Террорист халдлагаа камераар бичсэн байжээ

Парисын супермаркетад хүн барьцаалж дөрвөн хүний аминд хүрсэн Ахмед Кулибали энэ халдлагаа видео камераар бичсэн байжээ хэмээн CNN агентлаг тагнуулын эх сурвалжаас иш татан мэдээлэв. Кулибали халдлагынхаа долоон минутыг, тэр тусмаа гурван хүний амийг хороож буйгаа бичиж амжсан аж. Тэрээр хувцсандаа GoPro камер бэхэлсэн байсан хэмээн мэдээлж байна. Мөрдөн шалгалтад ойр эх сурвалж дамжуулж буйгаар, Кулибали видео бичлэгээ цахим шуудангаар илгээж амжсан бололтой.

Барьцаанаас амьд гарсан хүмүүсийн яриагаар, террорист өөрийн зөөврийн компьютерээс интернэтэд холбогдох гэж оролджээ. Гэвч хэд хэд оролдоод амжилтгүй болсны дараа барьцааны нэг хүнийг авчирч супермаркетад байрлуулсан компьютерээс интернэтэд холбогдсон байна. Кулибали нэгдүгээр сарын 9-нд Парисын нэгэн супермаркетад хоёр Калашников автоматтай нэвтэрч хүмүүсийг барьцаалсан юм. Довтолгооны үеэр дөрвөн хүн амиа алджээ.

Уитни Хьюстоны охин ухаангүй байна

Нэрт дуучин Уитни Хьюстоны охин Бобби Кристина Браун гэртээ ухаангүй байхыг түүний нөхөр олжээ. Түүнийг сэргээх арга хэмжээ авсны дараа эмч дуудаж, эмнэлэгт хүргэжээ. Бобби Кристина эдүгээ ухаангүй хэвээр байна. Охин яагаад ийм байдалд орсон нь тодорхойгүй байна. Цагдаа нар түүний гэрийг нэгжих даалгавар авчээ.

Уитни Хьюстон гурван жилийн өмнө буюу 2012 хоёрдугаар сарын 11-нд нас барсан юм. Тэрээр Беверли-Хиллз дахь зочид буудалд угаалгын өрөөний онгоцонд живсэн байдалтай олджээ. Ганцаардаж, зожигроод байсан Хьюстоныг амиа хорлосон гэж үзсэн билээ. Охин Кристина нь ээжээсээ хойш сэтгэлээр ихэд унаад байжээ. 

Альпийн нуруунд нэг хоногт зургаан цаначин амь эрсэджээ

Швейцарь дахь Альпийн нуруунд цасан нуранги болсны улмаас зургаан хүн амиа алдаад байна. Есөн хүнтэй баг Пиц Вилан ууланд 2200 метрийн өндөрт цанаар гулгаж байхад цас нурж долоо нь дарагджээ. Нисдэг тэргээр ирсэн аврагчид цасан дороос гурван хүнийг аварч чадсан байна. Энэ өдөр Берн муж дахь уулын амралтад гулгаж байсан хоёр хүн цасанд дарагдаж амиа алджээ. Тэд зөвшөөрөгдөөгүй замаар гулгаж байсан аж.

Сүүлийн гурав хоногт Швейцарьт цасан нурангид амиа алдсан хүний тоо наймд хүрээд байна. Сүүлийн хэд хоногт Альпийн уулсаар 120 см цас унаад байгаа тул тогтвортой цастай уулыг олж ялгахад бэрхтэй болоод байгаа ажээ.

“Агни-5” пуужинг амжилттай туршлаа

Энэтхэгт цөмийн цэнэгт хошуу тээвэрлэх чадалтай “Агни-5” тив хоорондын баллистик пуужинг амжилттай туршлаа хэмээн Hindustan Times сонин уламжлав.

Гурван шатлалтай пуужинг зүүн эргийн Уилер арлаас хөөргөжээ. 2012 оны есдүгээр сараас хойш “Агни-5” пуужинг гурав дахь удаагаа амжилттай хөөргөж буй нь энэ юм. Энэтхэгийн батлан хамгаалах судалгааны хүрээлэнд уг пуужинг боловсруулжээ. “Агни-5” пуужин тн гаруй цөмийн цэнэгт хошууг тээж, 5500 км зайд тусах чадвартай юм.

ОХУ үр тарианы экспортоос татвар авна

ОХУ хоёрдугаар сарын 1-нээс эхлэн үр тарианы экспортоос гаалийн татвар авахаар болж байна. Татварын хэмжээ 15 хувь+7.5 евро байна гэжээ. Гэвч нэг тн үр тарианд 35 еврогоос ихгүй татвар ногдуулах аж. Энэ татвар 2015 оны дунд хүртэл үйлчилнэ. ОХУ-д үр тарианы үнэ огцом өссөн тул дотоодын үр тарианы зах зээл дээр тогтвортой байдлыг хадгалахын тулд дээрх арга хэмжээг авчээ. 2013 оны арваннэгдүгээр сараас хойш Орост талхны үнэ 15-20 хувиар өсөөд байна.

28 жилийн дараа таван сая долларын нөхөн төлбөр авлаа

1986 онд цагдаа нарт алуулсан Николас Гвидогийн ар гэрийнхэн Нью-Йорк хотын захиргаанаас таван сая долларын нөхөн төлбөр авчээ. Гвидо эндүүрлээр мафийн захиалгыг гүйцэтгэсэн авлигач цагдаа нарын суманд өртөн амиа алдсан юм.

1986 оны сүүлчээр цагдаагийн ажилтан Луис Эпполито, Стивен Каракаппа нар нэгэн мафиас Николас Гвидо хэмээх гэмт хэрэгтнийг хороох заавар авчээ. Тэд албаны мэдээллийн санг ашиглан Гвидогийн оршин суугаа газрыг олсон ч энэ нь тэр гэмт хэрэгтэн биш, нэр нэгтэй гэм зэмгүй иргэн байжээ. Цагдаа нар ийнхүү ямар ч гэмгүй иргэнийг буудаж алсан аж.

Цагдаа нар үүнийхээ төлөө мафиас сар бүр дөрвөн мянган доллар авч байв. Тэд

1980-1990 онд гэмт бүлэглэлийн найман увайгүй шаардлагыг гүйцээсэн юм.

Цагдаа нарыг 2005 онд тэтгэвэртээ гарчихсан хойно нь баривчилжээ. Эдүгээ Луис

Эпполито, Стивен Каракаппа нар насаараа шоронд хоригдох ял эдэлж байна.

Хойд Солонгосын эмэгтэйчүүд цэргийн алба хаана

Хойд Солонгост энэ оноос эхлэн 17-20 насны эмэгтэйчүүд цэргийн алба хаах үүрэгтэй болж байна. Улс орныг нөмөрч байгаа хүн ам зүйн ноцтой бэрхшээлийн улмаас эрэгтэй цэрэг, цагдаа ихээр дутагдаж байгааг нөхөхийн тулд ийм шийдвэр гаргасныг “Daily HK” сонин албаны эх сурвалжаас иш татан мэдээлжээ. Өнөөг хүртэл хойд солонгос эмэгтэйчүүд цэргийн албыг сайн дураараа сонгодог байсан. Гэвч 1990-ээд оны аймшигтай өлсгөлөнгийн дараа үүссэн хүн ам зүйн өөрчлөлтийн дараа дээрх арга хэмжээг авахаас аргагүй байдалд орсон бололтой. Дунд сургууль төгссөн эмэгтэйчүүдийг цэргийн албанд татах дуудлага ирж эхэлснийг Хамкун муж дахь эх сурвалж мэдээлэв. Дөрөвдүгээр сард 17-18 насны охидыг цэрэгт татах бол, наймдугаар сараас 20 настай эмэгтэйчүүдийг цэргийн албанд дуудах ажээ. Эрэгтэйчүүдийг мөн ийм хувиараар цэрэгт татдаг аж. Урьдчилсан шалгалт, сорилтууд хийгдэж, цэргийн албаны бүртгэл, таталтыг зохион байгуулах үүр, хороо байгуулагджээ. Цэрэгт татагдаж буй эмэгтэйчүүд өвчин, хуучгүй байх, 1.52 метрээс багагүй нуруутай байх гэсэн наад захын шаардлагыг хангасан байх ёстой. 1994-1998 оны өлсгөлөнгийн үр дагавар өнөөдрийн иймэрхүү шийдвэрээр илэрч байна. Тэр үед хүүхэд, нялхсын эндэгдэл өндөр, төрөлт ихээхэн бууралттай байжээ. Мөн эрэгтэйчүүд гадаад руу зугтах, төрд тэрслэх нь их байсан тул олон зуун эрчүүд хорих лагерьт амьдралаа өнгөрөөх болсон юм.

