Д.Трамп гурван сая хууль бус цагаачийг хөөж гаргана

АНУ-ын  Ерөнхийлөгчөөр сонгогдсон Дональд Трамп гэмт хэрэгт холбогдож байсан  бичиг баримтгүй цагаачдыг улс орноос хөөн гаргана хэмээн CBS телевизийн “60 минут” нэвтрүүлэгт оролцохдоо дахин батлан хэллээ. Түүний энэ шийдвэр АНУ-д амьдарч буй гурван сая орчим цагаачийг албадан гаргахад хүргэж болзошгүй байна. “Урьд нь гэмт хэрэгт холбогдож байсан дээрэмчид, хар тамхи зөөгчдыг улс орноос хөөн гаргах болно. Эс бөгөөс тэднийг шоронд хийнэ” хэмээн Трамп сонгуульд ялснаасаа хойш анх удаа телевизэд ярилцлага өгөхдөө онцолжээ. Эхлээд хил хязгаараа чангатгаж байгаад дараа нь АНУ-д амьдарч буй хууль бус иргэдийн асуудлыг нэг тийш шийдвэрлэнэ хэмээн Цагаан ордны дараагийн эзэн өгүүлжээ. Трамп хэдийгээр цагаачдын эсрэг хатуу бодлого баримтална гэж байгаа ч тэднийг “Гайхамшигтай хүмүүс” хэмээн тодотгосон аж.

Нэгдсэн улсын хил хязгаарыг чангатгаж, бэхжүүлнэ хэмээн амлаж байгаа Дональд Трамп Мексик, Америкийн хилийн дагуу хана хэрэм барих хүсэлтэй байгаагаа дахин илэрхийлсэн юм. Хоёр улс гурван мянган км газраар хиллэдэг. Мексик болон Латин Америкийн орнуудын иргэд хууль бусаар нэвтэрдэг хэсэг болон бусад эмзэг газруудад хамгаалалтын өндөр хана хэрэм босгох санаатай байгаа аж. “Хилийн зарим хэсгээр хашаа хаалт, нөгөө хэсгээр нь хана хэрэм барих хэрэгтэй. Би барьж байгуулахдаа сайн хүн шүү” хэмээн Трамп ярьжээ.

Болгарын сонгуульд социалист нэр дэвшигч яллаа

Болгарын Ерөнхийлөгчийн сонгуулийн хоёрдугаар шатанд Социалист намын нэр дэвшигч Румен Радев ялалт байгуулжээ. Тэрээр сонгогчдын 58 хувийн санал авсан байна. Европын хөгжлийн намын нэр дэвшигч Цецка Цачева 35 хувийн санал авчээ. Ерөнхийлөгчийн сонгуульд Цачевийг дэмжиж байсан Болгарын Ерөнхий сайд Бойко Борисов огцорч буйгаа мэдэгдсэн юм. “Эрх баригч эвсэл олонхийн санал авахгүй нь тодорхой боллоо. Иргэдийн санаа бодол, сонголтыг хүндэтгэж байна” хэмээн Борисов ярьжээ. Болгарын Ерөнхийлөгчийн сонгуулийн нэгдүгээр шат арваннэгдүгээр сарын 6-нд болж Радев 26.4 хувийн санал авсан юм. Болгарын цэргийн нисэх хүчний командлагч 53 настай Румен Радев төрийн тэргүүнд өрсөлдөхийн тулд 2016 оны наймдугаар сард албан тушаалаа орхиж сонгуулийн кампанит ажлаа эхлүүлж байв. Тэрээр Европын холбооноос Оросын эсрэг тавьсан хоригийг цуцлах ёстой хэмээн үздэг аж.

Мьянмад 25 хүн амиа алджээ

Мьянма улсын баруун хэсгийн Ракхайн мужид Засгийн газрын цэргүүд, босогчдын  хооронд зэвсэгт мөргөлдөөн болж 25 хүн амиа алджээ. Ихэвчлэн рохинж омгийн хүмүүс амиа алдсан бөгөөд тэд балиус, модоор зэвсэглэсэн байсан хэмээн мэдээлж байна. Энэтхэг, Бангладешийн хил орчимд амьдардаг үндэстний цөөнх рохинж үндэстнүүд Мьянмагийн хүн амын дөрвөн хувийг бүрдүүлдэг. Тус улсын эрх баригчид босогчдын эсрэг үйл ажиллагаа явуулсан гэж мэдээлж байгаа ч үнэн хэрэгтээ эмэгтэйчүүд, хүүхдүүдийн амь насанд хүрсэн хэмээн хүний эрхийн байгууллагууд мэдэгдэж байна. 2012 онд буддын шашинтнууд болон лал шашинтай рохинж нарын хооронд дайн, мөргөлдөөн дэгдсэний дараа олон мянган рохинж үндэстэн Тайланд, Малайз руу зугтан дүрвэсэн юм.