Тереза Мэй Brexit-ийн үйл явцыг эхлүүлэв

Их Британийн Ерөнхий сайд Тереза Мэй Их Британийг Европын холбооны бүрэлдэхүүнээс гаргах үйл явцыг албан ёсоор эхлүүлэх баримт бичигт гарын үсэг зурж баталжээ. Лиссабоны гэрээний 50-р бүлгийг үндэслэн Европын холбооноос гарах үйл явцыг эхлүүлж байгааг албан ёсоор мэдэгдэж буй захидлыг Европын зөвлөлийн тэргүүн Дональд Тускт хүргүүлсэн байна. Европын холбоон дахь Их Британийн төлөөлөгч Тим Барроу гуравдугаар сарын 29-ний 12.30 цагт (Лондоны цагаар) Ерөнхий сайдынхаа захидлыг гардуулж өгснөөр Brexit буюу Их Британи Европын холбооны бүрэлдэхүүнээс гарах үйл явц албан ёсоор эхэллээ. Үүний дараа Тереза Мэй сайд нарын танхимийн гишүүдтэй уулзалт хийж, Британийн парламентад үг хэлжээ. Тэрээр парламентын гишүүд, лордуудын өмнө хэлсэн үгэндээ Европын холбоог орхих үйл явц эхэлснийг онцолсон юм. “Энэ улс орны хүн тус бүрт хэрэгтэй шийдвэрийг гаргасан гэдэгтээ итгэлтэй байна. Европын холбооноос гарах шийдвэр нэгэнт гарсан тул ард иргэд, улс орныг эв нэгдэл, нягтралд уриалж байна” хэмээн Мэй хэлжээ.

Тереза Мэй Brexit-ийг албан ёсоор эхлүүлэхээсээ өмнө, мягмар гаригт Европын зөвлөлийн дарга Дональд Туск, Европын холбооны Засгийн газрын тэргүүн Жан-Клод Юнкер, Германы канцлер Ангела Меркель нартай утсаар ярьсан байна. Европын холбооны лидерүүдийн дээд хэмжээний уулзалт өчигдөр эхлэхэд Их Британийн төлөөлөл байсангүй. Энэ уулзалтаар Европын холбооны Засгийн газарт Brexit-ийн талаар хэлэлцээ хийх эрхийг олгох аж. Үүний дараа Жан-Клод Юнкер тэргүүтэй Европын холбооны гүйцэтгэх засаглал яриа, хэлэлцээний төлөвлөгөөг батлах юм. Их Британи, Европын холбооны хоорондох хэлэлцээ тавдугаар сард эхэлнэ хэмээн мэдэгдлээ. Лиссабоны гэрээний 50-р бүлэгт зааснаар, хэлэлцэгч талууд аль нэг улс орныг Европын холбооноос гаргах тохиролцоонд хоёр жилийн дотор хүрэх ёстой. Мөн талууд тохиролцсоны үндсэн дээр энэ хугацааг сунгаж болдог аж.

Британийн парламентын лордуудын танхим гуравдугаар сарын эхээр Европын холбооноос гарах үйл явцыг эхлүүлэх эрхийг Засгийн газарт өгч буй хуулийг баталсан билээ. Их Британийн Европын холбоог орхих хүслийг Европын холбоонд уламжлах эрх ийнхүү Ерөнхий сайдад шилжсэн юм. Лондоны Засгийн газар улс орноо Европын холбооноос гаргах төлөвлөгөөг хоёрдугаар сарын эхээр баталсан аж. Төлөвлөгөөний дагуу, Их Британи Европын холбооны нэгдсэн зах зээлийг орхиж, Европын холбоотой худалдаа хийх гаалийн дүрэм журмаа шинэчлэх ажээ. Их Британи мөн Европын холбооны шүүхийн тогтолцооноос гарч, цагаач, дүрвэгчдийн давалгаанд хяналт тавих өөрсдийн системийг бий болгох юм.

Хятадад асар их нөөцтэй алтны уурхай олджээ

Хятадын түүхэнд байгаагүй их нөөцтэй алтны уурхайг илрүүллээ хэмээн China News агентлаг Shandong Gold Group компанийн эх сурвалжаас иш татан мэдээлэв. Зүүн хэсгийн Шаньдун мужийн Зяодун ольтриг дээр 382 тн алтны нөөцтэй алтын уурхай олдсон аж. Уг уурхайн нөөц 22 тэрбум доллараар үнэлэгдэж байна. Үнэт металлын нөөц хоёр км зайд тархаж, давхаргын зузаан нь 67 метрт хүрч байгаа аж. Энэ уурхайг ашиглалтад оруулж бүрэн хүчин чадлаар нь ажиллуулбал өдөрт 10 мянган тн алт олборлоно хэмээн China News онцлов. Shandong Gold Group-ийн илрүүлсэн шинэ алтны уурхайг 40 жилийн турш ашиглана хэмээн мэдэгдлээ.

Леди Гага 31 хүрлээ

Гурван жил завсарласны эцэст дэлхийг тойрсон аялал тоглолт хийхээр болсон АНУ-ын дуучин Леди Гага 31 нас хүрч байна. Наймдугаар сард эхлэх түүний аялан тоглолтын бүх тасалбар зарагдаад дуусчээ. Тиймээс зарим улс, хотод нэмэлт тоглолт хийх талаар яригдаж байна. Леди Гага хамгийн сүүлд гаргасан Joanne хэмээх цомогтоо халуун, янаг үгтэй дуунууд багтаасан нь ихээхэн шуугиан дэгдээжээ. Эхэндээ энэ цомгийн борлуулалт хүсэн хүлээж байсан хэмжээнд хүрээгүй ч тэрээр Super Bowl-д дуулсны дараа борлуулалт эрс нэмэгдсэн юм.

Этгээд хувцаслалт, хэв загвараараа ялгардаг нэрт дуучин Леди Гага 31 насныхаа ойтой ганц бие золгожээ. Тейлор Киннитэй таван жил хамт амьдарч, гэрлэхдээ хүртэл тулсан ч тэд саяхан салсан юм. Сүүлийн үед тэрээр Жастин Бибер, Майли Сайрусын төлөөлөгчөөр ажиллаж байсан Кристиан Каринотой найзалж байна гэсэн яриа гарсан ч үүнийг батлах нэг ч гэрэл зураг гарч ирээгүй байна.  

Ghost in the Shell гуравдугаар сарын 31-нд нээлтээ хийнэ

Төрөл зүйлдээ цорын ганц Киборг-хүн хосолсон эмэгтэй командлагч (Скарлет Йохансон) Есдүгээр тасаг буюу элит дайчдын бүлгийг удирдаж хамгийн аюултай гэмт хэрэгтнүүд, хэт даврагчдыг зогсоохоор тэмцэнэ. Есдүгээр тасгийнхан кибер технологийн талбарт гарч ирсэн Hanka Robotic-ийг зогсоохын тулд итгэмээргүй их хүчин чармайлт гаргадаг. Жейми Мосс кино зохиолыг нь бичиж, Руперт Сандерс найруулсан шинжлэх ухааны зөгнөлт, тулаантай Ghost in the Shell (Хуяган доторх хий үзэгдэл) киноны шинэ цуврал гуравдугаар сарын 31-нд нээлтээ хийх юм. Скарлет Йохансон, Майкл Питт, Пилоу Асбаек, Шин Хан, Жюлет Бинош нар гол дүрийг бүтээжээ.

Кино бүтээгчид компьютер график болон нүдний дүрс, өнгийг хувиргадаг технологи ашиглаж гол дүрд тоглосон Скарлет Йохансоны дүрийг ази төрхтэй болгон өөрчилсөн нь ихээхэн маргаан дагуулсан юм. Зэвсэглэсэн кибер цагдаагийн тухай өгүүлдэг Ghost in the Shell цуврал кино анх 1995 онд Японд бүтээгдэж байсан юм. Киноны зохиомж, гол баатруудын эрхийг эзэмшдэг Японы фирмийн төлөөлөгч Сам Ёшида гол дүрд Скарлет Йохансоныг сонгосныг дэмжиж байгаа аж. “Скарлетийн туулж өнгөрүүлсэн замналыг харвал энэ нь муугүй сонголт. Энэ киноны гол дүрд япон жүжигчинг тоглуулах ёстой гэж бид зүтгэхгүй. Харин ч Японы цуврал кино дэлхийд улам танигдах боломж гарч ирж байна” хэмээн тэрээр ярьжээ. 

Хар тамхинд донтож байсан эрийн саятан болсон түүх

Халил Рафати героины тунг дахин хэтрүүлэн хэрэглэж эмч нар амийг нь аврах гэж чармайж байсан нь саяхан мэт. Эмч нарын баг цахилгаанаар цохиулах арга хэрэглэснээр тэрээр эргэж ухаан орсон гэдэг. Энэ бол 2003 он. Халил 33 настай, Лос-Анжелес хотын гудамжинд унтаж бор хоногийг өнгөрөөдөг байв. Тэрээр кокаин, крак зэрэг хар тамхи хэрэглэж, дөнгөж 49 кг жинтэй, арьс нь нил шарх идээ болсон байлаа. “Би хар тамхи хэрэглэсэн, наймаалсан хэргээр хэдэн удаа баривчлагдсанаа санахгүй байна. Амьдрал тэр чигээрээ сүйрэл байсан. Бие минь үргэлж өвдөж унтаж чаддаггүй байлаа” хэмээн Халил өгүүлж байна. Америк эр Халил Рафати хар тамхинаас гарах гэж олон удаа оролдож бүтэлгүйтэж байсан ч ес дэх удаагаа хэтрүүлэн хэрэглэж амиа алдах шахсаны дараа ийм амьдралдаа өөрчлөлт хийх ёстой хэмээн эргэлт буцалтгүй шийдсэн аж. Ийнхүү сэргээн засах төвд дөрвөн сарыг өнгөрөөж хар тамхины донгоос ангижирчээ. Эрүүл саруул амьдралтай залгасан Халил амьдралаа шинээр эхлүүлж, Калифорнид эрүүл хүнсний Sunlife Organics компанийг үүсгэн байгуулж саятан болсон юм.

