амь насаа алджээ

Энэтхэгийн баруун хэсгийн Ражастан мужид хуримын ёслол болж байх үеэр хана нурж 20 орчим хүн амь насаа алдлаа хэмээн орон нутгийн эрх баригчид мэдэгдэв. Амь үрэгдсэн хүмүүсийн дунд хүүхдүүд байжээ. 26 хүн гэмтэж бэртсэн байна.

Ражастан мужийн цагдаагийн газраас мэдэгдэж буйгаар, хуримын үеэр элсэн шуурга босч зочид дөрвөн метр өндөр хана хэрэмний доор хоргодож байжээ. Хана хүчтэй салхины улмаас нурж хүмүүсийг дарсан аж. Энэтхэгт борооны улиралд байшин барилга нурах нь бараг энгийн үзэгдэл юм. Хотод ажил хайж ирсэн хөдөөний хүмүүс муу материалаар хууль бусаар барьсан хямд орон сууцанд амьдардаг. Эдгээр барилга бороо, салхинд нурах нь элбэг ажээ.

Жихадистуудад зориулан хар тамхи үйлдвэрлэж байжээ

Лалын жихадист дайчид түрэмгий авир, тэвчээрээ нэмэгдүүлж, өвдөлтийг багасгахдаа байнга хэрэглэж заншсан сэтгэл зүйг өдөөгч хар тамхи үйлдвэрлэж байсан нууц цехийг Голландын цагдаа Лимбург мужаас илрүүлжээ. Сэтгэлийн хямрал, янз бүрийн өвчинд ашигладаг мансууруулах бодисын төрөлд орох каптагон хэмээх шахмал эмийг их хэмжээгээр үйлдвэрлэж байсан хоёр хүнийг саатуулан шалгаж байна. Каптагон нь амфетамин, кофеин гэсэн хоёр гол орц агуулж байгааг Голландын шүүх-эмнэлгийн хүрээлэнгийн мэргэжилтнүүд тогтоожээ. НҮБ-ын хар тамхитай тэмцэх хэлтсээс мэдэгдэж буйгаар, дэлхий дээр үйлдвэрлэж буй арван каптагон тутмын нэгийг хуурамчаар үйлдвэрлэдэг аж. Тэндээс олж байгаа орлогыг “Боко Харам”, “Хезболла”, “Исламын улс” зэрэг террорист байгууллагуудыг санхүүжүүлэхэд зарцуулдаг байна. Сэтгэцийг өөрчилж, хөөрөлд хүргэдэг эм бэлдмэлийг лалын дайчид, тэр тусмаа амиа золиослогчид ихээхэн хэрэглэдэг ажээ.

Валентино 85 хүрчээ

1952 оноос хойш Парис, Ромын хувцасны загварыг тодорхойлж, итали даавуун дээр франц нэхмэлийг ашиглаж атаархмаар амжилт олж байсан нэрт загвар зохион бүтээгч Валентино Гаравани 85 нас сүүдрийг зооглож байна. Тэрээр Жоржио Армани, Версаче нарын хамтаар Италийн агуу оёдолчдийн тоонд зүй ёсоор нэрлэгддэг. Улаан өнгийг өөрийн таних тэмдэг, амжилтын сахиусаа болгосон Валентино Италид төрж өсөөд 17 насандаа загвар зохион бүтээгч мэргэжлээр сурахаар Парист хөл тавьсан гэдэг. 1959 онд Ромд буцан ирж жижиг цехээ нээж, ердөө дараа жил нь суу алдар нь түгэж Ром, Нью-Йорк  хотод дэлгүүрээ нээжээ. Тэрээр “V” хэмээх тансаг, ганган, хээнцэр хувцасны брэндийг бий болгосон билээ.

45 жилийн турш романтик, цог жавхаатай, өө сэвгүй хувцас зохиож ирсэн Валентино дэлхийн хамгийн сайхан, алдартай, дур булаам бүсгүйчүүдийг хувцаслаж байсан юм. Жаклин Кеннеди Онассис, Жоан Коллинз, Грейс Келли, Глориа Гиннес, Элизабет Тейлор, Одри Хепбурн, Софи Лорен нар хуримын даашинзыг Валентино урлаж байв. Жулиа Робертс Оскарын шагнал авахдаа түүний урласан хар, цагаан өнгийн даашинз өмсөж байлаа. “Миний хуримын даашинз хамгийн гоё зохисон бүсгүй бол Жаклин Кеннеди байсан. Би хөөрхөн бүсгүй, хөөрхөн нохой, сайхан тавилгыг шүтдэг. Эмэгтэйчүүд сайхан, хөөрхөн байхын тулд юу хүсдэгийг би мэднэ” хэмээн нэрт загвар зохион бүтээгч өгүүлжээ. 

