Босогчид Алеппог алдсан ч бууж өгөхгүй

Сирийн Засгийн газрын цэргүүд босогчдын хяналтад байдаг Алеппо хотын зүүн талын үлэмж хэсгийг эзэлж авсан билээ. Алеппо хотыг босогчдоос бүрэн чөлөөлөх нь цөөхөн хоногийн асуудал болоод байна. Гэвч Ерөнхийлөгч Башар Асадын эсрэг тэмцэж буй босогчид бууж өгөхгүй, стратегийн чухал хот Алеппог буцааж авахын тулд тэмцсээр байх болно хэмээн мэдэгдлээ. Нөхцөл байдал ийм болсны дараа энхийн тохиролцоонд хүрэх бүр хэцүү боллоо хэмээн Сирийн чөлөөлөх армийнхан ярьж байна. Дайн, байлдаан ширүүссэний улмаас Алеппо хотын хэдэн мянган иргэн орон гэрээ орхин дүрвэжээ. Иранаас санхүүжиж, Оросын нисэх хүчний дэмжлэгийг авсан Сирийн арми сүүлийн үед эрчимтэй давшиж чухал чухал байрлал, хотуудыг эзлэсээр байгаа юм.

Их сургуульд халдсан этгээд нь Сомалийн цагаач байжээ

АНУ-ын Охайогийн их сургууль руу халдсан 18 настай оюутан Абдул Разак Али Артан нь Сомали улсаас дүрвэж АНУ-д хууль ёсны дагуу оршин сууж байжээ. Одоогоор цагдаа нар энэ хэрэг явдлыг алан хядлага гэж үзэхгүй байгаа аж. Абдул Разак орон нутгийн цагаар өглөөний 10.00 цагт автомашинаа жолоодож инженерийн факультетийн байрны өмнө байсан хүмүүсийг дайрчээ. Дараа нь автомашинаасаа гарч ирээд хутга барин дайрсан байна. Хий алдагдсан гэсэн дуудлагаар тэр хавьд ирээд байсан цагдаа ердөө л нэг минутын дараа халдагч этгээдийг буудаж унагахад тэрээр 11 хүнийг шархдуулж амжсан байв. Нэг хүний биеийн байдал хүнд байна.

Колумбид 72 зорчигчтой онгоц сүйрчээ

Боливоос хөөрч Колумбийн Медельин хот орохоор нисч явсан нисэх онгоц сүйрлээ хэмээн орон нутгийн радио мэдээлжээ. Хэвлэл мэдээллийн хэрэгслүүд уламжилж буйгаар, онгоцонд Бразилийн хөлбөмбөгийн Chapecoense баг бүрэн бүрэлдэхүүнээрээ явж байсан аж. Нийт 27 хөлбөмбөгч, мөн сэтгүүлч, сурвалжлагч нар байжээ. Chapecoense багийнхан Өмнөд Америкийн цомын финалд Колумбийн Atletico Nacional клубтэй тоглохоор явж байсан юм. Ослоос хүн амьд гарсан эсэх нь тодорхойгүй байна.