Батлан хамгаалахын сайдыг Ерөнхийлөгчид нэр дэвшүүлэв

Египетийн зэвсэгт хүчний дээд зөвлөл Батлан хамгаалахын сайд, фельдмаршал Абдель Фаттах Аль-Сисиг Ерөнхийлөгчийн сонгуульд нэр дэвшүүлж буйгаар зарлав. Фельдмаршал энэ саналыг хүлээн авч, төрийн тэргүүнд өрсөлдөх эсэхээ ойрын үед зарлах бололтой.

Сонгуулийн ерөнхий хороо хоёрдугаар сарын 18 хүртэл Ерөнхийлөгчид нэр дэвшигчдийн өргөдлийг хүлээн авах юм. Сонгууль дөрөвдүгээр сард болно. Аль-Сиси нь Египетийн хамгийн алдартай улстөрч боловч Египет орныг цэргийнхний томилсон түр Ерөнхийлөгч Адли Мансур удирдаж байгаа билээ. Батлан хамгаалахын генералууд Аль-Сисиг Ерөнхийлөгчийн сонгуульд нэр дэвшүүлэхээсээ хэдэн цагийн өмнө түүнд цэргийн дээд фельдмаршал цолыг олгожээ.

Борооны улмаас онц байдал зарлав

Боливт хэдэн сарын турш үргэлжлэн орсоор байгаа борооны улмаас онц байдал зарлаад байна. Үерт цөөнгүй хүн амь насаа алдаад байгаа юм. Байгалийн гамшгийн улмаас хэдэн мянган хүн орон гэргүй болжээ. Засгийн газраас онц байдал зарласнаар төрийн сангаас тусламжийн хөрөнгө мөнгө гаргах боломжтой болж байгаа юм. Тэр тусмаа үерт хамгийн их нэрвэгдсэн бүс нутагт багагүй мөнгө гаргахаар болжээ. Өнгөрсөн оны аравдугаар сараас эхлэн орж байгаа борооны улмаас хэдэн арван хотод үер бууж, газрын хөрсны нуралт үүсээд байна.

АНУ Иракт байлдааны нисдэг тэрэг худалдана

Иракийн Засгийн газар АНУ-д үйлдвэрлэсэн Apache байлдааны нисдэг тэрэг худалдан авахаар зэхэж байна. Иракт пахин сэргээд байгаа аллага, хядлагын эсрэг тэмцэлд орчин үеийн нисдэг тэрэг ашиглах бололтой. Тохиролцооны дагуу иракууд энэ онд зургаан Apache нисдэг тэргийг түрээсээр авах бөгөөд дараагийн гурван жилд 20 орчим байлдааны нисдэг тэрэг худалдаж авахаар болжээ.

Энэ наймааны өртөг 1.37 тэрбум долларт хүрч байгаа аж. Мөн Иракийн тал өндөр ончтой 152 Hellfire пуужин, харвах төхөөрөмж, шөнийн хараатай нүдний шил болон бусад сэлбэг хэрэгсэл авах гэрээ байгуулсан байна. АНУ-ын мэргэжилтнүүд Иордан дахь ирак цэргүүдэд сургалт  явуулахаар болсон аж.

TataMotors-ийн захирал 22 давхраас үсэрчээ

Энэтхэгийн автомашин үйлдвэрлэлийн томоохон компани TataMotors удирдлагаа шинээр томилохоос өөр аргагүй байдалд орлоо. Тус компанийн 51 настай захирал, Английн иргэн Карл Слим Бангкок хотын таван одтой “Шангри-Ла” зочид буудлын 22 давхраас үсэрч амиа алджээ. Тэрээр Тайландын нийслэлд эхнэр Саллигийн хамт TataMotors-ийн салбарын хуралд ирээд байсан юм. Тэд өнөөдөр Дели хот руу буцах ёстой байжээ.

Цагдаагийн газар тайлбар хийхээс татгалзаж байна. Харин орон нутгийн хэвлэлүүд, Карл Слим тэнцвэр алдаж санамсаргүй тохиолдлоор тагтан дээрээс унасан хэмээн бичжээ. 2012 оноос хойш автомашин үйлдвэрлэгч Энэтхэгийн хамгийн том компанийг удирдаж байгаа Слимийн үхлийн шалтгаан тодорхойгүй хэвээр байна. Англи эр Tata-гийн бүтээгдэхүүнийг сайжруулахаар дорвитой шинэчлэл хийж байжээ. Хоёр долоо хоногийн дараа Дели хотод нээгдэх олон улсын AutoExpo дээр тэрээр компанийхаа ирээдүйн төлөвлөгөөний тухай ярихаар бэлтгэж байсан аж. TataMotors 60 мянган ажилтантай, жилийн орлого нь 35 тэрбум доллар. Энэтхэгийн компани сүүлийн үед TataNano хэмээх хямдхан, хэмнэлттэй автомашин үйлдвэрлэж ихээхэн амжилт олоод байгаа билээ. Энэ автомашин ердөө л хоёр мянган долларын үнэтэй юм.

Бан Ги Мун, Рауль Кастро нар уулзжээ

Гавана хотод Латин Америк болон Карибын тэнгисийн орнуудын нийгэмлэгийн дээд хэмжээний уулзалтад ирээд байгаа НҮБ-ын Ерөнхий нарийн бичгийн дарга Бан Ги Мун Кубын лидер Рауль Кастротой уулзжээ. Арлын удирдагч, НҮБ-ын тэргүүний хэлэлцээ Хувьсгалын ордонд болсон байна. Кофи Аннан 2006 онд Эвсэлд үл нэгдэх орнуудын уулзалтад Гавана хотод ирж байжээ.