25 сая хүн амтай Хойд Солонгос нь хоёр сая орчим цэрэгтэй. Цэргийнхээ тоогоор дэлхийд тавд ордог ажээ. Бэлтгэл цэргийн тоо нь 600 мянгад хүрдэг. Хагас цэрэгжсэн иргэд буюу байнгын дайны бэлтгэлтэй иргэдийн тоо 5.8 саяд хүрдэг нь дэлхийд нэгдүгээрт орох үзүүлэлт юм. 

Билл Гейтс: Хиймэл оюун ухаан ирээдүйд заналхийлж байна

Microsoft компанийг үндэслэгч Билл Гейтс хиймэл оюун ухааны технологийн хөгжилд хүн төрөлхтөн санаа зовних ёстой хэмээн үзэж байна. Тэрээр Reddit сайтын хэрэглэгчидтэй онлайн яриа өрнүүлэх үеэрээ “Би супер оюун ухааныг бүтээхийн эсрэг байдаг. Машин, техник бидний өмнөөс зарим ажлыг гүйцэтгэж болох ч супер оюун ухаан гэж байх ёсгүй. Энэ нь бидний удирдан хөтлөх арга хэлбэрээс хамаарна. Хэдэн арван жилийн дараа хиймэл оюун ухаан бидний сэтгэлийг зовоохуйц өндөр түвшинд хөгжих болно” хэмээн Гейтс хэлжээ.

Тэрээр энэ тал дээр Tesla компанийг үндэслэгч Элон Маск, Британийн физикч Стивен Хокингтой санал нэгдэж байна. С.Хокинг “Хиймэл оюун ухааныг хөгжүүлэх нь хүн төрөлхтөнд аюултай. Ойрын үед хүнийг давж гарах машин, техник бий болно гэхээс айдас төрж байна” хэмээн мэдэгдсэн билээ.

Америк эрдэмтэн тагнуулын хэргээр ял сонслоо

Лос-Аламосын үндэсний хүрээлэнд ажиллаж байсан америк эрдэмтэн Педро Мачерони тагнуул хийсэн хэргээр таван жилийн ял сонсчээ. Тэрээр АНУ-ын цөмийн зэвсгийн талаарх мэдээллийг Венесуэлийн Засгийн газрын албаны төлөөлөгчид дамжуулж өгсөн аж. Мачерони тагнуулын хэдэн үйл ажиллагаа явуулсан гэдгээ 2013 оны зун хүлээн зөвшөөрсөн юм. 79 настай Аргентины уугуул тэрээр АНУ-ын суурьшмал иргэн юм. Түүний эхнэр нөхөртэйгээ хамт тагнуул хийсэн хэргээр нэг жилийн ял сонсоод байгаа аж.

Лос-Аламос нь цөмийн судалгаа хийдэг АНУ-ын тэргүүлэх хоёр лабораторийн нэг юм. Энэ хүрээлэнд анхны цөмийн цэнэгт хошууг бүтээж байжээ. Лос-Аламос хүрээлэнд 12 мянга 500 байнгын мэргэжилтэн, гурван мянган гэрээт эрдэмтэн ажилладаг.

“Катар-2022”-ын үеэр архи худалдахыг зөвшөөрнө

Катар улс 2022 оны хөлбөмбөгийн дэлхийн аварга шалгаруулах тэмцээнийг зохион байгуулах үеэрээ архины худалдааг хүлээн зөвшөөрөхөөр болжээ. “Согтууруулах ундаа хэрэглэх нь Катарын соёл биш. Гэвч хөлбөмбөгийн дэлхийн аварга шалгаруулах тэмцээний үеэр тодорхой хэд хэдэн газарт архи, шар айраг худалдах болно” хэмээн зохион байгуулах хорооноос мэдээлэв. Катарт архи хэрэглэх, архи оруулахыг хориглодог аж.

Гуантанамог эргүүлэн өгөхийг АНУ-аас шаардлаа

Куба улс Гуантанамо дахь цэргийн баазыг буцааж өгөхийг АНУ-аас шаардлаа. Энэ нь хоёр улсын харилцааг хэвийн болгох нэг нөхцөл болж байгаа аж. Мөн Кубын лидер Рауль Кастро худалдааны хориг арга хэмжээг цуцалж, Кубыг терроризмийг дэмжигч орнуудын жагсаалтаас хасахыг уриалжээ.

Өнгөрсөн оны арванхоёрдугаар сард Америк, Куба хоёр 1961 оноос хойш тасарсан дипломат харилцаагаа сэргээж буйгааа зарласан билээ. Хэд хоногийн өмнө АНУ-ын Конгрессын төлөөлөгчид Гаванад ирж Элчин сайдын яамаа нээх талаар хэлэлцээ хийсэн юм.

Энэ хооронд Кубын хувьсгалын лидер Фидель Кастрогийн “Эргэцүүлэл” “Гранма” сонинд нийтлэгджээ. Тэрээр хоёр улсын харилцаа дулаарч байгааг дэмжиж байгаа ч АНУ-ын бодлогод итгэхгүй байгаагаа илэрхийлсэн байв.

Багт наадамд зориулж 70 сая бэлгэвч тараана

Бразилийн Засгийн газар хоёр сард болдог алдарт карнавалыг угтаж ДОХ болон бусад өвчний халдвараас сэргийлэхийн тулд 70 сая бэлгэвч үнэгүй тараахаар болжээ. 2014 оны багт наадмын үеэр 68.6 сая бэлгэвч тарааж байсныг Эрүүл мэндийн яамны мэдээлэлд онцолжээ. Бразилд “камисиньяс” буюу “бяцхан цамц” хэмээн нэрлэдэг энэ хэрэглэлийг Рио-де-Жанейро, Салвадор, Ресифе хотын нисэх буудал зэрэг багт наадмын зочин, жуулчдыг хүлээн авдаг газруудад түгээх аж. Сүүлийн таван жилд зөвхөн карнавал гэлгүйгээр өөр олон баяр цэнгээнд зориулж 2.2 тэрбум ширхэг бэлгэвч тараасан хэмээн эрх баригчид мэдэгдэв.

Бразилчуудын 94 хувь нь “бяцхан цамц”-ыг ДОХ-оос хамгаалах шилдэг арга хэмээн мэддэг ч 45 хувь нь тохиолдлын сексийн харилцааны үеэр үүнийг хэрэглэдэггүй болох нь судалгаагаар харагджээ. Тус улсад 100 мянган хүн тутамд ДОХ-ын 20 тохиолдол илэрдэг нь өндөр үзүүлэлт юм. Жилд 39 мянган хүн энэ өвчний халдварыг авдаг ажээ. ДОХ-оор нас барагсад 2013 онд 100 мянган иргэнд 5.7 байжээ.