Мун Жае Ин Хойд Солонгост айлчлахад бэлэн

Өмнөд Солонгосын шинэ Ерөнхийлөгч Мун Жае Ин хоёр улсын харилцааг хэвийн болгох зорилгоор Хойд Солонгост айлчлахад бэлэн хэмээн мэдэгдэв. Тэрээр Сөүл хотод болсон тангараг өргөх ёслол дээр ийнхүү онцолжээ. “Хэрвээ шаардлагатай бол би Вашингтон руу нисэхэд бэлэн байна. Нөхцөл байдал бүрдвэл би Бээжин, Токио руу явах болно. Пхеньян руу ч явахад бэлэн байна” хэмээн Мун Жае Ин ярилаа. Ардчилсан намаас дэвшиж ялалт байгуулсан Мун Жае Ин Хойд Солонгостой яриа хэлэлцээ хийхийг дэмждэг. Тэрээр Ерөнхийлөгч Ро Мун Хегийн үед Хойд Солонгостой хэлэлцээ хийх, харилцаагаа хэвийн болгох зорилготой “Нарны бодлого”-ыг хэрэгжүүлж байсан юм. 64 настай Мун Жае Ин “Тобура” Ардчилсан намаас нэр дэвшиж сонгогчдын 41 хувийн саналаар ялалт байгуулжээ.

Цагаан ордон Өмнөд Солонгосын шинэ Ерөнхийлөгчид баяр хүргэсэн байна. Д.Трампын засаг захиргаа Хойд Солонгосын эсрэг хатуу бодлого баримтална гэж мэдэгдэж байсан. Харин Мун Жае Ин эрх мэдэлд гарч ирснээр АНУ-ын Хойд Солонгосын талаарх бодлогод хүндрэл гарч магадгүй болов. АНУ-ын Ерөнхийлөгч Өмнөд Солонгосын шинэ лидерт баяр хүргэсэн гэж үзэж болохгүй, энэ мэдэгдлийг Цагаан ордны хэвлэлийн төлөөлөгч Шон Спайсер хийсэн нь ёс төдий зүйл хэмээн ажиглагчид үзэж байна. Өнгөрсөн 10 жилийн хугацаанд Хойд Солонгос олон хатуу хориг арга хэмжээнд өртсөн бол, Пак Гын Хегийн Засгийн газар хойд хөрштэйгээ тогтоогоод байсан бараг бүх харилцааг таслан зогсоосон юм. Шинэ Ерөнхийлөгч Мун Жае Ин хойдуудтай яриа хэлэлцээ, харилцаа холбоогоо нэмэгдүүлэх бодлого баримтлах нь тодорхой байна.

Д.Трамп С.Лавровтой уулзана

АНУ-ын Ерөнхийлөгч Дональд Трамп өнөөдөр ОХУ-ын Гадаад хэргийн сайд Сергей Лавровыг хүлээн авч уулзана хэмээн Цагаан ордны хэвлэлийн албанаас уламжлав. Уулзалт Цагаан ордны Зууван танхимд сэтгүүлчдийн оролцоогүй болно. Д.Трамп нэгдүгээр сарын 20-нд АНУ-ын Ерөнхийлөгчийн тангараг өргөж ажилдаа орсноос хойш анх удаа Кремлийн өндөр албаны төлөөлөгчийг хүлээн авч байна. В.Путин дөрөвдүгээр сард АНУ-ын Төрийн нарийн бичгийн дарга Рекс Тиллерсоныг Кремльд хүлээн авч байв.

Өнгөрсөн долоо хоногт Д.Трамп, В.Путин нар телефон утсаар холбогдож ярилцсан юм. С.Лавров мөн АНУ-ын Төрийн нарийн бичгийн даргатай уулзаж Сири, Украины асуудлаар ярилцахаар болжээ. АНУ-ын нисэх хүчин Сирийн Засгийн газрын цэргийн агаарын баазыг бөмбөгдсөнөөс хойш Вашингтон, Москвагийн харилцаа эрс муудаад байгаа билээ. Дөрөвдүгээр сарын 7-нд АНУ Сирийн Идлиб дахь агаарын цэргийн бааз руу 59 “Томагавк” пуужин харвасан юм.