“Кубад болж буй өөрчлөлт их сонирхолтой санагдаж байна” хэмээн Бан Ги Мун ярилаа. Тэрээр мөн Куба дахь өөрчлөлт, шинэчлэлийн үйл явцыг удирдаж байгаа Сайд нарын зөвлөлийн орлогч дарга Марино Мурильотой уулзаж ярилцсан аж. Үүний дараа НҮБ-ын тэргүүн Хуучин Гавана хотын төвтэй танилцаж, куба иргэдтэй ярилцан, гудамжны үсчинд орж үсээ засуулжээ.

Ганц бие, бэлэвсэн, салсан Ерөнхийлөгч нар

-Францын төрийн тэргүүний “албан ёсны дагалдагч”-ийн дүр төрх ихээхэн маргаан дагуулсан хэвээр. Зарим Ерөнхийлөгчид “дагалдагч” ч байсангүй-

Франсуа Олланд нь тэргүүн хатагтайгүйгээр төрийн тэргүүний үүргийг гүйцэтгэх Францын тав дахь Ерөнхийлөгч болж байна. Өмнөх төрийн тэргүүнүүдээс гоонь амьдралаараа хамгийн их алдаршсан нь Наполеон Бонапарт (1848-1852 онд Ерөнхийлөгч байж байгаад Францын хаанд өргөмжлөгдсөн) юм. Тэрээр бүр хойно Испанийн Гранада хотын уугуул бүсгүй Эухениа де Монтихотой гэрлэж байжээ. Наполеон олон жил гоонь явсны эцэст дээд эрх мэдэлд хүрч байсан аж. Наполеон гүнж Тебатай гэрлэсэн нь агуу байлдан дагуулагчийн нэр хүндээ баталгаажуулахад саад болж чадаагүй юм. Тэрээр Элисейн ордныг орхин гарч, хэдхэн алхмын зайд амьдардаг нууц амрагтайгаа уулздаг байсныг одоо үлгэр домог мэт ярьдаг. Одоогийн Ерөнхийлөгч Олланд ч аргагүй амраг Жюли Гайетайгаа Элисейн ордноос хэдхэн алхмын зайд болзож учирдаг байсан нь тодорхой болсон билээ.

Ерөнхийлөгч Гастон Домерг (1924-1931) сайд нарын сүүлчийн зөвлөлийн хурал хүртэл ганц биеэрээ явжээ. Протестант шашинтай гэр бүлд төрсөн Домерг католик шашинтан болохын тулд гэр бүл, удмын итгэл үнэмшлээсээ “буруулсан” Францын хоёр дахь төрийн тэргүүн болсон юм. Тэрээр хайр сэтгэл, амрагийн явдалд ихэд даруухан байснаараа Францын түүхэнд томоор бичигдэж чадаагүй аж.

1954-1959 онд Ерөнхийлөгч байсан Рене Коти Элисейн ордонд ирээд 11 сарын дараа бэлэвсэрчээ. Хайр сэтгэлийн явдалд “авъяасгүй” байсан тул бас л алдаршиж чадаагүй юм. Харин ч Францын их хямралын үед эдийн засагтай байлдсаар албаа дуусгасан байна.

Никола Саркози (2007-2012) Элисейн ордонд ирэхдээ хоёр дахь гэрлэлтээ бүтэн авч явах гэж ихэд зүдэрчээ. Тэр нь ч талаар болж гэргий Сесилиа Сиганье нь хэдхэн долоо хоногийн дараа түүнээс салжээ. “Сарко” 2008 оны хоёрдугаар сарын 2-нд Карла Брунитэй гэрлэхээсээ өмнө гоонь Ерөнхийлөгчийн амьдралаар хангалттай амьдарсан билээ. Саркози зургаан сар гоонь явахдаа нэгэн сэтгүүлч бүсгүйтэй хайр сэтгэлийн халуун романс өрнүүлээд амжжээ.

Одоогийн Ерөнхийлөгч Франсуа Олланд жүжигчин бүсгүй Жюли Гайетэй хайр сэтгэлийн холбоотой байсан нь илэрч, тэргүүн хатагтай үүнд нь ихэд хилэгнэн цухалдаж бухимдсанаар эмнэлэгт хүргэгдсэн юм. Олланд Элисейн ордноос хэдхэн алхмын зайтан нэгэн байр руу царайлаг жүжигчин бүсгүйтэй орж, гарч байгааг нэгэн гэрэл зурагчин отолт хийж дурандаа буулгаснаар Ерөнхийлөгчийн амрагийн явдал илчлэгдсэн билээ. Бухимдсан тэргүүн хатагтай эмнэлгээс гарч ирэнгүүт Олланд харилцаагаа төгсгөл болгохоор шийдэж, эдүгээ гоонь статустай болоод байна. Эдүгээ францууд гоонь төрийн тэргүүн Франсуа Олланд хэзээ амьдралынхаа гурав дахь бүсгүй Жюли Гайег дагуулан олны өмнө гарах вэ хэмээн хүлээж байна.

Барьцаанд байсан Египетийн дипломатчдийг чөлөөллөө

Ливид хулгайлагдаад байсан Египетийн таван дипломатчийг чөлөөллөө хэмээн “Аль-Арабия” телевиз мэдээлэв. Египетийн Гадаад хэргийн яам шаардсаны дараа босогчид Ливи дахь Египетийн элчин сайдын яамны ажилтнуудыг суллах шийдвэр гаргасан байна. Дипломатчдыг барьцаалсан хүмүүс Египетэд баривчлагдаад байсан Ливийн хээрийн цэргийн командлагч Шабан Хадег 24 цагийн дотор суллахыг шаардаж байжээ.