Норвеги – дэлхийн хамгийн ардчилсан орон

Норвеги улс хоёр жил дараалан дэлхийн хамгийн ардчилсан орноор шалгарч байна. “Economist Intelligence Unit” сэтгүүлийн судалгаагаар, Скандинавын хойгийн энэ орон янз бүрийн зэрэглэлийн тандалтаар хамгийн өндөр оноог авчээ. Сонгуулийн үйл явц, улс төрийн оролцоо, улс төрийн соёл, иргэний эрх чөлөө гэсэн ангилалд тус улс хамгийн дээд буюу 10 оноо авсан байна.

Осло Европын холбоонд байдаггүй. Нефтийн ордоор баян, Европын бусад улсыг бодвол колончлогдож явсан түүх байдаггүй аж. 100 гаруйхан жилийн өмнө  Шведээс салж тусгаар тогтнож байсан Норвеги эхэндээ эдийн засаг, улс төр нь тэгширчихсэн улс байсангүй, харин ч эсрэгээгээ байжээ. Гэсэн хэдий ч нэгэн зууны дараа хойд нутгийнхан хамгийн бага авлигатай, өндөр татварын бодлогоор тэгш бус байдлыг арилгахын төлөө тэмцдэг хүчирхэг улс болон хувирчээ.

Францын эдийн засагч Томас Пикеттигийн “XXI зууны капитал” ном хэвлэгдсэний дараа эдийн засгийн тэгш бус байдлын эсрэг тэмцэл Норвегид томоохон байр суурь эзлэх болов. Ард иргэдээ дэмжихдээ эдийн засаг, нийгмийн арга хэрэгслийг сонгож авсан нь Европын хамгийн бага хүн амын нягтралтай Норвеги орныг тивдээ хамгийн их төрөлттэй орны нэг болгоод байна. Норвеги нь эдийн засгийн хүчирхэг супер гүрэн биш. Цэрэг, зэвсгийн хувьд ч адилхан. Гэвч түүний ардчилсан ололт амжилт нь сайн сайхны төлөө тууштай зүтгэдэг төр улс дээр үндэслэжээ. Норвеги улс ардчилсан манлайллаа хадгалж үлдэхийг хүсвэл цагаачлалын асуудлаа зохицуулж, лал нийгмийн төлөөллийг ардчилсан бүтэц, байгуулалд нэгтгэх, багтаах хэрэгтэй болж байна. Скандинавын энэ оронд өөр тоочоод байх бэрхшээл, зовлон байхгүй. “Норвегид ганцхан бэрхшээл байдаг. Тэгш сайхан амьдралаас уйдах нэг л асуудал байдаг” хэмээн ярьдаг ажээ.

Apple орлогоо зарлав

Apple компани 2014 оны сүүлчийн улиралд 18 тэрбум долларын орлого олж урьд өмнө байгаагүй амжилтад хүрчээ. iPhone-6 гар утас 2014 оны эцсээр дэлхий даяар 74 сая хувиар зарагдсан байна. Тэр тусмаа iPhone-6 Хятадад онцгой их эрэлттэй байжээ. 2013 онтой харьцуулахад Хятадад энэ гар утасны борлуулалт 70 хувиар нэмэгджээ.

43 оюутныг хороосныг тогтоолоо

Мексикийн ерөнхий прокурор Хесус Мурильо 2014 оны есдүгээр сард алга болсон 43 оюутан бүгд алуулсан болохыг баталлаа. “Оюутнуудыг хөнөөж, дараа нь шатаагаад Сан-Хуан гол руу хаясан нь тодорхой боллоо” хэмээн Мурильо мэдэгджээ. Дээрэмчид оюутнуудын цогцсыг тун няхуур устгасан тул таних ямар ч боломжгүй болсон аж. Одоогоор 43 оюутны дөнгөж нэгийнх нь цогцсыг олоод байна. Саяхан баривчлагдсан Фелипе Родригес хэмээх дээрэмчин оюутнуудыг хороосон хэргийг гэрчилж байгаа аж. Нийтдээ энэ хэрэгт 99 хүнийг сэжиглэн баривчлаад байна. Дээрх гэмт хэрэгт оролцсон бүх хүнийг хариуцлагад таттал мөрдөн шалгалтыг үргэлжлүүлнэ гэжээ. 

Михаил Горбачев: Ийм дайн дэгдвэл шууд л цөмийн дайн болж хувирна

Оросын удирдагч асан Михаил Горбачев “Spiegel” сэтгүүлд сонирхолтой ярилцлага өгчээ.

-Михаил Сергеевич, та хүйтэн дайныг төгсгөхөд үнэтэй хувь нэмэр оруулсан. Гэвч өнөөдөр Украины хямралаас болж хүйтэн дайн буцан ирж байна. Үүнийг хараад эмзэглэж л байгаа биз дээ?

-Бүх зүйл эргэж давтагддаг юм шиг. Берлины ханыг босгох цаг үе байсан бол нураах цаг үе гэж байлаа. Энэ хана байхгүй болоход надаас өөр хувь нэмэр оруулсан хүн зөндөө бий. Дорнын улстөрч Вилли Брандт болон Зүүн Европ дахь эсэргүүцлийн хөдөлгөөн чухал үүрэг гүйцэтгэсэн. Өнөөдөр шинэ хана үүсч, хямралын шинэ голомт хүчээ авч байна. Хүйтэн дайны бүх шинж тэмдэг гараад иржээ. Орос, өрнөдийн хоорондох итгэлцэл байхгүй болсон нь гамшиг. Москва өрнөдөд итгэхгүй байна, өрнөд Москвад итгэхгүй байна. Энэ бол аймшигтай.

-Европт том дайн, бүр дэлхийн III дайн гарах магадлалыг үгүйсгэж болохгүй болчихлоо гэж бодож байна уу?

-Энэ тухай бодохын ч хэрэггүй. Ийм дайн дэгдвэл шууд л цөмийн дайн болж хувирна биз. Энэ л дутаж гэнэ. Сөргөлдөгч талуудын мэдэгдлийг харахад муу зүйлийг л ёрлоод байна. Ийм халуухан, эмзэг нөхцөлд хэн нэг нь биеэ барьж дийлэхгүй бол дараагийн жилүүдэд бид амьд гарч чадахгүй байх аа. Би үнэхээр их санаа зовж байна.

-Украины хямрал танд илүү ойр тусдаг байх, тийм үү?

-Би хагас украин хүн. Ээж, хань Раиса минь украин хүн байсан. Би украинаар хэлд орж, дуулж сурч байлаа. Миний өсч торнисон Ставрополийн хязгаар Украины Донецк мужтай нягт харилцаатай байсан. Тэр үед бид нэг нэгэндээ тусалж байлаа. Бид найзууд байлаа, нэг улсад амьдарч байлаа. Бусад олон оросын адилаар миний олон найз, хамаатан Украинд бий.

-Өнөөдөр ОХУ-д үзэл бодлоо илэрхийлэх эрх чөлөө, шударга сонгууль дахиад л дутагдах боллоо...?

-Би одоо хөгширчээ, урт замыг туулж. 19 настай байхдаа Коммунист намд элсч “Сталин бол бидний дайчин суу алдар, Сталин бол манай залуусын жигүүр” гээд л бичдэг байлаа. Өнөөдөр би сталинизмийн эсрэг тэмцэж буй хүмүүсийг дэмжээд сууж байна.

-Путин яагаад Орос дахь ардчиллыг хязгаарлаад байна вэ?

-Путин Кремльд ирэхдээ маш хүнд хэцүү зйүлийг өвлөж авсан. Бүх салбарт эмх замбараагүй байдал ноёрхож байлаа. Эдийн засаг нурж, бүхэл бүтэн муж салахыг хүсч байлаа. Путин энэ үйл явцыг зогсоосон. Тийм ээ, заримдаа тэр авторитар арга хэрэглэхэд хүрсэн. Энэ талаар би дуугарч л байсан. Тухайлбал түүнийг гурав дахь удаагаа сонгогдоход би эсэргүүцэж байсан.