ХМТ-ны тэргүүнийг огцруулав

АНУ-ын Ерөнхийлөгч Дональд Трамп Холбооны мөрдөх товчооны тэргүүн Жеймс Комийг огцрууллаа. Цагаан ордноос мэдэгдэж буйгаар, Ерөнхийлөгч Д.Трамп ерөнхий прокурор Жефф Сешнс, түүний орлогч Род Розенстин нарын зөвлөгөөг үндэслэн ийм шийдвэр гаргажээ. “Өнөөдөр Ерөнхийлөгч Трамп ХМТ-ны тэргүүн Жеймс Комид албан тушаалаас нь огцруулж буйг мэдэгдлээ” хэмээн Цагаан ордны мэдэгдэлд онцолжээ. “Холбооны мөрдөх товчоо нь манай улс үндэстний хамгийн чухал, хамгийн хүндтэй байгууллага. Өнөөдөр манай хууль сахиулах системийн гол бахархал болсон байгууллагад шинэ эхлэл ирж байна” хэмээн Трамп мэдэгдсэн юм. Д.Трампын сонгуулийн штабын хүмүүс ОХУ-тай холбоотой байсан эсэхийг мөрдөн шалгасан ХМТ-ны тусгай хороог Ж.Коми удирдаж байсан билээ. Д.Трамп түүнийг ХМТ-г удирдах чадваргүй хэмээн үзсэн байна.

Крымд дэлхийн хамгийн том хуушуурыг хийжээ

Крымийн хойгт дэлхийд хамгийн томд тооцогдох 100 кг жинтэй хуушуур хийлээ хэмээн РИА “Новости” агентлаг мэдээлэв. Хуушуурны урт 2.5, өргөн нь 1.4 метр болжээ. 14 кг мах, бүтэн хагас шуудай гурил орсон байна. Хуушуурыг Хедерлез үндэсний баярт зориулж Крым-Татарын уламжлалт аргаар хийхэд 18 хүн оролцжээ. “Энэ бол нэр алдрын төлөөх уралдаан биш. Хүмүүсийг гайхашруулж, сайхан  хоолоор дайлах нь бидний ажил. Энэ бол дэлхийн хамгийн том хуушуур. Бид дэлхийн рекорд тогтоолоо. Өмнөх аварга хуушуур нь 2 метр урттай байсан” хэмээн ахлах тогооч Эмиль Алиев өгүүлэв. Дэлхийн хамгийн том хуушуураас Хедерлез баярт оролцож буй бүхэн амсаж болно. Хагас сайнд болох баярт Симферополь, Бахчисарайн хоорондох талбайд болоx ажээ.

“Ювентус” Аваргуудын лигийн финалд шалгарлаа

Италийн “Ювентус” нэр хүндтэй Аваргуудын лигийн финалд шалгарлаа. “Ювентус” өчигдөр талбайдаа Францын лигийн “Монако”-г хүлээн авч 2:1 харьцаагаар буулгаж авчээ. Эхний тоглолтод италиуд 2:0-ээр ялалт байгуулсан юм. Туринд болсон хариу тоглолтод “Ювентус”-ээс Марио Манжукич, Дани Алвес нар гоол оруулжээ. Зочин багаас Мбаппе ганц гоол оруулсан байна. Италийн баг финалд Испанийн “Реал Мадрид”-тай таарах магадлал өндөр байна. Эзэн хааны баг эхний тоглолтдоо “Атлетико Мадрид”-ыг 3:0-ээр буулгаж авахад Роналдо хет-трик хийж Аваргуудын лигт 103 дахь гоолоо оруулсан билээ. “Юве” Аваргуудын лигт хоёр удаа, “Реал Мадрид” 11 удаа түрүүлээд байна.

Месси, Антонелла нар хуримын товоо зарлав

“Барселона” болон Аргентины шигшээ багийн од Лионель Месси, Антонелла Рокуззо нар хуримаа хийж эхнэр, нөхөр болно гэдгээ өнгөрсөн арванхоёрдугаар сард зарласан билээ. Тэд арав гаран жил хамт амьдарч Тиаго (дөрвөн настай), Матео (нэг настай) гэсэн хоёр хүүтэй болсон юм. Испанийн EFE агентлаг мэдээлж буйгаар, нэрт хөлбөмбөгчийн хуримын тов түүний оролцож буй тэмцээн, тоглолтоос хамаарна гэж байсан ч тийм биш бололтой. Месси, Антонелла нар Мессигийн төрсөн өдөр буюу зургадугаар сарын 24-нд хуримаа хийх талаар нухацтай ярилцсан ч эцсийн эцэст зургадугаар сарын 30 гэсэн өдрийг сонгожээ.  Харин дэлхийн шилдэг хөлбөмбөгч хуримаа хийх газраар хүүхэд байхдаа ирээдүйн эхнэртэйгээ танилцаж байсан Аргентины Росарио хотыг сонгож авсан байна. 