Кафе болон органик жимсний шүүсээр үйлчилдэг, мөн интернэт худалдаа хийдэг зургаан салбараараа дамжуулж жилд зургаан сая долларын борлуулалт хийдэг болов. Түүний компани эдүгээ АНУ-ын 16 мужид, мөн Японд салбараа нээхээр зэхэж байна.  Хэдэн жилийн өмнө гудамжинд цаасан хайрцагт хоног төөрүүлж байсан 46 настай Халил Рафати өнөөдөр хувийн нисэх онгоцоороо аялах болжээ. Хар тамхичнаас саятан болсон эрийн түүхээр кино хийх санал хүртэл Холливудаас ирээд байна.

АНУ-ын төвийн Охайо мужийн уугуул Халил нь Польшийн еврей ээж, лал шашинтай эцгийн хүүхэд. Бага нас нь аз жаргалтай байсангүй.  Сургуулиа дүүргэлгүй орхиж, танхай, хулгайн хэргээр хэд хэдэн удаа саатуулагдаж байв. 1992 онд 21 настай байхдаа кино жүжигчин болох мөрөөдлөө биелүүлэхээр Лос-Анжелес руу шилжжээ. Жүжигчний замналаа эхлүүлж ч чадсангүй. Гэвч орон нутгийн нэгэн хамтлагт хөгжим тоглож, Элизабет Тейлор, Жефф Брижс, Guns N' Roses-ийн гитарчин Слаш зэрэг Холливудын оддын автомашиныг угааж муугүй орлоготой байсан юм. Хар тамхинд бага багаар донтсоор хүндэрч амьдрал нь хяналтаас гарчээ. Өөр тэнэмэлүүдийн хамт гудамжаар гэр хийж, мансууруулах бодисоо олохын тулд хар тамхи наймаалдаг болов. Ингэж замарч явсаар ес дэх удаагаа эрлэгийн элчийн үүдэнд очоод гэнэт ухаарснаар Халил амьдралаа сайн зүг рүү эргүүлж чадсан юм. Хар тамхийг орхисныхоо дараа хэд хэдэн ажил хийж үзлээ. Малибу дахь нөхөн сэргээх төвд ажиллахын хажуугаар автомашин угааж, нохой салхилуулж, цэцэрлэг, зүлэг ч тордож янзалж явжээ.

“Би мөнгөө хэмнэж цааш нь хийж чадсан. Долоо хоногт долоон өдөр, өдөрт 16 цаг ажиллаж байлаа” хэмээн Халил өгүүлж байна. Удалгүй Халил Охайогийн хуучин найзтайгаа уулзсаны дараа өөрийн гэсэн жимс, ногооны шүүс үйлдвэрлэх сонирхолтой болжээ. “Найз маань хиппи шиг л нөхөр байсан. Тэр надад аминдэм, органик  хүнс, супер тэжээллэг хоол ундны талаар ярьж, зааж эхэлсэн. Тэр үед ч би шинэ бизнес хийх хүсэлд автагдаж байлаа” хэмээн ярив. 2007 онд Халил нэг байшин хөлсөлж сар бүрийн 10 мянган долларын төлбөрийг нь дийлдэггүй хүмүүст зориулан Riviera Recovery хэмээх хар тамхины донгоос ангижруулах өөрийн төвийг нээлээ.

Халил төвийнхөө үйлчлүүлэгчдэд өөрийн гараар бэлтгэсэн Wolverine хэмээх ховор нандин жимсний шүүс бэлтгэж өгдөг байв. Гадил, мака ногооны нунтаг, зөгийн бал, үүрний сархинцагийг хольж бэлтгэсэн шүүс эндээс хүчээ авч алдаршсаар гаднаас хүмүүс ирж худалдан авдаг болжээ. Эрэлт хэрэгцээ нэмэгдсээр Халил 2011 онд хамгийн сайн найз, тэр үед найз бүсгүй нь байсан эмэгтэйн хамтаар Sunlife Organics компаниа байгуулсан юм.

Жоорлосон мөнгөөрөө шинэ бизнесээ санхүүжүүлж, анхны салбараа Малибуд нээжээ. Эхний жилдээ л нэг сая долларын борлуулалт хийж амжилт шууд л хүрээд ирж. Өнөөдөр түүний компани зургаан салбартай, 200 гаруй ажилтантай. Жимс, ногооны шүүснээс гадна тансаг зэрэглэлийн хүнс, чанартай малгай, цамц зэргийг интернэтээр худалдаалж орлогоо нэмэгдүүлж байна. “Өмнө нь ямар байсан, хэн байсан нь хамаагүй. Шийдэмгий сэтгэл, зүтгэл, тэмүүлэл байвал амжилт ирэх нь гарцаагүй” хэмээн Нью-Йорк дахь Deutsche Bank-ний шинжээч Роб Назара Халил Рафатийн талаар ярилаа.

Sunlife Organics компаниас гадна Халил Riviera Recovery төвөө ажиллуулж, Малибуд йог нээжээ. Мөн намтраа бичихээр сэтгэл шулуудаж “Би үхлийг мартсан” хэмээн номоо 2015 онд хэвлүүлсэн байна. “Би өөрийгөө их ухаантай гэж хэлэхгүй. Гэвч надад амьдрах хүсэл бий. Өөрийгөө ямар нэг зүйлд зориулах үед бие, сэтгэл минь эрч хүчээр дүүрээд ирдэг” хэмээн Халил өгүүлсэн юм.

ОХУ Алеппогийн дүрвэгчдэд 13 тн тусламж хүргэжээ

Сири дахь дайсагнагч талуудыг эвлэрүүлэх Оросын төвийн ажилтнууд Сирийн Манбиж орчмын дүрвэгсдийн хуаранд 13.5 нт хүнсний тусламж хүргэжээ. Энэ тухай тус төвийн дарга Сергей Рачук “ТАСС” агентлагт ярьжээ. “ОХУ энд байлдаж ямар нэг юм эзэлж авахын тулд биш, харин Сири улсад, энгийн иргэдэд тусламж үзүүлэхийн тулд байгаа гэдгийг харуулахыг зорьж байна. Тусламж хэрэгтэй байгаа хүмүүст тусламжийн барааг ямар нэг аргаар хүргэхийг чармайж байна” хэмээн тэрээр онцоллоо. Сирийн цэргийнхэнтэй хамтран элсэн чихэр, лаазалсан мах, цай болон хүнсний бусад бүтээгдэхүүнийг Алеппогийн дүрвэгчдэд хүргэсэн байна. Сирийн Алеппо хотын зарим дүүрэгт байдал тогтворжиж хэд хэдэн сургууль нээгдсэн тухай мэдээ иржээ.

Роналдо орлогоороо анх удаа Мессийг давж гарлаа

2016-2017 оны улиралд хамгийн их орлого олсон хөлбөмбөгчнөөр Испанийн Оеал Мадрид клуб, Португалын шигшээ багийн тоглогч Кристиано Роналдо тодорчээ. Тэрээр цалин, зар сурталчилгаа болон бусад эх үүсвэрээс 87.5 сая евро халаасалснаар энэ үзүүлэлтээр мөнхийн өрсөлдөгч Лионель Мессийг анх удаа давж гарчээ. Барселона болон Аргентины шигшээ багийн довтлогч Месси 76.5 сая еврогийн орлоготой байсан хэмээн France Football сэтгүүлд бичжээ. Нэр хүнд бүхий тус сэтгүүл шилдэг хөлбөмбөгчдийн цалин, орлогын жагсаалтыг 19 дэх удаагаа гаргаж байгаа юм. Роналдо хамгийн сүүлд “Алтан бөмбөг”-ийн эзэн болж, мөн Европын аваргад Португалын шигшээн хамт түрүүлсэн. Харин Месси Аргентины шигшээ багийн хамт ямар нэг тэмцээнд түрүүлж чадаагүй байна. Тэрээр том тэмцээний аваргын төлөө гурван удаа тоглосон ч гурвууланд нь ялагдсан билээ. Хамгийн өндөр цалинтай дасгалжуулагчдыг Манчестер Юнайтедийн Жозе Моуриньо тэргүүлж байна. Тэрээр нэг улиралд 28 сая еврогийн цалинтай.

Хамгийн өндөр цалинтай хөлбөмбөгчид

1. Кристиано Роналдо (Real Madrid) 87.5 сая евро

2. Лионель Месси (Barcelona) 76.5 сая

3. Неймар Да Силва (Barcelona) 55.5 сая

4. Гарет Бейл (Real Madrid) 41 сая

5. Эзекиел Лавецци (Hebei China Fortune) 28.5 сая

Хамгийн өндөр цалинтай дасгалжуулагч

1. Жосе Моуриньо (Manchester United) 28 сая евро

2. Марчело Липпи (Хятадын шигшээ) 23.5 сая

3. Лоран Блан (баггүй) 20 сая

4. Карло Анчелотти (Bayern) 15.8 сая

5. Пеп Гуардиола (Manchester City) 14.5 сая

Б.Обама дурдатгалаа бичихээр арал руу явжээ

АНУ-ын Ерөнхийлөгч асан Барак Обама Францын Полинезийн Тетироа арал дээр хэдэн сар амьдрахаар явжээ. Гол зорилго нь дэлхийн хамгийн хүчирхэг улсын Ерөнхийлөгчийн албыг хашиж байсан он жилүүдийнхээ дурдатгалыг бичих хэмээн Washington Post мэдээлэв. Penguin Random House хэвлэлийн газар Обама, Мишель нарын дурдатгалыг хэвлэх эрхийг авсан юм. Б.Обама Цагаан ордноос явныхаа дараа гэр бүлийн хамтаар цагийг аялж зугаалахад зарцуулна хэмээн төлөвлөсөн аж. Тэрээр Карибын тэнгис болон Хавай аралд амраад амжжээ. Эдүгээ дурдатгал номоо бичихээр шийдэж Номхон далайн эзэнгүй нэгэн арлыг сонгож аваад байна. 2009 онд АНУ-ын 44 дэх Ерөнхийлөгчөөр сонгогдсон Барак Обама хоёр бүрэн эрхийн хугацааг гүйцээгээд энэ оны нэгдүгээр сард жирийн иргэн болсон юм.  