Ливи дахь египет дипломатчид нэгдүгээр сарын 25-нд хулгайлагдсан юм. Үүний дараа Каирийн эрх баригчид Ливи улсаас дипломат ажилтнуудаа эргүүлэн татаад байсан юм.

Францын Ерөнхийлөгчийн гэргий сүүлчийн аялалаа хийжээ

Францын Ерөнхийлөгч Франсуа Олландын гэргий Валери Триервейлер Энэтхэгт буяны ажлаар очжээ. Ф.Олланд эхнэрээсээ салж буйгаа мэдэгдсэнээс хэдхэн цагийн дараа Валери Энэтхэг рүү явсан аж. Елисейн ордны албан ёсны веб дээрх Валери Триервейлерийн веб хуудас байхгүй болжээ. Мөн түүний Twitter дахь албан ёсны хуудас устсан байна.

Энэтхэгт Диана гүнж маягаар хувцаслаж очсон Валери тэргүүн хатагтайн гуншингаасаа салахыг хүсэхгүй байна хэмээн Daily Mail сонинд бичжээ. Гэвч Елисейн ордны төлөөлөгч мэдэгдсэнээр, Триервейлер сүүлчийн удаа төрийн дэмжлэгтэйгээр гадаадад айлчилж байгаа аж.

Түймэр 100 орчим орон сууцыг залгив

Хятадын баруун өмнөд хэсгийн Гуйчжоу мужид Дун үндэстнүүд амьдардаг тосгонд гал гарч 100 орчим байшинг залгилаа хэмээн “Синхуа” агентлаг мэдээлэв. Шөнө дунд гарсан түймрийг дөрвөн цагийн дараа унтраажээ. Золоор хүний амь эрсдээгүй байна.

Гал гарсан Баоцин тосгон нь Дун үндэстнүүд дотроо нэлээн томд тооцогддог, 300 жилийн настай тосгон юм. Тэнд Дун үндэстний хоёр мянга орчим төлөөлөгч амьдардаг ажээ.

Эрдэмтэд Их Хавцалын насыг тодорхойлов

Америкийн эрдэмтэд Аризона мужид байдаг Их Хавцалын насыг тодорхойлжээ. Уг хавцал 5-6 сая жилийн өмнө бүрэлдэн тогтсон хэмээн үзэж байна. Үүнээс өмнө энэхүү байгалийн үзэсгэлэнт газрын насыг 70 сая жил хэмээн тооцоолж байсан билээ. Хавцалын янз бүрийн хэсгийг изотопын аргаар шинжлэн судалсны дараа ийм дүгнэлтэд хүрсэн аж.

Гэвч зарим эрдэмтэн Их Хавцалын хэсэг тус бүр өөр өөр настай хэмээн үзэж байна. Гантиг чулуун хавцал 5-6 сая, Зүүн хавцал 15-25 сая  жилийн өмнө үүссэн хэмээн үзэж байна. Харин Шуурган хавцал 50 сая жилийн өмнө бүрэлдэн тогтсон хэмээн тооцоолж байгаа аж.

Хүний эрхийн төлөө тэмцэгч ял сонслоо

Хятадын шүүх хүний эрхийн төлөө цогтой тэмцэгч Сю Чиюнд дөрвөн жилийн ял оноожээ. Ням гаригт Бээжинд болсон шүүх хурал дээр түүнийг олон нийтийн эмх журам зөрчиж хүмүүс цуглуулсан хэмээн үзсэн байна. Сю өнгөрсөн онд нийгмийн шинэчлэлийг шаардаж “Иргэний шинэ хөдөлгөөн” хэмээх кампанит ажлыг удирдаж байсан юм.

Тэрээр шүүх дээр гэм буруугаа хүлээн зөвшөөрөөгүй аж. Шүүх хурал дээр түүнд үг хэлэх боломж олгоогүй хэмээн өмгөөлөгч нь мэдэгдлээ. Шүүхийн байрны гадна аюулгүй байдлын арга хэмжээг чангатгаж, олон цагдааг хамгаалалтад гаргасан байв. “Иргэний шинэ хөдөлгөөн” Хятадад интернэтийн тусламжтайгаар үүссэн аж. Засгийн газрын өндөр тушаалын түшмэдийг хөрөнгө орлогоо олон нийтэд мэдүүлэхийг шаардаж байсан тус хөдөлгөөний гишүүд баривчлагдаад байна.

Иорданд тамхийг хоригложээ

Иордан улсад олон нийтийн газар тамхи татахыг хориглосон хууль батлагдлаа. Амман хотын олон улсын нисэх онгоцны буудал болон хэд хэдэн худалдааны төвд энэ хууль хэрэгжих аж. Мөн түргэн хоолны газрууд, эмнэлэг, сургууль, кино театр, номын сан, музей, Засгийн газрын байрууд, олон нийтийн тээврийг хамарч байгаа юм. Иорданы эрчүүдийн 50 хувь нь янжуур болон усан тамхи татдаг. Тус улсад усан тамхи татуулдаг зургаан мянга орчим цайны газар байдаг ажээ.

