Д.Трамп Пентагоны эрх мэдлийг нэмэгдүүлжээ

АНУ-ын Ерөнхийлөгч Дональд Трампын засаг захиргаа Ирак, Сирид илгээх америк цэргүүдийн тооны хязгаарыг цуцлахыг Пентагоны (АНУ-ын Батлан хамгаалах яам) генералуудад зөвшөөрчээ. Энэ тухай Reuters агентлаг баттай эх сурвалжаас иш татан мэдээлжээ. Пентагонд энэ мэдээллийг баталсан ч гадаадад үүрэг гүйцэтгэдэг америк цэргийн тоо өөрчлөгдөхгүй гэжээ. “Исламын улс” террорист бүлэгтэй тэмцэхийн тулд орон нутгийн цэрэг, цагдаагийн хүчинд дэмжлэг үзүүлэх, тухайн улс орон дахь америк цэргийн тоог нэмэгдүүлэх шаардлага гарч ирж байна хэмээн АНУ-ын Батлан хамгаалах яам үзэж байгаа аж.

Ерөнхийлөгч Д.Трампын шийдвэр Пентагоны эрх мэдлийг ихээхэн нэмэгдүүлж, хязгаарлалтад баригддаг системээс нь чөлөөлж байна хэмээн тоймч, ажиглагчид үзэж байна. Ийнхүү гадаад улс орон, дайн самуунтай бүс нутагт үүрэг гүйцэтгэж буй америк цэргүүдийн бодио тоо нууцлагдмал байхаар болж байна. Force Management Level буюу гадаад цэргийнхээ тоонд хязгаарлалт, хяналт тавих системийг Барак Обамагийн засаг захиргаа Ирак, Сирид хэрэгжүүлжээ. АНУ-ын өмнөх Ерөнхийлөгч Сири, Иракт үүрэг гүйцэтгэдэг цэргийнхээ тоог зөвшөөрсөн хэмжээнээс үе үе нэмэгдүүлсээр ирсэн юм. Өнөөдөр албан ёсны мэдээллээр, Иракт 5262, Сирид 503 америк цэрэг байрлаж байна. Гэвч бодит байдал дээр энэ тоо хэдэн мянгаар илүү байж магадгүй. 2017 оны хоёрдугаар сард Афганистан дахь Америкийн цэргийн командлагч, генерал Жон Николсон тус улс дахь америк цэргийн тоог мянгаар нэмэгдүүлэх шаардлагатай байна хэмээн Конгресст хүсэлт тавьжээ. Өнөөдөр Афганистан улсад Америкийн 8500 цэргийн албан хаагч үүрэг гүйцэтгэж байна.

Москвад согтууруулах ундааг хориглоно

Тавдугаар сарын баярын өдрүүдэд Москвад гэмтэл бэртэл, сөрөг үр дагавараас сэргийлэхийн тулд согтууруулах ундааны худалдаанд хязгаарлалт хийнэ хэмээн хотын даргын албанаас мэдэгдэв. “Тавдугаар сарын баярын өдрүүдэд нийслэлд архи, шар айргийн худалдааг хориглоно. 1, 8, 9-ний өдөр олон нийтийн арга хэмжээ болж буй газар болон ойролцоох дэлгүүрүүдэд хатуу ундаа, градус багатай ундаа, шар айраг худалдахыг хориглоно. Мөн шилтэй хүйтэн ундаа худалдахыг зөвшөөрөхгүй” хэмээн мэдэгдэлд онцолжээ. ОХУ-д тавдугаар сарын 1-нд хөдөлмөрчдийн эв санааны нэгдлийн баяр, 8-нд төрийн албан хаагчдын, 9-нд Ялалтын баярыг өргөн дэлгэр тэмдэглэдэг.

Туркт 9000 цагдааг ажлаас нь халжээ

Туркийн цагдаагийн газар есөн мянган ажилтнаа Америкт амьдардаг лалын шашны зүтгэлтэн Фетхулла Гюлентэй холбоотой хэмээн сэжиглэж ажлаас нь халжээ. Үндэсний аюулгүй байдлын эрх ашгийн үүднээс ийм алхам хийсэн хэмээн цагдаагийн газрын мэдэгдэлд онцолжээ. Өнгөрсөн оны долдугаар сард Туркт төрийн эргэлт хийх оролдлого гарсан юм. Төрийн эсрэг хуйвалдааныг нухчин дарсны дараа Ерөнхийлөгч Эрдоган эртний өрсөлдөгч Гюленийг хуйвалдааны толгойлогч, далд удирдагч хэмээн нэрлэжээ. АНУ-д амьдарч байгаа турк санваартан Фетхулла Гюлен энэ хэрэг явдалд ямар ч хамаагүй хэмээн мэдэгдсээр байгаа аж. Гэсэн хэдий ч Анкарагийн эрх баригчид түүнийг буруутай хэмээн үзэж шилжүүлж өгөхийг АНУ-аас шаардсаар байна. Хэд хоногийн өмнө Туркт Гюлений талыг баримтлагчдын эсрэг тусгай ажиллагаа явуулж мянга орчим хүнийг саатуулжээ.  Төрийн эргэлт хийх оролдлого гарсны дараа Туркийн эрх баригчид 40 мянган хүнийг баривчилж, цагдаа, цэргийн албан хаагч, багш зэрэг 120 мянган хүнийг төрийн эргэлтэд буруутган ажлаас нь халсан билээ.

Англи тосгон дуудлага худалдаагаар зарагджээ

2016 онд дуудлага худалдаанд 20 сая паундаар тавигдаж байсан Английн Норт-Йоркшир гүнлэгт байдаг Уэст Хеслертон тосгон эзэнтэй болжээ. Энэ тосгон 43  байшин, 2116 га талбайтай. 21 өрөөтэй том харш ч байдаг аж. Уэст Хеслертон тосгоныг 150 жилийн турш ганцхан гэр бүл эзэмшиж ирсэн юм. 2010 онд тосгоны хамгийн сүүлчийн эзэмшигч, 84 настай Ив Доуни нас барсны дараа өв залгамжлагчид нь дуудлага худалдаагаар оруулахаар шийдсэн байна.

Тосгоны шинэ эзэмшигчээр Британийн Albanwise хөрөнгө оруулалтын компани тодорчээ. Анхны дуудах үнэ нь 20 сая паунд (26 сая доллар) тосгон ямар үнэ хүрсэн нь нууц байна. 1960-аад онд эцгээсээ тосгоныг өвлөж авсан Ив Доуни байшин түрээслэгчдэд маш бага үнэ санал болгож байснаараа тосгоноо хөгжин цэцэглүүлж чаджээ. Уэст Хеслертон тосгон эзэддээ жилд 388 мянган паундын ашиг авчирдаг. Шинэ эзэд нь тосгоныг хөдөө аж ахуй, фермийн зориулалтаар ашиглах бололтой.

Японы Ерөнхий сайд ОХУ-д ирлээ

Японы Ерөнхий сайд Шинзо Абэ ОХУ-д айлчлалаар ирж байна. Тэрээр Ерөнхийлөгч В.Путинтэй уулзаж Хойд Солонгос, Сирийн асуудлаар ярилцахаас гадна Өмнөд Курилийн арал дээр эдийн засгийн хамтын ажиллагааг хөгжүүлэх, Орос, Японы хооронд энхийн гэрээ байгуулах талаар нухацтай ярилцах юм. Японы тал маргаантай арлын асуудлаар том ахиц дэвшилд хүрнэ гэдэгт итгэлтэй байгаа аж. Абэгийн мэдэгдэж хэлж буйгаар, эдгээр арлуудын экс оршин суугчид өвөг дээдсийнхээ ариун газрыг чөлөөтэй эргэж байх эрхтэй байх ёстой хэмээн Япон улс үзэж байна.

В.Путин, Шинзо Абэ нар улс төр, эдийн засаг, хүмүүнлэгийн салбар дахь хамтын ажиллагааны талаар хэлэлцээ хийнэ. Курилын аралд Орос, Японы Засгийн газрын түшмэлүүд, бизнесийн төлөөлөгчдийг илгээж арал дээр хамтарсан үйл ажиллагаа явуулах боломжийн талаар ярилцах юм. Курилийн арлын хүрээлэн буй орчныг хамгаалах, тэнд загас агнуур, аялал жуулчлал, эмнэлгийн үйлчилгээг нэвтрүүлэх талаар тохиролцоонд хүрэх төлөвтэй байна. 

Хятад улс анхны тээгч хөлөг онгоцоо усанд тавилаа

Хятад улс өөрсдөө үйлдвэрлэсэн анхны байлдааны нисэх онгоц тээгч хөлөг онгоцоо усанд тавилаа хэмээн “Синьхуа” агентлаг мэдээлэв. Ляонин мужид үйлдвэрлэсэн тээгч хөлгийг Далянь боомтоос усанд тавьжээ. Хятадын тэнгисийн цэргийн флот байгуулагдсаны 68 жилийн ойн өдөр ийнхүү бэлэг барьж байгаа аж. Энэ нь Хятадын ардын чөлөөлөх армийн хоёр дахь тээгч хөлөг онгоц болж байна. Тус улс зөвлөлтийн үед үйлдвэрлэсэн анхны тээгч хөлөг онгоцоо 1990-ээд оны сүүлчээр Украинаас 25 сая доллараар худалдан авч байв. Өөрсдийн үйлдвэрлэлийн анхны тээгч хөлөг нь 2020 онд бүрэн ашиглалтад орох ажээ.