Экс Ерөнхийлөгч Пак Гын Хег баривчлах уу?

Өмнөд Солонгосын Прокурорын газар экс Ерөнхийлөгч Пак Гын Хег баривчлах тушаал гаргахыг хүслээ хэмээн тус улсын хэвлэлүүд мэдээлэв. Түүнийг эрх мэдлээ урвуулан ашигласан, улсын нууц мэдээллийг бусдад дамжуулсан хэмээн үзэж байгаа аж. Пак Кын Хег авлигын хэрэгт буруутгаж байгаа билээ. Үүний улмаас түүнийг шүүхийн хариуцлагад татаж, албан тушаалаас нь огцруулах үйл явц эхэлсэн юм. Гуравдугаар сарын 10-нд Өмнөд Солонгосын Үндсэн хуулийн шүүхийн шийдвэрээр Пак Гын Хег албан тушаалаас нь огцруулжээ. Экс Ерөнхийлөгчийг  авлигын хэргээр 14 цагийн турш байцаасан нь саяхан ил болсон юм. Тэрээр томоохон компаниудыг дарамт шахалтад оруулж, найзынхаа буяны сангийн данс руу их хэмжээний мөнгө шилжүүлүүлж байсан нь илэрч шуугиан дэгдээгээд байна.

Цасан нурангид зургаан сурагч амиа алджээ

Японы Точи мужийн уулын цанын баазад цасан нуранги болсны улмаас зургаан сурагч амиа алдаад байна хэмээн ТАСС агентлаг орон нутгийн аврах албаны эх сурвалжаас иш татан уламжлав. Гурван хүн бэртэж, гурван хүн сурагггүй алга болоод байна. Аврагчид эрэл хайгуулын ажиллагааг шуурхай эхлүүлээд байгаа аж. Точи мужид болсон осолтой холбоотойгоор эрэл хайгуул, аврах ажиллагааг зохицуулах онцгой штабыг байгуулсан талаар Японы Засгийн газрын төлөөлөгч Ёшида Суга мэдэгдлээ. Мужийн эрх баригчдын хүсэлтээр Японы армийн цэргүүдийг Точи муж руу илгээгээд байна. Цасан нуранги болох үеэр цанын бааз дээр 66 хүн байжээ. Тэдний 50 нь орон нутгийн сургуулийн ахлах ангийн сурагчид байсан аж. Тэд багш, зааварлагч нарын хамтаар хаданд авирах сургуулилт хийж байжээ.

Хэн хамгийн удаан алга ташуулсан бэ?

Испанийн дуурийн дуучин Пласидо Доминго хамгийн удаан алга ташуулсан хүнээр тодорч Гиннесийн номд бичигдсэн байдаг. Тэрээр 1991 оны долдугаар сарын 30-нд Вена хотын Дуурийн театрт Вердигийн Отеллод тоглосны дараа үзэгчид түүнд баяр хүргэж нэг цаг 20 минутын турш алга ташсан юм. Тэрхүү ялгуусан үдэш Мадрид хотын уугуул дуучин Венийн дуурийн теартын тайзанд 101 удаа буцаж гарах хэрэгтэй болжээ. Ийнхүү Пласида Доминго алдарт Лучиано Павароттийн амжилтыг эвдсэн аж. Паваротти 1968 онд Берлины театрт Гаетано Донизеттийн дуурьт дуулсны дараа 67 минутын алга ташилтаар шагнуулж байжээ.

Хонконгийн сонгуульд Карри Лам яллаа

Хонконгийн сонгуульд  ямар ч гэнэтийн сонин болсонгүй. Бээжинд талтай гэгддэг Карри Лам Хятадын засаг захиргааны онцгой бүсийн шинэ удирдагчаар сонгогдлоо. Хонконгийн иргэдийн төлөөлөл болсон 1194 гишүүнтэй онцгой хорооны 777 гишүүн түүнд саналаа өгчээ. “Иргэдийг төлөөлж санал өгдөг онцгой хорооны гишүүдийг Хятадын Засгийн газар сонгож байна. Хонконгийн иргэд сонгуульд шууд оролцохыг хүсч байна” хэмээн Хонконгийн Ардчилсан намын ерөнхий нарийн бичгийн дарга Жошуа Вонг EL PAÍS-т ярьжээ. 2014 онд Бээжингээс ардчиллыг шаардсан шүхрийн хувьсгалын удирдаж байсан Вонг “Хонконгийн ирээдүйг Хятадын лидер Си Зиньпин удирдан залж байна. Хонконгчууд энэ үйл хэрэгт оролцож чадахаа болилоо” хэмээн өгүүлэв. 2014 онд 79 өдрийн турш үргэлжилсэн эсэргүүцлийн хөдөлгөөн Хонконгт өрнөхөд тэр үеийн Засгийн газрын төлөөлөгч, өнөөдрийн сонгуульд ялалт байгуулаад байгаа хатагтай Карри Лам урьдчилан сонгосон нэр дэвшигчдээс ялагчийг тодруулдаг тусгай  хорооны санал хураалтын системийг дэмжин мэдэгдэл хийж байсан юм. Хятадын Засгийн газрын гуравдугаар хүн Жан Дэжиан ч энэ санааг дэмжиж “Бээжингийн ашиг сонирхол, үндэсний эрх ашгийг эрхэмлэдэг итгэлтэй хүн Хонконгийг удирдах ёстой” хэмээн мэдэгдэж байв. Онцгой хорооны гишүүд нь Хятадын Коммунист намтай холбоо сүлбээтэй санхүү, шашин, худалдаа, үйлдвэрлэлийн салбарын төлөөлөгчдөөс бүрдсэн байдаг аж. Хонконгийн Ардчилсан намын Натан Лау тэргүүтэй долоон төлөөлөгч сонгуулийн энэхүү системийг эсэргүүцэж саналын хуудсаа хоосон өгсөн байна. Ардчиллыг дэмжигчдийн ихэнх нь Хонконгийн сүүлчийн Засгийн газрын Сангийн сайд Жон Цангийн төлөө саналаа өгчээ. Цанг 365, дээд шүүхийн шүүгч асан Ву Квок 21 санал авчээ.

Төрийн албанд 40 жил зүтгэсэн 59 настай Карри Лам эдүгээ Хонконгийн эдийн засгийг сэргээхэд гол анхаарлаа хандуулах хэрэгтэй болов. Мөн тусгаар тогтнох хөдөлгөөн эргэн сэргэж, улс төрийн тэмцэл хурцадсан нийгмийг эргэн нэгтгэх хэрэгтэй болж байна. Зарим иргэд санал хураалт болсон байрны гадаа ирж эсэргүүцлээ илэрхийлж байгаа бол, нөгөө хэсэг нь Хонконгийг удирдах анхны эмэгтэй удирдагчийн ялалтыг тэмдэгдэхээр цуглажээ. 1997 онд Британийн эзэмшлээс гарч Хятадын мэдэлд ирсэн Хонконг нь “Нэг улс - нэг систем” бодлогын хүрээнд Бээжинд захирагдах ёстой гэж байгаа ч тус хотын иргэдийн дийлэнх нь үүнийг хүсэхгүй байгаа юм. 

Элтон Жон 70 хүрлээ

Английн нэрт дуучин, хөгжмийн зохиолч Элтон Жон 70 нас сүүдрийг зооглолоо. Тэрээр урлагийн замналдаа хэд хэдэн “Грэмми”, нэг “Оскар” авч байв. Billboard сэтгүүл түүнийг бүх цаг үеийн хамгийн амжилттай дуучдын нэгээр нэрлэсэн юм. Сэр Элтон Жон дэлхийн хамгийн алдартай дуучин төдийгүй мөн хамгийн зартай ижил хүйстэн билээ. Тэрээр ижил хүйстэн хандлагатай хүмүүсийн эрхийг хамгаалж, ДОХ-ын эсрэг тэмцлээрээ танигдсан нэгэн. Элтон өөрийн олон жилийн хамтран амьдрагч Дэвид Ферништэйгээ 2014 онд гэрлэсэн юм. Тэд хоёр хүүхэд үрчлэн авч өсгөж байна. Элтон Жон 50 гаруй жилийн замналдаа 300 сая гаруй цомгоо борлуулжээ. Түүний дуунууд 40 удаа Billboard-ийн шилдэг жагсаалтад багтаж, 30 жилийн турш аль нэг дуу нь шилдэг 100-д орж байлаа. 1997 онд Уэльсийн гүнж Дианад зориулж гаргасан “Candle in the Wind 1997” сингл цомог нь дэлхий даяар 33 сая хувиар зарагджээ.

Ф.Гюленийг Туркт шилжүүлж өгөх талаар ярилцжээ

АНУ-ын Ерөнхийлөгч Д.Трампын үндэсний аюулгүй байдлын зөвлөх асан Майкл Флинн Туркт төрийн эргэлт хийх оролдлогод буруутгагдаж байгаа Фетхулла Гюленийг шилжүүлж өгөх боломжийн талаар Анкарагийн хүмүүстэй ярилцсан байж магадгүй байна. Флинн болон Туркийн төлөөлөгчдийн хоорондох уулзалтын талаар ТТГ-ын тэргүүн асан Жеймс Вулси ярьжээ. Тэрхүү албан бус уулзалт өнгөрсөн оны есдүгээр сард Нью-Йоркийн нэгэн зочид буудалд болсон аж. Туркийн талаас Ерөнхийлөгч Эрдоган болон Гадаад хэргийн сайд Чавушоглугийн хамаатнууд уулзалтад ирсэн хэмээн баталж байна. Вулси тэр уулзалтад хоцорч ирсэн бөгөөд түүнийг байхад Гюленийг АНУ-аас Туркт шилжүүлж өгөх талаар нухацтай ярилцаж байсан аж. М.Флинны төлөөлөгч ч ийм уулзалт болсныг няцаасангүй.