Брэд Питт архи, хар тамхийг хаяжээ

Холливудын супер од Брэд Питт Анжелина Жолигоос салснаас хойш архи, хар тамхийг бүрмөсөн хаясан гэдгээ хүлээн зөвшөөрөв. Тэрээр GQ сэтгүүлд “Жолийг үзэн ядахыг хүсэхгүй байна. Зургаан хүүхдийнхээ сэтгэл санааг үймүүлмээргүй байна” хэмээн ярьжээ. 53 настай Питт салалтдаа ихэд гутарч нэг хэсэг архинд орж, архины донгоос ангижрах албадан эмчилгээнд хүртэл явсан юм. Өнгөрсөн арваннэгдүгээр сард Брэд Питт хүүхдээ зодоогүй гэдэг нь батлагдаж, хүүхдүүдтэйгээ уулзах эрхтэй болсон билээ. Жоли, Питт хоёр салалтынхаа нарийн ширийнийг дэлгэхгүй байх тохиролцоонд хүрснээр Холливудын хамгийн алдарт хосын дуулиан нэг хэсэгтээ намжаад байна. Тэд 2014 онд гэрлэжээ. Үүнээс өмнө арван жил хамт амьдарсан юм. Жоли, Питт нар зургаан хүүхэдтэй, гурав нь өргөмөл юм.

Facebook зохисгүй бичлэгтэй тэмцэнэ

Facebook сүлжээ түрэмгий, зохисгүй агуулгатай бичлэг, шууд дамжуулалттай тэмцэхийн тулд гурван мянган хүнийг нэмж хөлслөхөөр боллоо хэмээн тус сүлжээг үндэслэгч Марк Цукерберг мэдэгдэв. Өөрөөр хэлбэл, сүүлийн үед Facebook-ээр хүний аминд хүрч буй бичлэг цацадах болсонтой холбоотой ийм арга хэмжээ авч байгаа аж. Мөн зохисгүй бичлэгт гомдол мэдүүлэх механизмийг сайжруулснаар иймэрхүү бичлэгт даруй хариу өгч, устгах боломжтой болж байгаа юм. “Өнгөрсөн долоо хоногт шууд дамжуулалтыг хөтөлж байгаа хэн нэгэн амиа хорлож магадгүй гэсэн мэдээлэл авсан. Бид хууль хяналтын байгууллагатай даруй холбогдож болзошгүй таагүй явдлаас сэргийлж чадсан” хэмээн Цукерберг ярьжээ. Сүүлийн үед Facebook сүлжээгээр аллага үйлдсэн, амиа хорлосон бичлэгээ цацсан хэд хэдэн тохиолдол гарсан юм.

ОХУ Сирид 1.8 тн хүмүүнлэгийн тусламж хүргэжээ

Дайсагнагч талуудыг эвлэрүүлэгч Оросын төвийн мэргэжилтнүүд нэг хоногийн дотор Сирийн Алеппо болон бусад бүс нутагт зургаан удаагийн хүмүүнлэгийн тусламжийн ажиллагаа явуулжээ. Нийтдээ 1.8 тн хүмүүнлэгийн тусламжийг сири иргэдэд хүргэлээ хэмээн “Новости” агентлаг уламжлав. Аль-Шахба Аль-Кадим, Квартал 3000, Тамбуга, Аль-Сальхин, Тирабль-эль-Халек, Ханану,  Алеппогийн оршин суугчдад хүнсний бүтээгдэхүүн, эм бэлдмэл хүргэсэн байна. “Нэг хоногийн дотор мянга 240 иргэн хүмүүнлэгийн тусламжид хамрагдлаа” хэмээн тус төвийн мэдэгдэлд онцолжээ. Мөн ОХУ-ын онгоцууд НҮБ-ын шугамаар Сирийн эрх баригчдаас авсан 21 тн хүнсний бүтээгдэхүүнийг Дейр-эз-Зор хотод хүргэсэн байна.