Зохисгүй үгнийхээ төлөө огцров

Японы Ерөнхий сайд Шинзо Абэ Байгалийн гамшгийг нөхөн сэргээх яамны сайд Масахиро Имамураг огцрууллаа. Имамура Ерөнхий сайдын өргөөнд зочилсныхоо дараа өөрөө энэ тухай сэтгүүлчдэд мэдээлсэн байна. Тэрээр “2011 оны цунамийн хохирол 227 тэрбум доллараар үнэлэгдэж байна. Энэ гамшиг Тохоку орчимд болсон нь сайн хэрэг. Нийслэлд ойрхон болсон бол хохирол маш их байх байлаа” хэмээн мэдэгдсэн нь шуугиан дэгдээсэн юм. Имамур мөн гурван долоо хоногийн өмнө бас нэг таагүй зүйл ярьснаар огцрох “замаа засчээ”. “Фукушима цөмийн цахилгаан станцын ослын дараа тэндхийн оршин суугчдыг буцааж авчрах нь тэдний хувийн асуудал” хэмээн хариулахдаа асуулт тавьсан сэтгүүлчийг “Амаа хамхи” хэмээн загнажээ.

Ф.Макрон 15 настайдаа ирээдүйн  эхнэрээ үнсэж байжээ

Британийн Daily Mail сонин Францын Ерөнхийлөгчийн сонгуулийн хоёрдугаар шатанд тунаж үлдээд байгаа нэр дэвшигч Эммануэль Макроны 15 настай байхдаа ирээдүйн эхнэр Брижит Троньег үнсэж буй зургийг нийтэлжээ. 1993 онд 15 настай Макрон хөвгүүн театрт тоглолт үзсэнийхээ дараа сургуулийнхаа багш Троньегийн хацар дээр үнсэж буй нь зурагнаас харагдана. 65 настай Брижит Тронье анхны уулзалтынхаа талаар “Түүнийг жүжигт хэрхэн тоглож байгааг харахаар очсон юм. Тэр гайхалтай тоглож байсан” хэмээн ярьжээ. Макрон 17 настай байхдаа багш бүсгүйдээ “Би тантай гэрлэнэ” гэж хэлж байсан аж. Макроны эцэг эх хүүгийнхээ багштайгаа үүсгэсэн харилцааг “Зохисгүй” хэмээн үзэж хүүгээ түүнээс холдуулах гэж оролдсон ч талаар болсон юм. Францын Ерөнхийлөгчөөр сонгогдож тун магадгүй байгаа Макрон гэргий Тронье болон түүний өмнөх гэрлэлтийн гурван хүүхдийн хамт амьдардаг.

Жулиа Робертс Эль-Класиког урилгаар үзжээ

Мадридад болсон Эль-Класикод эзэн хааны баг гашуун ялагдал хүлээхэд Холливудын од Жулиа Робертс “Амьд гэрч” болжээ. Оскарын шагналтай жүжигчин бүсгүй Сантьяго Бернабеу цэнгэлдэхийн VIP суудалд нөхөр Дани Модер болон гурван хүүхдийн хамт тухалж Реал Мадрид-Барселона тоглолтыг үзжээ. Тоглолтын нэмэлт цагт Месси ялалтын гоол оруулсан юм. Тоглолтын дараа “Хөөрхөн хүүхэн” доошоо бууж дэлхийн шилдэг хөлбөмбөгчидтэй гар барин танилцаж, гурван хүүхэддээ Роналдо, Мессигийн өмсгөл дээр гарын үсгийг нь зуруулж авчээ. Жулиа, Дани хоёрын гурван хүүхэд нь хөлбөмбөгт ихэд дуртай, хөлбөмбөгөөр хичээллэдэг аж. Жулиа Робертс энэ уулзалтынхаа талаар Instagram дээрээ “Дэлхийн шилдэг хөлбөмбөгчидтэй уулзаж, гайхалтай тоглолтыг нь үзсэндээ их баяртай, сэтгэл хангалуун байна” хэмээн бичжээ. Дашрамд сонирхуулахад, Месси Жулиад ихэд дуртай, шүтдэг гэдгээ хэлсэн байна. 

Балба дахь амьдрал: Газар хөдлөлтөөс хойш хоёр жилийн дараа

Балба улсыг аймшигтайгаар сэгсэрсэн газар хөдлөлтөөс хойш хоёр жил өнгөрч байна. “Өнөөдөр тэрхүү байгалийн гамшгийн талаар ярьж байгаа хүн алга” хэмээн балба хос Сусма, Сужит нар өгүүлж байна. Нийслэл Катмандугийн Жопарти дүүрэгт хүүхдүүдэд боловсрол олгох хөтөлбөр хэрэжүүлдэг энэхүү балба хос газар хөдөлсөн тэр өдөр бусдын адил зөвхөн хүүхдээ л бодож байсан аж. 2015 оны дөрөвдүгээр сарын 25-нд тус улсад 7.8, таван сард нь дахин 7.3 магнитудын хүчтэй газар хөдөлж 9000 мянга орчим хүн амь насаа алдсан билээ. 1934 оны нэгдүгээр сард 8500 хүний амийг авч одсон гамшиг тэнд болж байлаа.

Аймшигт газар хөдлөлтөөс хойш хоёр жил өнгөрсөн ч Балбын Засгийн газраас хохирогчдод үзүүлж буй тусламж хангалтгүй байгаа аж. Олон зуун гэр бүл нимгэн төмрөөр босгосон жижигхэн байшинд амьдарсан хэвээр байна.  

“Катмандуд газар хөдлөлтийн ул мөр бараг мэдэгдэхгүй. Харин Катмандугаас 10-аад км-ийн зайд байдаг Бактапурт очиход огт өөр дүр зураг угтана. Нурж сүйрсэн сүм хийд, амь амьдралгүй болсон байшин барилгууд, нурангид хаагдсан гудамж.. Тус хотын оршин суугчид нурж унасан барилгын тоосгон уул, овоог авиран давж зорьсон газраа хүрэх нь хэвшил болоод байна. “Газар хөдлөлтийн дараа мөнгөө хэмнэхийн тулд түр хоргодох хуаранд амьдарч байсан. Засгийн газраас өгдөг тусламж тун бага. Өдөр хоногийг аргацаахаас өөрцгүй” хэмээн балба иргэд ярьж байна. Бактапурт сүрэл, ялтасны үйлдвэр нээгдсэн нь олон хүнийг “орох орон”-той болгож байгаа аж. “Нимгэн төмөр ялтсыг эвлүүлж босгосон овоохойндоо амьдарсаар хоёр жил боллоо. Өдөр бүр ажилдаа явж амьдрал хэвийн үргэлжилж буй мэт боловч газар хөдлөлтийн гамшгаас сэргэж дээшилсэн юм алга” хэмээн тэд гомдоллоно.

Газар хөдлөлтөөс хойш сайн дурын олон байгууллага бий болж, хохирсон хүмүүст тусламж дэмжлэг үзүүлж байсан ч аажмаар багассаар одоо бараг байхгүй болжээ. Хувь хүмүүс, пүүс компаниуд туслламж үзүүлдэг ч тэдгээр нь өдөр хоногийг аргацаах төдий. Байгалийн гамшгийн хор хохирлыг арилгах, сэргээн босгох үйл хэрэгт Балбын Засгийн газар ихээхэн хариуцлагагүй хандаж байгааг сайн дурын байгууллагынхан шүүмжилж байна. Шүүмжлэлд өртөж, олон улсын дарамт шахалтад орсон Балбын Засгийн газар газар хөдлөлтөд хохирсон иргэдэд гурван үе шаттай тусламж үзүүлэхээр болжээ. 2017 оны эхээр эхний тусламжийг хүргэсэн бол, дараагийнх нь энэ сарын сүүлчээр ирэх ёстой. Орон гэргүй болсон айлд 2500 еврогийн тусламж үзүүлэхээ болсон тухай эх сурвалж мэдээлэв. Эрх баригчид таван жилийн дараа газар хөдлөлтийн хохирлыг арилгаж, хэвийн амьдралыг сэргээнэ хэмээн тооцоолжээ.

Чучепати дахь хоргодох хуаран анхандаа 2000 гаруй хүнтэй байжээ. Гэвч тэндхийн тарчиг амьдралыг үл тэссэн хүмүүс хуаранг орхиж явсаар цөөн хэдэн хүн л үлджээ. Түр хуаранд 18 сарын турш хүүтэйгээ амьдарсан Майя бүсгүй “Олон хүн, байгууллага бидэнд туслахаар ирдэг байсан. Гэвч тэд биднийг ашиглаж ашиг олчихоод л буцдаг байсан” хэмээн өгүүлж байна. Өнөөдөр Майя цонхийг нь даавуугаар хаасан жижигхэн байшинд сарын 4000 рупигээр (40 евро) амьдардаг. Өрөөний сарын түрээс нь 4500 рупи. Хоёр жилийн өмнө Балба дахь аймшигтай газар хөдлөлт дэлхий нийтийг цочроож байсан бол өнөөдөр энэ тухай санаж дурсаж буй хүн бараг алга. Засгийн газар байгалийн гамшгийн үр дагаварыг ойрын хэдэн жилд арилгана гэж байгаа ч үүнд нь итгэх хүн цөөхөн байна. 