Майкл Флинн АНУ дахь ОХУ-ын элчин сайдтай хэд хэдэн удаа холбоо барьж, энэ тухай бүрэн мэдээллээ Ерөнхийлөгчид танилцуулаагүйн улмаас Д.Трампын зөвлөхын албан тушаалаас огцорсон билээ. Өнгөрсөн оны долдугаар сард Туркт бүтэлгүйтсэн төрийн эргэлтэд буруутгагддаг Фетхулла Гюлен АНУ-д амьдардаг. Гюлен тэрхүү төрийн эргэлтэд ямар нэг холбоогүй, хэрвээ Анкара ямар нэг баттай нотолгоо олох юм бол өөрөө Туркт буцан очиж шүүхийн өмнө зогсоно хэмээн мэдэгджээ.

Лондоны террорист ганцаараа байжээ

Их Британийн парламентын ордны гадаа хүмүүс рүү довтолсон этгээд нь ямар нэг хамсаатангүй ганцаараа байсан хэмээн цагдаагийн газраас мэдэгдэв. “Тэр яагаад ийм аллага үйлдэх болсон нь тодорхойгүй байна. Тэр ганцаараа энэ хэргийг үйлдсэн нь батлагдлаа” хэмээн Лондоны цагдаагийн газрын төлөөлөгч Нейл Басу мэдэгдэв. Одоогоор шинэ халдлага гарах аюул байхгүй байгааг тэрээр онцолжээ. Энэхүү халдлагын дараа Бирмингем хотод 11 хүнийг баривчилсан ч 10 нь энэ хэрэгт холбогдолгүй болох нь батлагдсан юм. Нэг хүнийг сэжиглэн шалгасан хэвээр байна.

Англид төрсөн Адриан Рассель хэмээх 52 настай эр (Дараа нь нэрээ Халид Масуд болгон сольсон) Вестминстерийн гүүрэн дээр автомашинаар хүмүүсийг дайрч дараа нь парламентын ордны хашааг мөргөжээ. Тэрээр автомашинаас гарч нэг цагдааг хутгалж амь насыг нь хохироосон юм. Энэ халдлагын улмаас нэг цагдаа, гүүрэн дээр явж байсан дөрвөн хүн амь насаа алджээ. Халдлага үйлдсэн этгээдийг цагдаа нар буудаж устгасан байна. Халид Масуд 1992-95 онд Босни Герцоговины дайнд оролцож байсан аж. 

Мосул дахь довтолгоонд 200 хүн амиа алдсан бололтой

АНУ-ын нисэх хүчин гуравдугаар сарын 17-нд “Исламын улс” бүлгийн гол түшиц газар болоод байгаа Иракийн Мосул хотыг довтолжээ. Уг дайралтад олон арван энгийн иргэн амиа алдсан байж болзошгүй байна. Пентагон агаарын довтолгооны үр дагаварыг судлан шалгах тусгай хороог байгуулсан тухай мэдэгдэв. “Амь үрэгдсэн хүмүүсийн дунд энгийн иргэд байгаа тухай мэдээллийг олон улсын цэргийн эвсэл түгшингүй хүлээж авлаа. Энэ хэргийг албан ёсоор шалгаж эхлээд байна. Энгийн иргэд амь насаа алдсан нь үнэн эсэхийг шалган тогтоох болно” хэмээн АНУ-ын зэвсэгт хүчний ерөнхий командлалын мэдэгдэлд онцолсон байна.

Иракийн эрх баригчдын хүсэлтээр Мосул хот орчмын алан хядагчдын байрлалд цохилт өгсөн аж. Энэ довтолгоонд олон энгийн иргэн амь үрэгдсэн тухай мэдээлэл ирсэн ч АНУ үүнийг хараахан хүлээн зөвшөөрөөгүй байгаа юм. “Одоогоор бид зөрүүтэй мэдээллийг нягтлан шалгаж байна. Мосул орчимд хийсэн бүх довтолгоо, түүний хохирол, үр дагаварыг нарийвчлан шалгаж байна” хэмээн Пентагоны төлөөлөгч хэвлэлд ярьжээ.

АНУ тэргүүтэй олон улсын цэргийн эвсэл гуравдугаар сарын 17-23-ны хооронд Мосул дахь хэт даврагчдын байрлалд хэд хэдэн удаа цохилт өгчээ. Довтолгооны хохирлыг судлан шалгах хороо энэ бүх өдрүүдэд юу болсныг нягтлахаар болсон аж. Хүний эрхийг хамгаалах байгууллагуудаас мэдэгдэж буйгаар, дээрх агаарын довтолгооны улмаас 200 орчим хүн амиа алдсан, тэдний дотор маш олон энгийн иргэд байгаа гэж байна. Энэ нь сүүлийн 13 жилийн доторх хамгийн өндөр хохирол, үзүүлэлт юм. Хамгийн сүүлд АНУ-ын нисэх хүчин 2003 онд хамгийн их хохирол учруулж байсан билээ. Иракийн арми олон улсын цэргийн эвслийн дэмжлэгтэйгээр Мосул хотыг лалын дайчдаас чөлөөлөх ажиллагааг явуулж байгаа. Засгийн газрын цэрэг хотын гүн рүү нэвтэрч орсон тухай мэдээ иржээ. Гэсэн хэдий ч тус бүс нутагт лалын босогчид хориглон тулалдсаар байгаа юм. Мосул хот орчимд 600 мянган энгийн иргэн байсаар байна. “Исламын улс” тэргүүтэй лалын босогчид 2014 онд нефтиэр баялаг Иракийн хойд хэсгийн Мосул хотыг эзэлж авсан юм. Тэд нефть арилжиж Ирак, Сири дахь дайнаа санхүүжүүлсээр иржээ. Мосул хотыг лалын босогчдын гараас салгаж авбал тэд санхүүгийн гол эх үүсвэрээ алдаж ялагдахад ойрхон болно хэмээн үзэж байгаа ажээ. 

Украинд зэвсгийн агуулах шатжээ

Украины Балаклей дахь зэвсгийн томоохон агуулахад гал гарчээ. Аврагчид тэр хавийн иргэдийг яаралтай нүүлгэн шилжүүлэв. Шөнийн гурван цагийн үед гал гарсан хэмээн мэдээлж байна. Украины цэргийн прокурор Анатолий Матиос энэ гал түймрийг хорлон сүйтгэх ажиллагаа хэмээн мэдэгджээ. Өөр хэд хэдэн газар зэрэг гал гарсан хэмээн тэрээр баталж байна. “Танк, их бууны зэвсэглэл хадгалдаг агуулахын хэд хэдэн талбайд зэрэг дэлбэрэлт болж гар гарсан. Украины армийн зэр зэвсгийг устгах зорилгоор ийм хорлон сүйтгэх ажиллагаа явуулсан гэж үзэж байна” хэмээн тэрээр өгүүлэв.

Харьков мужийн Балаклей дахь зэвсгийн агуулах нь 368 га талбайтай Украины армийн хамгийн том зэвсгийн агуулах юм.Тэнд их бууны сум, артиллерийн зэвсэглэл, пуужин зэрэг 138 тн зэр зэвсгийг хадгалж байжээ.

2014 онд живсэн “Севоль” хөлгийг татаж гаргалаа

2014 онд Чэжү арал руу аялж яваад Өмнөд Солонгосын баруун өмнөд эрэгт живсэн “Севоль” хөлөг онгоцыг далайн ёроолоос татаж гаргалаа хэмээн “Синьхау” агентлаг мэдээлэв. Бараг гурван жилийн турш усан доор байсан хөлөг онгоц ихэд эвдэрч, зэвэнд идэгдсэн байжээ. Хөлөг онгоцыг уснаас бүрэн гаргах ажиллагаа үргэлжилж байгаа бөгөөд удалгүй Мокпо боомтод аваачих юм. Уг ослоор амь үрэгдсэн хүмүүсийн ар гэрийнхэн энэ үеэр байлцсан аж. “Севоль” хөлөг онгоц 2014 оны дөрөвдүгээр сард Өмнөд Солонгосын баруун өмнөд эрэгт сүйрч живсэн юм. Түүнд 470 зорчигч аялж явжээ. Энэ ослоор 290 хүн амь насаа алдаж, 15 орчим хүн сураггүй алга болжээ.

Сайн дураараа буцаж буй цагаачдад олгох мөнгийг нэмжээ

Австрийн эрх баригчид сайн дураараа эх нутаг руугаа буцаж буй цагаач, дүрвэгчдэд олгох мөнгөний хэмжээг хоёр дахин нэмэгдүүлжээ. Дотоод явдлын яамнаас мэдэгдэж буйгаар, төрөлх нутаг руугаа буцахад бэлэн болсон эхний мянган цагаач тус бүр нэг мянган доллар аваад байна. Үүнээс гадна Ойрхи Дорнодын орнуудын оршин суугчдад буцах, унаа тээврийн асуудлыг нь шийдэж өгнө хэмээн амлажээ. Харин Балканы хойгийн орнуудын цагаачдад ийм тусламж олгохгүй. Сүүлийн гурван жилд Европт орж ирэх цагаач, дүрвэгчдийн тоо эрс нэмэгдэхийн хэрээр улс орнууд цагаачлалын эсрэг арга хэмжээ авсаар байна. Румын, Унгар, Словени, Австри зэрэг орнууд Европын холбооноос тогтоосон тооны цагаачдыг хүлээн авахаас татгалзаж байсан билээ. Зарим орнууд цагаачдаас салахын тулд эдийн засгийн, урамшууллын арга хэмжээ авч байна. Австри улс 2019 он гэхэд 50 мянган цагаачийг нутаг буцаахаар төлөвлөжээ. Өнгөрсөн онд тус улсыг 10.7 мянган цагаач орхин гарсны тал хувь сайн дураараа нутаг буцсан юм. 