Диего Марадона: Пеле үргэлж хоёрдугаарт байх болно

Аргентины хөлбөмбөгийн амьд домог Диего Армандо Марадона Бразилийн шигшээгийн тоглогч асан Пеле рүү ээлжит үгэн дайралтаа хийв. “Пеле үргэлж миний дараа хоёрдугаарт байх болно. Тэр өөрийнхөө улсын тамирчид дотор ч Айртон Сеннагийн дараа хоёрдугаарт бичигдэнэ. Пеле бол дэлхийн хөлбөмбөгт ч, Бразилийн спортод ч нэгдүгээрт зогсож чадахгүй. Хамгийн гунигтай нь тэр үргэлж хоёрдугаарт байх болно” хэмээн Марадона ярьжээ. “Би хөлбөмбөгийн төлөө, өөрийнхөө төлөө хийсэн зүйлдээ сэтгэл хангалуун байдаг. Би Дубайд гэртээ байгаа юм шигээ л жаргалтай байдаг. Яг л Пеле ФИФА-д хэрхэн амьдардаг шиг” хэмээн аргентин эр ёжилсон байна.

Э.Сноуден: АНУ-ын Засгийн газар намайг үхсэн байхыг хүсч байна

АНУ-ын Үндэсний аюулгүй байдлын агентлагийн (NSA) экс шинжээч Эдвард Сноуден Вашингтоны эрх баригчдын зүгээс амь насанд нь халдах вий гэж айж буйгаа илэрхийллээ. Тэрээр Германы ARD телевизэд ярилцлага өгөхдөө ийнхүү өгүүлсэн аж. Энэ ярилцлага өнөөдөр олон нийтийн хүртээл болох юм. “АНУ-ын Засгийн газрын төлөөлөгчид намайг үхсэн байхыг хүсч байна” хэмээх Сноуден герман сэтгүүлч Хуберт Зипелтэй ярилцахдаа онцолжээ.

Экс шинжээч энэ санаархлыг батлахын тулд “Buzzfeed” веб сайт дээр нийтлэгдсэн өгүүллээс иш татсан байна. Уг нийтлэлд Пентагоны хүмүүс Сноудений амь насыг хөнөөх тухай ярьсан аж. “Эдгээр хүмүүс бол АНУ-ын Засгийн газрын ажилтнууд. Тэд миний толгойд нэг сум зоох, эсвэл супермаркетаас гарч явахад хордуулах, мөн шүршүүрт орж байхад амь насанд минь халдах талаар ярьсан” хэмээн АНУ-ын тагнуулын албаны тэрслүү ажилтан Германы телевизэд ярьжээ.

Тагнуул хийсэн, төрийн нууцыг хулгайлсан, эх орноосоо урвасан хэрэгт буруутгагдаж байгаа Сноуден эдүгээ Орост орогнож байгаа билээ. АНУ-ын нууц албад бусад улс орны үйлдвэр компаниудыг тагнадаг талаар бас ам нээжээ. “АНУ-ын ашиг сонирхолд хамаатай Siemens-ийн ямар нэг мэдээлэл байлаа гэхэд тэр нь үндэсний аюулгүй байдалд нөлөөлөхгүй байсан ч америкууд тэр мэдээллийн хойноос хөөцөлдөж, тагнадаг” хэмээн Сноуден ярилаа.

Экс тагнуулчийн энэ яриа Үндэсний аюулгүй байдлын агентлагийн төлөөлөгч Вани Винсийн батлан ярьсантай зөрчилдөж байгаа аж. “АНУ гадаадын үйлдвэр компаниудын бизнесийн нууц мэдээллийг хулгайлахын тулд тагнуулын албадаа ашигладаггүй. Бид бизнес дээр дэлхий дахинтай өрсөлдөхдөө ийм арга хэрэглэдэггүй” хэмээн Винс мэдэгдэж байсан юм. Эдвард Сноуден эдүгээ гар дээрээ ямар ч мэдээлэлгүй хоцорсон гэдгээ ярьжээ. Тэрээр өөрт байсан бүх мэдээллээ өөрийн сонгож авсан хэд хэдэн сэтгүүлчид дамжуулж өгсөн гэдгээ Германы телевизид ярьсан байна. Тэрхүү мэдээллийг нийтэлж түгээх нь одоо тэдгээр сэтгүүлчийн мэдэх хэрэг хэмээн Сноуден онцолсон аж.

Reuters аентлаг мэдээлж буйгаар, Э.Сноуден АНУ-д буцаж очих талаар Ерөнхий прокурор Эрик Холдертэй хэлэлцээ хийж эхэлжээ. Тэрээр өөрийг нь өршөөн хэлтрүүлсэн тохиолдолд л эх орондоо буцаж очих болзол тавиад байна хэмээн Хууль зүйн департаментын эх сурвалж мэдээлэв. “Би АНУ-д буцаж очвол Засгийн газар болон олон нийтийн хувьд хамгийн зөв шийдвэр болох байх. Гэвч мэдээлэгчийг хамгаалах хууль биелэгдэнэ гэдэгт би итгэхгүй байна” хэмээн Сноуден мэдэгдсэн байна.

АНУ-ын Ерөнхий прокурор Холдер телевизэд өгсөн ярилцлагадаа, Сноуденийг өршөөх эсэх талаар хэлэлцэхэд бэлэн биш байна хэмээн мэдэгдсэн юм. Түүнийг бүрэн өршөөх асуудал байж болохгүй гэж Холдер хэлсэн ч АНУ-ын эрх баригчид Сноуденийг эх оронд нь авчрах боломжийг судалж байгаа бололтой. Сноуден гэм буруугаа хүлээн зөвшөөрвөл эх оронд нь буцааж авчрах боломжийн талаар ярилцаж болно гэдгийг АНУ-ын эрх баригчид ойлгуулсан аж. 