-Путин царцсан эдийн засгийн сэргээж, рублийн уналтыг зогсоож чадах болов уу?

-Түүнд айх юм байхгүй, тэр их алдартай. Путин мэдрэх л юм бол хөдөлж, ажиллаж чадна.

-Та арваннэгдүгээр сард шинэ номоо танилцуулахдаа, Путин өөртөө найдах өвчин туссан тухай ярьж байсан. Путин өөрийгөө бурхны дараахь хоёр дахь хүн гэж боддог болчихов уу?

-Бүр бурхантай адил гэж боддог байж ч болно (инээв). Мэдээж Путин бурхан биш. Асар их хариуцлага хүлээж, эрс шийдэмгий байж, шийдвэр гаргахад бэлэн байна гэдэг өөртөө бат итгэлтэй байгаагийн шинж.

-Таныг шийдэмгий бус, мөнхийн эргэлзэгч гэж байнга л зэмлэж байдаг...?

-Энэ шийдэмгий бус Горбачев олон саадыг давж өөрчлөн байгуулалтыг эхлүүлсэн болж таарах уу? Тэр яаж олон ургальч үзлийг зарлаж, үг хэлэх, шашин шүтэх эрх чөлөөг тунхагласан юм? Энэ шийдэмгий бус улстөрч гэнэт зэвсэглэлээр хөөцөлдөх уралдааныг зогсоож, дунд тусгалын пуужинг бүгдийг, алсын тусгалтайг нь талыг нь устгахаар шийдсэн хэрэг үү? Эдгээр нь зориг, шийдэмгий байдал биш бол өөр юуг хэлэх юм?

-ЗХУ үргэлжлэн оршин тогтносоор байсан бол илүү сайн байх байсан уу?

-Яриангүй. ЗХУ-ыг яаран сандран задалсанд Украины хямралын уг үндэс оршиж байгаа юм.

-Та 1991 оны сүүлчээр Кремлийг орхихоосоо өмнө “Манай хөршүүд Оросын танкнаас айгаад байх хэрэггүй боллоо” гэж хэлж байсан. Өнөөдөр энэ айдас эргэж ирж байна..?

-Харамсалтай нь, түүх юуг бидэнд сургасныг мартчих юм даа.

-Үүнд хэн буруутай вэ?

-Та хоцрогдсон асуулт тавьж байна, эхнэр буруутай юу, хадам ээж буруутай юу? Магадгүй хоёулаа буруутай. Эхлээд тэд хэрэлдэж байгаад дараа нь эвлэрдэг. Хариуцлага аль аль талд бий.

-Украины хямралд хэн илүү хариуцлага хүлээх вэ, Орос уу, өрнөд үү?

-Улс төрийн ийм ноцтой асуудал, аюултай хямралын тухай ярьж байхад математик, ийм тийм хувь гэх нь ямар ч тусгүй. 1990 онд Парист Европын холбооны аюулгүй байдлын хуралдаан дээр дэлхийн шинэ эмх журмыг бий болгох талаар яригдсан. Том Жорж Буш бид хоёр энэ талаар голлон ярьсан ч үр дүн гараагүй. Америк нөгөө л ялан дийлэгч сэтгэхүйгээрээ хандсан. Би энэ байр суурийг нь байнга шүүмжилдэг. Америк ялан дийлж гарах гэсэн ноцтой өвчинд нэрвэгдчихсэн.

-Америкууд хэзээ энэ бодлогоо хэрэгжүүлж эхэлсэн юм бэ?

-Та хариултыг нь мэдэж байгаа биз. ЗХУ задрахад бидэнд сайн сайхныг хүсээгүй хүмүүс матрын нулимс унагаж байсан ч ширээн доогуур гараа үрчиж байсан. Америкууд Оросыг тойрсон бүслэлтээ чангатгаж, дараа нь НАТО-г дорно зүг рүү өргөтгөсөн. НАТО НҮБ-ын зөвшөөрөлгүйгээр Югославын иргэний дайнд хөндлөнгөөс оролцсон. Энэ бол баримт. Энэ бүгд Оросыг хөдлөхөд хүргэсэн. Кремлийн ямар ч удирдагч үүнийг тоолгүй өнгөрөөхгүй байсан.

-Та өнөөдөр жаргалтай байна уу?

-Хэдэн жилийн өмнө “Жаргалтай шинэчлэгч гэж байдаггүй” хэмээн бичиж байлаа. Тэр үеийн сэтгэл, сэтгэгдэлээр л бичиж. Одоо эргээд харвал би жаргалтай хүн. Томоохон төсөл, том улсыг удирдана гэдэг мэдээж гайхамшигтай.

-Чөлөөт цагаараа юу хийж байна даа?

-Раиса бид хоёр өдөр бүр явган алхдаг байсан. Уур, бухимдлаас ангижирахад их тустай байлаа. Одоо хөл минь мууджээ, 84 хүрлээ шүү дээ. Хельмут Коль, эцэг Жорж Буш таяг хэрэглэдэг болсон. Би ч бас удахгүй таяг барих байх (инээв).

Хүч чадал барагдаж байгааг мэдрэх хэцүү байна уу?

-75 хүртлээ бие сайн байсан, бүх дэлхийгээр л нисдэг байлаа. 1999 онд Раиса маань өнгөрөхөд надад хүнд цохилт болсон. Сүүлийн жил хагаст тийм ч сайнгүй байна. Гурван ч удаа хагалгаанд орлоо. Бүгд л хөгшрөлттэй тэмцдэг, гэхдээ юу ч хийж чаддаггүй. Зарим талаар хөгширч, нөгөө талаар бүр залуужсанаа мэдэрч байна.

-Үлдэж буй жилүүдэд юуг чухалчилж байна вэ?

-Амьдрах. Тэсч үлдэх биш шүү. Зүгээр нэг үхлээ хүлээгээд сууж баймааргүй байна. Хоёрдугаар сард Америк явна, тэнд хэд хэдэн хотод лекц уншина. Лекц уншиж, ном гаргах нь миний орлогын ганц эх үүсвэр. Надад дахиад зорилго байна, энэ зорилго намайг хөтөлж, дэмжиж байдаг.

-Ямар зорилго байна?

-Оросын ирээдүй, энхийн үйл явц, хүрээлэн буй орчны талаар маргаан мэтгэлцээнд оролцох. Ном бичиж, лекц уншиж, хуралд оролцож, үе үе ярилцлага өгөх.

-Энэ дэлхийг дахиад сайн тийш нь өөрчлөхийн тулд юу хийх ёстой вэ?

-Ингэх шаардлагагүй. Эхлүүлсэн зүйлээ үргэлжлүүлэх хэрэгтэй.

Аргентины Ерөнхийлөгч тагнуулын газрыг тарааж магадгүй

Аргентины Ерөнхийлөгч Кристина Фернандес Киршнер тагнуулын байгууллагын тарааж, шинэ агентлаг байгуулах бодолтой байна. Тэрээр үндэсний телевизээр мэдэгдэл хийхдээ зохих хуулийн төслийг парламент руу илгээснийг дуулгажээ. Өнөөгийн тагнуулын бүтэц нь цэргийн хунтын дэглэмийн үеээс өөрчлөгдөөгүй тул дээрх шийдвэрийг гаргасан гэжээ.

1994 онд Буэнос-Айрес дахь Еврейн соёлын төвд болсон дэлбэрэлтийн хэргийг судлан шалгаж байсан прокурор Альберто Нисман учир битүүлгээр нас барснаас долоо хоногийн дараа Ерөнхийлөгч энэ мэдэгдлийг хийжээ. А.Нисман энэ хэрэгт сэжигтнээр татах хүмүүсийг Конгрессын хуралдаан дээр зарлахаар зэхэж байсан юм.

