Киевт 20 орчим жагсагчийг баривчилжээ

Өчигдөр Украины нийслэл Киев хотод жагсагчид, цагдаа нарын хооронд эмх замбараагүй байдал үүсч, мөргөлдөөн болжээ. Цагдаа нар 20 орчим хүнийг баривчлан түр саатуулан хорих төвд аваачаад байна. Есөн хүнийг олон нийтийн эмх журам зөрчсөн хэргээр шийтгэхээр болоод байна хэмээн мэдээлэв. Киев хотод үргэлжилсээр байгаа эмх замбараагүй байдлын улмаас гэмтэж бэртсэн хүний тоо 100 гаруй болжээ. Сөрөг хүчний талынхан Ерөнхийлөгч В.Януковичийг огцрохыг шаардаж байгаа ч хүчээ нэгтгэж чадахгүй байна. Сөрөг хүчний олон салангид бүлэг, хөдөлгөөнийг нэгтгэж чадах лидер дутагдаж байгаа аж.

Хятадын хүн ам 2013 онд долоон саяаар нэмэгдлээ

БНХАУ-ын хүн ам 2013 онд долоон саяаар нэмэгдлээ хэмээн тус улсын Статистикийн хорооноос мэдэгдэв. Ийнхүү Хятадын хүн ам нэг тэрбум 360 саяд хүрээд байна. Эрэгтэйчүүд 697.2 саяд хүрч урьд өмнөх давамгайллаа хадгалж үлджээ. Хөдөлмөр эрхлэх чадвартай буюу 16-59 насны иргэд 2.44 саяаар цөөрчээ. Хөгшин хүмүүсийн тоо 14 хувиар нэмэгдэж 202.4 саяд хүрээд байна. Ажил хийж буй хятадуудын тоо нэмэгдэж 769.7-д хүрчээ. Хөдөөгийн хүн ам буурч, хотынх нэмэгдсээр байна.