Ронни O'Салливан-Дин Жунхуй нар таарлаа

Снукер биллиардын дэлхийн аварга шалгаруулах тэмцээн Английн Шеффилд хотод үргэлжилж байна. Шөвгийн наймд дэлхийн таван удаагийн аварга Ронни O'Салливан Хятадын Дин Жунхуйтай таарлаа. Жунхуй өнгөрсөн оны дэлхийн аваргаар финалд гарч ирсэн ч Английн Марк Селбид хожигдсон юм. Кайрен Вилсон –Жон Хиггинс, Марк Селби-Марко Фу, Барри  Хокинс –Стивен Магуайр нар шөвгийн наймд тулахаар болж байна. Марк Селби аварга цолоо хамгаалах зорилготой байгаа бол Хятадын Дин Жунхуй дэлхийн аварга болор ганцхан зорилго тавьжээ. Олон жилийн турш тогтвортой сайн тоглож, дээд зэрэглэлийн 12 тэмцээнд түрүүлээд байгаа 30 настай Жунхуй дэлхийн аварга болвол гайхах хүн гарахгүй. Тэрээр сэтгэл зүй сайтай байвал хүсэн хүлээсэн дэлхийн аварга цолоо авч чадна гэдэгтэй мэргэжилтнүүд санал нэг байна.

Венесуэль дахь жагсаалын үеэр гурван хүн амиа алджээ

Венесуэлийн Каракас хотод Ерөнхийлөгч Николас Мадурог эсэргүүцсэн жагсаалын үеэр гурван хүн буудуулж амь насаа алдав. Дөрвөн хүн хүнд шархаджээ. Ийнхүү улс оронд эсэргүүцлийн хөдөлгөөн эхэлснээс хойш нэг сарын дотор 24 хүн амь насаа алдаад байна. Өчигдөр гэхэд л Венесуэлийн 20 хотод эсэргүүцлийн жагсаал болжээ. Жагсагчид хугацаанаас өмнө сонгууль явуулж, сөрөг хүчний лидерүүдийг шоронгоос суллахыг шаардаж байна. Сөрөг хүчин сүүлийн гурван жилд байгаагүй том эсэргүүцлийн хөдөлгөөн өрнүүлж байгаа аж.

Ерөнхийлөгч Мадурогийн бодлого улс орныг эдийн засгийн гүнзгий хямралд оруулж, ардчилал, эрх чөлөөг боомилж байна хэмээн сөрөг хүчин үзэж байна. Харин Н.Мадуро “Намайг эсэргүүцэгчид АНУ-ын тусламжтайгаар төрийн эргэлт хийхийг санаархаж байна” хэмээн мэдэгдэж байгаа аж. Сөрөг хүчний депутатууд Үндэсний ассамблейд давамгайлж байгаа ч Мадуро шүүхийн эрх мэдлээр далайлган парламентаас эрх мэдлийг нь булааж авах оролдлого хийж байна.

Элтон Жон эрүүл мэндийн шалтгаанаар концертоо цуцлав

Английн дуучин Элтон Жон өвчний улмаас АНУ-д хийх цуврал концертоо цуцалжээ. Чили улсаас буцаж ирсний дараа тэрээр бактерийн цочмог халдвар авч хоёр хоногийн турш эрчимт эмчилгээ хийлгэсэн аж. Элтон Жон дөрөвдүгээр сарын 22-нд эмнэлгээс гарч гэрээр эмчлүүлж байна. Тавдугаар сарын 6-наас өмнө Лас-Вегас, Калифорнид болох байсан концерт цуцлагджээ. “Надад ийм гайхалтай, үнэнч шүтэн бишригчид байгаад их баяртай байна. Тэднийг гомдоосондоо уучлал хүсье. Надад онцгой анхаарал тавьж байгаа эмч нарын багт талархаж байна” хэмээн нэрт дуучин мэдэгдэв. 70 настай Элтон Жон зургадугаар сарын 3-нд аялан тоглолтоо сэргээхээр төлөвлөж байна хэмээн түүний төлөөлөгч дуулгав. Бүх цаг үеийн хамгийн амжилттай дуучдын нэгд тооцогддог тэрээр хэд хэдэн “Грэмми”, нэг “Оскар”-ын эзэн болж байсан юм.

Украинд үзүүлдэг тусламжаа 70 хувиар багасгана

АНУ-ын засаг захиргаа Укрианд үзүүлдэг санхүүгийн тусламжаа 2018 онд 70 хувиар багасгахаар төлөвлөж байна хэмээн Foreign Policy сэтгүүл Вашингтоны төсвийн хүрээнээс иш татан мэдээлэв. Ерөнхийлөгч Дональд Трампын Засгийн газар Украинд 570 сая долларын тусламж үзүүлэхээр төлөвлөж байсан ч энэ нь 177 сая болон багасч байгаа аж. Үүнээс гадна АНУ хөгжиж буй хэд хэдэн оронд үзүүлдэг тусламжаа ихээхэн танаж байгаа ажээ. Тэр тусмаа Ази, Африкийн орнуудад үзүүлдэг тусламжаа 50-70 хувиар багасгаж байгааг АНУ-ын Төрийн нарийн бичгийн даргын Европ, Евразийн асуудал хариуцсан орлогч Брижит Бринк мэдэгдлээ.

“Карл Винсон”-ыг живүүлнэ хэмээн сүрдүүлэв

“АНУ-ын “Карл Винсон” байлдааны тээгч хөлөг онгоц манай усанд ойртож ирвэл түүнийг устгах хүч чадал манайд бий” хэмээн Хойд Солонгос анхааруулав. Япон, АНУ Номхон далайд цэргийн хээрийн сургууль хийж эхэлсний дараа Пхеньянаас ийнхүү мэдэгдсэн юм. Байлдааны нисэх онгоц тээгч “Карл Винсон” хөлөг онгоц энэ сургуулилтын дараа Солонгосын хойг руу хөдлөнө хэмээн Пентагоноос мэдэгдсэн аж. Японы “Ашигара”, “Самидаре” байлдааны хөлөг онгоц өнгөрсөн бямба гаригт Японы баруун өмнөд эргээс хөдөлж Филипины ольтриг хавьд байгаа АНУ-ын “Карл Винсон” хөлөгтэй нэгджээ.

Америк, Японы байлдааны хөлөг онгоцууд тэнд хэдэн өдөр стратеги, хамтын ажиллагааны сургуулилт хийх бөгөөд энэ долоо хоногийн сүүлчээр хойд зүг рүү хөдөлж Солонгосын хойг руу ойртоно хэмээн Японы Батлан хамгаалах яамнаас мэдэгдэв. Дайснуудынх нь энэ үйлдэл Хойд Солонгост таалагдахгүй байгаа нь ойлгомжтой. “Манай хувьсгалт хүчин АНУ-ын тээгч хөлөг онгоцыг ганц довтолгоогоор устгахад бэлэн байна” хэмээн Хойд Солонгосын Хөдөлмөрийн намын албан ёсны хэвлэл “Rodong Sinmun” сонинд бичжээ. Пхеньяны хэвлэл Америкийн “Карл Винсон” хөлгийг “Балмад араатан” хэмээн нэрлээд “Тэдний эсрэг ганц довтолгоо манай цэрэг, армийн сүр хүчийг харуулах бодит жишээ болно” онцлов.

Хойд Солонгосын дэглэм ийнхүү сүрдүүлэн мэдэгдэл хийж байхдаа Америкийн иргэншилтэй бас нэг хүнийг баривчилснаа зарлалаа. Сүүлийн үед Солонгос, Америкийн давхар иргэншилтэй гурав дахь иргэн ийнхүү саатуулагдаж байна хэмээн Өмнөд Солонгосын “Ионхап” агентлаг мэдээлэв. Сүүлд баривчлагдсан иргэн нь Ким хэмээх Янбяны шинжлэх ухаан, технологийн их сургуулийн багш асан аж. 50 настай тэрбээр Хойд Солонгост хүмүүнлэгийн тусламжийн ажлаар ирээд байсан аж. Ким дөрөвдүгээр сарын 14-нд Пхеньяны олон улсын нисэх буудал дээр Өмнөд Солонгос руу нисэх гэж байгаад саатуулагджээ. Үүний өмнө АНУ-ын оюутан Отто Вармбир, сүмийн номлогч Ким Дон Чул нарыг баривчилсан юм. Өмнөд Солонгос, АНУ-ын иргэншилтэй тэднийг Хойд Солонгосын эсрэг хорлон сүйтгэх үйл ажиллагаа явуулсан хэмээн буруутгаж байгаа аж.