Аварга гүрвэл жуулчин руу дайрчээ

Индонезийн зүүн хэсэгт хонин гүрвэлийн овгийн хамгийн том нь болох Комодогийн луу нэгэн жуулчин руу дайрчээ. Комодогийн дархан цаазат газрын ажилтны хэлж буйгаар, сүүлийн таван жилд анх удаа ийм тохиолдол гарч байгаа аж. Комодогийн луу нь Индонезийн арал дээр цөөн тоогоор байдаг. Дэлхийд хамгийн томд тооцогддог энэ гүрвэл гурван метр хүртэл урттай, 100 кг жин татах нь бий. Тэд хүнийг хазвал хортой, аминд нь хүрч болдог. Сингапурын 50 настай жуулчин аварга гүрвэлийн довтолгоонд өртжээ. Тэрээр сануулгыг үл хайхран зураг авах гэж байгаад хөлөндөө хазуулсан ч золоор амь наснаас нь хол өнгөрчээ.

Apple АНУ-д ажлын байр бий болгоход тэрбум доллар зарцуулна

Apple компани АНУ дахь ажлын байрыг нэмэгдүүлэхэд зориулж нэг тэрбум долларын хөрөнгөтэй сан байгуулна хэмээн тус компанийн тэргүүн Тим Кук мэдэгдлээ. Тэрээр энэ сангийн талаар илүү дэлгэрэнгүй зүйл яриагүй ч Apple эхний хөрөнгө оруулалтаа тавдугаар сард хийнэ хэмээн зарлав. “Ажлын байр бий болгох нь компанийн үүрэг мөн үү хэмээн олон хүн надаас асуудаг. Компани нь хүмүүсийн цуглуулга тул тэр компанид үнэ цэнэт зүйлс байх ёстой хэмээн би хариулдаг” хэмээн Кук ярьжээ. Apple компани бүтээгдэхүүнийхээ ихэнх хэсгийг АНУ-аас гадна байдаг үйлдвэрээс цуглуулдаг нь ихээхэн шүүмжлэлд өртдөг. Энэ шүүмжлэлийн улмаас тус компани сан байгуулах шийдвэр гаргасан хэмээн зарим тоймч үзэж байна. АНУ-ын Ерөнхийлөгч Д.Трамп өнгөрсөн нэгдүгээр сарын дундуур Alibaba-гийн эзэн Жек Матай уулзаж Хятадын компанийн үйл ажиллагааг АНУ-ын газар нутаг дээр өргөтгөж АНУ-д нэг сая ажлын байр бий болгох талаар ярилцсан юм. 

146 настай индонез эр таалал төгсөв

Түүнийг дэлхийн хамгийн хөгшин хүн гэдэг байсан ч хэзээ ч албан ёсоор хүлээн зөвшөөрөөгүй юм. Мбат Гото нэрээр мөн алдаршсан индонез өвгөн Содимежо Төв Жава мужид 146 насандаа өөд болов. Тэрээр 1870 оны арванхоёрдугаар сарын 31-нд мэндэлжээ. Түүний төрсний гэрчилгээн дээр байх огноо түүнийг 146 настайг илтгэн харуулдаг. Индонезийн орон нутгийн хэвлэл мэдээлж буйгаар, Содимежогийн оршуулгыг ач хүү Сурянто болон бусад хамаатнууд нь цомхон хүрээнд зохион байгуулжээ. Түүнийг дөрөв дэх гэрлэлтээс нь мэндэлж 60 наслаад өөд болсон охиных нь хажууд нутаглуулсан байна.

Содимежогийн ач хүү “Liputan6” мэдээллийн сайтад ярихдаа “Өвөө нэг өдөр өөд болно гээд хэдэн жилийн өмнөөс бэлтгэж байлаа. Хайрцгийг нь хийх модыг 18, хөшөө хийх чулууг нь 25 жилийн өмнө худалдаж авсан” гэжээ. Харин индонез буурай “Намайг хайрладаг хүмүүс намайг асарч бөөцийлж байсны ачаар би ийм олон жил амьдарлаа” хэмээн өнгөрсөн жил ВВС агентлагт ярьж байв. Тэвчээртэй хүлээцтэй байж, бусдыг хүлээн зөвшөөрч байсан нь өндөр наслах гол түлхүүр болсон хэмээн өгүүлж байсан юм.