Ливид хулгайлагдсан түшмэлийг суллажээ

Нэгдүгээр сарын 19-нд Ливийн Триполи хотод хулгайлагдсан Өмнөд Солонгосын түшмэл суллагджээ. Ливийн эрх баригчид түүнийг хүлээн авч Өмнөд Солонгосын дипломат төлөөлөгчийн газарт хүлээлгэн өгчээ. Солонгосын худалдаа, хөрөнгө оруулалтын агентлагийн Ливи дахь салбарын тэргүүнээр ажиллаж байсан Хан Сок У босогчдын жижигхэн бүлэгт хулгайлагдсан байв. Эх сурвалж мэдээлж буйгаар, Ливийн аюулгүйн албаны ажилтнууд чөлөөлөх ажиллагааг явуулж, гэмт хэрэгтнүүдийг баривчилсан аж. Дөрөв хоногийн өмнө Хан Сок Уг дөрвөн этгээд машинаас нь буулган өөр машинд суулган авч явсан ажээ.

Цуврал хүчирхийлэгч 290 жилийн ял авлаа

Зимбабвейн шүүх тус улсын иргэн Томас Чирембег 13 бүсгүйг хүчирхийлсэн хэрэгт буруутган 290 жилийн ял оноолоо. Шүүгч Саймон Качембе түүнийг “Зэрлэг араатнаас дор” хэмээн нэрлээд нийгмээс бүрэн тусгаарлах нь зүйд нийцнэ гэжээ. Хүчирхийлэгч эр шүүх хурал дээр гэм буруугаа хүлээж, олон жилийн ял оноохгүй байхыг хүсчээ. Гэвч шүүүгчид түүний үгэнд итгэсэнгүй, Зимбабвейн түүхэн дэх хамгийн том ялаар шийтгэсэн байна. Цуврал хүчирхийлэгчийн хэрэг тус улсад шуугиан дэгдээж, ийм гэмт хэрэгтнүүдийг химийн аргаар тайган болгох тухай хэлэлцэхэд хүргэсэн юм.

ОХУ Сочигийн олимпийн бэлтгэлд 50 тэрбум доллар зарцуулжээ

Сочигийн өвлийн олимпийн бэлтгэлд 50 орчим тэрбум доллар зарцуулаад байна хэмээн ОХУ-ын Ерөнхий сайд Дмитрий Медведев ярилаа. Үүнээс яг олимпийн уралдаан, тэмцээнтэй холбоотой зардал зургаан тэрбум болж байгаа аж. Үлдсэн мөнгө нь бүс нутгийн хөгжил, дэд бүтцэд зарцуулагдаж байгаа ажээ. Олимпийн барилга байгууламжийг босгох явцад авлигын хэрэг гаарсан гэх яриаг Ерөнхий сайд няцаалаа. “Бид энэ 50 тэрбум долларыг тун ухаалгаар зарцуулсан. Төсвийн мөнгө зохих зүйлдээ бүрэн зарцуулагдсан” хэмээн тэрээр онцоллоо. Сочигийн олимпийн аюулгүй байдлыг хангар тал дээр ОХУ, АНУ хоёр өндөр түвшинд хамтран ажиллаж байгааг Д.Медведев хүлээн зөвшөөрчээ.

Аргентины Ерөнхийлөгч ил гарав

Аргентины Ерөнхийлөгч Кристина Фернандес де Киршнер сар хагасын хугацаагаар олон нийтийн өмнө үзэгдэхгүй байсан нь олон таамаг, хардлага төрүүлсэн билээ. Тэрээр өчигдөр энэ нам гүмийг эвдэж олон нийтийн өмнө үг хэлжээ. Тэрээр Буэнос-Айрес дахь Ерөнхийлөгчийн ордны өмнө гарч ирж ажилгүй залууст төрөөс үзүүлэх нийгмийн халамжийн талаар мэдэгдэл хийсэн байна. Мөн Засгийн газрын үйл ажиллагааг таашаадаггүй хэвлэлүүдийг шүүмжилжээ. Аргентины төрийн тэргүүн өнгөрсөн оны аравдугаар сард тархин дахь цусны өтгөрөлтийг арилгах мэс засалд орж, нэг сарын дараа ажилдаа орж байжээ.

Токио хотын даргын сонгуульд 15 хүн өрсөлдөнө

Японы нийслэл Токио хотын даргын суудлын төлөө тус улсын бүх нам, хүчний төлөөлөгч өрсөлдөх гэж байна. Тэдний дотор хэт барууны үндсэрхэг намаас эхлээд зүүний хүчнийхэн болон зохион бүтээгч, Ерөнхий сайд асан зэрэг 15 хүн нэр дэвшжээ.

Японы армийн нисэх хүчний командлагч асан Тосио Тамогами, өмгөөлөгч Кенжи Үцүноми, зүүний үзлээрээ алдартай экс Ерөнхий сайд Морихиро Хосокава, зохион бүтээг Ёширо Накамацү нарын нэртэй хүмүүс байгаа аж. Накамацү соронзтой бэлгэвч, харайдаг-гутал зэрэг этгээд зүйл зохион бүтээж байв. Токио хотын дарга Наоки Иносэ авлигын хэрэгт холбогдон 2013 оны сүүлчээр огцорсон юм. Тэрээр сонгуулийн кампанийн үеэр нэгэн компаниас 500 мянган долларын хандив авсан нь ил болсон ажээ. 

“Майданы эсрэг хүч хэрэглэхгүй бол иргэний дайн гарч магадгүй”

Майдан буюу Киевийн Тусгаар тогтнолын талбай дээрх жагсаал, мөргөлдөөн ширүүссээр байна. Эдүгээ тэнд хуягт техник харагдах болов. Өчигдөр жагсагчид, цагдаа нарын хооронд болсон мөргөлдөөний улмаас хоёр хүн амиа алджээ. ТУХН-ийн орнуудын хүрээлэнгийн Украин дахь салбарын захирал Денис Денисов Украин дахь үлй явдлын цаашдын өрнөлийг ийнхүү таамаглаж байна.