Лондонд халдлага болж таван хүн амь насаа алдлаа

Их Британийн парламентын ордны гадаа, Вестминстер гүүрэн дээр халдлага гарсны улмаас таван хүн амиа алдаж 40 хүн шархдаж бэртээд байна. Автомашин  жолоодож явсан балмад этгээд гүүрэн дээр явж байхдаа явган хүний зам руу орж хүмүүсийг дайрч гурван хүний аминд хүрчээ. Дараа нь парламентын ордны хашааг автомашинаар мөргөж хамгаалалтыг эвдэх гэж оролдсон байна. Улмаар автомашинаас гарч парламентын ордон руу нэвтрэх гэж гүйж байхдаа саад болсон цагдаа руу дайрч хутгалжээ. Үүний дараа цагдаа нар ирж танхай этгээдийг буудаж устгасан байна. Хутгалуулсан цагдаа эмнэлэгт хүргэгдээд нас барсан аж. Тэр бол Скотланд-Ярд буюу Британийн цагдаагийн албанд 15 жил ажилласан Кит Палмер байсан юм.

Британийн парламентын ордны гадаа халдлага үйлдсэн этгээд хэн болохыг тодруулсан хэмээн Скотланд-Ярдын терроризмын эсрэг хэлтсийн тэргүүн Марк Роули мэдэгдлээ. Гэвч түүний нэр, хаанахын иргэншилтэй зэргийг зарласангүй. Энэ нь ард иргэдийн дунд айдас хүйдэс бий болгох гэсэн санаатай террорист халдлага хэмээн үзэж байна. Ерөнхий сайд Тереза Мэй Засгийн газрын онцгой хуралдааныг зарлажээ. “Халдлага үйлдэх газрыг санаатай сонгож авсан. Алан хядагч манай нийслэлийн зүрх болсон, бүх улс үндэстний хүмүүс цугладаг газарт цохилт өгөхийг зорилгоо болгожээ” хэмээн Т.Мэй ярилаа. Их Британид террорист халдлага гарах аюултай хэмээн үзэж, цагдаа тусгай хүчнийхэн бэлэн байдалд ажиллаж байгаа билээ. Халдлага үйлдсэн этгээд нь ази төрхтэй, 40 орчим насны хар хувцастай сахалтай эрэгтэй байсан, мөн автомашинаас бууж ирэхдээ хоёр гартаа том хутга барьсан байсан хэмээн гэрчүүд өгүүлж байна. Цагдаа нарт буудуулсан тэр этгээд эмч нарыг ирэхэд амьд байсан ч удалгүй шархныхаа улмаас амьсгал хураажээ.

Халдлагын улмаас парламентын ордныг Лондоны тусгай цагдаагийн ажилтнууд хамгаалалтад авч, Ерөнхий сайд Тереза Мэй болон парламентын гишүүдийг ордноос гарахгүй байхыг сануулж байв. Вестминстерийн ордныг таван цаг хаасны дараа улстөрчдийг нягт хамгаалалт дор ордноос гаргасан байна. Халдлага үйлдсэн этгээд нь ганцаараа байсан хэмээн Скотланд-Ярдаас мэдэгдэв. Мөн түүнд хамсаатан байсан эсэхийг шалгаж байгаа аж. Хамсаатан байсан бол мөн иймэрхүү аллага үйлдэх магадлалтай тул цагдаа, тусгай хүчнийхэн сонор сэрэмжээ дээд зэргээр дээшлүүлээд байна.

Эрх баригчид халдлагад өртсөн хүмүүс хэн болохыг тогтоожээ. Халдлага болох үеэр Вестминстерийн гүүрэн дээр Францаас ирсэн сурагчид байсан аж. Тэдний гурав нь автомашинд мөргүүлэн бэртжээ. Мөн гүүрэн дээр явж байсан гурван цагдаа, дөрвөн оюутан дайралтад өртсөн байна. Хүнд гэмтэл авсан 12 хүнийг яаралтай эмнэлэгт хүргэлээ. Найман хүнд газар дээр нь эмнэлгийн тусламж үзүүлсэн аж.

Одоогоор халдлагын хариуцлагыг ямар нэг хэт даврагч байгууллага хүлээгээгүй байна. Энэ нь автомашинаар хүмүүсийг дайрсан Францын Ницца, Германы Берлин хотод болсон халдлагатай адилхан байгаа нь хардлага төрүүлж байгаа юм. Мөн Израильд ийм халдлага гарч байсан билээ. Европт болсон эдгээр халдлагыг “Исламын улс” бүлэг зохион байгуулснаа хүлээн зөвшөөрч байв. 

Моника Белуччи Канны кино наадмыг хөтлөнө

Дэлхийд алдартай Канны кино наадам мөдхөн болох гэж байна. Энэхүүү кино урлагийн арга хэмжээг цагтаа дэлхийн хамгийн сайхан бүсгүй гэгдэж явсан Италийн жүжигчин Моника Белуччи хөтлөхөөр болжээ. Тэрээр анх удаа ийм үүрэг хүлээж буй нь энэ биш. Белуччи 2003 онд Канны кино наадмыг хөтөлж байв. Итали бүсгүй 2000 онд Стивен Хопкинсийн “Сэрдлэг” кинонд тоглож Канны наадамд анх өрсөлдөж байжээ. “Малена”-д тоглож дэлхийд танигдсан Белуччи хамгийн сүүлд найруулагч Роман Копполагийн “Mozart in the Jungle” кинонд тогложээ. Гоо үзэсгэлэнгээрээ алдартай Моника Белуччи Францын жүжигчин Кассельтэй гэрлэж хоёр хүүхэдтэй болсон ч 2013 онд салсан юм.

70 дахь удаагийн Канны кино наадам тавдугаар сарын 17-28-нд болно. Наадмын шүүгчдийг Испанийн нэрт кино найруулагч Педро Алмодовар тэргүүлэхээр болжээ. 

Уугуул иргэдийг хөөж гаргана

Герман улс террорист үйл ажиллагаанд сэжиглэгдсэн хоёр иргэнээ улс орноос хөөж гаргахаар болсноо зарлав. Дотоод яамны төлөөлөгч мэдэгдэж буйгаар, Германы газар нутаг дээр цагаачдын гэр бүлд мэндэлсэн хүмүүсийг анх удаа хөөн гаргаж буй тохиолдол болж байгаа ажээ. Тэднийг мөн Герман руу буцаж орохыг нь хориглож байгаа аж. Нигер болон Алжир гаралтай хоёр иргэн өнгөрсөн хоёрдугаар сарын эхээр Германы төвийн хэсгийн Геттинген хотод баривчлагдсан юм. Нигери гаралтай нь 22, Алжир гаралтай иргэн нь 27 настай. Германд төрсөн, эсвэл аав, ээжийнх нь аль нэг нь герман бол Германы иргэншил олгож болдог ажээ.

Энэхүү хоёр этгээдийг террорист үйл ажиллагаанд бэлтгэж байсан хэмээн сэжиглэн баривчилсан юм. Тэдний гэрийг нэгжихэд галт зэвсэг, сум, “Исламын улс” бүлгийн далбаа олджээ. Харин тэднийг галт зэвсгээрээ гэмт хэрэг үйлдэх гэж байсан хэмээн албан ёсоор буруутгалгүй улс орноос хөөн гаргахаас болсон байна. 2016 оны арванхоёрдугаар сарын 19-нд Берлин хотод ачааны машин Зул сарын баярын зах руу дайран орж 12 хүний аминд хүрч, 49 хүнийг гэмтээсний дараа Германд аюулгүй байдлын арга хэмжээг чангатгасан билээ. “Исламын улс” бүлэг энэ хэргийг үйлдсэнээ хүлээн зөвшөөрсөн юм. Германы хууль хяналтын байгууллага Тунисаас гаралтай Анис Амри хэмээх этгээдийг энэ хэрэгт сэжиглэн эрэн сурвалжилж байв. Тэрээр зугтаж амжин Итали руу гарсан ч бичиг баримт шалгаж байсан цагдаа нартай тулгаран буудалцах үеэр алуулсан байна. Берлины халдлагын дараа канцлер Ангела Меркель оршин суух эрх авч чадаагүй дүрвэгчдийг эх нутаг руу яаралтай буцаахыг уриалсан юм. Хоёр жилийн өмнөөс Европ руу давалгаалан орж ирэх болсон Сири болон Ойрхи Дорнодын орнуудын цагаачид голчлон Германыг зорьж байна. Өнгөрсөн хоёр жилд тус улс дайн байлдаантай орнуудын нэг сая 600 мянга гаруй дүрвэгчийг хүлээж авчээ.  

Хакер 100 сая доллар луйварджээ

Литва улсын иргэн Элдас Римаускас АНУ-ын компаниудаас 100 сая доллар луйвардаж авсан хэрэгт буруутгагдлаа хэмээн Нью-Йорк мужийн холбооны прокурорын газраас мэдэгдэв. Тэрээр АНУ-ын хоёр томоохон корпорацийн цахим шуудан руу нэвтэрч тэдний данснаас өөр байгууллага руу 100 гаруй сая доллар шилжүүлсэн аж. Литва хакер кибер луйвар хийсэн хэрэгтээ 20 жилийн ял авч магадгүй байна. Одоо тэрээр түр баривчлагдаад байгаа аж. Саяхан өөрсдийгөө Turkish Crime Family хэмээн нэрлэсэн хакерчдын бүлэг iPhone ухаалаг утасны сүлжээг эвдэлнэ хэмээн сүрдүүлж Apple компаниас ихээхэн хэмжээний мөнгө нэхжээ. Холбооны мөрдөх товчоо, цахим гэмт хэргийг мөрдөх хэлтэс хакерчдын бүлгийг илрүүлэхээр ажиллаж байна.