Алга болсон оюутнуудыг олохыг шаардав

Мексикийн нийслэл хотод олон мянган хүн оролцсон жагсаал болжээ. Тэд өнгөрсөн оны есдүгээр сард сураггүй алга болсон 43 оюутны хэргийг бүрэн судлан шалгахыг эрх баригчдаас шаардсан байна. Алга болсон оюутнуудын ар гэрийнхэн жагсаалыг толгойлжээ. 2014 оны есдүгээр сард баруун өмнөд хэсгийн Игуала хотод дадлагажигч оюутнууд эсэргүүцлийн жагсаал хийснийхээ дараа сураггүй алга болсон юм. Мөрдөн шалгалтаар, орон нутгийн авлигач түшмэд, цагдаа нар эсэргүүцлийн жагсаал хийсэн оюутнуудыг баривчилж хар тамхины мафид аваачиж өгчээ. Мафийнхан оюутнуудыг хороож газар булсан бололтой.

В.Путин Украины эрх баригчдыг буруутгажээ

ОХУ-ын лидер Владимир Путин Германы канцлер Ангела Меркел, Францын Ерөнхийлөгч Франсуа Олландтай утсаар ярилцахдаа, Украины зүүн өмнөд нутагт нөхцөл байдал хурцадсанд Украины хүчний байгууллагуудын үйлдэлтэй холбоотой хэмээн мэдэгджээ. В.Путин нэгдүгээр сарын 15-нд Украины Ерөнхийлөгч Петр Порошенкод захидал илгээж, Донбасст төвлөрүүлсэн байлдааны хүнд техник, зэвсгээ даруй татахыг шаардсан юм. Харин Киев “ОХУ Донбасс дахь Оросын талыг баримтлагчыг дэмжин өөгшүүлж, зэвсэг нийлүүлж байна” хэмээн мэдэгджээ. А.Меркел Кремлийн лидерт хандаж, босогчдын довтолгоо, дайралтыг зогсоохын тулд нэн нөлөөгөө ашиглахыг хүсчээ.

“Исламын улс” Пакистан, Афганистанд нэвтрэх үү

“Исламын улс” бүлгийн дайчид Афганистан, Пакистаны газар нутаг дээр үйл ажиллагааг нь хариуцах шинэ салбар, үүрийг байгуулах болсноо зарлажээ. Хоёр долоо хоногийн өмнө эдгээр бүс нутгийн арваад жихад дайчин “Исламын улс” бүлгийг дэмжиж буйгаа илэрхийлсэн юм. Сири, Иракт хүчээ аваад байгаа лалын бүлгийнхэн Пакистан, Афганистанд үйл ажиллагаагаа өргөжүүлэхийн тулд аудио, видео бичлэг хийж интернэтээр цацахаар болжээ. Тоймчдын үзэж буйгаар, тэд энэ хоёр улс дахь лалын хоёр гол бүлэг “Аль-Кайда”, “Талибан”-ыг өөрийн талд элсүүлэхийг санаархаж байгаа ажээ.  

Леопольдо Лопес: Намайг шударга бусаар хорьсоор байна гэж байхгүй, дийлэхгүй

Ерөнхийлөгч Николас Мадурогийн дэглэмийг шүүмжилж, эсэргүүцлийн жагсаалыг удирдсаныхаа төлөө шоронд хоригдоод нэг жил болж байгаа Венесуэлийн сөрөг хүчний лидер Леопольдо Лопестэй “АВС” сонин уулзаж ярилцлага авч чаджээ. Тэрээр хамгийн их хамгаалалттай, эрх баригчдын хамгийн заналт улс төрийн хоригдол юм. Л.Лопес маш хатуу чанга дэглэмд хоригддог ч “АВС” сонин бичгээр ярилцлага авч чадсан байна. Засгийн газар түүнийг төрийн эргэлт хийхийг санаархсан хэмээн буруутгаж байна.

-Та шоронд хоригдсоноор сөрөг хүчин дахь таны манлайлалд хэрхэн нөлөөлж байна вэ?

-Энэ улс оронд байгаа шударга бус шүүхийн өмнө очихдоо “Намайг шоронд хийснээр ард түмнийг сэрээх юм бол тэгье, оръё” гэж хэлсэн. Бид ямар төр, ямар дэглэмтэй учирчихаад байгааг олон сая венесуэльчүүд, дэлхий нийт харлаа. Өөрчлөлт хийхэд энэ сэтгэхүй их чухал. Би шоронд орсноор сөрөг хүчин дахь миний байр суурь яасан ч байж болно, тэр хамаагүй. Нэг зүйлийг хэлж чадна, юу гэвэл, би эндээс гарахдаа сэтгэл, оюун, бие бялдрын хувьд ч илүү хүчтэй болох болно. Сэтгэл зүйн хувьд хүчирхэгжиж, өс хорсолгүй гарах болно. Үзэн ядалт, өс хорсол л манай улсыг ийм байдалд аваачаад байна. Өнөөдөр венесуэль иргэдийн 80 хувь нь өөрчлөлт шинэчлэлийг, 60 хувь нь Мадурог огцрохыг хүсч байна.

-Венесуэльчүүд Мадурог огцрохыг шаардаж томоохон жагсаал хийж байсан ч тэр огцорсонгүй, систем өөрчлөгдсөнгүй нэг жил өнгөрлөө..?

-Зөвхөн эсэргүүцлийн замаар системийг өөрчлөх гэж оролдох нь зөв биш. Үндсэн хуулийн, тайван, хүчирхийллийн бус эсэргүүцлийн замаар өөрчлөлт, шинэчлэлд хүрч чадна. Учир нь бид ардчилсан нийгэмд юу ч өгдөггүй дарангуйллын өмнө зогсож байна. Тайван замаар эсэргүүцлээ илэрхийлж, Үндсэн хуулийн механизмийг идэвхжүүлснээр энэ нийгмийг эрүүлжүүлж чадна.

-Энэ дэглэмийг өөрчилснөөр эдийн засгийн хямрал төгсөх үү?

-Ардчилсан, шударга, өрсөлдөөнтэй системийг бий болговол эдийн засаг аяндаа сайжраад эхэлнэ. Эрх баригч дэглэм нь эдийн засгийн хөгжилд саад болдог үзэгдэл зөвхөн Венесуэльд биш, өөр олон газар байна. Венесуэль улс ардчилсан бус дэглэмд байгаа гэдгийг иргэдийн олонх нь ойлгож, мэдрэх боллоо.

-Эдийн засгийн хямрал улс төрийн өөрчлөлт авчирч чадах уу?

-Зөвхөн эдийн засаг, нийгмийн хямрал улс төрийн өөрчлөлт авчирна гэж байхгүй. Ард түмний хүсэл зориг, Үндсэн хуулийн механизм гол үүрэгтэй. Кубын жишээ байна. Тэнд эдийн засаг нь 50 жил муу байж ирсэн ч улс төрийн систем нь улам бэхжсээр ирсэн.

-Олон улсын байгууллагууд, экс Ерөнхийлөгч нар таныг суллахыг шаардсаар байна. Каракасын Засгийн газар таныг чөлөөлөхөд юу дутаад байна вэ?

-Цаг хугацааны л асуудал. Намайг хугацаагүйгээр хорьж байна, эрх чөлөөтэй болно гэдгээ мэдэж байна. Мадуро намайг шударга бусаар хорьсоор байна гэж байхгүй, дийлэхгүй. Дэлхийн хүний эрхийн байгууллагууд зөвхөн намайг бус, Венесуэль дахь улс төрийн хоригдлуудыг суллахыг шаардсан.

-АНУ, Куба харилцаагаа сэргээсэн нь танд ямар санагдаж байна вэ?