Палестин эр дөрвөн израилийг шархдуулав

Тель-Авив хотод нэгэн палестин эр гудамжинд явж байсан дөрвөн израиль иргэн рүү дайрч шархдуулжээ. Хурц бахиар зэвсэглэсэн 18 настай палестин залуу зочид буудлын өмнө гурван хүн рүү дайрсны дараа далайн эрэг дээр очиж настай израиль иргэн рүү довтолжээ. Шархадсан иргэдийн эмнэлэгт хүргээд байгаа ба амь нас нь аюулгүй хэмээн мэдэгдэв. Палестин залууг террорист халдлага үйлдсэн хэмээн баривчилжээ. Израиль иргэд рүү хутга барин дайрах үзэгдэл өнгөрсөн онд нэлээн хэд гарсан юм. Энэ өдөр хоёр израиль цэрэг, дөрвөн израиль иргэн араб хүмүүс рүү хүйтэн зэвсэн барин дайрсан хэргээр саатуулагдсан байна. Тэднийг мөн террорист халдлагад буруутгаж байгаа аж.

АНУ-ын эргээс нефть, хий олборлоно

АНУ-ын Ерөнхийлөгч Дональд Трамп далайн эргийн газар нутгаасаа нефть, байгалийн хий олборлож эхлэх зарлигийг мөдхөн батлах гэж байна. Энэ тухай Politico сонин албаны эх сурвалжаас иш татан мэдээлэв. Америкийн эрэг орчмын газар нутагт хайгуул хийж нефть, байгалийн хийн орд газар илрүүлэх даалгаврыг өгөх болсон нь тодорхой болоод байна. Цагаан ордны эзэн мөн кибер аюулгүй байдлыг хангах, ахмад дайчдын тэтгэмжийг нэмэгдүүлэх, хөдөө аж ахуйн салбарт шинэчлэл хийх зарлигийг батлахаар зэхэж байна. Dakota Access Pipeline нефть дамжуулах хоолойгоор тавдугаар сарын 14-ноос эхлэн АНУ-д нефть нийлүүлж эхлэхээр болжээ.

Эль-Класико “Барса”-гийнх боллоо

Эль-Класико буюу Испанийн Ла Лигийн “Реал Мадрид”-“Барселона”-гийн тулаан Сантьяго Бернабеу цэнгэлдэхэд болж Каталоны багийн ялалтаар өндөрлөв. Тоглолтын эхний гоолыг “Реал”-ын хамгаалагч Касемиро 28 дахь минутад оруулжээ. Таван минитын дараа “Барса-гийн довтлогч Лионель Месси харьцааг тэнцүүлэв. 73 дахь минутад Каталоны багийн хагас хамгаалагч Иван Ракитич гайхалтай цохилтоор гоол оруулсан юм. “Реал”-ын хамгаалагч Серхио Рамос Месси дээр бүдүүлэг алдаа гаргаж улаан хуудас аван талбайг орхисон. Эзэн хааны баг хүн дутуу тоглож байсан ч 85 дахь минутад тоглолтын харьцааг 2:2 болгож тэнцүүлжээ. Гэвч 92 дахь минутад дэлхийн шилдэг довтлогч Месси гоол оруулж “Барса” 3:2-оор өрсөлдөгчөө хожиж Ла Лигийн хүснэгтийг тэргүүлж эхэлсэн юм. Месси ийнхүү карьерийнхаа 500 дахь гоолоо оруулаад байна. 

Э.Макрон, Марин Ле Пен нар тунаж үлдлээ

Францын Ерөнхийлөгчийн сонгуулийн нэгдүгээр шатанд хамгийн их санал авсан төвийн үзэлтэй Эммануэль Макрон (23,75 хувь), үндсэрхэг “Үндэсний фронт” намын лидер Марин Ле Пен (21,53 хувь) нар хоёрдугаар шатанд тунаж үлдлээ. Францууд шинэ Ерөнхийлөгчөө тавдугаар сарын 7-нд болох хоёрдугаар шатанд сонгохоор болж байна. Францын Ерөнхийлөгч Франсуа Олланд Эммануэль Макрон руу утсаар ярьж баяр хүргээд нэгдүгээр шатанд ялагдсан нэр дэвшигчдэд хандан түүнийг дэмжихийг уриалжээ. Тавдугаар бүгд найрамдах улсын түүхэнд (1958 оноос хойш) анх удаа социалист ч, барууны төвийн үзэлтэй нэр дэвшигч ч хоёрдугаар шатанд үлдэж чадсангүй. “Бүгд найрамдахчууд” намын Франсуа Фийон 19.91, Жан-Люк Меланшон 19,64 хувийн санал авчээ.  

Хоёрдугаар шатанд үлдээд буй Макрон олон улсын чөлөөт худалдаа, Европын холбооны нэгдмэл байдлын төлөө байгаа бол, Марин Ле Пен “Frexit” буюу Францыг Европын холбооноос гаргаж, НАТО-г орхих бодолтой байгаа аж. Мөн тэрээр Европын санхүүгийн гэрээнээс гарч хуучин мөнгөн дэвсгэрт франкийг сэргээхийг хүсч байна. Банкир асан Э.Макрон нь Олландын Засгийн газарт Эдийн засгийн сайдын албыг хашиж байв. Тэрээр хоёрдугаар шатанд ялалт байгуулбал Францын хамгийн залуу Ерөнхийлөгч болно. 2016 оны дөрөвдүгээр сард сайдын суудлыг орхисны дараа үүсгэн байгуулсан “Урагшаа” улс төрийн хөдөлгөөнөө Макрон “Зүүнийх ч биш, барууных ч биш” хэмээн тодорхойлдог. Тэрээр нэгдүгээр шатанд ялалт байгуулсны дараа дэмжигчдийнхээ өмнө үг хэлэхдээ “Үндсэрхэг аюул заналхийллийн эсрэг нэгдсэн эх оронч үзэлтэй франц иргэдийн Ерөнхийлөгч болохыг хүсч байна” гэжээ. Харин Марин Ле Пен “Би ард түмний нэр дэвшигч боллоо. Франц улс тэсч үлдэх тухай асуудал босч ирлээ. Анхны алхам хийгдсэн. Түүхэн үр дүн гарлаа” хэмээн ярьжээ. Нэгдүгээр шатанд ялагдсан Франсуа Фийон хоёрдугаар шатанд Макроныг дэмжихийг ард иргэдэд уриалав. Францын Ерөнхийлөгчийн сонгуульд 11 нэр дэвшигч өрсөлдсөнөөс ийнхүү хоёр нь тунаж үлдээд байна. Дөрвөн гол өрсөлдөгч нь хэт зүүнээс хэт барууны үзэлтэй нам, хөдөлгөөнийг төлөөлж байсан юм.

Идлибийг агаараас довтлохдоо зарин хэрэглэснийг тогтоожээ

Дөрөвдүгээр сарын эхээр Сирийн Идлиб мужид агаараас цохилт өгөхдөө зарин, эсвэл түүнтэй адил мэдрэлийн системийг саатуулдаг үйлчилгээтэй бодис ашигласан гэдэг дүгнэлтийг Химийн зэвсгийг хориглох байгууллагын (Organisation for the Prohibition of Chemical Weapons, OPCW)  мэргэжилтнүүд хийлээ. “Шинжилгээний няцаашгүй үр дүн үүнийг нотолж байна” хэмээн OPCW-ийн мэдэгдэлд онцолжээ. Дөрөвдүгээр сарын 4-нд босогчдын хяналтад байдаг Хан-Шейхун хотыг довтлох үеэр дор хаяж 87 хүн амиа алдсан билээ. Халдлагын золиос болсон арван хүнээс дээж авч лабораторид шинжилсэн хэмээн тус байгууллагын тэргүүн Ахмет Узюмч мэдэгдэв. Довтолгооны үеэр нас барсан гурван хүнээс дээж авч OPCW-ийн тусгай лабораторид илгээж, эмнэлэгт эмчлүүлж буй долоон хүнээс шинжилгээ авч өөр газар руу судалгаанд илгээсэн байна. “Дөрвөн өөр лабораторид хийсэн шинжилгээний дүн зарин, эсвэл заринтай адилхан бодис хэрэглэснийг нотлож байна. Илүү нарийн шинжилгээ хэд хоногийн дараа гарах ч одоо ил болсон үр дүн нь хөдөлбөргүй юм” хэмээн Узюмч ярилаа. Хэрвээ Сирийн эрх баригчид аюулгүй байдлыг хангах баталгаа өгвөл OPCW-ийн баг агаарын довтолгоонд өртсөн хот руу хөдлөхөд бэлэн байгаа аж. Одоогоор мэргэжилтнүүдийн баг уг довтолгоонд өртсөн хүмүүстэй уулзаж ярилцаж, шинжилгээ хийж байгаа аж. Хан-Шейхун хот Сирийн Засгийн газрын агаарын хүчний довтолгоонд өртсөний дараа хүмүүсийн амьсгаа боогдож, химийн бодист хордсон нь илт харагдаж байсан юм.

