iPhone утас тагнуулын нууц программтай

АНУ-ын Apple компани үйлдвэрлэдэг iPhone гар утсанд алсын удирдлагаар идэвхжүүлдэг нууц программ байдаг хэмээн АНУ-ын Үндэсний аюулгүй байдлын агентлагийн экс ажилтан Эдвард Сноуден ярилаа. Засгийн газрууд iPhone утсан дахь тагнуулын нууц программын тусламжтайгаар хэрэглэгчдийг өөрт нь мэдэгдэлгүйгээр хянаж, тагнаж байдаг хэмээн тэрээр өгүүлж байна. Америкийн тагнуулын албаны нууцыг дэлхий дахинд задруулсан Сноуден хэзээ ч иймэрхүү нууц программтай гар утас хэрэглэж байгаагүй аж. “Эдвард хэзээ ч iPhone хэрэглэж байгаагүй. Тэр энгийн, даруухан утас барьдаг” хэмээн түүний өмгөөлөгч Анатолий Кучерена “РИА Новости”-д ярьжээ.

iPhone утсанд эзнийх нь оролцоогүйгээр идэвхжүүлж, хэрэглэгчийн талаарх мэдээлэл цуглуулдаг тусгай программ байдаг хэмээн баталж байна. Тиймээс Эдвард Сноуден Apple компанийн бүтээгдэхүүнээс эрс татгалздаг аж. Энэ мэдээллийн дараа Apple компани хэрэглэгчдээ хамгаалахын төлөө аюулгүй байдлаа дээшлүүлнэ хэмээн амлажээ. iOS 8 үйлдлийн систем нь хэрэглэгчийн хувийн мэдээллийг гадагш нь алдахгүй байхад зориулагдсан хэмээн мэдэгдэж байна. Сноуден Америкийн тагнуулын нууц системийг илчилсний дараа Apple компани Facebook, Google-тэй нэгдэж мэдээллийн аюулгүй байдлын талаарх хуулинд өөрчлөлт оруулахыг АНУ-ын эрх баригчдаас шаардах болжээ.