-Сүүлийн үед Майданд юу болоод байна вэ. Хууль, хүчнийхэн жагсагчдад ширүүн хандаж магадгүй болж байх шиг байна. Цагдаа, хүчнийхэн цаашдаа яаж ажиллах бол?

-Сүүлийн өдрүүдийн өрнөлийг харахад энэ нь аль хэдийнэ тайван жагсаал биш болсон нь харагдлаа. Майдан дээр байгаа тусгай хүчнийхнээс дутуугүй бэлтгэгдсэн хүмүүс энэ жагсаалд оролцож байна. Бараг мэргэжлийн дайчид гэж хэлж болохоор хүмүүс цагдаа, цэргүүдийг сөрөн зогсож байна. Эрх баригчид ч, хууль хүчний байгууллагууд ч энэ байдлаас гарах аргаа олохгүй байна. Болзошгүй иргэний дайн, иргэний мөргөлдөөнөөс сэргийлэхийн тулд хамгийн хатуу, ширүүн аргаар үзэх хэрэгтэй болж байх шиг. “Халуун голомт” үүсэхээс таслан сэргийлэх нь чухал болж байна.

Украины сөрөг хүчний лидерүүд иргэд, жагсагчдыг удирдаж, хянаж чадахгүй байна шүү дээ. Сөрөг хүчнийхний уриа дуудлага, мэдэгдлийг тоож байгаа хүн алга. Жагсагчдыг олигархуудынх ч юм уу, эсвэл гадаадын ямар нэг байгууллагад хамаатай үл үзэгдэх гар удирдаад байх шиг байна. Жагсаж, эсэргүүцэж байгаа хүмүүс үүнийг мэдэж байгаа ч юм алга.

-Цаашдаа юу болох бол. Таны таамгийг сонсмоор байна?

-Украины эрх баригчид хүч хэрэглэх үү, үгүй юу гэдгээс бүх зүйл хамаарах болчихоод байна. Майданд үргэлжилсээр байгаа энэ ужгирсан үйл явцыг зогсоохын тулд эрс шийдэмгий арга хэмжээ авах ёстой. Заримдаг, туйлбаргүй байдлаар юуг ч шийдэх боломжгүй болсон. Заримдаг байдлаар яваад байвал нөхцөл байдал улам л хурцадна. Энэ байдлыг одоо зогсоохгүй бол бүх юм хяналтаас гарна. Тэгээд юу болдог билээ дээ, тэдэн хүн хохирлоо, золиос боллоо гэж яригдах болно. Нөхцөл байдал хяналтаас гарах гээд байна шүү дээ. Үүнийг зогсоох болсон.

Нэг хувилбар байна. Тэр нь Украин болон Киевийн иргэдийн эсрэг нэг удаа хүч хэрэглэх. Тэдэнд нэг удаа сүрийг үзүүлбэл бүх юм тайван болох магадлалтай. Бусад бүс нутагт хамаагүй тайван, амгалан байгаа. Ер нь бол Киевийн ганц талбай дээр л хамаг үйл явдал өрнөөд байна шүү дээ. Эмх журмыг мэдрүүлэхгүй бол үйл явдал хамгийн муу өрнөл рүүгээ орж магадгүй байна. Одоо талбай дээр жагсч, цагдаа нарыг дайрч, зодож байгаа хүмүүсийн гарт хэн нэг нь галт зэвсэн атгуулбал иргэний дайны эхний үе шат эхлэх нь ойлгомжтой.

 

 

Барьцаалагчид гурван сая доллар нэхэж байна

 

Йеменд Өмнөд Африкийн иргэн Пьер Коркийг барьцаалсан хүмүүс гурван сая долларын золиосны мөнгө шаардаж байна. Коркийн гэр бүлийнхэн энэ гурван сая долларыг олохоор хандивын аян зарлаад байгаа аж. Барьцаалагчид ч хандивын аян хэрхэн дуусахыг хүлээж, өмнөдафрик эрийг цаазлахаа хойшлуулсан аж. Нэгдүгээр сард түүнийг цаазлана хэмээн Йемений лалын босогчид сүрдүүлж байжээ.

2013 оны эхээр Пьер Коркитэй хамт барьцаалагдсан гэргий Иоландыг өнгөрсөн арванхоёрдугаар сард суллаж явуулжээ. Засгийн газрын бус Gift of the Givers байгууллага босогчидтэй хэлэлцээ хийж түүнийг сулласан юм. Йемен нь Арабын хойгийн хамгийн аюултай улс болоод байна. Тэнд лалын дайчид, салан тусгаарлагчид болон “Аль-Кайда”-тай холбоотой террорист бүлгүүд үйл ажиллагаа явуулсаар байгаа ажээ.

 

Ж.Кеннедийн охин японуудыг шүүмжилжээ

 

АНУ-аас Японд суугаа Элчин сайд Кэролайн Кеннеди (АНУ-ын Ерөнхийлөгч Жон Кеннедийн охин) далайн гахайг бөөнөөр хөөж авладаг япон уламжлалыг эсэргүүцжээ. Тэрээр АНУ-ын Засгийн газар ийм ан авын эсрэг байгаа гээд өөрөө ч энэхүү зэрлэг уламжлалыг таашаахгүй байгаагаа илэрхийлжээ.