Энэхүү химийн зэвсгийн довтолгоонд Сирийн Засгийн газар хамаагүй хэмээн Башар Асад няцаажээ. Сирийн нисэх хүчин босогчдын химийн зэвсгийн агуулахыг бөмбөгдсөн хэмээн Дамаскийн эрх баригчид мэдэгдээд байна. Идлиб мужийг довтолсноос дөрвөн өдрийн дараа Киприйн өмнөх Газар дундын тэнгист байрлаж буй Америкийн байлдааны хөлөг онгоцноос Сирийн Хомс муж дахь Шейрат аэродром руу 59 “Томагавк” пуужин харвасан юм. Идлид мужид химийн зэвсгийн довтолгоо хийсний хариуд энэхүү пуужингийн довтолгоог хийсэн хэмээн АНУ-ын Ерөнхийлөгч Дональд Трамп мэдэгдсэн билээ.

Серена Уильямс хөл хүнд болжээ

Дэлхийн шилдэг теннисч Серена Уильямс хөл хүнд гэдгээ Snapchat сүлжээгээр дамжуулан зарлажээ. 35 настай теннисч “20 долоо хоногтой” хэмээн усны хувцастай зургаа оруулсан байв. Тэрээр нэгдүгээр сард Australian Open-д түрүүлэхдээ жирэмсэн байсан болж таарав. Ийнхүү  Серена Францын нээлттэй аварга шалгаруулах тэмцээн, Уимблдон, Америкийн нээллтэй аварга шалгаруулах тэмцээнийг өнжихөөр болж байна. Эгч дүү Уильямсын дүү Серена “Их дуулга” тэмцээнд 23 удаа түрүүлээд байгаа юм. Австралийн теннисч бүсгүй Маргарет Корт 1960-1975 онд “Их дуулга”-ын 24 тэмцээнд түрүүлж байсан удаатай. Серена Уильямс Reddit сайтыг үндэслэгч Алексис Оганянаас жирэмсэн болсон ажээ.

АНУ-ын тээгч хөлөг онгоц Хойд Солонгост ирсэнгүй

Ерөнхийлөгч Дональд Трамп мэдэгдэж байсны дагуу АНУ-ын нисэх онгоц тээгч “Карл Винсон” хөлөг онгоц дагалдан явж буй цохилтын хүчний хамтаар Хойд Солонгосын эргийг чиглэн явж байсан ч зорьсон газартаа очилгүй өөр тийшээ явжээ. Үүний дараа АНУ-ын зэвсэгт хүчний Номхон далайн командлалаас, “Карл Винсон” тэргүүтэй довтолгооны хүч эхлээд Австралийн цэргийнхэнтэй хээрийн сургууль хийх ёстой байсан хэмээн мэдэгдэв. Д.Трамп байлдааны хөлөг онгоцуудаа Солонгосын хойг руу илгээлээ хэмээн мэдэгдэж байхад тэдгээр нь Хойд Солонгосоос Австрали руу нэгэнт эргэсэн байжээ. Вашингтон Ким Чен Уны дэглэмийг худлаа сүрдүүлэв үү, эсвэл америкууд гэнэт төлөвлөгөөгөө өөрчлөв үү гэдэг тодорхойгүй байна.

“Реал”, “Атлетико” хагас шигшээд шалгарлаа

Аваргуудын лигийн хагас шигшээд өрсөлдөх багууд тодорч байна. Өчигдөр Германы “Байерн” Испанийн “Реал Мадрид”-ын талбайд зочлов. Долоо хоногийн өмнө болсон тоглолтод Испанийн эзэн хааны клуб 2:1-ээр хожиж Роналдо Аваргуудын лигийн тэмцээнд 100 дахь гоолоо оруулсан билээ. Өчигдөр Мадридад болсон хариу тоглолтод германууд эхэлж гоол оруулсан ч “Реал”-ын шилдэг довтлогч Криштиано Роналдо хет-трик хийснээр 4:2-оор хожлоо. Ийнхүү Испанийн баг долоон жил дараалж Аваргуудын лигийн хагас шигшээд шалгараад байна. Английн “Лестер” талбайдаа Испанийн “Атлетико”-г хүлээн авч 1:1-ээр тэнцсэн юм. Эхний тоглолтод 1:0-ээр хожсон “Атлетико” хагас шигшээд гарч ирлээ. Үлдсэн хоёр эрхийн төлөө “Барселона”-“Ювентус”, “Монако”-“Боруссиа Дортмунд” өрсөлдөж байна. “Барселона” эхний тоглолтод 3:0-ээр гашуун ялагдал хүлээсэн. Тэд өмнөх тойрогт Францын “ПСЖ”-д эхний тоглолтод 4:0-ээр хожигдсон ч хариу тоглолтод 6:1-ээр гайхалтай ялалт байгуулсан юм. Каталоны баг Италийн “Ювентус”-ыг дөрвөн гоолын зөрүүгээр хожиж чадна гэдэгтээ итгэлтэй байна.

Венесуэльд инфляц 2000 хувиар өснө

Венесуэль дахь инфляцийн түвшин ирэх онд 2000 хувийг давж магадгүй байна. Энэ тухай CNN агентлаг Олон улсын валютын сангийн таамаглалаас иш татан мэдээлэв. 2017 онд тус улс дахь инфляц 720 хувьд хүрээд байна. Ирэх онд инфляц улам гаарна хэмээн эдийн засагчид, мэргэжилтүүд үзжээ. Улс төрийн гүнзгий хямралд ороод байгаа Латин Америкийн энэхүү улсад эдийн засаг нь улам хүндэрч, ажилгүйдэл нэмэгдсээр байна. Энэ онд ажилгүйдэл 25 хувьд хүрсэн бол, ирэх онд 28 хувийг давна хэмээн шинжээчид таамаглажээ. Улс төр, эдийн засгийн хямралын улмаас Венесуэльд онц байдлын дэглэмийг зургаа дахь удаагаа сунгаад байна.

Бангкокт гудамжны хоолыг хориглоно

Тайландын нийслэл Бангкок хотын эрх баригчид цэвэр, аюулгүй байдал, эмх журамтай байх үүднээс гудамжны бүх хоолыг хориглох шийдвэр гаргалаа. Энэ шийдвэр 2017 оны сүүлчээс хэрэгжиж эхлэнэ. Ердөө нэг сарын өмнө CNN телевизийн шалгаруулалтаар Бангкок хот дэлхийн хамгийн шилдэг гудамжны хоолтой хотоор шалгарч байсан ч эрх баригчид үүнийг үл хайхран дээрх шийдвэрийг гаргажээ. Бангкок хотын 50 дүүргийн хоол хийж зардаг гудамжийг цэвэрлэж явган хүний зам болгон хувиргах ажил эхэлсэн хэмээн хотын захиргаанаас мэдэгдлээ. Гудамжинд хоолны бизнес эрхэлж байсан хүмүүст зах дээр ажлын байр гаргаж өгөх аж. Гэвч олон хүн “Орлого эрс багасна” хэмээн энэ шийдвэрийг эсэргүүцэж байна. Тайландад жуулчдыг татдаг нэг чухал зүйл нь гудамжны хоол юм. 

АНУ ажлын визний хөтөлбөртөө өөрчлөлт оруулна

Гадаадын өндөр мэргэшилтэй ажилтнуудыг хөлслөхөд ашигладаг түр ажлын визний хөтөлбөрийг эргэн харж нягтлах тушаалд Ерөнхийлөгч Д.Трамп гарын үсэг зурлаа. Тэрээр Висконсин мужийн нэгэн үйлдвэрт зочлох үеэрээ “Америкуудыг худалдаж ав, америкуудыг хөлсөл” (Buy America, Hire America) хэмээх зарлиг гаргаж батлажээ. Трамп сонгуулийн кампанит ажлынхаа явцад “Америкийг хамгийн түрүүнд” (America First) хэмээх хөтөлбөр хэрэгжүүлнэ, түр ажлын H-1B визний хөтөлбөрийг бүрэн хаана хэмээн амлаж байсан юм. Гадаадаас ажилтан, мэргэжилтэн хөлслөх боломжийг ажил олгогч нарт олгодог уг хөтөлбөрт өөрчлөлт оруулахыг Дотоод хэрэг, Хууль зүйн яам, Үндэсний аюулгүй байдлын газарт даалгажээ. “Бид өөрсдийн ажилтнуудаа хамгаалж, ажлын байраа хадгалж үлдэх болно гэдгээ дэлхий нийтэд анхааруулж байна. Бид Америкийг хамгийн түрүүнд тавих болно” хэмээн Трамп онцолсон юм.

АНУ-ын Засгийн газар жил бүр сугалааны тусламжтайгаар гадаадын иргэдэд 85 мянган H-1B түр ажлын визийг сугалаагаар олгодог. Ихэвчлэн техник, технологийн салбарт түр виз олгодог ажээ. Вашингтоны засаг захиргаа энэ хөтөлбөрт өөрчлөлт оруулж зөвхөн хамгийн чадварлаг, өндөр мэргэшилтэй хүмүүст виз олгох санаатай байгаа тухай Цагаан ордны эх сурвалж ВВС-д ярьжээ. Тийм ч чадварлаг бус гадаадын иргэд түр ажлын визээр АНУ-д ирж бага цалингаар америк иргэдийн ажлын байрыг булааж байгааг өөрчлөх бололтой. Өнгөрсөн онд Disney компани дээрх визний хөтөлбөрийг ашиглаж америк ажилтнуудаа халаад, илүү бага цалингаар гадаад ажилтнуудыг хөлсөлж байна гэсэн шүүмжлэлд өртөж байв. Reuters агентлаг мэдээлж буйгаар, 2016 онд Facebook-ийн АНУ дахь ажилтнуудын 15 хувь нь түр ажлын визээр орж ирсэн хүмүүс байжээ. АНУ-ын Ерөнхийлөгч Дональд Трампын гэргий Меланиа загвар өмсөгчийн замналаа эхлүүлж байхдаа H-1B визээр АНУ-д ирж байсан аж.

