“Севилья” Европы лигт дараалан түрүүлэв

Испанийн “Севилья” клуб Европа лигийн финалд Украины “Днепр”-ийг 3:2-ийн харьцаагаар хожиж аварга боллоо. “Севилья”-гийн колумб довтлогч Карлос Бакка 73 дахь минутад хожлын гоолыг оруулжээ. Ийнхүү Испанийн клуб х оёр жил дараалан Европы лигт түрүүлж байна. Мөн тэд 2006, 2007 онд энэ тэмцээнд аваргалж байв. “Днепр”-ийг хожиж аваргалсан Унай Эмерийн баг Аваргуудын лигт оролцох эрхтэй болж байна. 2015-16 оны Аваргуудын лигт анх удаа нэг улсын таван клуб (Барселона, Реал Мадрид, Атлетико, Валенсиа, Севилья) оролцохоор боллоо.

ОХУ Венесуэльд 14 тэрбум долларын хөрөнгө оруулалт хийнэ

Венесуэлийн тал ойрын жилүүдэд нефтийн олборлолтоо хоёр дахин нэмэгдүүлэхийн тулд ОХУ-аас 14 тэрбум долларын хөрөнгө оруулалт авах тохиролцоо хийлээ. Ерөнхийлөгч Николас Мадуро Оросын “Роснефть”-ийн тэргүүн Виктор Сечинтэй уулзсаны дараа ийнхүү мэдэгдэв. Оросын хөрөнгө оруулалтыг Ориноко голын сав газрын нефтийн олборлолтод зарцуулахаар төлөвлөж байна. Каракас Оросын хөрөнгө оруулалтыг гурван жилийн дараа эргүүлэн төлөх үүрэг хүлээжээ.

Хятадад 175 археологчийг баривчилжээ

Хятадын цагдаа археологийн хулгайлагдсан үнэт эдлэлийг буцааж авах өргөх хүрээтэй ажиллагаа явуулж хууль бус малтлага хийж байсан 175 хүнийг баривчиллаа. Тэд 500 сая юань (80 сая доллар)-аар үнэлэгдэх 1168  урлагийн бүтээлийг ухаж аваад байсныг хурааж авчээ. Хар археологчид Ляонин муж дахь Хуншанийн үеийн оршуулгад малтлага хийж байсан аж. Таван мянган жилийн өмнө энд өргөлийн төв, оршуулгын газар байсан юм. Хууль бус малтлага хийгчид эртний оршуулгыг сүйтгэсэн хэмээн цагдаагийн газраас мэдэгдэв. Хар археологчдыг саатуулар ажиллагаанд мянга орчим цагдаа оролцжээ. Малтлагын газар дээр археологийн үнэт олдворыг шууд худалдан авдаг арав орчим бүлэг ажиллаж байв. Мөн дөрвөн эрдэмтэн энэ хэрэгт оролцсон нь тодорхой болоод байна.

“Аль-Каида”-гийнхан Дамаск хотыг эзлэхэд бэлэн

Алан хядагч “Аль-Кайда” бүлгийн Сири дахь салбар гэгддэг “Жебхан ан-Нусра” бүлгийн лидер Абу Мохамед аль-Голани Сирийн нийслэл Дамаск хотыг эзлэн авахад бэлэн байна хэмээн мэдэгдэв. “Бид Дамаск дээр анхаарлаа төвлөрүүлж байна. Башар Асадын дэглэмийг устгахад бэлэн боллоо” хэмээн аль-Голани ярьжээ. Тэрээр Сирийн Ерөнхийлөгчийг дэмждэг хүмүүст хандаж өөрсдийн аюулгүй байдлын үүднээс үзэл бодлоосоо татгалзахыг уриалав. “Аль-Кайда” болон “Жебхат ан-Нусра” нь олон оронд  хориглогдсон террорист бүлгүүд юм.

Фидель Кастрогийн тансаг амьдралыг дэлгэсэн бие хамгаалагч

Кубын хувьсгалын удирдагч Фидель Кастрогийн хувийн бие хамгаалагчаар 17 жил ажилласан Хуан Рейналдо Санчес Майами хотод 66 насандаа өвчний улмаас өөд болов. Кубын Дотоод яамны хурандаа асан Кубын удирдагчийн хувийн амьдралын олон нууцыг өөртөө авч явснаа “Фидель Кастрогийн нууц амьдрал” номд дэлгэн харуулсан билээ. Фидель 1977 онд хувийн бие хамгаалагчаараа хэнийг сонгохыг сайн мэдэж байсан юм. Тэр бол хууль, эрх зүй, тагнуул, сөрөг тагнуулаар мэргэшсэн, мэргэн бууч, карате, жүдогийн хар бүстэй Хуан Рейналдо Санчес байсан аж.

Кастро 20 орчим зуслан, дарвуулт хөлөгтэй Каёо Пиедра арал, банкны нууц данснууд, алтны уурхай, гэрийн үйлчлэгч нар, дүрэмт хувцастай тогооч нар, тэр бүү хэл хувийн хэрэгцээндээ зориулсан бяслагны үйлдвэр эзэмшдэг байсныг Санчес дэлгэсэн юм. Тэрээр амьдралынхаа 26 жилийг Кубын удирдагчийн аюулгүй байдлыг сахиулахад зориулсан ба 17 жилийг нь гэр бүлээ золиослон байж Кастрог сүүдэр мэт дагаж шадарласан юм. Санчес даргынхаа хариу талархал, тус мэддэггүй занг нь бус харин урвалтыг нь буруутгаж байв. “Өөрт нь үйлчилж байсан олон хүнд хариу талархалгүй ханддагаас илүүтэй түүний урвалтыг би зэмлэнэ. Тэр олон сая кубачуудын итгэлээс урвасан” хэмээн Хуан Рейналдо Санчес өгүүлж байлаа.

Фиделийн хувийн бие хамгаалагч асан “АВС” сонинд ярилцлага өгөхдөө “Кубын дарангуйллын хамгийн том нууцын нэг нь Фиделийн хувийн амьдрал. Энэ нь төрийн нууц байсан. Тэрээр хэзээ ч амралт авч байгаагүй хамаг юмаа золиослосон хувьсгалчийн дүр төрхөө дэлхий нийтэд цацдаг байсан ч үнэн хэрэгтээ XVI зууны хааны бүх л тансаглалыг эдэлсэн капиталист шиг амьдарч байсан. Фидель Кубыг феодал ноён мэт л захирдаг байсан” хэмээн онцолсон ажээ. Ф.Кастрогийн бие хамгаалагч нарыг улирдаж байсан Санчес түүний Куба болон гадаад дахь айлчлалын аюулгүй байдлыг хариуцдаг байв. Мөн Куба арал дээрх сургалт, бэлтгэлийн төвийг ЭТА, FARC, Сандинист бүлгийн партизануудад ашиглуулж байсныг тэрээр дэлгэсэн юм.

1989 онд Фидель Кастро тэр үеийн Дотоод хэргийн сайд Хосе Абрантестэй хар тамхины наймаатай холбогдсон тухайгаа хэлж, ярилцаж байгааг Хуан Рейналдо сонсчээ. Дараагаар нь Фидель өөрийн болон дүү Раулийн нэрийг цэвэрлэхийн тулд генерал Арналдо Очоад цаазын ял оноосныг Санчес дэлгэн ярьж байв. 1994 онд Хуан Рейналдо Санчес 45 насандаа албанаасаа халагдах хүсэлт гаргаж, үүнийхээ улмаас “Үл захирагдсан” хэмээн хоёр жил шоронд хоригджээ.

Санчес арван удаагийн оролдлогын эцэст 2008 онд завиар зугтаж Америкт очжээ. Хуан Рейналдо Санчес Кастрогийн нууцыг дэлгэх нь миний үүрэг хэмээн шийдсэн байв. Тэрээр эх орон нэгтнүүдтэйгээ уулзаж чадаагүй ч эрх чөлөөгөө эдэлсээр, Америк, Кубын харилцааны мөс хайлж эхлэхийг дөнгөж хараад хорвоогоос явлаа. Фиделийн хувийн бие хамгаалагч асан сүүлчийн өдрөө хүртэл “Яагаад хувьсгалын баатрууд эсэргүүцэн тэмцэж байсан дарангуйлагчдаасаа илүүтэй нухчин дарагч болон хувирчихдаг юм бэ” хэмээн асуусаар байсан юм.