Индонезид дөнгөж 1900 оноос эхэлж төрөлтийг албан ёсоор бүртгэж, баталгаажуулж эхэлсэн нь Содимежогийн настай холбоотой маргаан үүсэхэд хүргэжээ. Үүнээс өмнө төрсөн хүмүүсийн төрсөн огноог үнэн, баталгаатай гэж үзэх боломжгүй байгаа аж. Тэрээр 146 насласан нь үнэн бол дэлхийн хамгийн урт насласан хүн болж байна. Францын иргэн Жанне Калмент 122 наслаад 1997 онд өөд болсон нь дэлхийн хамгийн өндөр насласан хүнд тооцогддог.

Мбат Гото амьдралынхаа туршид олон үйл явдал, өөрчлөлтийн гэрч болжээ. Төрсний гэрчилгээг нь харвал, тэрээр Суэцийн суваг нээгдсэний дараа жил, Индонезид албадан хөдөлмөр буюу боолчлолыг халсан жилд хорвоод мэндэлсэн аж.

Ханхүү Уильям Францын хэвлэлүүдийг шүүхэд өгчээ

Их Британийн хатан хааны гэр бүл Францын хоёр шар хэвлэлийг ханхүү Уильямын гэргий Кейт Мидлтоны цээж нүцгэн зургийг нийтэлснийх нь төлөө шүүхэд өгч 1.5 сая евро нэхэмжилжээ. Францын Closer сэтгүүл, La Provence сонин 2012 оны есдүгээр сард Кейт Мидлтоны усан санд цээж нүцгэн орж байгаа гэрэл зургийг нийтэлсэн юм. Уильям, Кейт нар хамаатан Линлийн Франц дахь шилтгээнд зочлон амарч байсан аж. Энэ зураг Британид ихээхэн шуугиан дэгдээж, Бритаийн сонин, хэвлэлүүд Кейтийн нүцгэн зургийг нийтлэхээс татгалзаж байсан юм. Хатан хааны гэр бүл ч ихээхэн эгдүүцэж, шүүхэд хандана гэж байсан билээ. Хувийн амьдралын хэм хэмжээг зөрчсөн хэргээр уг гэрэл зургийг нийтэлсэн зургаан хүн шүүхэд дуудагдлаа. Тэдний дотор Closer сэтгүүлийн редактор, La Provence сонины гэрэл зурагчин байгаа аж.

Гитарчин Брюс Хэмптон 70 насныхаа ойн концерт дээр нас баржээ

Алдарт гитарчин, Hampton Grease Band рок хамтлагийг үндэслэгч Брюс Хэмптон тавдугаар сарын 1-нд Атланта хотод болсон 70 насных нь ойд зориулсан концерт дээр зүрхний өвчнөөр өөд болов. “Turn on Your Lovelight” дууг тоглож байх үед Хэмптоны зүрх хаагджээ. Тэрээр 50 жилийн өмнө домогт Фрэнк Залпийн хамтаар хөгжмийн замналаа эхэлж байсан юм.

1960-аад онд Hampton Grease Band хамтлагаа байгуулжээ. Хэмптон 1990-ээд онд ямар нэг бэлтгэлгүйгээр рок концерт тоглосоор алдаршиж байсан билээ. Тэрээр уран зөгнөлт, хийсвэр дуугаараа алдаршсан юм. Брюс Хэмптон 20 гаруй цомог гаргажээ.

Тансаг зэрэглэлийн галт тэрэгний тасалбар 10 мянган долларын үнэтэй

Японы East Japan Railway компани тансаг зэрэглэлийн шинэ галт тэрэг үйлчилгээнд гаргалаа. 10 вагоноос бүрдэж буй галт тэрэгний хамгийн үнэтэй тасалбар нь 10 мянган долларын үнэтэй. Анхны аялал нь Токио-Хоккайдо маршрутаар дөрвөн өдөр үргэлжилнэ. Аялагчид юм харж, баясаж яваг гэж хоёр вагоныг шилэн дээвэр, ханатай хийжээ. Шинэ, тансаг галт тэрэгний тасалбар өндөр үнэтэй байгаа ч 2018 оны гуравдугаар сар хүртэл захиалга дуусчээ. Японд тансаг зэрэглэлийн аялал ихээхэн хөгжиж, төмөр замын компаниуд шинэ үйлчилгээ нэвтрүүлж, шинэ галт тэрэг үйлдвэрлэх болсон аж. 2015 онд Японы Kyushu Railway компани “Долоон од” элит галт тэрэгнийхээ маршрутыг өөрчлөх шийдвэр гаргажээ. Зорчигч, аялагчдад далайн эргийн мартагдашгүй наран жаргалтыг харуулж таашаал өгөхийн тулд маршрутыг ийнхүү өөрчилсөн байна.