Apple-ийн цаг чихрийн шижинг илрүүлнэ

Apple компани иженер-эмч нарын багтай хамтарч чихрийн шижин өвчтэй хүмүүст зориулсан цаг бүтээхээр ажиллаж байна. Шинэ ухаалаг цаг нь эзнийхээ сахарын хэмжээг түвэггүй хэмжиж харуулж байх аж. Хуруу рүү зүүгээр хатгаж, цусны дээж авалгүйгээр сахарын хэмжээг тодорхойлдог технологийг зохион бүтээхийг Стив Жобс санаачилж байжээ. Apple компани Пало-Альто дахь байрандаа био эмч нарын багийг хөлслөн ажиллуулж байна. Тэд хүний цусан дахь сахарын хэмжээг тодорхойлж, байнга хянаж байх мэдрэгч бүтээхээр ажиллаж байгаа юм. Энэ төсөл амжилттай хэрэгжвэл чихрийн шижин өвчнийг оношлох, эмчлэх салбарт том дэвшил авчирна хэмээн эрдэмтэд үзэж байна. Уг мэдрэгч нь гэрлийн цацрагийг арьсны завсраар илгээж сахарын хэмжээг тодорхойлох чадвартай байх аж. Өвчтөнөөс цусны дээж авахгүйгээр сахарын хэмжээг тогтоох багаж бүтээх оролдлого олон удаа гарч байсан ч бүгд бүтэлгүй болж байв. Apple компани сахарын хэмжээг тодорхойлогчтой ухаалаг цаг бүтээхийн тулд дор хаяж тэрбум доллар зарцуулна хэмээн DexCom-ийн мэргэжилтэн Терренс Грегг үзэж байна.

Дэлхийн лидерүүд Эрдоганд баяр хүргэв

АНУ-ын Ерөнхийлөгч Дональд Трамп Туркийн Ерөнхийлөгч Режеп Тайип Эрдоганд эрх мэдлээ өргөтгөх бүх нийтийн санал асуулгад ялалт байгуулсанд нь баяр хүргэжээ. Цагаан ордны тэргүүн Туркийн лидертэй утсаар ярилцахдаа ийнхүү баяр хүргэсэн байна. Белорусийн Ерөнхийлөгч Александр Лукашенко, Азербайжаны төрийн тэргүүн Ильхам Алиев нар Эрдоганд баяр хүргэж амжилт хүсчээ. ОХУ-ын Ерөнхийлөгч В.Путин Эрдоганд баяр хүргэсэн тухай Кремль мэдээлсэнгүй. Харин Путиний хэвлэлийн төлөөлөгч Дмитрий Песков “Бүх нийтийн санал асуулга нь Туркийн бүрэн эрхт асуудал. Туркийн ард түмний хүсэл зоригт хүндэтгэлтэй хандаж байна” хэмээн мэдэгджээ. Сирийн дэглэм иргэдийнхээ эсрэг химийн зэвсэг ашигласны дараа АНУ-ын нисэх хүчин Сирийн Засгийн газрын цэргийн баазад цохилт өгсөн юм. Үүнд дэмжлэг үзүүлсэн Туркийн талд талархаж буйгаа Д.Трамп илэрхийлжээ. Сирийн Ерөнхийлөгч Башар Асадыг хариуцлагад татах ёстой гэдэг дээр санал АНУ, Туркийн лидерүүд нийллээ хэмээн Цагаан ордноос мэдээлэв. 

Чечень дахь ижил хүйстнүүдэд санаа зовниж байна

НҮБ дахь АНУ-ын байнгын төлөөлөгч Никки Хейли Чечень дахь ижил хүйстнүүдийн нөхцөл байдалд санаа зовниж буйгаа илэрхийлэв. “Чеченьд хүмүүсийг сексийн чиг хандлагаар нь баривчилж, хулгайлж, тамлаж, алж байгаа тухай мэдээлэлд бид санаа зовниж байна. Хэрвээ энэ үнэн бол ийнхүү хүний эрх зөрчигдөж байгааг анхаарахгүй өнгөрөөж болохгүй. Чеченийн эрх баригчид энэ хэргийг шалгаж, гэмт хэрэгтнүүдийг хариуцлагад татаж, цаашид хүний эрх зөрчигдөхөөс сэргийлэх ёстой” хэмээн Хейли мэдэгдэлдээ онцолжээ. ОХУ-ын Гадаад хэргийн яам, НҮБ дах төлөөлөгч энэ талаар ямар нэг тайлбар хийсэнгүй.

Дөрөвдүгээр сарын 1-нд “Новая газета” сонин Чеченьд сүүлийн долоо хоногт зуу гаруй эрчүүдийг ижил хүйстэн хэмээн сэжиглэн баривчилсан тухай мэдээлсэн юм. Тус сонинд мэдээлснээр, баривчлагдсан хүмүүсийн гурав нь амиа алдсан аж. Грозныйн эрх баригчид энэ нийтлэлийг “Огт худал” хэмээн нэрлэж, “Новая газета” сониныг уучлал гуйхыг шаардсан байна. Чеченийн шашны тэргүүн Салах Межиев “Аллах тус сонины сэтгүүлчдээс өшөө авна” хэмээн ярьжээ.

Туркт онц байдлыг гурван сараар сунгав

Туркт мөрдөгдөж буй онц байдлын дэглэмийг гурван сараар сунгалаа хэмээн дэд Ерөнхий сайд Нуман Куртулмуш мэдэгдэв. Аюулгүй байдлын үндэсний зөвлөлөөс Сайд нарын зөвлөлд ийм арга хэмжээг санал болгожээ. “Эрх зүйт төрийн зарчмыг хамгаалах арга хэмжээний хүрээнд ийм алхам хийлээ” хэмээн эрх баригчид хэлж байна. 2016 оны долдугаар сард Туркт цэргийн эргэлт гарч бүтэлгүйтсэний дараа онц байдал тогтоосон билээ. Туркийн Ерөнхийлөгчийн бүрэн эрхийг өргөтгөх санал асуулга явагдсаны дараа онц байдлын дэглэмийг дахин сунгах шийдвэр гарчээ. Сөрөг хүчний гол намууд бүх нийтийн санал асуулгын дүнг эсэргүүцэж байна. Стамбул хотод санал асуулгын дүнг эсэргүүцсэн иргэдийн жагсаал намжихгүй байгаа аж.

Нисэх онгоц дэлгүүрийн хажууд унажээ

Португалын амралт сувиллын Кашкайше хотод хөнгөн мотортой нисэх онгоц дэлгүүрийн хажууд унасны улмаас таван хүн амь насаа алджээ. Онгоцны нисгэгч, гурван зорчигч, мөн дэлгүүрт бараагаа буулгаж байсан ачааны автомашины жолооч амь үрэгдсэн байна. Францын Марсель хот руу явж байсан нисэх онгоц хөөрснийхөө дараахан унаж сүйрчээ. Ослоор амь насаа алдсан иргэд нь Франц, Швейцарийнх байсан аж. Хөнгөн мотортой нисэх онгоцны сүйрлийн шалтгааныг хараахан тогтоогоогүй байна.

Д.Трамп Хойд Солонгосын талаарх төлөвлөгөөгөө задалсангүй

АНУ-ын Ерөнхийлөгч США Дональд Трамп Хойд Солонгосын талаарх төлөвлөгөөнийхөө талаар ярьсангүй. Харин Пхеньянаас гарч буй цөмийн зэвсгийн аюул заналхийллийг энхийн замаар шийдвэрлэнэ хэмээн найдаж буйгаа илэрхийлжээ. Д.Трамп Fox News телевизэд ярихдаа “Цаашид юу болохыг харцгаая. Бүх юм сайнаар эргэж, энх тайван тогтоно гэдэгт би итгэж байна. Гэвч Хойд Солонгосын лидер Ким Чен Унтай хийж буй яриа хэлэлцээ удаан хугацаанд үргэлжилж байгаа гэдгийг мэдэж байгаа биз дээ” хэмээн онцолсон байна. Гэхдээ тэрээр цаашдын төлөвлөгөөнийхөө талаар мэдээлэхээс татгалзжээ. АНУ Хойд Солонгост цохилт өгөх боломжийн талаар асуухад Трамп “Дөрвөн долоо хоногийн дараа хийх гэж буй зүйлийнхээ талаар яриад сууж байдаг бусад удирдагч шиг ажиллахгүй. Ингэж ажиллаад дэмий байдаг” хэмээн хариулсан аж. Пентагоны тэргүүн Жеймс Мэттис АНУ-ын цөмийн зэвсгийн хүчин чадлыг нягтлан дүгнэх даалгавар өгөөд байгаа билээ.