Халуунд амиа алдсан хүний тоо 1000-ыг давлаа

Энэтхэгт агаарын температур +50 градуст хүрч хэт халууны улмаас амиа алдсан хүний тоо мянгыг давлаа хэмээн ВВС мэдээлэв. Одоогоор мянга 118 хүн нас бараад байгаагийн ихэнх нь Телангана, Андра-Прадеш мужийнх байна. Баруун Бенгал, Орисса мужид мөн олон хүн амиа алджээ. Ойрын өдрүүдэд хэт халуун агаар буурахгүй хэмээн цаг уурчид анхааруулав. Иргэлдийг гэртээ үлдэж, ус их хэрэглэхийг зөвлөж байна.

П.Порошенко үндэсний аюулгүй байдлын стратегийг батлав

Украины Ерөнхийлөгч Петр Порошенко үндэсний аюулгүй байдлын стратегийг баталжээ. Энэ салбар дахь төрийн бодлогын гол чиглэлүүд дотор газар нутгийн бүрэн байдлыг сэргээх, улс орны батлан хамгаалах чадварыг дээшлүүлэх, зэвсэгийн үйлдвэрэл, цэргийн техник хэрэгслийн тал дээр Оросоос бүрэн хараат бус болох зэрэг багтжээ. Мөн Украиныг Европын холбоонд нэгтгэх, НАТО-гийн бүрэлдэхүүнд багтаах нь стратегийн гол зорилт хэмээн тусгаж өгсөн байна. Оросын аюул заналхийллээс сэргийлэхийн тулд үндэсний аюулгүй байдлын шинэ системийг бий болгох тухай дээрх баримт бичигт тусгаж өгчээ.

Бразилд Неаполийн мафийн толгойлогчийг баривчлав

Бразилд Неаполийн “Каморра” мафийн хамгийн зальтай толгойлогчийг баривчилжээ. Паскуале Скотти хууль хяналтын байгууллагаас 30 жилийн турш зугтсан нэгэн юм. Италид түүнийг 20 орчим аллагад буруутгаж байна. 1984 онд Скотти эмнэлгээс оргож алга болжээ. Тэрээр Бразилд хуурамч паспорттай болж, зүүн хойд хэсгийн Ресифе хотод суурьшаад байсан аж. “Каморра” мафийн толгойлогчийг ойрын өдрүүдэд Италид шилжүүлэн өгөх бололтой. Ромын хууль хяналтын байгууллагууд гэмт этгээдийг баривчилсан Бразилд талархал илэрхийлжээ. 

Египетэд дахин цэргийн эргэлт, хувьсгал гарахыг үгүйсгэхгүй байна

Египетийг 30 гаруй жил төмөр гараар удирдсан Хосни Мубарак ард түмний бослогын улмаас огцорч араас нь “Лалын ахан дүүс” хөдөлгөөний талыг баримтлагч Мохамед Мурси гарч ирсэн ч 2013 оны долдугаар сард цэргийн эргэлтээр түүнийг эрх мэдлээс зайлуулсан билээ. Одоогоос нэг жилийн өмнө болсон сонгуульд армийн генерал Абдельфатах аль-Сиси 96.9 хувийн ялалт байгуулж Египетийг удирдах болсон юм. Тэр цагаас хойш арабын ертөнцийн хамгийн их хүн амтай улс үймж бужигналдсан хэвээр байна. Генерал Аль-Сисигийн амлаж байсан тогтвортой байдал эргэж ирсэнгүй. Эдийн засгийн хурц хямрал, авлига, гэмт хэрэг үйлдсэн ч шийтгэлгүй хоцорсон цагдаа нар зэрэг нь ард иргэдийг Тахрир талбайд жагсан тэмцэхэд хүргэсэн юм.

“Нөхцөл байдал Мубаракийн үеийнхээс ч дордсон. Шорон гяндан дахь тамлалт, яргалал түгшүүртэйгээр нэмэгдэж, хувьсгалд оролцож байсан хүмүүсийг шоронд хийж зохиомол хэрэгт тулгаж байна” хэмээн хоригдлуудад хууль зүйн туслалцаа үзүүлдэг Египетийн эдийн засаг, нийгмийн эрхийн төвийн өмгөөлөгч Махмуд Билал өгүүлэв. Лалын талыг баримтлагч Мохамед Мурсийг 2013 оны долдугаар сард эрх мэдлээс зайлуулсны дараа эрх баригчдын эсрэг дуугарсан хүмүүсийг дарамталж, нухчин дарах нь ихэсчээ.

Персийн булангийн орнуудаас дэмжлэг хүлээсэн Аль-Сиси сүүлийн нэг жилд “Төрийн төмөр нүүр”-ийг хоёр дахин нэмэгдүүлсэн нь Мубаракийн дэглэмийн хатуу гарыг сэргээсэн хэрэг болжээ. “Түүний дарангуйллын олон тоглогч тайзан дээр буцаж ирсэн. 2011 он хувьсгалын дараа байгуулагдсан улс төрийн бүлэглэлүүдийн ихэнх нь хавчин гадуурхагдсан” хэмээн тоймчид хэлж байна. Аль-Сисигийн дэглэм “Лалын ахан дүүс” хөдөлгөөнийг нухчин дарснаас гадна мөн либералууд, зүүний хүчнийхэн зэрэг тэрс үзэлтнүүдийг “дуусгажээ”. “Улс төрийн хоригдлууд хэдэн зуугаараа нэмэгдсээр байхад Египетийн орчин үеийн түүхэнд хамгийн муухай гэмт хэрэг үйлдсэн хүмүүс эрх мэдэлд гарч байна. Нэгдүгээр сарын 25-ны хувьсгалд итгэж байсан бүх хүн нэгдэх хэрэгтэй байна. Бид хоорондоо эвлэлдэн нэгдэж, дарангуйллын эсрэг хамтдаа тэмцэх арга замыг хайх хэрэгтэй” хэмээн “Лалын ахан дүүс” хөдөлгөөний Лондонд цөлөгдсөн гишүүн Абдала Хаддад ярилаа.

Сүүлийн нэг жилийн дотор хууль, шүүхийнхэн сөрөг хүчний олон зуун гишүүнд бүх насаар нь хорих, цаазаар авах ял оноож, сөрөг хүчин, тэрс үзлийг улам бүр боомилох болжээ. М.Мурсид хоёр долоо хоногийн өмнө цаазын ял сонсгосныг дэлхийн улс орнууд таатай хүлээж авсангүй. Төрийн бус байгууллагуудын эсрэг хяналтыг чангатгаж, их дээд сургуулийн оюутнуудыг хянаж цагдаж байгаа ч Аль-Сиси бүх эсэргүүцэл, дургүйцлийг намжааж чадаагүй юм. Сөрөг хүчнийхнийг олноор нь баривчилж, хорьж байгааг шүүмжлэх сонин хэвлэл байхгүй болжээ. “Урьдчилан таамаглахад хэцүү. Гэвч ойрын таван жилд Египетийн нийгэм, улс төр бужигнаж, самуурсан хэвээр байх болно. Бослого хөдөлгөөн тархах магадлалтай. Дахин нэг цэргийн эргэлт, эсвэл хувьсгал гарахыг ч үгүйсгэхгүй” хэмээн тоймч Данне өгүүлэв.

“Исламын улс” бүлгийн нэг салбар гэгддэг Синайн босогчдыг Аль-Сиси тайвшруулж чадсангүй. Тэд Египетийн аюулгүй байдалд заналхийлсэн хэвээр байна. “Сири, Ливи, Йемен дахь дайн, хямрал Абдельфатах Аль-Сисид ашигтай тусч тэрээр Европын зарим орны итгэлийг олж авсан. Египетийн одоогийн дэглэм тайван сөрөг хүчний бүх хаалга, замыг нь хааж байна. Тиймээс Египетэд тогтвортой байдал ирэх магадлал бага. Харин ч залуусыг радикал үзэл бодол, бослого хөдөлгөөн рүү түлхэж байна. Европ, Америк Аль-Сисиг дэмжсэнээрээ хариуцлагын нэг хэсгийг үүрэх ёстой” хэмээн улс төрийн тоймч Данне үгээ төгсгөлөө.

