Нууц үйлдвэрт хүүхдүүдийг өдөрт 19 цагаар ажиллуулж байжээ

Хятадад хүүхдүүдийг хөлсөлж, өдөрт 19 цагаар албадан ажиллуулж байсан хувцасны үйлдвэрийн эздийг баривчилжээ. Хэвлэлд бичиж буйгаар, Чаншу хот дахь тус үйлдвэр 13 настай хүүхдүүдийг авчирч бохир, харанхуй байранд албадан хөдөлмөр хийлгэдэг байсан аж. Хуурамч дүрээр тэнд ажиллаж байсан нэгэн сэтгүүлч уг үйлдвэрийн талаар зургаан минутын бичлэг хийж Хятадын Pear Video сайтад тавьснаар цагдаа нарын анхааралд өртсөн байна. Чаншу дахь хувцасны нууц үйлдвэрт ядуурлын түвшин өндөр байдаг Хятадын өмнөд хэсгийн хөдөө нутгийнхан голдуу ажилладаг. Ажил өглөө 07:30-д эхэлдэг ба өдрийн хэтийдсэн их нормоо биелүүлэх гэж ийнхүү олон цагаар ажилладаг байжээ. Заримдаа тэдний ажлын цаг үүрээр дуусдаг байсан бололтой. Үйлдвэрийн эзэд ажилчдаа сард 28 хоног ажиллуулдаг байсныг тогтоогоод байна.

Харин эздийн нэг нь “Ажилчид сард 1000-3000 юанийн (145-435 доллар) цалин авдаг. Хүүхдүүдийг албадан ажиллуулсан юм байхгүй, тэд сайн дураар ирж ажилладаг” хэмээн мэдүүлжээ. Цагдаа нар энэ мэдээллийг шалгаж байна. Гэвч ажилчин хүүхдүүдийн бичиг баримт, гар утсыг хураан авч, үйлдвэрээс гарах, зугтах боломжийг нь хаадаг байсныг сэтгүүлчид олж мэдсэн юм. Энэ хэрэг явдлын дараа Чаншу хотын захиргаа хувцас, оёдлын үйлдвэрүүдэд шалгалт явуулахаар болжээ.

Б.Питттэй холбоотой хэргийг хаажээ

Холбооны мөрдөх товчоо АНУ-ын жүжигчин Брэд Питт хүүхдүүддээ харгис хэрцгий

хандаж, зодож цохьсон гэх хэргийг шалгасны эцэст “Нотолгоо олдсонгүй” хэмээн хэрэгсэхгүй болгож хаажээ. Холливудын хамгийн зартай хос Брэд Питт, Анжелина Жоли нар муудалцаж салсны дараа Жоли түүнийг нэгэн аялалын үеэр хүүхдээ зодсон хэмээн цагдаад хандсан юм. ХМТ энэ гомдлын мөрөөр шалгалт явуулсан ч Питтийг буруутгах ямар нэг үндэслэл байхгүй хэмээн үзжээ. Ийнхүү Брэд Питт гэм буруугүй нь нотлогдсон тул зургаан хүүхдийнхээ асран хамгаалал дээр шүүх дээр ялалт байгуулж магадгүй боллоо. Анжелина Жоли “Зургаан хүүхдээ өөр дээрээ авна. Эцэгтэй нь уулзуулахгүй” гэж байгаа. Гэвч ХМТ дээрх хэргийг хааснаар Брэд Питт хүүхдүүдтэйгээ уулзаж байх зөвшөөрлийг авч чадахаар боллоо.

Сирийн цэргүүд Алеппогийн зүүн хэсгийг довтолж байна

Сирийн Засгийн газрын цэргүүд Алеппо хотын зүүн хэсгийг босогчдоос чөлөөлөхийн тулд нэмэлт хүчээр довтолж эхэллээ хэмээн “Тасс” агентлаг орон нутгийн хэвлэлээс иш татан мэдээлэв. Танк, их буугаар дэмжүүлсэн сири цэргүүд Алеппо хотын Баидин талбайн зүг давшиж эхэлжээ. Масакин-Ханано дүүрэгт үүрлэж байгаа “Жебхат Фатх аш-Шам” дүүргийг их буугаар буудсаар байна. Өчигдөр гэхэд л Засгийн газрын хүчин зүүн Алеппогийн таван чухал байрлалыг эзлэн авчээ. Үүний зэрэгцээ, зэвсэгт босогчид энгийн иргэдийг амьд бамбай болгон ашиглахаа зогсоож, хотын зүүн хэсгийг орхин явахыг Сирийн агаарын хүчний командлалаас шаардлаа. Сүүлийн хэдэн өдрийн дайн байлдаанд Алеппо хотын хэд хэдэн сургууль, эмнэлэг, орон сууц их бууны суманд өртөн сүйрчээ.