Үүний дараа Японы Вакаяма мужийн захирагч Ёшинобу Нисака дээрх уламжлалыг хамгаалсан мэдэгдэл хийжээ. “Бид халим, далай гахайг бага тоогоор агнадаг. Ангийн ийм хэлбэрийг олон улсын хуулиар хориглоогүй. Улс орон бүр идэш уушаа бэлтгэх арга, уламжлалтай. Энэ уламжлал байгалийн баялаг устахад хүргэхгүй л хүндэтгэх хэрэгтэй” хэмээн Нисака ярьсан байна.

 

Хятад, Японы лидерүүд Сочид уулзахгүй

 

Хятадын лидер Си Жинпин, Японы Ерөнхий сайд Шинзо Абэ нар Сочи дахь өвлийн олимпийн нээлтэд оролцохдоо тусдаа уулзалт хийнэ гэсэн мэдээллийг Хятадын Гадаад хэргий яамнаас няцаалаа. Хятадын Гадаад хэргийн сайдын орлогч Чэн Гопин “Си Жинпин даргад Сочигийн олимпийн үеэр Японы удирдлагаас хэн нэгэнтэй нь уулзах төлөвлөгөө байхгүй” хэмээн мэдэгдээд өнгөрсөн сард Ясукуни сүмд зочилсон Шинзо Абэг дахин шүүмжилсэн байна.

Харин Сочид Си Жинпин Оросын Ерөнхийлөгч Владимир Путинтэй уулзаж, зарим асуудлаар санал солилцох ажээ.

 

В.Путин, Б.Обама олимпийн бэлтгэлийн талаар ярилцжээ

 

Кремлийн лидер Владимир Путин, Цагаан ордны эзэн Барак Обама нар Сочийн өвлийн олимпийн бэлтгэл ажлын талаар утсаар ярилцлаа хэмээн “Новости” агентлаг мэдээлэв. Хоёр орны лидер Орос-Америкийн нийтлэг эрх ашгийг хамгаалах, тэр тусмаа Сочигийн олимпийн тоглолтыг аюулгүй зохион байгуулах талаар ярилцсан аж. Энэ тал дээр АНУ бүрэн дэмжлэг үзүүлэхээ илэрхийлсэн билээ. Тэд мөн Швейцарьт эхэлсэн Сирийн энхийн хэлэлцээ болон Ираны цөмийн хөтөлбөрийн асуудлаар санал солилцсон бололтой.

 

Бангкокт онц байдал зарлав

 

Тайландын Засгийн газар нийслэл Бангкок хот болон залгаа мужуудад онц байдал зарлажээ. Онц байдлын дэглэм 60 хоног үргэлжлэх бөгөөд эрх баригчид хөл хорио тогтоох, иргэдийг ямар нэг буруутгалгүйгээр баривчлах, хэвлэл мэдээлэлд хяналт тавих, улс төрийн цуглааныг хориглох, үймээнтэй дүүрэг, бүсийн зам, гарцыг хаах эрхтэй болж байна.

Засгийн газар ард иргэдээ хамгаалахын тулд онц байдал зарласан хэмээн дэд Ерөнхий сайд мэдэгджээ. Сөрөг хүчний лидерүүд болон дэмжигч, жагсагчид хэд хэдэн удаа халдлагад өртсөний дараа эрх баригчид дээрх шийдвэрийг гаргасан юм. Тэдэнд халдсан этгээдүүдийг олоогүй ч сөрөг хүчнийхэн үүнд эрх баригчдыг хардаж байгаа ажээ.

 

 

Татварын диваажинд нуугдсан Хятадын элитүүд

 

Сүүлийн 20-30 жилд хамгийн их хөгжиж, өөрчлөгдсөн улс бол Хятад билээ. Нээлттэй бодлого, шинэчлэлийн үйл явц олон зуун сая хүнийг ядуурлаас гаргасан ч нийгэм дахь баян, ядуугийн ялгаа түгшүүр төрүүлэх болов. Элит ангийнхан тун хурдан хөрөнгөжиж байгаа нь авлига, тэгш бус байдлыг үгүй болгоно хэмээн амласан коммунист удирдагчдын нэр хүнд, итгэлд муугаар тусч байлаа. Тэгвэл бас нэг томоохон шуугиан дэгдэв.

Эрэн сурвалжлах сэтгүүл зүйн олон улсын консорциум (International Consortium of Investigative Journalists) Хятадын өнөөгийн болон экс удирдагчдын 13 садан төрөл, мөн хувийн болон улсын үйлдвэрийн 15 томоохон бизнесмэн оффшор бүс буюу татварын диваажинд хөрөнгө мөнгөө байршуулсныг илчлэн мэдээлсэн юм. Энэ мэдээллийг The Guardian, BBC, Le Monde, Süddeutsche Zeitung, Asahi Shimbun, El Pais зэрэг дэлхийн хэвлэл мэдээллийн томоохон хэрэгслүүд нийтэлсэн нь дэлхий даяар шуугиан тариад байна. Британийн Виржин арал (Карибын тэнгисийн) дээр банк, санхүүгийн үйл ажиллагаа явуулдаг Portcullis TrustNet, Commonwealth Trust хэмээх хоёр байгууллагын архивын хоёр сая орчим мэдээлэл алдагдсаныг консорциумын сэтгүүлчид олж авчээ. Хятадын элит анги Карибын тэнгисийн энэ арлыг сонгож авсан нь гайхалтай зүйл биш аж. Британийн газар нутагт тооцогддог энэхүү арал нь 2010 он хүртэл Хятадад хамгийн их хөрөнгө оруулсан арал, улсуудын жагсаалтад хоёрдугаарт (Хонконг ард) бичигдэж байжээ.