377 мянган хаягийг терроризмыг сурталчилсан хэмээн хаажээ

Twitter сүлжээний захиргаа 2016 оны сүүлчийн хагаст 377 мянган хаягийг терроризм, хэв даврах үзлийг сурталчилсан хэмээн хаасан байна. “2016 оны зургадугаар сарын 1-нээс арванхоёрдугаар сарын 31 хүртэл 376 мянга 890 хаягийг терроризм сурталчлахтай холбоотой дүрэм журмыг зөрчсөн хэмээн хааж устгасан” хэмээн 140 тэмдэгтэд багтаан мэдээлэл солилцдог нийгмийн сүлжээний хэвлэлийн албанаас мэдэгдэв. Терроризмын эсрэг хуулийн зөрчсөн хаягнуудын 74 хувийг буруу, өдөөн турхирсан мэдээллийг илрүүлдэг дотоод програмын тусламжтайгаар илрүүлсэн байна. Турк, Франц, Оросын Засгийн газар Twitter-ийн ямар нэг хаягийг устгах, хаах хүсэлтийг хамгийн идэвхтэй илгээдэг ажээ.

Хүүхэлдэйн улаан дэнлүүний газар нээгджээ

Испанийн Барселона хотод Lumidolls хэмээх хүүхэлдэйн улаан дэнлүүний газар хоёр долоо хоногийн өмнө нээгджээ. Sant Miquel гудамжинд нээгдсэн энэхүү газар эрчүүдийн сонирхлыг ихэд татаж байгаа ч үүнийг даруй хаах ёстой гэсэн санал, гомдол зарим иргэн, байгууллагаас ирээд байна. Цагдаагийн газраас Lumidolls янхны газрыг шалгахад ямар нэг үйл ажиллагаа явуулаагүй, үйлчлүүлэгч байхгүй байсан аж. Тус газрын хүүхэлдэйнүүдээр хагас цаг “үйлчлүүлэхэд” 80 еврогийн төлбөртэй. 45 минут цэнгэе гэвэл 100 евро, нэг цаг бол 120 еврогийн үнэтэй. Одоогоор энэхүү улаан дэнлүүний газарт найман хүүхэлдэй үйлчлүүлэгчдээ хүлээгээд зогсож байна. 161-170 см өндөртэй хүүхэлдэйнүүд бараг л амьд хүүхэн мэт мэдрэмж төрүүлнэ хэмээн Lumidolls-ийн менежер ярилаа.

Пуужингийн туршилт амжилтгүй болов

Хойд Солонгос өчигдөр ээлжит пуужингийн туршилтаа хийсэн ч амжилтгүй боллоо хэмээн Өмнөд Солонгос, Америкийн цэргийнхэн уламжлав. Пуужин хөөрснөөсөө хойш хэдхэн секундын дараа дэлбэрсэн хэмээн АНУ-ын зэвсэгт хүчний төлөөлөгч мэдэгдэв. Харин хойдууд ямар төрлийн хэдэн пуужин харвасан нь тодорхойгүй байгаа аж. Пхеньян сүүлийн үед НҮБ-ын хоригийг зөрчин пуужингийн туршилт явуулсаар байгаа юм. Гуравдугаар сарын 6-нд Хойд Солонгосын тал Япон тэнгис рүү нэгэн зэрэг дөрвөн пуужин харвасан. Тус улсын эрх баригчид мэдэгдэж буйгаар, Пхеньяны арми Япон дахь Америкийн цэргийн баазад цохилт өгөх туршилт хийж байгаа аж. Гурван пуужин Японы Ога ольтригоос 300-500 км-ийн зайтай унасан байна. Үүний дараа АНУ-ын Төрийн нарийн бичгийн дарга Рекс Тиллерсон “Мэдээж бид цэргийн мөргөлдөөнд хүрэхийг хүсэхгүй байна. Гэвч Хойд Солонгосын тал Өмнөд Солонгос, эсвэл манай цэрэгт заналхийлсэн үйлдэл гаргавал зохих хариуг нь өгөх болно. Хэрвээ Пхеньяны зэвсэглэлийн хөтөлбөр цэрэг дайны арга хэмжээ авахуйц заналхийлсэн түвшинд хүрвэл бидэнд бас боловсруулсан хувилбар байгаа” хэмээн онцолжээ.

Куба-Америкийн харилцаа хэрхэн өрнөж байна вэ?

¿Qué bolá, Cuba? (Сонин юутайв дээ, Куба орон?) хэмээн АНУ-ын экс Ерөнхийлөгч Барак Обама нэг жилийн өмнө Air Force One агаарын хөлгөөрөө Гаванад газардахдаа Кубын ард түмэнтэй мэндчилж байв. Бараг л нэг зууны дараа АНУ-ын удирдагч Куба арал дээр хөл тавьж түүхэн үйл явдлыг тамгалан үлдээж байлаа. Дэлхийн бүх телевиз Хуучин Гаванаар гүйлдэж Цагаан ордны эзний айлчлал, Рауль Кастротой хийсэн уулзалтыг сурвалжилсан юм. Тэр үед итгэл найдвар, өөрчлөлт, мөрөөдөл зэрэг үгс хамгийн их сонсогдож Куба, Америкийн харилцаанд шинэ үе нээгдлээ хэмээн ярьж байв. Б.Обамагийн айлчлал хоёр улсын харилцааг хэвийн болгох үйл явцыг түргэсгэх, батжуулах зорилготой хэмээн Куба дахь АНУ-ын Элчин сайдын яамны анхны нэгдүгээр нарийн бичгийн дарга Жастин Томас хэлж байсан юм. АНУ Кубын талаарх баримтлах бодлого, чиглэлээ өөрчлөх нь хэмээн дэлхий нийт харж байсан нь зүйн хэрэг.

Гэвч тэр цагаас хойш далайцтай том өөрчлөлт гарсангүй. Гарч буй өөрчлөлтүүд зөвхөн эдийн засгийн салбарт ажиглагдаж байна. Обамагийн айлчлалын дараа итгэл найдвар тээж байсан куба иргэд Дональд Трампын ирэлтээс айн түгшиж, хоёр талын харилцаанд хүрсэн ололт амжилт нь хойшоо ухрах вий хэмээн санаа зовних болжээ. Обамагийн түүхэн айлчлалаас хойш ердөө л нэг жил өнгөрч байгаа ч олон кубачуудын хувьд маш урт хугацаа өнгөрсөн мэт санагдаж, дорвитой өөрчлөлт гартал дахиад олон арван жил болох юм шиг сэтгэгдэл төрөх болсон аж.

Сүүлийн нэг жилд Кубад Rolling Stones концертоо толилуулж, Chanel-ийн загвар өмсөгчид Гаваны тайзан дээр алхаж куба иргэдийг гайхашруулсан олон үйл явдал болсоор. Фидель Кастро өөд болж, хуурай хөл, нойтон хөлийн бодлого цуцлагдаж, хоёр улсын хооронд зорчигчдийн аварга хөлөг онгоцны аялал, худалдаа арилжааны шууд нислэг сэргэж, Куба арал дээр Америкийн хөрөнгө оруулалттай анхны зочид буудал хаалгаа нээжээ. Гэсэн хэдий ч Америкийн томоохон компанийн хөрөнгө оруулалт хараахан орж ирээгүй байна. 60 жил үргэлжилсээр буй эдийн засгийн хориг арга хэмжээний улмаас Кубад томоохон хөрөнгө оруулалт орж ирэхгүй байна хэмээн Гаваны эрх баригчид үзэж байна.

Б.Обамагийн айлчлалын дараа Кубад гарсан хамгийн том өөрчлөлт нь Гаваны гудамжаар хэсүүчлэх америк жуулчид. Кубад хамгийн их ирдэг жуулчид нь канадууд. Америкууд хоёрт бичигдэх болов. Хуучин Гавана дахь жуулчдын гудамж америкуудын хөлд дарагдаж, бизнес цэцэглэж, хуучин барилга байшин, зочид буудлуудыг сэргээн засварлаж байна. “Би одоо юмаа зарах гэж хашгирч зарлах шаардлагагүй болсон. Тун хурдан зарагддаг болсон” хэмээн Chivirico хэмээх Кубын алдартай амттаны явуулын худалдаачин Улисес өгүүлж байна. Эрэлт хэрэгцээ ихэссэний улмаас жуулчдын хөл ихтэй дүүргүүдийн хоолны газрууд хүнсний бүтээгдэхүүнээ татаж амжихгүй байгаа аж. Хуучин Гавана дахь нэгэн зочид буудлын эзэн жуулчдын тоо нэмэгдсэнд ихэд сэтгэл хангалуун байгаа ба удахгүй жуулчид багатай улирал хэмээх үг хэллэг байхгүй болно хэмээн батлан өгүүлэв. Аялал жуулчлалын салбарт ажилладаггүй куба иргэдийн хувьд амьдрал бахь байдгаараа, өөрчлөгдсөн юмгүй байна. Куба, Америкийн харилцаа сайжирсан ч Куба дахь сөрөг хүчний эрх чөлөө хумигдмал хэвээр, улс төрийн систем нь өөрчлөгдөх дохио, тэмдэг ажиглагдахгүй байна.