-Тивийн ард түмэн нэгдэж нийлэх чухал алхам болсон. Куба улс улам нээгдэж, ардчилсан өөрчлөлт хийх хэрэгтэй. Ард түмэн нь ч үүнийг хүсч байгаа. Нөгөө талаар, Венесуэль улс ардчиллын эсрэг, хүний эрхийн эсрэг үйлдлээрээ дэлхийн нийтээс улам зайгаа барьж, алсалсаар байгаад харамсаж байна.

-Таны эхнэр, гэр бүл их зоригтой хүмүүс. Венесуэлийн ард түмэнд хандаж юу хэлэх вэ?

-Миний гол түшиг тулгуур бол эхнэр Лилиан, хүүхдүүд, эцэг эх минь юм. Хоригдохоосоо өмнө эхнэртээ дурлачихсан байсан бол одоо бүр илүү дурлаад байна. Венесуэльчүүдэд хандаж “Нөхцөл байдал улам хурцдаж, хоол хүнс, эм тариа улам хомс боллоо. Нар, бороонд урт дараалалд зогсдог боллоо. Та бүгдийг эсрэг талаасаа том боломжийг олж харахыг уриалж байна. Бидний зохион байгуулах, нэгдэх, хөдлөх чадвараас өөрчлөлт, шинэчлэлт хамаарна ” гэж хэлэх байна. 

Спортын нүүрэнд

Стивен Жеррард: Хөгжөөн дэмжигчдийн гунигийг би ч мэдэрч байна

26 жил тасралтгүй зүтгэсэн Ливерпүүл клубээ энэ зун орхино хэмээн зарласан Стивен Жеррард “Daily Mail”- д ярилцлага өгчээ.

-Ийм шийдвэр гаргахад юу нөлөөлөв өө?

-Хэд хэдэн зүйл энэ шийдвэрийг гаргахад нөлөөлсөн. Дасгалжуулагч надад тоглолтын хангалттай цаг өгч чадахгүй гэж ил тод хэлсэн л дээ. Энэ их хэцүү яриа болсон ч би хүлээн зөвшөөрч байгаа. Мэдээж би гараанд гарсан ч бай, сэлгээнээс тоглосон ч бай би хүчээ дайчлах болно

-Гэр бүл тань энэ шийдвэрийг хэрхэн хүлээж авсан бэ?

-Гэрийнхэн маань хөлбөмбөг сонирхдоггүй ч тэдэнд энэ тухай дуулгах хүнд байсан. Мэдээж гэр бүлээрээ шинэ газар очиж, шинэ орчинтой танилцах боломж гарч ирж байгаа нь сайн хэрэг.

-Багийн андууддаа шийдвэрээ дуулгахад ямар байсан бэ?

-Тэд бага зэрэг цочирдож хүлээж авсан байх. Би багаас явах шийдвэрээ хурдан дуулгахыг хүссэн. Миний тухай цуу яриа багт муугаар битгий нөлөөлөөсэй гэсэндээ шийдвэрээ ил болгосон.

-Ливерпүүлийн домогт тоглогч гэж яригдахад ямар санагддаг вэ?

-Энэ бол том магтаал. Ингэж нэрлэгдэж байгаа нь надад болон миний гэр бүлд тун таатай. Тэр тусмаа аав болон ахын хувьд. Яагаад гэвэл бид бүгдээрээ Ливерпүүлийн үнэнч фэнүүд. Бид Ливерпүүлийг олон жилийн турш дэмжиж ирсэн, цаашид үүрд дэмжинэ. Би бол энэ дэлхийн хамгийн азтай хүмүүсийн нэг.

-Та Ливерпүүлд хэзээ нэгэн цагт эргэн ирэх үү?

-Би эргэн ирж клубтээ ямар нэг байдлаар туслах болно. Мэдээж ирээдүйд юу ч болсон би Ливерпүүлийн фэн байх болно. Олон жилийн турш клубынхээ нэг хэсэг нь байсан хүний хувьд цаашид ч ийм байхыг хүснэ.

-Та ирэх зун яг ямар багт очих тухайгаа яриагүй. Гэхдээ фэнүүд болон бүгд л үүнийг мэдэхийг хүсч байгаа?

-Би Америк руу явна гэдгээ л хэлж чадна. Гэхдээ яг одоогоор ямар баг гэдгээ хараахан сонгоогүй байна. Ямар ч байсан Ливерпүүлтэй таарч болох лиг рүү, өөрөөр хэлбэл Европын ямар нэг лиг рүү явахгүй.

-Танд Ливерпүүлд зүтгэх чухал таван сар үлдээд байна. Юу болоосой гэж мөрөөдөж байна даа?

-Бидэнд эхний дөрөвт орох боломж одоо ч байгаа. Хэрвээ бид топ дөрөвт орчихвол тааруу эхлэлээ цайруулах болно. Гэхдээ л би цом хүсч байна. Capital One, FA Cup-ийн цомыг авах боломж бидэнд байгаа

-Хөгжөөн дэмжигчдийн хувьд гунигтай байгаа нь мэдээж. Тэдэнд хандаж юу хэлэхсэн бол?

-Тэр гунигийг би ч гэсэн мэдэрч байна. Ахиад бага зэрэг хугацаа үлдлээ. Би тэдний төлөө тоглож, улирлын төгсгөлд Уэмблийн цэнгэлдэхэд цом өргөхөөс өөр зүйл хүсэхгүй байна.

“Боко Харам” 192 эмэгтэйг суллажээ

“Боко Харам” террорист бүлгийнхэн нэгдүгээр сарын 6-нд Нигерийн газар нутгаас хулгайлаад байсан 192 эмэгтэйг чөлөөллөө хэмээн France-Presse агентлаг уламжлав. Олзны эмэгтэйчүүдийг дөрвөн ачааны машинд суулган Гирбува тосгонд авчраад сулласныг эрх баригчид хүлээж авчээ. Босогчид нэгдүгээр сарын 6-нд эмэгтэйчүүд, хүүхэд нийлсэн 216 хүнийг хулгайлан авч явсан юм. Өрнөдийн боловсролыг эсэргүүцэж, шариатын хууль тогтоохыг эрмэлздэг лалын үндсэрхэг “Боко Харам” бүлэг нь арми, цагдаагийн барилга байгууламжийг сонгон довтолдог ч сүүлийн үед энгийн иргэдийг барьцаалан авч явах тактикт шилжээд байгаа юм.

2014 оны дөрөвдүгээр сард тус бүлгийнхэн Чибок хот руу нэвтэрч 276 эмэгтэй сурагчийг хулгайлан авч явжээ. 57 сурагч гэртээ эргэж ирсэн аж. “Боко Харам”-ын лидер Абубакар арваннэгдүгээр сард мэдэгдэл хийхдээ, олзлогдсон 219 эмэгтэй сурагч лалын шашинд орж, нөхөрт гарсан гэсэн юм.

Барьцааны хүнийг цаазалсан бололтой

“Исламын улс” бүлгийнхэн Японы хоёр иргэнийг олзолж, гурав хоногийн дотор 200 сая доллар өгөхгүй бол цаазлана хэмээн сүрдүүлж байсан билээ. Токиогийн Засгийн газар шаардсан мөнгийг нь өгч иргэдээ суллаж авна гэж байсан ч тулган шаардалт дуусахаас өмнө алан хядагчидтай холбоо барьж чадаагүй юм. Үүний дараа “Исламын улс” бүлгийнхэн барьцаанд байсан хоёр японы нэг Харуна Юкаваг цаазалсан гэрэл зургийг нийтэлсэн юм. АНУ-ын Ерөнхийлөгч Барак Обама япон иргэнийг цаазалсан алуурчдыг олоход тусална хэмээн амлажээ.