Ватиканы банкны ашиг 24 дахин өсчээ

Ватиканы банк буюу Шашны үйл хэргийн хүрээлэнгийн цэвэр ашиг 2014 онд 24 дахин өсчээ. Нийтлэгдсэн тайлангаас үзэхэд тус банк өнгөрсөн онд 69.3 сая еврогийн ашигтай ажилласан байна. 2013 онд дөнгөж 2.9 саяын ашигтай ажиллаж байжээ. Авлигын эсрэг тэмцлийн хүрээнд Ромын пап ламын зарлигаар 2014 онд Ватиканы банкны удирдлагыг сольсон юм. Шашны үйл хэргийн хүрээлэн дэлхий даяарх католик шашны үйл хэргийг санхүүжүүлэхээс гадна католик лам нарт банкын үйлчилгээ үзүүлдэг ажээ.

Болгар, Грек, Турк хилийн хамтарсан төвтэй болно

Болгар, Грек, Турк улс хууль бус цагаачлал, зохион байгуулалттай гэмт хэрэг, терроризмтэй тэмцэх зорилгоор хилийн алба, гаалийн хяналтын хамтарсан төв байгуулахаар тохиролцлоо. Софи хотод болсон гарын үсэг зурах ажиллагаан дээр Болгарын Дотоод хэргийн сайд Румяна Бычварова “Гурван улс нийтлэг ашиг сонирхлоо хамгаалахын тулд илүү нягт хамтран ажиллах боломжийг нээж байна” хэмээн онцолжээ. Хил, гаалийн хамтарсан төв Болгар, Туркийн хил дээрх Капитан-Андреево тосгонд байрлах юм. Туркт байдаг сири голдуу хэдэн мянган дүрвэгч, цагаач Болгар, Грекээр дамжин Европын холбооны улс руу нэвтрэх гэж оролддог ажээ.

Бангладешт лалын бүлгийг хориглов

Бангледешийн эрх баригчид блогчдын амь насанд халдсан хэрэгт буруутгагдаж байгаа лалын зэвсэгт “Ансарулла Бангла” бүлгийн үйл ажиллагааг хориглолоо. Дотоод хэргийн яамнаас мэдэгдэж буйгаар, тус бүлгийнхэн энэ онд гурван блогчны амь насанд халдаад байгаа аж. Тэдний дотор бангладеш гаралтай Америкийн иргэн Авижит Рой байгаа юм. Бангладешийн зохиолч, блогчид улс оронд лалын радикал үзэл бодол нэмэгдэж буйг хүчтэй шүүмжлэх болжээ. “Ансарулла Бангла” бүлэг 2013 онд блогч Ахмед Ражиб Хайдарын амь насанд халдаж байсан юм.

“Реал”-ын Карло Анчелотти ажлаасаа халагдав

“Реал Мадрид” клубын дасгалжуулагч Карло Анчелотти ажлаасаа халагджээ. Клубын Ерөнхийлөгч Флорентино Перес түүнтэй цаашид хамтран ажиллахгүй гэдгээ мэдэгдсэн байна. 55 настай итали мэргэжилтэн “Реал”-д Эзэн хааны цом, мөн  Аваргуудын лигийн арав дахь түрүүг нь авчирсан билээ. Энэ улирлын Аваргуудын лигийн хагас шигшээд “Реал Мадрид” Италийн “Ювентус”-т ялагдсан юм. Харин Испанийн лигт “Барселона”-д түрүүгээ алджээ.

“Надад Итали, Англи, Германаас санал ирсэн. Гэвч би нэг жил амрах бодолтой байна” хэмээн Карлетто сэтгүүлд өгсөн ярилцлагадаа онцолсон байна. “Реал”-ын олон тоглогч Карло Анчелоттийг дэмжиж байсан ч багийн удирдлага итали мэргэжилтнээс татгалзах шийдвэр гаргажээ.

Д.Кэмерон, В.Путин нар Сири, Украины асуудлаар ярилцжээ

Их Британийн Ерөнхий сайд Дэвид Кэмерон, ОХУ-ын Ерөнхийлөгч Владимир Путин нар Сири, украин дахь нөхцөл байдлын талаар утсаар 30 орчим минут ярилцаж хэлэлцлээ хэмээн Даунинг-Стритийн төлөөлөгч мэдэгдэв. Хоёр улсын үндэсний аюулгүй байдлын асуудал хариуцсан зөвлөхүүд уулзаж Сирийн хямралыг шийдвэрлэх энхийн хэлэлцээг сэргээх оролдлого хийх ёстой хэмээн лидерүүд тохиролцжээ. Сирийн хямралыг шийдвэрлэх үйл явцад Сирийн Ерөнхийлөгч Башар Асад оролцох ёсгүй хэмээн үзэж буйгаа Британийн Ерөнхий сайд уламжилсан байна. Лондон, Москвагийн хооронд ноцтой санал зөрөлдөөн байгаа ч өнөөдөр Минскийн тохиролцоог мөрдөх ёстой хэмээн Дэвид Кэмерон Украины талаарх санал бодлоо илэрхийлжээ.

Асрах газарт гал гаржээ

Хятадын Диншань хот дахь хөгшчүүдийг асрах газарт гал гарсны улмаас 38 хүн амиа алдаж, зургаан хүн түлэгдэж гэмтлээ хэмээн China.com сайт мэдээлэв. Шатсан байшинд хүмүүс үлдсэн байж магадгүй тул амиа алдсан хүний тоо нэмэгдэж болзошгүй байна. Аврах ажиллагаа үргэлжилсээр байна. Цахилгаан дамжуулах шугамд богино холболт үүссэнээс гал гарсан хэмээн үзэж байгаа аж. Гал гарах үеэр асрах газарт 100 гаруй хүн байжээ. 

Хэт халуун 500 гаруй хүний аминд хүрээд байна

Энэтхэгийн зарим мужид сүүлийн хэдэн өдөр Цельсийн 50 градус хүртэл халж байгаа хэт халуун цаг агаар 500 гаруй хүний аминд хүрээд байна. Өмнөд хэсгийн Телангана, Андра Прадеш мужид гэхэд л өнгөрсөн хагас сайнаас хойш 350 орчим хүн халууны улмаас амиа алджээ. Аллахабад, Уттар Прадешт агаарын халуун 48, нийслэл Дели хотод 44 градус хүрч байна. Эрх баригчдын зүгээс иргэдийг гэртээ үлдэж, маш их ус ууж байхыг зөвлөжээ.

Хэт халуун агаар дөрөвдүгээр сарын дундаас эхлэн өмнө зүгийн мужуудыг дайрч байгаа ч өнгөрсөн долоо хоногоос эхлэн хүмүүс олноороо амиа алдах болов. Халуунд хамгийн их цохиулсан Андра Прадеш мужид 246 хүн амиа алдаад байна. Тавдугаар сарын 25-нд гэхэд л 62 хүн наранд цохиулж амиа алджээ.

“Хэт халууны золиос болж буй хүмүүсийн ихэнх нь 50 гаран насны, гудамжинд ажилладаг хүмүүс байна. Иргэд урьдчилан сэргийлэх арга хэмжээ авч, малгай, шүхэртэй явж, ус, шингэн их хэмжээгээр уух хэрэгтэй” хэмээн Андра Прадеш мужийн Байгалийн гамшигтай тэмцэх хэлтсийн төлөөлөгч Тулси Рани ярилаа. Цөлөрхөг Ражастан мужид 58 хүн халуунд цохиулж нас бараад байна хэмээн Press Trust of India агентлаг уламжиллаа. Халуун, бүгчим цаг агаар дахиад хэд хоног үргэлжилнэ хэмээн Цаг уурын албанаас мэдэгдлээ. “Андра Прадеш, Телангана  муж, Дели хот болон хойд хэсгийн хэд хэдэн мужид хэт халуун агаар дахиад дөрөв хоног үргэлжилнэ” хэмээн эрх баригчид сануулж байна.