Ердөө 27 мянган оршин суугчтай энэ арал дээр нэг сая гаруй компани, нийгэмлэг бүртгэлтэй байдгийн 40 хувь нь Хятад, Хонконг, Сингапураас гаралтай юм. Хятадын коммунист элит ангийн олон гишүүн дэглэмийн сүүдэрт асар их мөнгө “хийснийхээ” дараа оффшор компани байгуулж байсан нь эндээс харагдаж байна. Дэн Сяопин төвлөрсөн төлөвлөгөөт эдийн засгийг халж, цорын ганц коммунист намын Засгийн газрын удирдлага дор капитализм руу үсрэн орсноос хойш 30 жил өнгөрсөн ч энэ системд олон гажиг, дутагдал байсаар байгаа юм. Өөрөөр хэлбэл, эрх мэдэлд ойр байсан хүмүүс асар их баяжиж байгаа нь улам бүр ил болсоор байна.

Бээжингийн элит ангийн гэр бүл, холбоотнууд олсон мөнгөө ердийн  эргэлтээс гарган Британийн Виржин арал дээр өөрсдийн болон бусдын байгуулчихсан байсан компанийн данс руу илгээдэг байжээ. Ингэснээр мөнгө, эд хөрөнгөө  Хятадын Засгийн газрын албан ёсны хяналтаас (Хятадын нэг иргэн жилд 50 мянган доллараас илүү мөнгө, хөрөнгийг гадаад руу гаргаж болдоггүй) гадна гаргадаг нь өөрт нь болон гадаадын компани, байгууллагад ашигтай тусдаг ажээ.

Задарч, ил болоод байгаа баримтаас харахад, Хятадын улаан зиндаа буюу одоогийн болон экс коммунист удирдагчдын гэр бүлийн 13 гишүүн оффшор компанитай байна. Тэдгээрээс одоогийн удирдагч Си Жинпиний хүргэн ах, өмнөх Ерөнхий сайд Вэн Зябаогийн хүү болон хүргэн, мөн экс Ерөнхий сайд Ли Пэний охин, шинэчлэлийн эдийн засгийн удирдагч Дэн Сяопины хүргэн, Хятадын хувьсгалын домогт командлагч Су Югийн ач хүү зэрэг 13 хүн “толгой цохиж” байна. Энэ 13 хүний нэр дор хаяж 25 оффшор нийгэмлэг, компанитай холбогдож байгаа аж.

Хятадын одоогийн удирдагчийн эгч Ки Киаокиагийн нөхөр Дэн Жиагу бол шинэ Хятадын билэгдэл болсон хүн. Тэрээр 20-хон жилийн дотор эхнэрийн хамтаар Хонконгод үл хөдлөх хөрөнгийн их гүрнийг байгуулсан юм. Экс Ерөнхий сайд Вэн Зябаогийн хүү Вэн Юнсон нэгэн оффшор бүсэд Trend Gold Consultants хэмээх компани байгуулсан байна. 2012 онд The New York Times сонинд хэвлэгдсэн нэгэн мэдээллээр, Вэн Зябаогийн гэр бүлийн хөрөнгө 2.7 тэрбум доллараар үнэлэгдэж байв. Татварын диваажинд нуугдсан бас нэг язгууртан нь Тяньанминий талбай дээрх ардчилсан жагсаалыг цус урсган дарахад гол үүрэг гүйцэтгэсэн экс Ерөнхий сайд Ли Пэний охин Ли Шиаолин юм. Эх орондоо Эрчим хүчний хатан хаан хэмээн өргөмжлөгдсөн тэрээр Хятадын эрчим хүчний монополь компанийг удирддаг бөгөөд ичиж зовох юмгүйгээр эд хөрөнгө, сүр нөлөөгөө гайхуулдаг нэгэн.

Оффшор бүсэд тухалсан Хятадын элитүүдийн ихэнх нь эрх мэдэлд байх үедээ баяжсан байдаг аж. Экс Ерөнхий сайд Вэн Зябаогийн хүү, хүргэн хоёр түүнийг эрх мэдэлд байсан он жилүүдэд л (2003-2013) Британийн Виржин арал дээр пүүс, компани байгуулсан байдаг. Одоогийн лидер Си Жинпиний хүргэн ах Дэн Жиагу Си Жинпинийг дэд ерөнхийлөгч байх үед (2008-2013) оффшор компаниа байгуулж байжээ. Татварын диваажинд компани байгуулж, данс нээсэн Хятадын үйлдвэрийн эзэд, магнатуудын тоо дор хаяж 15-д хүрч байна. Тэдний ихэнх нь сүүлийн 20 жилд буюу Хятадын эдийн засгийн үсрэнгүй хөгжлийн үед хөрөнгөжсөн хүмүүс ажээ. Цахим шуудангийн томоохон компани Tencent-ийг байгуулсан Ма Хуатений хөрөнгө гэхэд л 10 тэрбумд хүрч байгаа юм.

Хятадын элит ангийнхан хөрөнгө, мөнгөө хэрхэн нууж, зувчуулж байгааг илчилсэн мэдээлэл дэлхийн хэвлэл мэдээллийн хэрэгслээр түгсэн нь нийгмийн тэгш бус байдлыг арилгах уриатай гарч ирсэн Хятадын өнөөгийн удирдлагад хүнд цохилт боллоо хэмээн “The Guardian”-д бичжээ. Мэдээж тэд яг хэдий хэмжээний хөрөнгийг татварын диваажинд нуусныг илрүүлэх боломжгүй. Гэвч АНУ-д төвтэй Global Financial Integrity фирмийн тооцоолсноор, 2011 онд Хятадаас 150 тэрбум доллар гадагшаа хууль бусаар гарсан аж.