“Исламын улс” бүлэг барьцаанд байгаа нөгөө иргэнийг (Кенжи Гото) харуулж, шинэ шаардлага тавьж буй бичлэгийг цацжээ. Энэ удаа Иорданы шоронд байгаа Сажид Ришави гэгч этгээдийг суллах талаар тохиролцоо хийхийг Японы Засгийн газраас шаардсан байна.

Сагсчин Родман “Ярилцлага”-ыг шүүмжлэв

Сагсчин Деннис Родман Хойд Солонгосын удирдагч Ким Чен Уны амь насанд халдаж байгаа тухай “Ярилцлага” киног бүтээсэн хүмүүсийг шүүмжилжээ. “Тэд Хойд Солонгосын тухай инээдмийн кино хийж байна. Хүн алах тухай инээдмийн кино хийжээ. Энэ бол инээдтэй зүйл огт биш, огт биш” хэмээн Родман ярьжээ. Тэрээр Хойд Солонгост зочлохдоо “Big Bang in Pyongyang” хэмээх баримтат кино хийсэн бөгөөд энэ киноноос жинхэнэ Хойд Солонгосыг харж болно хэмээн өгүүлэв. Мөн “Ярилцлага” киног хийсэн Sony Pictures компанийг хакердсан хэрэгт Пхеньян буруутай гэдэгт эргэлзэж буйгаа алдарт сагсчин ярилаа.

Фукушимагийн хүүхдүүд илүүдэл жинтэй

Япон хүүхдүүдээс Фукушима мужийн хүүхдүүд илүүдэл жин хамгийн ихтэй байгаа нь судалгаагаар харагдлаа хэмээн Japan Today сонин мэдээлэв. 2011 онд тус муж дахь цөмийн цахилгаан станцад осол гарсан билээ. Фукушимагийн хүүхдүүдийн таргалалтын өндөр түвшин ослын дараа эцэг эхчүүд хүүхдүүдээ гадаа гаргах дургүй болсонтой холбоотой хэмээн Японы Боловсролын яамны мэргэжилтнүүд үзэж байна. Тэндхийн хүүхдүүд бусад бүс нутгийн хүүхдүүдийг болвол гадаа гарч тоглох нь тун бага байдаг ажээ. Япон даяар хүүхдүүдийн илүүдэл жин буурсан байна.

Каракаст эсэргүүцлийн жагсаал боллоо

Венесуэлийн нийслэл Каракас хотод эдийн засгийн хямралтай тэмцэж чадахгүй байгаа Засгийн газраа эсэргүүцсэн жагсаал болж хэдэн мянган хүн оролцжээ. Хоол хүнсний гол нэрийн бүтээгдэхүүн хомсдолтой байгаад эгдүүцсэн хүмүүс хоосон сав суулга барьж жагссан байна. Цагдаа нар хотын төв рүү орох замыг хааж зогссон ч ноцтой мөргөлдөөн гарсангүй. Сөрөг хүчний улстөрч Мария Корина Мачадо “Ерөнхийлөгч Николас Мадуро яг одоо огцрох ёстой. Венесуэлийн ард түмэн дахин нэгдэж нийлэхэд Мадуро саад болж байна” хэмээн мэдэгджээ. 

Олимпийн тоглолтын сүр хүч аравхан жилийн дотор дампуурах гэж үү

2004 оны Афины олимпийн барилга байгууламжаар зочлох нь балгасан дундуур эргэн санагалзах зугаалга хийж буй мэт санагдана. Тэдгээрийг харж хамгаалалгүй орхисны улмаас зэвэрч муудан хаалга, хашлагууд нь нурж, олимпийн усан сан хоосрон хог, новшоор дүүрч, барилга байгууламжуудын хана туурга муудан өнө эртнийх мэт харагдах аж. Ажиллагаатай үлдсэн томоохон байгууламж нь олимпийн цэнгэлдэх болон олимпийн тосгон аж. Софтбол, волейбол зэрэг цомхон спортод зориулсан байгууламжуудыг ашигласаар байгаа ч ганц ч удаа засаж сэлбээгүйн улмаас ерөнхийдөө ихээхэн мууджээ.

Сүүлийн арван жилд Грек улс гялалзан гэрэлтсэн цог жавхлангаас (тэр нь хуурамч байсан) эдийн засгийн харанхуй ангал, хямрал руу унаад байна. Эртний сод эрдэмтэн, мэргэдийн өлгий нутгийнхан шинэ үеийнхээ түүхэнд ингэж доройтож байсангүй. Грек улс 2004 оны зуны XVIII олимпийн тоглолтыг хүлээн авахдаа “Олимп гэртээ буцаж ирлээ” хэмээн тунхаглаж байв. Грекүүд анх Христээс өмнөх 776 онд спортын анхны том баярыг хийж байжээ. Орчин үеийн түүхэнд, 1896 онд хүн төрөлхтний анхны олимпийг зохион байгуулж байв.

2004 оны олимп нь 2001 оны есдүгээр сарын 11 халдлагын дараахь анхны олимп байсан тул аюулгүй байдлын зардал огцом өсч 650 сая еврод хүрчээ. Энэ нь “Сидней-2000”-ын аюулгүй байдлын зардлаас гурав дахин өндөр байсан юм. Ямар ч байсан Грек улсад хөгжил дэвшлээ дэлхий дахинд харуулах агуу том боломж гарч ирсэн билээ. Тэр үед зүүний төвийн үзэлтэй Пасокийн мэдэлд байсан Грекийн Засгийн газар олимпийн бүтээн байгуулалтад 4.64 тэрбум евро төсөвлөсөн юм. Гэвч ажил удааширч, төлөвлөөгүй зардал, хайнга байдал болон авлигын улмаас нийт зардал есөн тэрбум еврод хүрчээ. Шинээр байгуулсан Афины олон улсын нисэх буудал, нийслэл хотын метроны зардал энд ороогүй. Гэвч эдгээр зардал нь хэдэн жилийн дараа 360 тэрбум еврод хүрсэн Грекийн өртэй харьцуулахад өчүүхэн зүйл байсан билээ. Энэ үед л улс орны эдийн засгийн байдал Европт түгшүүрийн анхны харангыг дэлдэж эхэлжээ.

2004 онд Грекийн төсвийн алдагдал ДНБ-ний 6.1 хувьд хүрсэн нь Брюсселээс тогтоосон гурван хувийн босгыг давлаа. Улсын өр ДНБ-ний 110.6 хувьд хүрсэн нь Европын холбоон дотроо “толгой цохьжээ”. Эдүгээ Грекийн өр 177 хувь буюу 428 тэрбум еврод хүрээд байгаа нь эргэн төлөгдөх ямар ч боломжгүй хэмээн эдийн засагчид үзэж байна. Европын байгууллагууд Грекийн төр засгийг “Санхүүгийн ямар ч хариуцлагагүй” хэмээн тодотгох болов. 2005 оноос Грек улс санхүү, эдийн засгийн хяналтаа Европын комисст (Европын холбооны Засгийн газар) шилжүүлэн өгөхөөс өөр аргагүй болж байлаа. Улмаар Европын холбоо Грекийг аврахаар 240 тэрбум евро гаргаж, улс оронд хасалт, таналтын арга хэмжээ авсан ч олигтой үр дүн авчирсангүй. Хямрал улам гүнзгийрсээр улс төрийн системийг нураажээ.

Афины олимп наймдугаар сарын 13-нд нээлтээ хийснээс хойш арав гаруй жил өнгөрөөд байгаа ч бүхэл бүтэн нэг зуун өнгөрсөн мэт санагдах аж. Олимпийн тоглолтыг хүлээн авч сүр хүчээ гайхуулж байсан улс аравхан жилийн дотор дампуурах дээрээ тулаад байна. 