Калькутта мужид таксины хоёр жолооч наранд цохиулан амиа алдсаны дараа тус хотод агааржуулагчгүй таксинуудыг үйлчилгээнд гарахыг хоригложээ. Хэд хэдэн мужид сүүлийн нэг, хоёр сарын дотор бороо ороогүйн улмаас ган гачиг нүүрлэж, худгийн ус ширгэжээ. Үүний улмаас олон фермерүүд ургац алдах нь тодорхой болоод байна. Налгонда мужид гэхэд л нийт тариалангийн 50 хувь нь хатаж үгүй болжээ.

Испанийн эрх баригчид нэр хүндээ алдаж байна

Испанид орон нутгийн ,мужийн сонгуулийн урьдчилсан дүн гарч байна. Олон жил ээлжлэн эрх барьсан Ардын нам, Социалист ажилчдын нам нэр хүндээ алдаж, авлигын эсрэг шинэ нам, хөдөлгөөн илүү амжилт үзүүлжээ. Өнөөдөр эрх барьж буй Ардын нам ихэнх саналыг авсан ч сүүлийн 20 жилд анх удаагаа Мадрид хотын зөвлөл дээрх хяналтаа алдаж магадгүй болов. Улс орны эдийн засгийн байдал иргэдийн сонголтод хамгийн ихээр нөлөөлсөн байна. Ардын намаас авч буй (мөн өмнө нь Социалист намаас авч байсан) эдийн засгийн хатуу арга хэмжээ болон авлигын асуудалд испани иргэд тааламжгүй хандаж байгаа юм.

“Хезболла”-гийн лидер “Исламын улс”-ын аюулыг сануулав

Ливаны өмнөд хэсэг дахь лалын “Хезболла” хөдөлгөөний лидер Хасан Насралла Сирид байлдаж буй “Исламын улс” бүлгийн жихад дайчид болон “Аль”Кайда”-тай сүлбээтэй босогчдоос гарч буй аюул дэлхий нийтийг урьд өмнө байгаагүйгээр заналхийлж байгааг санууллаа. Насралла видео мэдэгдэлдээ “Хезболла” бүлэг хөрш Сири улсад Ерөнхийлөгч Башар Асадын талд байлдаж байгааг анх удаа хүлээн зөвшөөрчээ. Тэрээр Ливаны талд хандаж Сири дахь үйл ажиллагааг дэмжихийг уриалсан байна. Асадын эсрэг талынхныг дэмжсэнээр Сири улсыг жихад дайчдаас аварч чадахгүй хэмээн Насралла хэлжээ.

Сөрөг хүчний улстөрч өлсгөлөн зарлажээ

Венесуэльд сөрөг хүчний нэртэй улстөрч Леопольдо Лопес улс төрийн хоригдлуудыг чөлөөлөхийн шаардаж өлсгөлөн зарлажээ. Тэрээр Венесуэлийн иргэдийг ирэх хагас сайнд Каракасын гудамжинд гарч хүний эрх зөрчигдөж байгааг эсэргүүцэн жагсахыг уриалж Рамо Верде шоронгоос бичлэг хийлгэснийг хэвлэлийнхэн олж авсан байна. Мөн сөрөг хүчний бас нэг лидер Даниель Себальос өлсгөлөн зарлажээ.

Л.Лопес Засгийн газрыг хяналт цагдалтаа зогсоохыг шаардаж, парламентын сонгуулийг зарлахыг уриалжээ. Венесуэлийн сөрөг хүчний лидер Леопольдо Лопес социалист Засгийн газрын эсрэг олон нийтийн жагсаал зохион байгуулсан хэргээр 2014 онд шоронд хоригдсон юм. 

Польшийн Ерөнхийлөгчийн сонгуульд Анжей Дуда ялалт байгуулав 

Польшийн Ерөнхийлөгчийн сонгуулийн хоёрдугаар шатны дүн гарч өнөөгийн төрийн тэргүүн Бронислав Коморовский ялагдаж, сөрөг хүчний консерватив намын нэр дэвшигч Анжей Дуда ялалт байгууллаа. Коморовский ялагдлаа хүлээн зөвшөөрчээ. Хоёрдугаар шатны санал хураалтын дүнг нэгтгэн гаргахад Дуда сонгогчдын 53 хувийн санал авсан байна. Коморовский 47 хувийн санал авчээ. Сонгогчдын ирц 56.1 хувьтай гарлаа. Сонгуулийн албан ёсны дүнг өнөөдөр зарлана. Энэ намар Польшид парламентын сонгууль болно. Анжей Дудагийн ялалт түүний консерватив “Эрх, шударга ёс” намын нэр хүндийг өсгөж, парламентын сонгуульд ялалт байгуулах нөхцлийг бүрдүүлээд байна.   

Польшид Ерөнхийлөгч нь Засгийн газраасаа бага эрх мэдэлтэй байдаг. Парламентын сонгуульд “Эрх, шударга ёс” нам ялалт байгуулбал 2010 онд Смоленскт нисэх онгоцны ослоор нас барсан Польшийн Ерөнхийлөгч Лех Качиньскийн ихэр Ярослав Качиньский дахин Засгийн газрыг толгойлж магадгүй байна. Өнөөгийн Ерөнхийлөгч Б.Коморовский “Иргэдийн сонголтыг хүндэтгэж байна. Ялалт байгуулсан өрсөлдөгчдөө төр улсаа амжилттай удирдахыг хүсэн ерөөе” хэмээн мэдэгдлээ.

Анжей Дуда нь Ерөнхийлөгч Лех Качиньскийн хуулийн зөвлөх байсан юм. 43 настай Дуда өөрийгөө Лех Качиньскийн оюун санаа, улс төрийн залгамжлагч хэмээн үздэг аж. Тэрээр саяхан Rzeczpospolita сонинд ярилцлага өгөхдөө, “Качиньский нас барахаасаа хоёр хоногийн өмнө “Үе солигдож байна. Тиймээс улс орны хувь заяаг та нар гартаа авах болсон” хэмээн хэлж байсан” гэж ярьжээ. Польшид барууны хүчин ялалт байгуулсан нь Эва Копачын толгойлдог эрх баригч “Иргэний мөрийн хөтөлбөр” намд томоохон сануулга боллоо хэмээн тойм, ажиглагчид үзэж байна.  

“Иргэний мөрийн хөтөлбөр” нам эрх бариад найман жил болж байгаа бөгөөд энэ хугацаанд санхүүгийн хямралтай байсан ч эдийн засгийн өсөлтийг тасралтгүй хангаж иржээ. Гэвч Засгийн газар бүх амлалтаа биелүүлж чадалгүй тэтгэврийн насыг нэмэх зэрэг тааламжгүй арга хэмжээ авахад хүрч байлаа. Консерватив намд саналаа өгсөн сонгогчдын гол цөм нь ахмад үеийнхэн байсан юм. Польш улс нь амьдралын түвшингээрээ Баруун Европын орнуудыг тогтмол гүйцэж ирсэн ч олон польш иргэн энэ өсөлт, хөгжлийг мэдрэхгүй байгаа аж. Залуусын дунд ажилгүйдэл өндөр хэвээр, иргэд мөнгө олохын тулд Их Британи, Герман зэрэг орныг зорих нь элбэг байгаа ажээ.

Намрын парламентын сонгуульд “Эрх, шударга ёс” нам (2005-2007 онд эрх барьж байсан) ялалт байгуулсан тохиолдолд дотоодын асуудалдаа илүү орооцолдож, Европын холбоотой түншлэх, хамтран ажиллах тал дээр хойрго болж магадгүй байна. Ерөнхийлөгчийн сонгуулийн нэгдүгээр шатанд Анжей Дуда хуучинсаг үзэлтэй иргэд оршин суудаг Украин, Белорусьтай хил залгаа зүүн бүс нутагт илүү санал авсан юм.

