Европт халдлага үйлдэж болзошгүйг анхааруулав

Зул сар, шинэ жилийн баярын үеэр Европ даяар халдлага, дэлбэрэлт үйлдэгдэх магадлалтай байгааг АНУ-ын Төрийн департамент санууллаа. АНУ-ын иргэдэд зориулж гаргасан анхааруулгад, өөрсдийгөө “Исламын улс” гэж нэрлэсэн жихад дайчдын бүлэг болон бусад хэт даврагч байгууллага Европын орнуудад Зул сарын баярын үеэр халдлага зохион байгуулахаар төлөвлөж байгааг онцолжээ. “Баттай эх сурвалжаас авсан мэдээллээр, “Исламын улс”, “Аль-Кайда” болон тэдгээрийн салбар, үүрүүд Европт олон нийтийг хамарсан баяр цэнгүүний үеэр алан хядах ажиллагаа явуулахаар төлөвлөж байна” хэмээн Төрийн департаментын мэдэгдэлд онцлоод аялагч жуулчдын хөл ихтэй гудамж, тээврийн хэрэгсэл болон бусад газраар анхаарал сэрэмжтэй явахыг америк иргэдэд анхааруулжээ. Хэдийгээр сүүлийн жилүүдэд Бельги, Герман, Франц, Турк дахь хэт даврагчдын хүч ихээхэн суларсан ч Европын аль ч хэсэгт халдлага үйлдэх чадвартай байгааг анхаарууллаа.

Хятадад 56 автомашин мөргөлджээ

Хятадын Шаньси мужид 56 автомашин оролцсон осол гарч дор хаяж 17 хүн амь насаа алдлаа хэмээн “Синьхуа” агентлаг уламжлав. 37 хүн гэмтэж бэртжээ. Бээжин, Куньмин хотыг холбосон зам дээр энэ осол гарчээ. Олон хүн, автомашиныг хамарсан осол нойтон цас, зам дээрх хальтиргаа гулгааны улмаас болсон хэмээн таамаглаж байна. Гэмтсэн хүмүүсийг хамгийн ойрхон эмнэлэгт хүргэх ажлыг шуурхай зохион байгуулав. Өнгөрсөн наймдугаар сард АНУ-ын Жоржиа мужид 27 автомашин оролцсон томоохон осол гарч байсан юм.

Фукушимагийн гурван мянган иргэнийг нүүлгэв

Японы Фукушима мужид 7.4 магнитудын хүчтэй газар хөдөлж, цунами үүсэх аюултай болсон тул тэр хавийн гурван мянга гаруй иргэнийг яаралтай нүүлгэн шилжүүлжээ. Орон нутгийн эрх баригчдын шийдвэрээр орон гэрээ орхин гарсан хүмүүсийг түр байрлуулах 60 орчим байрыг угсарч бэлэн болгоод байна. Фукушима мужийн баруун хойд хэсгийн далайн эрэг орчмын 150 сургуулийг хаажээ. Онц байдлын яамны сайд Мацүмотогийн мэдэгдсэнээр, хүчтэй газар хөдлөлтийн дараа үүссэн цунами мэдэгдэхүйц аюул учруулсангүй өнгөрчээ. Хүчтэй газар хөдлөлтийн улмаас Японы зүүн хэсэгт 1.4 метрийн өндөр цунами үүссэн хэмээн мэдээлж байсан юм.

Алеппод хүмүүнлэгийн тусламж хүргэнэ

НҮБ арваннэгдүгээр сарын 24-нд Сирийн Алеппо хотод хүмүүнлэгийн тусламж хүргэхийн тулд Москва, Дамаск хоёроос зөвшөөрөл авч чадна хэмээн тооцоолж байна. НҮБ-ын Сирийн асуудал хариуцсан тусгай элч Ян Эгеланн “Бид Орос, Сирийн Засгийн газрын зөвшөөрлийг хүлээж байна. Зохих хариуг нэн даруй өгөхийг хүсч байна” хэмээн мэдэгджээ. Дайны хөлд нэрвэгдээд байгаа Алеппо хотын зүүн хэсэгт хүмүүнлэгийн тусламж хүргэхийг босогчдын зэвсэгт бүлэглэлүүд зөвшөөрөөд байгаа юм. Хэдэн хүнд эмнэлгийн яаралтай тусламж үзүүлж, хэдэн хүнийг дайн байлдааны бүсээс гаргахыг нарийн тодруулах шаардлагатай болж байна. Зарим мэдээллээр, хүнд өвчтэй, шархдаж бэртсэн 400 орчим хүнийг яаралтай өөр хотын эмнэлэгт хүргэх шаардлагатай байгаа аж. Энэ завсар АНУ-ын Ерөнхийлөгч Барак Обама Сирийн хямралыг богино хугацаанд шийдвэрлэнэ гэдэгт итгэж буйгаа илэрхийлжээ. “Сирид цэргээ оруулах хууль ёсны үндэслэл алга. Тийшээ цэргээ оруулбал стратегийн алдаа болж, хөрш Иракт муугаар нөлөөлнө” хэмээн тэрээр онцолжээ.