Кабулын төвд хүчтэй дэлбэрэлт боллоо

Афганистаны нийслэл Кабул хотын төвд хүчтэй дэлбэрэлт болж найман хүн амь насаа алдлаа хэмээн тус улсын Дотоод хэргийн яамнаас мэдээлэв. Амиа золиослогч этгээд бөмбөг дэлбэлсэн хэмээн цагдаагийн газраас мэдэгдлээ. 30 орчим хүн шархдаж бэртжээ. Амь үрэгдсэн хүмүүс нь бүгд энгийн иргэд байна. “Талибан” хөдөлгөөний гишүүн НАТО-гийн цэргийн эвслийн автомашины цувааг довтлох зорилготой байсан ч өөр газар бөмбөг дэлбэлсэн аж. Амиа золиослогч этгээд нь өндөр настай хүн байжээ. 

Н.Мадуро цалингийн доод хэмжээг 60 хувиар нэмэгдүүлэв

Венесуэлийн Ерөнхийлөгч Николас Мадуро цалингийн доод хэмжээг 60 хувиар нэмэгдүүлж буйгаа зарлав. “Цалин, тэтгэврийн доод хэмжээ, төрийн албаны ажилтнуудын шагнал, эмч, сувилагч, цэрэг, цагдаа, гал команд, багш нарын цалинг 60 хувиар нэмэгдүүлэх шийдвэр гаргалаа” хэмээн тэрээр мэдэгдлээ. Тавдугаар сарын 1-нээс цалингийн доод хэмжээ 40638-аас 65021 боливар болон нэмэгдэж байна. Улс орон даяар эсэргүүцлийн хөдөлгөөн, эмх замбараагүй байдал дэгдээд хэдэн долоо хоног болсны дараа төрийн тэргүүн ийм шийдвэр гаргажээ. Иргэд, цагдаа нарын хоорондох мөргөлдөөнд 29 хүн амь насаа алдаад байна. Иргэд эдийн засгийн байдалд сэтгэл дундуур байгаагаа илэрхийлж, хугацаанаас өмнө сонгууль явуулахыг шаардаж байгаа юм. Н.Мадуро гол өрсөлдөгч Энрике Каприлесийг улс төрд оролцохыг нь 15 жиллээр хоригложээ. АНУ-ын дэмжлэгтэй сөрөг хүчин төрийн эргэлт хийхийг санаархаж байна хэмээн Мадуро үзэж байна. 

Д.Трамп Ким Чен Уныг “Ухаантай залуу” хэмээн үнэлэв

АНУ-ын Ерөнхийлөгч Дональд Трамп CBS телевизийн нэвтрүүлэгт орохдоо Хойд Солонгосын удирдагчийн талаар ярьжээ. “Хүмүүс надаас асуудаг, тэр хэвийн хүн мөн үү гэж. Надад тэр талаар ойлголт алга. Гэхдээ тэр эцгийнхээ үхлийн дараа эрх мэдлийг гартаа авахдаа их залуухан 26, 27 настай байсан. Ким Чен Ун генералууд болон бусад улстөрч гээд маш хэцүү, эвгүй хүмүүстэй ажил хэрэг явуулах хэрэгтэй болсон. Тэр хар залуугаараа эрх мэдлийг атгаж, барьж чадсан. Олон хүн, тэр тусмаа түүний хүргэн ах нь түүнээс эрх мэдлийг нь булааж авах гэж оролдсон гэдэгт би итгэлтэй байна. Гэвч тэр тэсч чадсан. Тэгэхээр тэр хангалттай ухаантай залуу гэдэг нь харагдаж байна” хэмээн Америкийн лидер ярьжээ.

Ким Чен Уны хүргэн ах Чан Сон Тэк төрийн эргэлт хийхийг оролдсон хэрэгт буруутгагдан 2013 оны арванхоёрдугаар сард цаазаар авахуулсан билээ. Чан Сон Тэк нь Ким Чен Ирийн хамгийн ойрын шадар, Хойд Солонгос дахь хамгийн нөлөө бүхий хүний нэг байсан юм. Ким Чен Ун эрх мэдэлд гарснаасаа хойш хоёр жилийн дараа ийнхүү хамгийн тэрслүү, хамгийн аюултай өрсөлдөгчөө замаасаа зайлуулсан аж.