Гватемалд Төвбанкны захирлыг баривчилжээ

Гватемалын цагдаа Төвбанкны захирал Хулио Суарес болон хэд хэдэн менежерийг авлигын хэрэгт сэжиглэн баривчилжээ. Суарес төрийн ажил, үйлчилгээг танилуудынхаа компанид өгч, хувь хүртдэг байсан нь мөрдөн шалгалтаар тогтоогджээ. Мөн банкны менежерүүд улсын мөнгийг хувийн компаниудад зээлүүлж “ашиг олдог” байсан хэмээн мөрдөгчид үзэж байгаа аж. Өнгөрсөн долоо хоногт Гватемалын дэд ерөнхийлөгч Роксана Бальдетти татвараас зайлсхийсэн хэргээр албан тушаалаасаа огцорчээ.

Лалын босогчид Пальмира хотыг эзлэв

Сирид эртний түүхт хот Пальмира “Исламын улс” бүлгийн босогчдод эзлэгдлээ хэмээн гэрчүүд мэдээлж байна. Хотын өмнөд хэсэгт Ойрхи Дорнодын соёлын үнэт өвийн нэг болох эртний Ромын хотын туурь байдаг. Энэ туурь ЮНЕСКО-гийн Бүх дэлхийн соёлын өвд орсон билээ. Библи сударт бичсэнээр, Соломон хаан Дамаск болон Ефрат мөрний хоорондох цөлийн баян бүрдэд Пальмира хотыг байгуулжээ. Хожим нь Пальмира хот өрнө, дорнын хоорондох Торгоны замын огтлолцол дээрх худалдааны томоохон төв болж байв. Лалын хэт даврагчид тус хотод хяналтаа бүрэн тогтоосны дараа эртний хөшөө дурсгалыг устгаж эхлэх вий гэсэн айдас болгоомжлол үүсчээ.

Зөвлөлтийн цэргийн олзлогдогчдод нөхөн төлбөр олгоно

Холбооны бүгд найрамдах Герман улсын Засгийн газар дэлхийн II дайны үед нацистын хорих лагерьт хоригдож байсан зөвлөлтийн дөрвөн мянган цэргийн олзлоглогчдод 10 сая еврогийн нөхөн төлбөр олгохоор боллоо. Энэ мөнгийг Германы төсөвт тодотголоор оруулж, парламент баталсан байна. Цэргийн олзонд байсан хүн (ар гэрийнхэн) бүр хоёр мянга 500 еврог хорих лагерьт зовж байсныг нь хүндэтгэсэн захидлын хамт хүлээж авах юм. Германы эрх баригчид үүнийг “Санхүүгийн билэгдлийн хүлээн зөвшөөрөлт” хэмээн нэрлэж байгаа аж.

Хүйсээр нь ялгаварлан үр хөндөхийн  эсрэг кампанит ажил

Хятадын эрх баригчид хүн амынхаа эрчүүд, эмэгтэйчүүдийн хоорондох тэгш бус харьцааг арилгахын тулд хүүхдийн хүйсийг тодорхойлох, хүйсээр нь ялгаварлаж үр хөндөлт хийдэг явдлыг таслан зогсоохоор кампанит ажил өрнүүлж байна. Үндэсний эрүүл мэнд, гэр бүл төлөвлөлтийн хороо зорилгодоо хүрэхийн тулд энэ оны арваннэгдүгээр сар хүртэл үргэлжлэх хяналт, шалгалтын хөтөлбөрийг хэрэгжүүлж эхлэв. Тус хороо эрүүл мэндийн төв, үр тогтоох агентлаг, гэр бүл төлөвлөлтийн төв, эмнэлэг, явуулын эмэгтэйчүүдийн эмнэлгүүдийг онцгой хяналтад байлгана хэмээн “Синхуа” уламжиллаа.

Азийн олон орны адилаар Хятадад уламжлал ёсоор эрэгтэй хүүхдийг илүүд үздэг. Эрэгтэй хүүхэд нь гэр бүлийн удам угсаагаа авч явах баталгаа болж, хөгширсөн хойноо хэн нэгнээр асруулах хувьтай хэмээн эцэг эхчүүд үздэг тул хөдөө тосгодод эмэгтэй хүүхэд мэндлэх гэж байна гэж мэдвэл үр хөндүүлэх нь элбэг байдаг. Хэвлий дахь хүүхдийн хүйсийг тодорхойлуулж, хүйсээр нь ялгаварлан жирэмслэлтийг таслан зогсоох нь Хятадад хэдэн жилийн өмнөөс хууль бус болсон ч эрэгтэй хүүхдийг эрхэмлэдэг, мөн 70-аад оноос хойш үйлчилж байгаа нэг хүүхэд бодлогын улмаас үр хөндүүлэх нь элбэг байсаар байна. “China Daily” сонинд бичсэнээр, Шандун мужийн эмч нар хүйс тодорхойлдог В хэт авианы аппаратыг нууцаар хэрэглэж эцэг эхчүүдэд “тусладаг” аж.

2014 онд Хятадад 100 эмэгтэй хүүхэд тутамд 116 эрэгтэй хүүхэд төржээ. Олон жилийн турш ийм харьцаатай явж ирсний улмаас хүйсийн тэгш бус байдал асар их болсон юм. 2012 онд НҮБ-ын Хүн амын сангаас явуулсан судалгаагаар, 2010 онд Хятадад 24 сая охин “алга болжээ”. Энэ нь хэвлийдээ амиа таслуулсан эмэгтэй хүүхдүүдийн тоо юм. Үүнээс гадна, улс оронд боловсрол, эд баялгийн түвшин нэмэгдэхийн хэрээр олон эмэгтэй гэр бүлээс татгалзах болжээ. Их сургууль төгссөн, хотод амьдардаг, ажил төрөлтэй хятад бүсгүйчүүд Япон, Солонгосын адилаар гэрлэж бараалах нь тун хойрго болж, зарим нь бүрмөсөн татгалздаг болсон аж.

Энэхүү гаж байдлыг улмаас олон эрчүүд, тэр тусмаа хөдөө нутагт, эхнэр олох гэсэн тун хэцүү даалгавартай тулах болжээ. Мөн охид, эмэгтэйчүүдийг хулгайлах, сүйт бүсгүй болгож худалдах зэрэг тохиолдол нэмэгдэж байгаа нь хүн ам зүйн тэгш бус байдлын нэг үр дагавар юм. Ийм нөхцөл байдлын өмнө хятад залуус хөрш улсуудаасаа ханиа олох замыг сонгож байна. Юннан, Гуйжоу зэрэг баруун өмнөд хэсгийн мужид вьетнам, эсвэл бирм эхнэртэй хятадууд элбэг байдаг. Саяхан “Beijing News” сонинд эхнэр авч болох гадаадын шилдэг 10 орны жагсаалт гарсан нь эрчүүдийн анхаарлыг ихэд татжээ. Эрх баригчид энэ асуудлыг шийдэхийн тулд эмч нарын тоног төхөөрөмж, эм хэрэгслийг нарийн шалгаж, хууль бус үр хөндөлт хийсэн эмч, эмнэлгийн “Хар жагсаалт”-ыг гаргах гэж байна.

Хятадын Засгийн газар ойрын үед хосуудыг хоёр хүүхэдтэй болохыг зөвшөөрөх гэж байна гэсэн цуу яриа дэгджээ. 2013 онд нэг хүүхэд бодлогодоо зарим өөрчлөлт оруулж, хоёр дахь хүүхдээ төрүүлэх боломжийг тусгаж өгсөн ч энэ нь хэтэрхий хатуу чанд шаардлагатай. Засгийн газраас нэг хүүхэд бодлогыг цуцлахаас нааш хүйсээр нь ялгаварлан үр хөндөх явдал байсаар байх болно хэмээн тоймч, ажиглагчид үзэж байна.

Майкл Жордан тансаг эдлэнгээ худалдана

Бүх цаг үеийн хамгийн агуу сагсанбөмбөгч Майкл Жордан Чикаго дахь тансаг  эдлэнгээ зарах гэсэн ч худалдан авагч олдохгүй байна. Тэрээр энэхүү тансаг зуслангаа 2012 онд 29 сая доллараар худалдаанд тавьж байсан юм. Гэвч авах хүн олдоогүй тул 14 сая доллар хүртэл бууруулж дуудлага худалдаагаар оруулахаар болжээ. М.Жордан “Чикаго Буллз” багт тоглож байхдаа зүүж байсан домогт дугаарынхаа үнээр эдлэн газраа худалдах санаатай байна. 23 гэсэн тоо зуслангийнх нь хаалган дээр байдаг аж.