Солонгосын хойгийн цэрэггүй бүсэд зочилсон АНУ-ын дэд ерөнхийлөгч Майк Пенс “Хойд Солонгосын талаар баримталдаг Вашингтоны стратегийн тэвчээрийн эрин үе дууссан. Ерөнхийлөгч Дональд Трампын тэвчээрийг сорилтод оруулахгүй байхыг Пхеньянд зөвлөж байна” хэмээн мэдэгджээ. Майк Пенс анхны гадаад айлчлалаа Өмнөд Солонгос, Япон, Индонез, Австрали улсад хийж байна.

АНУ ийнхүү хатуу байр сууриа илэрхийлж байгаа ч Хойд  Солонгос заналхийлсэн өнгө аясаа хадгалсаар байна. Хойд Солонгосын Гадаад хэргийн дэд сайд Хан Сон Рил ВВС-д өгсөн ярилцлагадаа пуужингийн туршилтаа нэмэгдүүлнэ хэмээн мэдэгджээ. “Бид илүү олон пуужин турших болно. Долоо хоног бүр, сар бүр, жил бүр пуужин туршина” хэмээн тэрээр мэдэгджээ. АНУ-ын дэд Ерөнхийлөгч Майк Пенс “Өмнөд Солонгосын ард иргэдийн аюулгүй байдлыг хамгаалж, зорилгодоо хүрэхэд бүх боломж ширээн дээр байгаа. Хэрвээ Пхеньян нөхцөл байдлыг улам хурцатгавал өөр арга хэмжээ авах боломж ч нээлттэй байгаа” хэмээн ярьжээ. Энэ нь Хойд Солонгос улам зөрүүдэлсээр байвал цэрэг дайны аргаар асуудлыг шийдэхэд ч бэлэн хэмээн ойлгогдож байгаа аж.

Жагсаалын үеэр 13 настай хөвгүүн алуулжээ

Венесуэльд сөрөг хүчний эсэргүүцлийн жагсаалын үеэр 13 настай хүүхэд алуулсан тухай эрх баригчид мэдэгдэв. Баркисимето хотод болсон сөрөг хүчний эсэргүүцлийн жагсаалын үеэр Брайан Принсипал хэмээх жаал гэдсэндээ буудуулж амь насаа алдсан аж. Парламентын гишүүн Альфонсо Маркины хэлж буйгаар, эрх баригчдыг дэмжигч зэвсэгтэй этгээдүүд жаалхүүгийн аминд хүрчээ. Венесуэльд эргэн сэргээд байгаа эсэргүүцлийн хөдөлгөөний үеэр амиа алдсан хүний тоо ийнхүү дөрөвт хүрээд байна. Үүний өмнө 19 настай хоёр оюуган бусдын гарт амиа алдсан юм.

Дөрөвдүгээр сарын 4-нд улс орон даяар эхэлсэн эсэргүүцлийн хөдөлгөөн намжихгүй байна. Цагдаа нар үймээн самуун дэгдээсэн хэргээр 100 орчим хүнийг баривчилжээ. Ерөнхийлөгч Мадурогийн бодлого эдийн засгийн гүнзгий хямралд хүргэсэн, мөн ардчилсан эрх чөлөөг нухчин дарж байна хэмээн сөрөг хүчнийхэн үзэж байгаа юм. Харин Мадуро “Намайг эсэргүүцэгчид АНУ-ын тусламжтайгаар төрийн эргэлт хийхийг хүсч байна” хэмээн мэдэгдэв. Сөрөг хүчнийхэн парламентад олонх болсон ч шүүхийн эрх мэдэл Ерөнхийлөгчийн гарт хэвээр байна.

United Airlines зорчигчдын тасалбарын мөнгийг буцааж өгнө

Америкийн United Airlines авиакомпани нэгэн ази төрхтэй зорчигчийг чирж гулдран хүчээр буулгасан 3411-р нислэгийн бүх зорчигчдод тасалбарын мөнгийг нь буцааж өгөхөөр болсон тухай USA Today мэдээлэв. Авиакомпанийн ерөнхий захирал Оскар Муньос энэ хэрэг явдлын төлөө дахин уучлал гуйгаад тасалбартай зорчигчийг хүчээр буулгах явдал дахиж гарахгүй хэмээн амлав. Түүнийг огцрохыг шаардаж 60 мянган хүн гарын үсгээ цуглуулсан ч тэрээр огцрох бодолгүй байгаагаа хэлжээ.

Дөрөвдүгээр сарын 9-нд энэ хэрэг явдал болжээ. United Airlines суудлаасаа илүү тасалбар борлуулж онгоц дүүрсэн тул хэд хэдэн зорчигчийг сайн дураараа агаарын хөлгийг орхихыг хүссэн аж. Сайн дураараа буух хүн олдоогүй тул авиакомпанийн менежер бие даан хэд хэдэн хүнийг сонгон онгоцноос гаргахаар шийдсэний нэг нь эмч Давид Дао байсан юм. Тэрээр намайг өвчтөнүүд хүлээж байгаа хэмээн буухаас татгалзсан ч аюулгүй байдлын ажилтнууд түүнийг чирч гулдран буулгажээ. Даог хөл, гарнаас нь чирч буулгаж байгаа бичлэг нийтэд тарсны дараа United Airlines ихээхэн шүүмжлэлд өртөж, олон зуун сая долларын алдагдалд оржээ. АНУ-ын Ерөнхийлөгч Д.Трамп хүртэл үүнийг “Аймшигтай явдал” хэмээн нэрлэсэн байна.

Орос, Хятадын худалдааны эргэлт 30 хувиар нэмэгджээ

2017 оны нэгдүгээр улирлын дүнгээр Орос, Хятадын худалдааны эргэлт 29.3 хувиар нэмэгдлээ хэмээн Хятадын Гаалийн ерөнхий хорооноос мэдэгдэв. Энэ оны эхний гурван сард хоёр талын худалдаа арилжаа 9.9 тэрбум доллари хүрчээ. ОХУ дахь Хятадын экспорт өнгөрсөн оны мөн үетэй харьцуулахад 22.4 хувиар өссөн бол, Оросоос Хятад руу гаргадаг бараа, бүтээгдэхүүний эргэлт 36.1 хувиар нэмэгджээ. 2016 оны дүнгээр хоёр улсын худалдааны эргэлт 2.2 хувиар нэмэгдэж 69.5 тэрбум долларт хүрчээ.

Дутерте маргаантай арал руу айлчлахаа хойшлуулжээ

Филиппины Ерөнхийлөгч Родриго Дутерте Хятадтай тогтоосон эв найрамдлынхаа төлөө Өмнөд Хятадын тэнгис дахь маргаантай арал руу хийхээр төлөвлөөд байсан аялалаа цуцаллаа хэмээн Reuters агентлаг уламжлав. Манилагийн лидер Титу арал дээр очиж, улсынхаа далбааг мандуулахаар төлөвлөж буйгаа өнгөрсөн долоо хоногт зарласан юм. Гэвч Бээжингийн эрх баригчид “Маргаантай арал дээр аль нэг улсын тэргүүн нь айлчилж далбаагаа мандуулбал асуудал үүснэ шүү” хэмээн сануулсан аж. “Хятадтай тогтоосон найрамдал нөхөрлөлийнхөө төлөө би тийшээ явж, Филиппины далбаа мандуулах санаагаа орхиж байна” хэмээн Дутерте хэлжээ. Тэрээр хэд хоногийн өмнө ОХУ-ын хөлөг онгоцууд Филиппины усанд ямар нэг саадгүй орохыг зөвшөөрсөн юм.

Роналдо Аваргуудын лигт 100 гоолтой боллоо

Испанийн “Реал Мадрид” болон Португалын шигшээ багийн довтлогч Криштиано Роналдо Аваргуудын лигийн түүхэнд 100 гоол оруулсан анхны тоглогч болж түүхэнд нэрээ бичүүллээ. Тэрээр ¼ шигшээд Германы “Байерн”-ий хаалганд хоёр гоол оруулснаар энэ босгыг давсан юм. 32 настай Роналдо 143 тоглолтын дараа ийм амжилт үзүүлээд байна. Түүний араас хамгийн ойрхон нэхэж байгаа тоглогч нь “Барселона”-гийн аргентин довтлогч Лионель  Месси (97 гоолтой) юм. Өчигдөр Мюнхен хотын “Альянз Арена” цэнгэлдэхэд болсон тоглолтод Испанийн баг Роналдогийн хоёр гоолын ачаар өрсөлдөгчөө 1:2-оор буулгаж авчээ. Хариу тоглолт дөрөвдүгээр сарын 18-нд Мадрид хотод болно.