Хойд Солонгосын тал өнгөрсөн амралтын өдөр ээлжит баллистик пуужингийн туршилтаа хийжээ.  Гэвч энэ туршилт амжилтгүй болж пуужин Хойд Солонгосын газар нутаг дээр дэлбэрсэн хэмээн Өмнөд Солонгос мэдээлэв. Пхеньяны эдгээр үйлдэлд хариу арга хэмжээ авах уу гэсэн асуултад АНУ-ын Ерөнхийлөгч Д.Трамп “Би энэ сэдвээр яриад баймааргүй байна. Бид юу хийх гэж буйгаа яриад, дэлгээд байж болохгүй. Энэ бол яг шатрын өрөг л гэсэн үг. Юу бодож, юу сэдэж байгаагаа ил гаргаад байх хэрэггүй” хэмээн хариулжээ. Гэсэн хэдий ч тэрээр Хойд Солонгосын хямралыг цэрэг, дайны замаар шийдэх боломжийг үгүйсгэсэнгүй.

Хойд Солонгос, АНУ-ын харилцаа сүүлийн үед ихээхэн муудаад байна. Пхеньян баллистик пуужингийн туршилтаа үргэлжлүүлэн хийж хөрш Өмнөд Солонгос, Япон болон АНУ-ыг ихээхэн түгшээгээд байгаа билээ. Харин Вашингтон Солонгосын хойг руу “Карл Винсон” байлдааны тээгч хөлөг онгоцоо илгээжээ. АНУ ийнхүү сүр хүчээ үзүүлж буйн хариуг нь барина, хүчтэй цохилт өгнө хэмээн хойдууд мэдэгдэж байна. Хойд Солонгосын арми хариу цохилт өгч “Карл Винсон”-ыг живүүлэх ч боломжтой хэмээн мэдэгджээ. Хойд Солонгосын хямралыг шийдвэрлэхэд Пхеньяны гол түнш Хятадыг гол үүрэг гүйцэтгээсэй гэж АНУ хүсч байна. Хятадын лидер Ким Чен Унд шахалт үзүүлснээр цөмийн хэнээрхлийг нь зогсоож чадна хэмээн Дональд Трамп үзэж байна.

Тони Блэр улс төрд эргэж ирнэ

 Их Британийн Ерөнхий сайд асан Тони Блэр Британи Европын холбооноос гарах болсонтой холбогдуулж улс төрд эргэн ирэхэд бэлэн гэдгээ зарлав. “Brexit (Их Британийн Европын холбооноос гарах шийдвэр) улс төрд эргэн ирэх шалтгаан боллоо” хэмээн тэрээр хэвлэлд ярьсан байна. Их Британид ийм түүхэн үе тохиож байхад тэрээр дуугүй суугаад байхыг хүсээгүй аж. “Улстөрчид өнөөдөр үнэхээр их урам зоригтой ажиллаж байна. Гэвч орчин үеийн дэлхий хэрхэн өөрчлөгдөж байгаа талаар тэд хангалттай ойлгоогүй гэж бодож байна” хэмээн Тони Блэр өгүүлэв. Т.Блэр өнгөрсөн хоёрдугаар сард Brexit-ийг эсэргүүцэж үг хэлснийхээ төлөө ихээхэн шүүмжлэлд өртсөн юм. Тэрээр 1997-2007 онд Их Британийн Ерөнхий сайдаар ажиллажээ.

351 энгийн иргэний аминд хүрчээ

Ирак, Сири дахь “Исламын улс” бүлгийн эсрэг байлдааны ажиллагаа явуулж байгаа АНУ тэргүүтэй олон улсын цэргийн эвсэл довтолгооны үеэр амь үрэгдсэн энгийн иргэдийн тоог зарлажээ. 2014 оны наймдугаар сард лалын босогчдын эсрэг цэргийн ажиллагаа явуулж эхэлснээс хойш олон улсын цэргийн эвслийн агаарын довтолгоо, их бууны галд 351 энгийн иргэн санамсаргүй амь насаа алджээ. 2014 оны наймдугаар сараас 2017 оны гуравдугаар сарын хооронд “Исламын улс” бүлгийн эсрэг 20 мянга 205 довтолгоо хийсэн байна. Гэвч АНУ-ын цэргийнхний гаргасан энэхүү то баримтыг зарим байгууллага хүлээн зөвшөөрөхгүй байна. Бие даасан судалгаа, ажиглалт хийдэг Airwars групп “Лалын босогчдын эсрэг хийсэн довтолгооны явцад амиа алдсан энгийн иргэдийн тоо гурван мянгыг давна” хэмээн мэдэгджээ.