Жорданы зуны өргөө нь маш том талбайтайгаас гадна бүх талаараа тансаг зэрэглэлтэй. Усан бассейн, сагсан бөмбөгийн талбай нь хамгийн үнэ цэнэтэй нь бөгөөд 15 ариун цэврийн тасалгаа, есөн унтлагын өрөөтэй. Эдлэнгийн нийт талбай 17 км кв ажээ. Дуудлага худалдаагаар оруулбал үнэ нь өсч 23 сая долларт хүрнэ хэмээн тооцоолж байгаа аж.

Хятадад нохойн махны эрэлт унажээ

Хятадын Гуанжоу хотод нохойн махаар хоол хийдэг эртний нэгэн зоогийн газар хаагджээ. 1963 онд нээгдэж байсан Sunshine зоогийн газрын эзэн “Нохойн махан хоолны эрэлт буурсан, мөн зоогийн газрын үйл ажиллагаанд тавих хяналт чангарсны улмаас хаагдаж байна” хэмээн ярьжээ. South China Morning Post сонин мэдээлж буйгаар, Гуанжоу хотод нохой, муурны махаар зочдоо дайлдаг хэд хэдэн ресторан хаагджээ.

1960-аад онд хотын захиргаа нутгийн өвөрцмөц хоолоор үйлчилдэг зоогийн газар нээх саналыг бизнесмэнүүдэд тавьснаар Sunshine ресторан нээгдэж байжээ. 2000 онд энэ газар хотын захиргаанаас олгодог “Хятадын алдарт зоог” шагналыг хүртэж байв. Sunshine-д Япон, Хятадын жуулчид байнга зочилдог байжээ. Хятадын гал тогоонд уламжлал ёсоор нохойн махыг өргөн хэрэглэдэг. Бүр манай эрины өмнөх 500-гаад оноос хятадууд нохойн мах зооглодог байжээ. Солонгос, Индонез, Вьетнам, Зүүн Тимор, Гана, Нигери улсад нохойн мах иддэг ажээ.

Афганистанд 60-аад босогчийг устгажээ

Афганистаны зэвсэгт хүчин 60 гаруй босогчийг устгалаа хэмээн эрх баригчид мэдэгдэв. Лагман, Баглан, Тахар, Кундуз, Фарьяб, Бадахшан, Сари-Пуль, Жаузжан, Фарах, Хельманд, Нимроз мужид тусгай ажиллагаа  явуулсны үр дүнд дээрх босогчдыг устгасан байна. Мөн 38 орчим хэт даврагчийг шархдуулж баривчилжээ. Афганы шинэ Ерөнхийлөгч Ашраф Гани хэт даврагчидтай ширүүн тэмцэл өрнүүлнэ хэмээн амласан юм. Талибууд хяналтаа тогтоогоод байгаа алслагдсан мужуудад төвийн эрх мэдлийг эргүүлэн тогтооно хэмээн тэрээр мэдэгдэж байна.

Биеэ үнэлэгчийг Google-ийн менежерийг хөнөөсөн хэргээр шийтгэв

Калифорнийн шүүх Google компанийн топ-менежер Форрест Хейесийг санамсаргүй хөнөөсөн хэрэгт буруутгагдсан Алекс Тичелманд зургаан жилийн ял оноолоо. Тичелман өөртөө болон Хейест хар тамхи тарьсан нь топ-менежерийг үхэлд хүргэснийг шинжээчид тогтоосон юм. Тэд энэ үеэр Хейесийн дарвуулт хөлөгт байсан бөгөөд Алекс тэнд биеэ үнэлэгчийн үүргээ гүйцэтгэж байжээ. Үйлчлүүлэгч нь хар тамхины улмаас амьсгал хураасны дараа Алекс Тичелман түүний дээгүүр алхаж эд зүйлсээ аваад хундагатай дарсыг уугаад дарвуулт хөлгийг орхиж явсан нь хяналтын камерт бичигдэн үлдсэн байжээ.

Хунтайж Чарльз Шинн Фейний лидертэй гар барьжээ

Британийн хаан ширээг залгамжлагч хунтайж Чарльз Ирландад үндсэрхэг Шинн Фейн намын лидер Жерри Адамстай уулзжээ. Адамс, хунтайж нар гар барьж, дараа нь 15 минут хаалттай уулзалт хийсэн байна. Хунтайж Чарьлз Шинн Фейний лидертэй уулзахыг зөвшөөрсөн Британийн хатан хааны гэр бүлийн анхны гишүүн болсон тул хэвлэлийнхэн энэхүү гар барилтыг “Түүхэн” хэмээн нэрлэж байна.

Шинн Фейн нам нь Хойд Ирландыг Их Британийн бүрэлдэхүүнээс гаргахын төлөө байдаг Ирландын бүгд найрамдах армийн (IRA) улс төрийн жигүүр юм. 1979 онд Ирландын бүгд найрамдах арми Ирландын Маллахмор тосгонд хунтайж Чарльзын хамаатан, лорд Луис Маунтбеттений аминд хүрсэн юм. Тэр үед Жерри Адамс IRA-ийн удирдагчдын нэг байсан хэмээн үздэг ч тэрээр үүнийг няцаасаар иржээ. 

Петр Порошенко: “Оростой жинхэнэ дайн өрнөж байна”

Украины Ерөнхийлөгч Петр Порошенко “ВВС” агентлагт ярилцлага өгөхдөө, Украин улс Оростой жинхэнэ дайны байдалтай байна хэмээн мэдэгджээ. Украины газар нутаг дээр Оросын тусгай албаны хоёр дайчин баривчлагдсаныг тэрээр сануулав. Нэг жилийн өмнө Украины Ерөнхийлөгч болсон Порошенко улс орны зүүн хэсэг дахь салан тусгаарлах үзэлтэй тэмцэх амаргүй даалгавартай шууд тулгарсан юм. Салан тусгаарлах үзэл нь маш хурдан зэвсэгт мөргөлдөөн болон хувирсан билээ. Украины зүүн нутаг дахь бослогод ОХУ дэмжлэг үзүүлж байна хэмээн буруутгадаг ч Москва үүнийг эрс няцаасаар байна. Саяхан Луганск мужид Оросын хоёр иргэн украин цэргүүдэд баривчлагджээ. Тэд Оросын зэвсэгт хүчний албан хаагч биш хэмээн ОХУ-ын Батлан хамгаалах яамнаас мэдэгдэв.

Украины зүүн хэсэг дахь Оросын талыг баримтлагч зэвсэгт бүлгүүд зуны ээлжит довтолгоондоо бэлтгэж байна хэмээн Петр Порошенко үзэж байна. “Бид үүнд бэлэн байх ёстой гэж бодож байна. Гэвч бид тэдэнд өдөөн хатгалга хийх өчүүхэн ч шалтаг гаргаж өгөхгүй. Тиймээс хариуцлагыг тэд бүрэн хүлээх болно” хэмээн тэрээр “ВВС”-д ярилаа.

“Та Владимир Путинд итгэж байна уу” гэсэн асуултад “Итгэдэг үү гэж үү, үгүй ээ” хэмээн хариулжээ. “Итгэдэггүй хүнтэйгээ яаж яриа хэлэлцээ өрнүүлэх юм бэ” гэхэд Порошенко “Надад өөр гарц алга. Бид цэргийн хүчээр газар нутгаа эргүүлэн авч чадна гэж бодохгүй байна” хэмээн хүлээн зөвшөөрчээ.