Үлэг гүрвэлийн 80 өндөг хулгайлаад баригдав

Хятадын зүүн нутгаас үлэг гүрвэлийн 80 орчим чулуужсан өндөг хулгайлсан дөрвөн этгээдийг цагдаа нар баривчилжээ. Цагдаа нар баян худалдан авагчийн дүрд тоглож эртний үнэтэй чулуужмал наймаалагчдыг илрүүлсан байна. Ван тэргүүтэй дөрвөн этгээд Хэйлунзян муж дахь гэртээ үлэг гүрвэлийн өндөгнүүдийг нуусан байв. Тэдний гэрийг нэгжих үеэр 27 өндөг илрүүлсэн ч үлдсэн өндөгнүүд алга болжээ. Үлэг гүрвэлийн араг яс, чулуужсан өндөг хамгийн их олддог улс нь Хятад, Монгол юм. Хятадын өмнөд хэсгийн Хэюань хот орчмын нутгийг палеонтологийн диваажин гэдэг. Тэндээс гарсан эртний ховор олдворууд хууль бус наймаачдын гараар орох нь элбэг. Чулуужсан өндөг, араг ясыг худалдаж авдаг гадаадын мафийн бүлэглэл ч байдаг ажээ.

Иванка Трамп Цагаан ордонд өрөөтэй болно

АНУ-ын Ерөнхийлөгч Дональд Трампын охин Иванка Трамп Цагаан ордонд албаны өрөөтэй болно хэмээн Ерөнхийлөгчийн засаг захиргаанаас мэдэгдэв. 35 настай Иванка Цагаан ордны баруун жигүүрт байрлаж нууц мэдээлэлтэй танилцах эрхтэ болж, Засгийн газрын харилцаа холбоог ашиглах ажээ. Иванка Трамп ямар нэг албан тушаал хашихгүй, цалин авахгүй. Тэрээр Ерөнхийлөгчийн зөвлөхөөр ажиллаж байгаа нөхөр Жаред Кушнерт туслах юм. Д.Трамп Ерөнхийлөгч болсноос хойш охин Иванка нь томоохон арга хэмжээнд байнга хамт байлцах болсон билээ. Гуравдугаар сарын 17-нд Германы канцлер Ангела Меркель Цагаан ордонд айлчлахад Иванка түүний хажууд суусан юм. Тэрээр Меланиа Трампыг туршлага суух хүртэл нь тэргүүн хатагтайн үүргийг гүйцэтгэж байна хэмээн зарим хэвлэлд бичжээ. 

Д.Трампын шинэ зарлигт дахин хориг тавилаа

АНУ-ын холбооны шүүгч Деррик Уотсон лалын зарим орны иргэдийг АНУ-д орохыг хориглосон хуулийг хүчинтэй болохоос нь өмнө хориг тавилаа. Ерөнхийлөгч Трампын цагаачлалын талаарх шинэ зарлигийн үйлчлэлийг зогсоож өгөхийг хүссэн Хавай мужийн нэхэмжлэлийг шүүх ийнхүү ёсоор болгожээ. Цагаан ордны эзний шинэ зарлигийг хориглохыг хүсч хамгийн түрүүнд Хавай муж шүүхэд хандаад байсан юм. АНУ-ын Ерөнхийлөгч нэгдүгээр сард цагаачлалын талаарх анхны зарлигаа баталсан ч Сиэтлийн шүүх хориг тавьж цуцалсан билээ.

Хавай мужийн өмгөөлөгчид Хонолулу дахь холбооны шүүхэд гомдол гаргахдаа, цагаачлалын хязгаарлалтын улмаас мужийн лал шашинтай иргэд хохирно, гадаадаас ирэх жуулчид, оюутны урсгал багасна гэжээ. Д.Трампын шинэ зарлиг өчигдрөөс эхлэн хүчин төгөлдөр үйлчилж эхлэх байв. Зарлигийн дагуу, Иран, Йемен, Ливи, Сири, Сомали, Суданы иргэдийг АНУ-д орохыг нь 90 хоногийн турш хориглоод байсан юм.

Эрх баригч нам ялалт байгуулав

Голландын парламентын сонгуульд Ерөнхий сайд Марк Руттегийн тэргүүлдэг Эрх чөлөө, ардчиллын төлөөх нам ялалт байгуулжээ. Тус нам парламентын 31 суудлыг авчээ. Хэт үндсэрхэг үзэлтэй Эрх чөлөөний нам, Христос ардчилсан нам, Ардчилагчид-66 нам хамтдаа 19 суудал авлаа. “Манай нам гурав дахь удаагаа Голландын хамгийн том намаар шалгарлаа. Манай иргэд популизмд “Үгүй” гэж хэллээ” хэмээн Рутте мэдэгдэв. Гуравдугаар сарын 15-нд болж өнгөрсөн парламентын сонгуулийн ирц 81 хувьтай байсан нь сүүлийн 30 жилд гарч байгаагүй өндөр үзүүлэлт юм. 2016 оны намар явуулсан судалгаагаар, цагаачдыг хязгаарлаж, лал шашинтнуудыг улс орноос хөөж гаргана гэж ярьдаг Эрх чөлөөний нам ялалт байгуулахаар байсан аж. Гэвч тэдний хэт популист амлалт амжилтыг нь нураалаа хэмээн ажиглагчид үзэж байна.

Манчестер Сити шилдэг наймд шалгарч чадсангүй

Аваргуудын лигийн шилдэг найман баг тодорлоо. Өчигдөр Францын лигийн Монако Английн Манчестер Ситиг талбай дээрээ хүлээн авч 3:1-ээр хожсоноор дараагийн шатанд шалгарав. Эхний тоглолтод англичууд 5:3-аар хожсон. Гэвч хоёр тоглолтын нийлбэрээр 6:6 болж айлын талбайд илүү олон гоол оруулсан францууд дараагийн шатанд үлдлээ. Испанийн Атлетико Мадрид Германы Леверкузентэй 0:0 харьцаагаар тэнцэж 4:2 нийлбэр дүнгээр шилдэг наймд шалгарлаа. Ийнхүү Аваргуудын лигийн шилдэг наймд Испанийн Барселона, Реал, Атлетико, Германы Байерн, Боруссиа, Английн Лестер, Италийн Ювентус, Францын Монако үлдлээ. Сугалаа өнөөдөр болно. Энэ улиралд Барселона, Реал түрүүлэх магадлал хамгийн их байна.

“Титаник” руу аялуулна

Живсэн “Титаник” хөлөг рүү усан доорх аялал зохион байгуулна хэмээн The Telegraph сонин мэдээлэв. Лондонд байрладаг нэгэн аялалын компани ийм санаачилга гаргаж байгаа аж. Алдарт “Титаник” хөлөг онгоцны үлдэгдэл Атлантын далайн дөрвөн мянган метрийн гүнд нойрсож байгаа. 2018 оны тавдугаар сараас эхлэн хүссэн хүн бүхэн түүнийг харах боломжтой болох ажээ. “Титаник”-тай танилцах аялал найман өдөр үргэлжилнэ. Нэг группт есөн жуулчин багтах аж. Төлөвлөгөө ёсоор, жуулчдыг Канадын Сент-Жонс хотоос нисдэг тэргээр холын аялалын хөлөг онгоцонд хүргэж “Титаник” хөлөг живсэн бүсэд аваачих ажээ.

Цаг агаар таатай байвал зорчигчид домогт хөлөг онгоцны үлдэгдлийг харж болно. Аялалын хөтөлбөрт лекц, мэтгэлцээн, эрдэмтэн, судлаачидтай хийх уулзалт багтаж байна. Энэхүү аялалын нэг хүний зардал 105 мянган доллар болно хэмээн тооцоолжээ. “Титаник” хөлөг 1912 онд живсэн юм. Хятад улс жуулчдад зориулж алдарт “Титаник” хөлгийн хуулбарыг бүтээх гэж байгаа мэдээ саяхан цацагдсан билээ.

Zara-гийн цэвэр ашиг 10 хувиар өсчээ

Zara брэндийг эзэмшдэг Испанийн Inditex компани 2016 оны санхүүгийн тайлангаа гаргахад цэвэр ашиг 10 хувиар өсч 3.2 тэрбум долларт хүрчээ. Нийт худалдааны хэмжээ 12 хувиар нэмэгдэж 23.3 тэрбум долларт хүрсэн байна. Өнөөдөр Inditex компани дэлхийн 93 улсад 7300 дэлгүүртэй.

Inditex компани 1963 онд Испанийн хойд хэсгийн Галисиа мужид байгуулагджээ. Эдүгээ тус компани Zara, Pull&Bear, Massimo Dutti, Bershka, Stradivarius, Oysho, Zara Home, Uterqüe зэрэг нэртэй брэндийг дэлхий нийтэд танил болгожээ. Компанийг үүсгэн байгуулагч Амансио Ортега дэлхийн баячуудын жагсаалтад 70 тэрбум долларын хөрөнгөөр Билл Гейтс, Уоррен Баффет нартай зэрэгцэн бичигдэж байна. 

Цунамийн хохирогчдод хүндэтгэл үзүүлэв

2011 оны цунамид нэрвэгдсэн хүмүүсийн дурсгалыг хүндэтгэсэн арга хэмжээ өчигдөр Японд болж Ерөнхий сайд Шинзо Абэ, хунтайж Акишино нар оролцжээ. Өдрийн 14:46 цагт нэг минут чимээгүй зогсчээ. Зургаан жилийн өмнөх өдөр яг энэ цагт Японы эрэгт газар хөдөлж аймшигтай давалгаа үүссэн юм. Цунамийн хохирлыг арилгаж дэд бүтцийг сэргээх ажил бараг дууссан хэмээн Шинзо Абэ мэдэгдлээ. “Байгалийн гамшгийн дараа тусласан бүх улс оронд талархаж байна. Бид өөрсдийн туршлагаа ашиглаж байгалийн гамшгаас сэргийлэхэд хувь нэмэр оруулахыг хүсч байна” хэмээн тэрээр онцллов.

2011 оны гуравдугаар сард Японы зүүн хойд эргийн далайд газар хөдөлсний улмаас 15 метр өндөртэй давалгаа үүсч эх газар руу орж ирсний улмаас 18 мянган хүн амь насаа алдсан юм. “Фукушима-1” цөмийн цахилгаан станц үерт автан сүйрчээ. 2011-2015 онд сэргээн босголтын үйл явцад 220 тэрбум доллар зарцуулжээ.