Шайя ЛаБаф урлагийн төлөө урцанд амьдарна

Холливудын жүжигчин Шайя Лабаф урлагийн төлөө Финландын хээр нутагт урцанд нэг сар амьдрахаар болжээ. Transformer (Хувирагч), Lawless (Хуульгүй) зэрэг киноны дүрээр дэлхий дахинд танигдсан тэрээр урцанд амьдарч байхдаа зөвхөн бичгээр бусадтай харилцана хэмээн Associated Press уламжлав. Жүжигчинтэй харилцахыг хүссэн бүхэн Киасмагийн орчин үеийн урлагийн мүзейгээс түүнд захидал бичиж болох аж. Финландын аглаг зэлүүд нутагт амьдрах энэ төслийг #ALONETOGETHER буюу “Ганцаараа хамтдаа” хэмээн нэрлэж байгаа бөгөөд түүний уран бүтээлийн хамтрагч Настя Ронко, Люк Тернер нар бас оролцож байна. Тэд мөн Финландад нэг сар, гэхдээ өөр урцанд тусдаа байх ажээ. 2016 онд Лабаф мөн л урлагийн төлөө гэсэн уриатай 24 цаг лифтэнд амьдарч, АНУ-ын газар нутгаар autostop буюу машинд гар өргөн сууж аялж байв.

Вин Дизель, Жейсон Стэтхэм нар The Fate of the Furious-т тогложээ

Fast & Furious цуврал киноны үргэлжлэл The Fate of the Furious-ийн зохиолыг Крис Морган бичиж, Феликс Грай ерөнхий найруулагчаар ажиллажээ. Хүчирхийлэл, тулаан, хөөцөлдөөн, зодоонтой киноны төрөлд дээгүүр байр суурь эзэлдэг энэ киноны гол дүрд Вин Дизель, Дуайн Жонсон, Жейсон Стэтхэм, Тирес Гибсон, Крис Бриж, Курт Рассель, Шарлиз Терон, Хелен Миррен зэрэг мундгууд тоглосон юм. Fast & Furious-ийн найм дахь цуврал болж байгаа Fast & Furious (Уур хилэнгийн хувь заяа) кино дөрөвдүгээр сарын 7-нд Берлин хотод нээлтээ хийсэн бол, 14-нд АНУ болон дэлхийн бусад оронд нээлтээ хийх гэж байна. Киноны зураг авалтыг Гавана, Атланта, Кливленд, Нью-Йорк хотод авчээ. Энэ кино IMAX 3D болон 4DX хэлбэрээр үзэгчдэд хүрч байгаа ажээ.

АНУ Хойд Солонгост сүр хүчээ үзүүлж байна

АНУ-ын армийн байлдааны хөлөг онгоц тээвэрлэгч “Карл Винсон” хөлөг онгоц Солонгосын хойгийн  эрэг рүү дөхөж байгаа нь Хойд Солонгосыг довтлох АНУ-ын төлөвлөгөө нухацтай, түгшүүртэй шатандаа орсныг илтгэж байна хэмээн Пхеньяны Гадаад хэргийн яамны төлөөлөгч төрийн мэдлийн мэдээллийн агентлагаараа дамжуулан мэдэгдлээ. Цэрэг, дайны хүчин чадлаа нэмэгдүүлж, цөмийн зэвсгийн үйлдвэрлэл, боловсруулалт дээр ажиллах Хойд Солонгосын бодлого зөв гэдгийг Вашингтоны үйлдэл дахин нотлон харууллаа хэмээн уг мэдэгдэлд онцолжээ. “Карл Винсон” тээвэрлэгч хөлөг онгоцоор удирдуулсан АНУ-ын тэнгисийн цэргийн флотын довтолгооны хэсэг дөрөвдүгээр сарын 9-нд Номхон далайн баруун бие рүү хөдлөх тушаал авсан юм. Энэхүү флот Австрали орохоор Сингапур орчимд явж байсан ч гэнэт чиглэлээ өөрчлөх тушаал авч Солонгосын хойг руу хөдөлсөн байна. Довтолгооны хэсгийн бүрэлдэхүүнд тээгч хөлөг онгоцноос гадна байлдааны хөлөг онгоц нэг, их буутай хөлөг онгоц хоёр, мөн удирдлагатай пуужингаар тоноглогдсон нэг хөлөг байгаа аж.

“Карл Винсон” хөлөг Солонгосын хойг руу хөдөлж байгаа нь байнгын байлдааны бэлэн байдлыг харуулж байгаа хэрэг хэмээн АНУ-ын Номхон далайн флотын командлагч Дэвид Бенхам мэдэгдлээ. Хойд Солонгос нь бодлогогүй, хариуцлагагүй, тогтвортой байдлыг эвдэгч пуужингийн хөтөлбөр болон цөмийн зэвсэг бүтээх оролдлогоороо бүс нутгийн хамгийн том заналхийлэл болж байна хэмээн тэрээр онцоллоо. Хойд Солонгосын тал АНУ-ын газар нутагт хүрэх пуужинтай болохыг зөвшөөрч болохгүй хэмээн АНУ-ын Ерөнхийлөгч Дональд Трамп мэдэгдсэн юм. Пхеньяны эрх баригчид НҮБ-ын шаардлага, хориг арга хэмжээг үл хайхран цөмийн пуужингийн туршилтыг зогсолтгүй хийсээр байна. Гуравдугаар сард болсон ээлжит пуужингийн туршилтын дараа Хойд Солонгосын Засгийн газар “Япон дахь Америкийн цэргийн баазад цохилт өгөх сургуулилт хийлээ” хэмээн мэдэгджээ. АНУ, Өмнөд Солонгосын арми Солонгосын хойгт цэргийн хамтарсан сургууль хийсээр байгаа нь Пхеньяны эгдүүцлийг төрүүлсээр байна. Хойд Солонгос энэхүү хээрийн сургуулийг “Манай улсад халдан довтолсонтой ялгаагүй заналхийлэл” хэмээн үзэж байгаа юм.  

Малала Юсуфзай НҮБ-ын хамгийн залуу элч боллоо

Нобелийн энх тайвны шагналт, лалын шашинтай охидын боловсролын төлөө тэмцэгч Малала Юсуфзай НҮБ-ын түүхэн дахь хамгийн залуу элч болжээ. 19 настай пакистан охин охидын боловсролд онцгой анхаарал хандуулах амлалт авч энэхүү нэр хүндтэй томилгоог хүлээн зөвшөөрсөн юм.

Малала Юсуфзай 11 жилийн өмнө ВВС агентлагийн урду хэл дээрх буланд амьдралынхаа тухай тэмдэглэл бичиж дэлхий нийтэд танигдсан билээ. Талибуудын мэдэлд байдаг Сват хөндийд охидын сургуулийг хэрхэн хаасан тухай бичсэний дараа талибууд түүнийг мөшгиж, байнга заналхийлэх болсон аж. 2012 оны аравдугаар сард талибын хэт даврагчид Малалагийн амь насанд халдаж, тэрээр толгойдоо буудуулж хүнд шарх авчээ. Түүнийг Англид яаралтай авчирч эмчилснээр аврагдсан юм.

Цаазын ял буурчээ

2016 онд гүйцэтгэсэн цаазын ял 2015 онтой харьцуулахад 37 хувиар буурсан хэмээн хүний эрхийг хамгаалагч Amnesty International байгууллагаас мэдэгдлээ. Өнгөрсөн онд 1032 цаазын ялыг гүйцэтгэсэн байна. 2015 онд энэ үзүүлэлт 1634 байжээ. Иран, Пакистан улсад цаазын ялын гүйцэтгэл буурсан нь ихээхэн нөлөөлсөн аж. 2006 оноос хойш анх удаа эхний таван байранд АНУ орсонгүй. 2016 онд Хятад 567, Саудын Араб 154, Ирак 88, Пакистан 87 цаазын ял гүйцэтгэжээ. Европ, Төв Азийн орнуудаас зөвхөн Белорусь, Казахстанд цаазын ял хүчинтэй байна. Өнөөдрийн байдлаар дэлхийн 104 орон цаазын ялаас татгалзаад байгаа юм. 1997 онд цаазын ялгүй орны тоо 64 байсан аж.

TripAdvisor Aeroflot-ийг шилдгээр нэрлэв

Аялалын TripAdvisor сайт хэрэглэгчдийнхээ дунд санал асуулга явуулахад Европын хамгийн шилдэг авиакомпаниар ОХУ-ын Aeroflot шалгарчээ. Аялагчдын сэтгэлд нийцсэн шилдэг авиакомпаниудыг бүртгэл, газардалт, үйлчилгээний чанар, салоны цэвэр цэмцгэр байдал, хоол унд, нислэгийн үеэрх сатааруулалт, суудлын тохь тух, зохистой үнэ тариф гэсэн шалгуураар жагсаажээ. Travellers' Choice Award шагналын эзнээр Аeroflot шалгарч, араас нь Turkish Airlines, KLM Royal Dutch Airlines, Lufthansa, Swiss International Air Lines оржээ. Хамгийн хямд нислэгтэй авиакомпаниар Их Британийн Jet2, Monarch Airlines тодорсон байна. Эдгээр авиакомпани Европын орнуудын хооронд маш бага өртөг буюу 5-50 еврогийн нислэг хийдгээрээ алдаршсан юм. Харин дэлхийн шилдэг авиакомпаниар Emirates, Singapore Airlines, Azul (Бразил) шалгарсан байна. Дэлхийд эхний аравт JetBlue, Air New Zealand, Korean Air, Japan Airlines, THAI Smile, Alaska Airlines, Garuda Indonesia багтжээ.