Өнгөрсөн долоо хоногт АНУ, ОХУ-ын хоорондох дипломат харилцаа холбооны идэвх мэдэгдэхүйц нэмэгдсэн юм. АНУ-ын Төрийн нарийн бичгийн дарга Жон Керри болон Төрийн департаментын өндөр албаны төлөөлөгч Москвад айлчилсан билээ. “Америкууд Владимир Путинтай харилцаагаа сайжруулчихвал Украинд муугаар нөлөөлөх юм биш биз” хэмээн “ВВС”-ийн сурвалжлагч асуухад П.Порошенко “Жон Керри В.Путинтай уулсаныхаа дараа хувийн нисэх онгоцноосоо над руу утасдсан. АНУ Украиныг хэзээ ч орхихгүй гэдгийг тэр батлан хэлсэн” хэмээн хариулжээ. 

Байкеруудын хоорондох мөргөлдөөнд есөн хүн  амь үрэгдэв

АНУ-ын Техас мужийн Уэйко хотод байкерууд буюу мотоциклчдын бүлгүүдийн хооронд мөргөлдөөн болсны улмаас есөн хүн амиа алдаж, 17 хүн шархаджээ. Дайсагнагч бүлгүүдийн хоорондох мөргөлдөөн өдрийн цагаар нэгэн зоогийн газарт эхэлж, дараа нь автомашины зогсоол дээр үргэлжилж гинж, мод, хутга, буу хэрэглэн тулалджээ. Найман хүн газар дээрээ нас барж, нэг хүн эмнэлэгт өнгөрсөн байна. Хэргийн газраас 100 орчим зэвсэг олж хураажээ. Цагдаа нар хэд хэдэн хүнийг баривчлаад байна.

Мохаммед Мурсид цаазын ял оноосныг Европын  холбоо эсэргүүцэв

Европын холбооны дипломат албаны тэргүүн Федерика Могерини Египетийн Ерөнхийлөгч асан Мохаммеду Мурси болон түүний талынханд цаазаар авах ял оноосон нь Египетийн олон улсын өмнө хүлээсэн үүрэг амлалтад нийцэхгүй байна хэмээн мэдэгдэв. Египетийн эрх баригчид гэмт хэрэгт буруутгагдсан хүмүүсийг шударга шүүхээр хангах үүрэг хүлээсэн хэмээн Европын холбооны Гадаад хэрэг, аюулгүй байдлын дээд төлөөлөгч Могерини хэллээ. “Давж заалдах явцад цаазын ялыг эргэн харна гэдэгт Европын холбоо итгэлтэй байна. Тогтвортой байдал, хүний эрхийг баталгаажуулсан байх ёстой” хэмээн мэдэгдэлд онцолжээ. Европын холбоо ямар ч тохиолдолд цаазын ялыг эсэргүүцдэг билээ.

Мохаммед Мурси болон “Лалын ахан дүүс” хөдөлгөөний 105 гишүүн тавдугаар сарын 16-нд шүүхээс ялын дээд хэмжээ сонссон юм. Мурсийг 2011 онд “Лалын ахан дүүс” хөдөлгөөний лидерүүд шоронгоос бөөнөөрөө оргож, дараа нь аллага үйлдэх нөхцөл бүрдсэн хэрэгт буруутай хэмээн үзсэн байна. Шүүхээс оноосон цаазын ялыг Египетийн шашны дээд төлөөлөгч Шауки Аллам батлах ёстой.

Жагсагчид Скопье хотын төвийг орхихоос татгалзав

Македонийн нийслэл Скопье хотын төвд цугларсан сөрөг хүчнийхэн Ерөнхий сайд Никола Груевскийг огцрохыг шаардсаар байна. Тэд хотын төвийг орхихоос татгалзаж Засгийн газрын байрны өмнө майхан барьжээ. Сөрөг хүчний Социал демократ намын лидер Зоран Заев “Жагсагчид консерватив Ерөнхий сайдыг огцортол төв талбайг орхихгүй” хэмээн мэдэгдэв. Сөрөг хүчнийхэн Засгийн газрыг авлигад буруутгаж байгаа ч Груевскийн энэ бүгдийг няцааж байгаа юм. Засгийн газрыг дэмжигч хүчнүүд эсрэг жагсаал хийхээр төлөвлөж байна.

Саудын Араб агаарын довтолгоог сэргээв

Саудын Арабаар ахлуулсан олон улсын цэргийн хүчин Йемен дахь хусит босогчдыг байрлалыг дахин довтолж эхэллээ. Таван өдөр гал зогсоосны эцэст ийнхүү довтолгоог сэргээжээ. НҮБ эвлэрлийн сүүлчийн өдөр гал зогсоолтыг сунгахыг уриалж байсан ч талаар болов. Гал зогсоох гэрээг ерөнхийд нь дагаж мөрдсөн ч Йемений зарим бүс нутагт хусит босогчид болон Засгийн газарт үнэнч хүчнүүдийн хооронд байлдаан болсоор байжээ. Олон улсын буяны байгууллагууд эвлэрлийг ашиглаж энгийн иргэдэд хүмүүнлэгийн тусламж хүргэж амжсан байна.

АНУ-д 1.8 сая тахиаг устгажээ

Америкийн Айова мужид шувууны ханиадаар өвчилсөн 200 мянган нян тээгч тахиаг, нийтдээ хоёр сая орчим тахиаг урьдчилан сэргийлэх зорилгоор устгалаа хэмээн Star Tribune мэдээлэв. “Халдвар тархахаас сэргийлж боломжтой бүхнийг хийж байна. Өөр юу хийхийг мэдэхгүй байна” хэмээн АНУ-д нэлээн томд тооцогддог Rembrandt Enterprises фермийн төлөөлөгч ярьжээ. Айова мужид шувууны ханиадны улмаас онц байдал тогтоогоод байна.

Лалын босогчид Рамади хотыг эзэлжээ

Иракийн баруун хэсгийн Рамади хот “Исламын улс” бүлгийн дайчдад эзлэгдлээ хэмээн Иракийн эрх баригчид мэдэгдэв. Хотыг хамгаалж байсан бэхлэлт, хамгаалалт жихад дайчдын довтолгоог эрэргүүцэхэд хангалтгүй байсны улмаас Засгийн газрын цэрэг ухарчээ. Орон нутгийн эрх баригчдын төлөөлөл мэдэгдэж буйгаар, сүүлийн хоёр хоногт тус хотод 500 гаруй хүн алуулсны дотор энгийн иргэд цөөнгүй байгаа аж. Иракийн хамгийн том муж Анбарын нийслэл Рамади хот нь Багдадаас баруун тийш 112 км-т оршдог.

“Исламын улс” бүлэг хотыг бүрэн эзэлж авсан тухайгаа интернэтээр дамжуулан мэдэгдээд байна. Иракийн Засгийн газрыг эсэргүүцдэг суннит овог аймгийнхан болон Садддам Хусейний армийн экс гишүүдийн дэмжлэгийг хүлээдэг жихад дайчид олон сарын турш Рамади хотыг эзлэх гэж оролдсоны эцэст ийнхүү санасандаа хүрчээ. “Исламын улс” бүлгийнхэн стратегийн чухал Рамади хотыг эзэлснээр Анбар мужийг тэр чигт нь хяналтдаа авч чадна гэдгээ Иракийн Засгийн газарт сануулж, батлан харууллаа хэмээн тоймч, ажиглагчид үзэж байна. Засгийн газрын цэргүүд ухарсаар Рамадигаас зүүн зүгт байдаг Халидиа хотод иржээ.

Анбар мужийн засаг захиргаанд ихэд ойр эх сурвалж мэдээлж буйгаар, Рамади хотын төлөөх тулалдааны явцад Иракийн армийн зэр зэвсийн нөөц дууссан аж. Засгийн газрын цэргүүд Рамади хотыг автомашинаар яаран орхиж буй бичлэг интернэтэд тавигджээ. “Исламын улс” бүлгийнхэн амиа золиослогчдыг ашиглан хэд хэдэн том дэлбэрэлт зохион байгуулсны дараа Иракийн армийн цэргүүд Рамади хотыг орхин зугтжээ. АНУ-ын Батлан хамгаалахын төлөөлөгч Элис Смит “Холбоотны хүчин Иракийн армийг дэмжиж Рамади хотыг буцааж авахад туслах болно” хэмээн мэдэгдлээ. 