Сүүлийн 72 жилд гараагүй хүмүүнлэгийн хямрал

Дэлхийн II дайны төгсгөлөөс хойш байгаагүй хүмүүнлэгийн хямрал дэлхий нийтийг нөмрөөд байна хэмээн НҮБ-аас мэдэгдлээ. Йемен, Өмнөд Судан, Сомали, Нигерид 20 сая хүн өлсгөлөнд нэрвэгдээд байна. НҮБ-ын Хүүхдийн сангаас мэдэгдэж буйгаар, энэ онд 1.4 сая хүүхэд өлсгөлөнгөөр хорвоог орхиж магадгүй байгаа аж. Яаралтай арга хэмжээ авахгүй бол дээрх улсууд дахь нөхцөл байдал хүндэрч гамшгийн хэмжээнд очно хэмээн НҮБ-ын Ерөнхий нарийн бичгийн даргын хүмүүнлэгийн асуудал хариуцсан орлогч Стивен Брайан ярилаа. Улс орнууд үйл ажиллагаагаа нэгтгэхгүй байгаагийн улмаас хүмүүс өлсгөлөнгөөр үхэж байна хэмээн тэрээр онцлов. Гамшгаас сэргийлэхийн тулд долдугаар сараас өмнө 4.4 тэрбум долларын тусламжийг хүргэх ёстой хэмээн үзэж байна. Сомали, Өмнөд Судан, Йеменд зэвсэгт мөргөлдөөн нэмэгдэхийн хэрээр хүмүүнлэгийн нөхцөл байдал улам хурцадсаар байна. Нигерид радикал лал босогчдын үйл ажиллагаа идэвхжсэний улмаас олон арван мянган хүн орон гэрээ орхин дүрвэх болжээ.

Голланд дахь туркууд үймээн дэгдээжээ

Туркийн Ерөнхийлөгч Эрдоганыг дэмжсэн турк иргэд Голландын Роттердам дахь  Туркийн консулын газрын өмнө эсэргүүцлийн жагсаал хийж цагдаа нарын эсрэг хүч хэрэглэжээ. Цагдаа нар жагсаалын тараахын тулд усан буу ашиглаж, туркууд чулуу, лонх шидэж байв. Голландад ирсэн Туркийн Гадаад хэргийн сайд Мевлют Чавушоглу, Нийгмийн бодлогын сайд Фатим Бтюль нар Роттердамд амьдардаг турк иргэдтэй уулзахыг хүссэн ч Голландын эрх баригчид зөвшөөрөөгүй юм. Үүнд эгдүүцсэн турк иргэд жагсаал хийжээ.

Гуравдугаар сарын 15-нд Голландад болох сонгуульд Герт Вилдерсийн Эрх чөлөөний нам ялалт байгуулж магадгүй байна. Тус нам улс орондоо лал шашныг хориглож, Голландыг дахин агуу улс болгоно хэмээн амлаж байгаа аж. Голландад 400 мянган турк үндэстэн амьдарч байна. Мөн Австри, Герман, Швейцарийн эрх баригчид Туркийн албаны хүмүүсийг турк иргэдтэй уулзахыг хоригложээ. 

Ерөнхийлөгч Пак Гын Хэг огцруулсны дараахь дөрвөн асуулт

Өмнөд Солонгосын Үндсэн хуулийн шүүх авлигын хэрэгт орооцолдоод байсан Ерөнхийлөгч Пак Гын Хэг албан тушаалаас нь огцруулав. Ийнхүү ардчилсан зарчмаар сонгогдсон анхны эмэгтэй лидер авлигын хэргээр шүүгдэж магадгүй болжээ. Хойд Солонгос, Хятадтай харилцаа хурцдаж, өмнөдүүд АНУ-тай хамтран цэргийн хээрийн сургууль хийсэн шуугиантай үед тэрээр огцорч байна. Өмнөд Солонгост юу болж байна вэ? Пак Гын Хэгийн огцролтын дараа улс орон, бүс нутагт юу болж болох вэ?

-Яагаад ийм юм болов?

Ерөнхийлөгчийг авлигын хэргээр улс төрийн хариуцлагад татах парламентын шийдвэрийг Үндсэн хуулийн шүүх баталлаа. Энэ хэрэгт түүний дотны найз эмэгтэй Чой Сун Сил бас холбогджээ. Пак Гын Хэ Өмнөд Солонгосын том компаниудыг дарамталж Засгийн газарт хандив өргүүлэхийн тулд найз эмэгтэйтэйгээ зөвлөлдөж шийдвэр гаргадаг байсан гэж байна. Хоёр эмэгтэй ямар нэг гэмт хэрэг үйлдээгүй хэмээн мэдүүлж байгаа аж. Чой Сун Сил Сөүлийн төрд ямар нэг албан тушаал хашдаггүй ч албаны, нууц баримт бичигтэй чөлөөтэй танилцдаг байжээ. Парламент дээрх санал хураалтын дараа Пак Ерөнхийлөгчийн эрх мэдлээ алдсан бол одоо халдашгүй дархан эрхээ алдаж шүүхэд дуудагдаж магадгүй боллоо. Үндсэн хуулийн шүүхээс өнгөрсөн баасан гаригт “Экс Ерөнхийлөгч ард түмний итгэл найдвараас урвасан. Хуулийг ноцтой зөрчсөн” хэмээн мэдэгджээ.

-Одоо юу болох вэ?

Өмнөд Солнгосын дараагийн Ерөнхийлөгчийг 60 хоногийн дотор сонгох ёстой. Нэр дэвшигчид ч бараг бэлэн болоод байна. Парк Гын Хэгийн консерватив намынхан түүнийг дэмжигчид болон түүнээс зайгаа баригчид гэсэн хоёр хэсэгт хуваагджээ.

Сүүлийн судалгаагаар, 2012 онд Пактай Ерөнхийлөгчийн сонгуульд өрсөлдөөд ялагдсан Ардчилсан намын дарга Мун Жае Ин дараагийн төрийн тэргүүнээр сонгогдох магадлалтай болж ирэв. Пак Гын Хэ авлигын хэрэгт орооцолдохын хэрээр Мун Жаегийн нэр хүнд дээшилсээр байгаа юм. Өнгөрсөн арванхоёрдугаар сараас хойш Ерөнхийлөгчийн үүргийг гүйцэтгэж байгаа Хван Ко Ан өмнөх Ерөнхийлөгчийн засаг захиргаанд хэтэрхий ойрхон хүн гэдгээрээ Ерөнхийлөгчөөр сонгогдох магадлал багатай байна. Консерватив намынхан энэ хугацаанд эргэн сэргэж Ардчилсан намын эсрэг дорвитой эсэргүүцэл үзүүлж чадна гэдэгт тоймчид эргэлзэж байна.

-Экс Ерөнхийлөгч шүүхэд дуудагдах уу?

Тун магадгүй. Өмгөөлж хамгаалж байсан халдашгүй дархан эрх нь байхгүй болсон тул одоо түүнийг нягт мөрдөн шалгахаар болж байна. Түүний найз Чой Сун Силийг авлигын хэргээр шалгаад эхэлсэн. Samsung-ийн өв залгамжлагч Ли Жае Ён мөн улс төрийн ашиг хонжоо олох зорилгоор Пак Гын Хэгийн дарамт шахалтаар Чой Сун Силийн буяны санд ихээхэн мөнгө хандивласан хэргээр шалгагдаж байна. Экс Ерөнхийлөгчийг ихээхэн хэмжээний авлига авсан хэмээн үзэж байгаа аж. Samsung корпорац Чойн санд 36 сая доллар хандивласан гэж байна. Өмнөд Солонгосын томоохон компаниудын захирлууд мөн хандивыг сая саяаар нь өгч байсан бололтой. Ийнхүү Өмнөд Солонгос дуулиан, шуугианаар дүүрэн байгаа ч тус улсын ардчилал тогтвортой, эдийн засаг нь хүчтэй хэвээр байна.

-Бүс нутагт ямар өөрчлөлт гарах вэ?

Хүйтэн дайны үеийн Өмнөд Солонгосын цэргийн дарангуйлагч Пак Гын Хэгийн охин Пак хойд хөршийнхөө өдөөн хатгалгыг хатуу сөрөн зогсч, Вашингтогтой илүү ойртон нөхөрлөж байлаа. Өмнөд Солонгосыг Пхеньяны довтолгооноос хамгаалахын тулд АНУ энэ долоо хоногт пуужингийн хамгаалалтын нүсэр системийг Өмнөд Солонгос руу илгээж эхэлснээ мэдэгдэв. Хятад улс үүнд дургүйцэж буйгаа мэдэгдсэн бол, АНУ аюулгүй байдлаа хамгаалахын тулд Ази дахь цэргийн нөлөөгөө нэмэгдүүлэх хэрэгтэй болсон гэв. Одоо Пак Гын Хэ огцорсон тул эрх мэдэлд гарч ирэх магадлалтай Ардчилсан намынхан хойд хөршийнхөө зүг илүү аядуу, зөөлөн бодлого баримтлах нь тодорхой.

Ардчилсан намын лидер Мун Жае Ин Сөүлийн лидерээр сонгогдвол Хойд Солонгостой улс төрийн харилцааг түлхүү сэргээж байсан “Нарны бодлого”-ыг сэргээх магадлалтай байна. Пак Гын Хэ огцорсны дараа Хойд Солонгос тэр даруй мэдэгдэл хийж экс Ерөнхийлөгчийг “Ердийн гэмт хэрэгтэн” хэмээн нэрлэжээ. Өмнөд Солонгосын шинэ Засгийн газрын бодлогоос хойл хөршийн ааш авир ихээхэн хамаарна хэмээн ажиглагчид үзэж байна. 

Зургийн тайлбар: Ардчилсан намын лидер Мун Жае Ин