Арын нүүрртт

Пэрис Хилтон 18-тай залууг сонгожээ

“Хилтон” зочид буудлын сүлжээний өв залгамжлагч Пэрис Хилтон (33 настай) арван насаар дүү итали загвар өмсөгч Риверо Виперигээс салсны дараа 18 настай  Жордан Баррет хэмээх австрали залуутай хамт явах болжээ. Пэрис, Жордан нар Миланы моодны шоун дээр хамтдаа ирсэн байна. Тэд үдэшлэгт хамт явж, зоог барьж бал сараа тэмдэглэж буй хос шиг байх болов. Дээдсийн хүрээний хатагтай Пэрис итали загвар өмсөгчтэй хоёр жил үеэрхсэн юм. Тэрээр өөрөөсөө хавьгүй дүү залууст ихээхэн дуртай ажээ.

Конгын ламтан аллагыг зосгоохыг уриалав

Конгын ардчилсан бүгд найрамдах улсын католик сүмийн тэргүүн Лоран Монсенгво эрх баригчдад хандан Ерөнхийлөгч Жозеф Кабилагийн эсрэг тэмцэж байгаа жагсагчдыг алж хөнөөхөө зогсоохыг уриалжээ. Ж.Кабилагийн хоёр дахь буюу сүүлчийн бүрэн эрхийн хугацаа 2016 онд дуусч байгаа бөгөөд тэрээр эрх мэдэлд үлдэхийн тулд янз бүрийн харгис арга хэрэглэж байна. Парламенты гишүүд Жозеф Кабилаг дэмжиж байгааг иргэд эсэргүүцэн жагсчээ. Эрх баригчид бүх нийтийн санал асуулгыг хойшлуулсныг ламтан буруутгаж байна. Киншаса хотод болсон гурван өдрийн эсэргүүцлийн явцад 40 гаруй хүн амиа алдаад байгаа юм. Кабилагийн Засгийн газар гар утас, интернэтийг хааж, гадаадын хамгийн алдартай мэдээллийн хэрэгсэл болох Radio France International-ийн эфирийг хаажээ.

Ханхүү Эндрю шүүхэд дуудагдана

Британийн ханхүү Эндрю насанд хүрээгүй охиныг садар самуунд уруу татсан хэрэгт холбогдоод байгаа билээ. “Насанд хүрээгүй байхад минь албадлагаар секс хийсэн” хэмээн баталж байгаа америк охины өмгөөлөгчид ханхүү Эндрюг шүүхэд мэдүүлэг өгөх ёстой хэмээн үзэж байгаа юм. АНУ-д санхүүч Жеффи Эпстиний хэргийг хэдэн жилийн турш шалгаж байгаа бөгөөд энэ хэрэгт ханхүү Эндрюгийн нэр дурдагддаг аж. Эпстин гэгч нь Жейн Доу хэмээх хүүхнийг насанд хүрээгүй байхад нь ханхүүтэй бэлгийн харилцаанд албадан оруулсан хэмээн шүүхэд гаргасан өргөдөлд дурдсан байна. Британийн ханхүү энэхүү мэдээлэлд ямар нэг тайлбар хийгээгүй байна. Их Британийн хааны ордны төлөөлөгч дээрх буруутгалыг үндэслэлгүй хэмээн мэдэгдсэн юм.

Путиний төлөвлөгөөг эзэрхийлэгч хэмээн нэрлэв

АНУ-ын НҮБ дахь төлөөлөгч Саманта Пауэр Украины зүүн нутаг дахь мөргөлдөөнийг зохицуулах Оросын төлөвлөгөөг “Эзэрхийлэгч төлөвлөгөө” хэмээн нэрлэжээ. Украины төлөөлөгч Юрий Сергеев Москвад хандан салан тусгаарлагчдад зэвсэг нийлүүлэхээ зогсоохыг шаардлаа. Украинд дайчилгаа явагдаж байгаа нь Донбасст Оросын зэвсэг, техник цугларч буйгийн хариу үйлдэл ажээ.

НҮБ-ын Аюулгүйн зөвлөлийн хуралдаан дээр Литва, Их Британи, Францын дипломатчид ОХУ-д хандан Минскийн тохиролцоог мөрдөж, салан тусгаарлагчдаас харилцаагаа таслахыг шаардсан байна. Үүний өмнөхөн АНУ-ын Төрийн нарийн бичгийн дарга Жон Керри “Оросын талыг баримтлагч отрядууд Украины газар нутгийн эзэлсээр байна” хэмээн мэдэгдсэн юм. ОХУ дайн байлдааны ажиллагаанд оролцоогүй гэдгээ дахин мэдэгджээ. Берлинд Герман, Франц, Украин, Оросын Гадаад хэргийн сайд нар уулзаж хэлэлцээ хийж байна.

Дэлхийн хамгийн атаархам гоонь эр

Нефтийн үнэ унасаар байгаа ч Арабын баячууд тансаглалд умбасаар байна. Арабын нэгдсэн эмират улсын хунтайж, тэрбумтан Хамадан бин Мохаммед бин Рашид Аль-Мактум дэлхийн хамгийн атаархам гоонь залууд тооцогдож байна. Эмиратын Ерөнхий сайдын долоон хүүгийн нэг тэрээр 18 тэрбум долларын хөрөнгө өвлөж авсан юм. Аль-Мактум Лондон, Дубайд эдийн засгийн гайхалтай боловсрол эзэмшжээ. Тэрээр сайн үүлдрийн тэмээ үржүүлж, романтик шүлэг бичдэг. Мөн экстрим спорт, өндөрт гарах дуртай. Аль-Мактум Азийн тоглолтын морины уралдаанд оролцож алтан медаль авсан юм. Баян арабуудын адилаар шонхроор ан хийлгэх сонирхолтой.

Хамадан бин Мохаммед бин Рашид Аль-Мактум энэ бүгдийн хажуугаар буяны ажил эрхэлж, хөгжлийн бэрхшээлтэй иргэдийг ивээлдээ авчээ. Түүнд ганцхан “дутагдал” байдаг нь өдийн насандаа (32) гоонь хэвээр яваа ажээ. Эцэг нь хүүгийнхээ ганц бие байдалд сэтгэл дундуур байдгаа илэрхийлсэн ч хунтайж гэрлэх бодолгүй байна.

American Express дөрвөн мянган ажилтнаа цомхотгоно

Олон улсын төлбөрийн American Express компани 2016 онд ажлын байраа дөрвөн мянгаар цомхотгоно хэмээн зарлалаа. Тус компани 2014 оны санхүүгийн тайлангаа нийтэлсний дараа ийм шийдвэр гаргажээ. American Express-ийн хувьцааны үнэ 2.1 хувиар унажээ. Үйлчлүүлэгчдийн зээлийн үлдэгдэл ихсэж, компанийн зардал нэмэгдэж байгаа тул алдагдал хүлээж болсон байна. Компанийн бодлогод үндсээр нь өөрчлөлт хийх шаардлагатайг American Express-ийн удирдлага онцоллоо.

“Лейкерс” хамгийн баян нь

Америкийн Forbes сэтгүүл Үндэсний сагсан бөмбөгийн холбооны багуудыг хөрөнгө орлогоор нь жагсаажээ. Хамгийн баян клубээр 2.6 тэрбум доллараар үнэлэгдэж байгаа “Лос Анжелес Лейкерс” нэрлэгдэв. Сүүлийн нэг жилд тус клубын үнэ цэнэ 93 хувиар нэмэгджээ. Удаах байрт “Ню-Йорк Никс” (2.5 тэрбум доллар), “Чикаго Буллз” (2.1 тэрбум) орлоо. Үнэ цэнэ нь 178 хувиар өссөн “Лос Анжелес Клипперс” 1.6 тэрбум доллараар үнэлэгдэж байна. “Бруклин Нетс” (1.5 тэрбум), “Кливленд Кавальерс” (915 мянга) араас нь жагслаа. Хамгийн бага үнэлгээтэй клуб нь “Милоуки Бакс” (600 мянга) болж байна.