Shell Арктикт өрөмдлөг хийх эрхтэй болов

АНУ-ын засаг захиргаа Англи-Голландын хамтарсан Shell компанид Арктикт нефть, хий олборлох урьдчилсан зөвшөөрлийг өгчээ. Shell компани энэ зунаас Хойд мөсөн далайд өрөмдлөг хийж эхлэх бололтой. АНУ-ын Засгийн газрын зөвшөөрөл нь тус компанийн хувьд томоохон ялалт болж байна. Тэд Бофорт болон Чукоткийн алслагдсан тэнгист олборлолт хийх эрхийн төлөө олон жил хөөцөлдсөн юм. Зарим мэдээллээр тэнд нефть, хийн асар их нөөц байгаа аж.

Америкийн экологчид Цагаан ордны шийдвэрийг шүүмжилж, Арктикт осол гарвал байгальд ноцтой хор хохирол учирна хэмээн мэдэгдлээ.

Канадууд Украинд 25 сая доллараар туслана

Канад улс Украины ардчилсан байгууллын хөгжилд 25 сая доллараар туслахаар болов. Канадын Гадаад хэргийн сайд Дуглас Николсон Украины Ерөнхийлөгч Петр Порошенкотой уулзах үеэрээ ийнхүү мэдэгдлээ. “Дэлхий ертөнц өөрчлөгдөж байна. Гэвч дараагийн таван өдөр, таван сар, эсвэл 50 жилд Канад улс Украинд дэмжлэг үзүүлсээр байх болно” хэмээн Канадын Ерөнхий сайд хэлснийг тэрээр дамжуулжээ. Украин улс Минскийн гэрээг нарийн чанд мөрдөж байгааг Порошенко хэлжээ. Харин гэрээг Донецк, Луганскийн бүгд найрамдах улс зөрчиж байгаа хэмээн Киев үзэж байна. Канад улс 200 орчим цэргийн сургагчаа Украин руу илгээхээр болсон нь Оросын эсэргүүцэлтэй тулгарсан юм.

10 настай жирэмсэн охиныг үр хөндүүлэхийг хориглов

Парагвайд цагдаа нар 10 настай өргөмөл охиноо хүчирхийлсэн эрэгтэйг баривчилжээ. Охин эдүгээ таван сартай жирэмсэн бөгөөд үр хөндүүлэхийг хориглоод байна. Парагвайн хуулиар үр хөндүүлэхийг эрүүгийн гэмт хэрэгт тооцдог аж. Эрүүл мэндийн сайд Антонио Баррос “Охины бие сайн байна. Үр хөндүүлэхэд ч хэтэрхий оройтсон байна” хэмээн ярилаа. Гэвч эмэгтэйчүүдийн эрхийн төлөө тэмцэгчид охиныг хүүхэд төрүүлэхэд хэтэрхий балчир байна хэмээн үзэж, үр хөндүүлэхийг шаардаж байна. Парагвайд жил бүр 14-өөс доош насны 600 орчим охин жирэмсэлдэг ажээ.

Б.Обама 2016 онд Кубад айлчилж магадгүй

АНУ-ын Ерөнхийлөгч Барак Обама 2016 онд Кубад айлчилж магадгүй байна. Энэ тухай Цагаан ордны хэвлэлийн төлөөлөгч Жош Эрнест мэдэгджээ. “Ерөнхийлөгч ойрын үед Кубад очихгүй гэж хэлсэн. Гэвч дараа жил Кубад айлчлах боломжоо үгүйсгээгүй” хэмээн Эрнест ярьжээ. Б.Обама саяхан Панамад болсон Америкийн дээд хэмжээний уулзалтын үеэр Кубын удирдагч Рауль Кастротой биелэн уулзаж  ярилцсан билээ.

Францын Ерөнхийлөгч Франсуа Олланд Кубад түүхэн айлчлалаар ирээд байна. Тэрээр сүүлийн 60 жилд Кубад хөл тавьсан Францын анхны төрийн тэргүүн болж байгаа юм. Ф.Олланд Рауль Кастротой уулзсаны дараа Фидель Кастрогийн гэрт зочилж найрсаг яриа өрнүүлжээ.

Шумахерийн бие сайжирч байгаа гэв

“Формула-1” авто уралдааны долоон удаагийн аварга Михаэль Шумахерийн эрүүл мэнд сайжирсаар байна хэмээн түүний төлөөлөгч Сабина Кем мэдээлэв. “Түүний бие үл ялиг сайжирсан. Гэвч бүрэн эдгэртэл хол байна” хэмээн тэрээр ярьжээ. Шумахерийн гэргий Коринна нөхрийнхээ эмчилгээний зардлыг гаргахын тулд 34 сая еврогийн үнэтэй хувийн нисэх онгоцыг зарсан байна. Мөн Францын Мерибель дахь тансаг зуслангаа худалдахаар төлөвлөж байгаа аж.

М.Шумахер 2014 оны есдүгээр сард эмнэлгээс гарч Женев нуурын эрэг дахь зусландаа ирсэн юм. Тэрээр зургаан сарын турш эмнэлэгт ухаангүй байж, тархиндаа хэд хэдэн хагалгаа хийлгэсний эцэст ухаан орсон билээ. Шумахер Альпийн ууланд цанаар гулгаж байгаад осолдож толгойдоо хүнд гэмтэл авсан юм.

Хууль бус цагаачлалтай тэмцэхэд НҮБ-аас тусламж хүсэв

Европын холбооны гадаад бодлогын тэргүүн Федерика Могерини НҮБ-д хандаж Газар дундын тэнгисээр дамжин Европт орж ирдэг цагаачдын асуудлыг шийдэхэд дэмжлэг үзүүлэхийг уриаллаа. Тэрээр НҮБ-ын Аюулгүйн зөвлөлийн хуралдаан дээр үг хэлэхдээ, Европын холбоо энэ асуудлаар тусгай ажиллагаа явуулах боломжийг судалж байгааг дуулгажээ. Хууль бус цагаачдыг зөөвөрлөдөг хөлөг онгоцуудыг хурааж, устгах тухай яригдаж байгаа юм. Мөн Европ руу хууль бус цагаачдыг оруулдаг гэмт бүлэглэлийг устгах төлөвлөгөө боловсруулж байгаа аж.

Сүүлийн үед Африкийн хууль бус цагаачид Италид хөл тавихын тулд найдваргүй хөлөг онгоцоор хууль бусаар зорчих нь ихэсчээ. Саяхан 600 орчим цагаач Италийн Лампедуза арал руу явж байгаад хөлөг онгоц нь далайд сүйрч амь үрэгдсэн юм. Цагаачлалын олон улсын байгууллагаас мэдээлж буйгаар, 2015 он гарсаар 1770 хүн Европ хүрэх замдаа далайд амь насаа алджээ. Хууль бус цагаачид ачсан хөлөг онгоцууд замдаа гарсаар байгааг санууллаа.

Эмх замбараагүй, засаг захиргаагүй байдал ноёрхож байгаа Ливи улсын боомтуудаас хамгийн их цагаачид Европ руу гарч байгаа аж. Европын холбоо энэ асуудлаар Ливитэй гэрээ, тохиролцоо хийх боломжгүй байна. Хэдийгээр тодруулах, хийх нарийн ширийн зүйл их байгаа ч хууль бус цагаачдын эсрэг цэргийн хүч ашиглах нь Европын холбооны нэг зорилтын нэг болоод байна. Хууль бус цагаачид гүн тэнгист гарчихсан хойно нь олж аврах биш, харин Африкийн эргээс хөдлөхөөс нь өмнө зогсоох ёстой хэмээн Ф.Могерини үзэж байна.

Далайгаас аварсан, эсвэл Европын газар нутаг дээр хөл тавьсан цагаачдын асуудлыг шийдвэрлэхэд маш хүнд байдаг. Тэдний ихэнх нь ямар ч бичиг баримтгүй, аль улсын иргэн болох нь тодорхойгүй байдаг. Тиймээс тэднийг буцаах газар байхгүй, эцэст нь хүний эрхийн конвенцийн дагуу цагаачдын байранд байлгаж тэжээхээс өөр аргагүй болдог ажээ.